| Library / Tipiṭaka / ཏིཔིཊཀ • Tipiṭaka / སཾཡུཏྟནིཀཱཡ (ཊཱིཀཱ) • Saṃyuttanikāya (ṭīkā) |
༡༠. ཨནིཙྩསཉྙཱསུཏྟཝཎྞནཱ
10. Aniccasaññāsuttavaṇṇanā
༡༠༢. བྷཱཝེནྟསྶཱཏི ཝིཔསྶནཱཡ མགྒཾ བྷཱཝེནྟསྶ ཨུཔྤནྣསཉྙཱ། ཏེནཱཧ – ‘‘སབྦཾ ཀཱམརཱགཾ པརིཡཱདིཡཏཱི’’ཏིཨཱདི། སནྟཱནེཏྭཱཏི ཀསནཊྛཱནཾ སབྦསོ ཝིཏནེཏྭཱ པཏྠརིཏྭཱ། ཀིལེསཱཏི ཨུཔཀྐིལེསཔྤབྷེདཱ ཀིལེསཱ། ཨནིཙྩསཉྙཱཉཱཎེནཱཏི ཨནིཙྩསཉྙཱསཧགཏེན ཉཱཎེན།
102.Bhāventassāti vipassanāya maggaṃ bhāventassa uppannasaññā. Tenāha – ‘‘sabbaṃ kāmarāgaṃ pariyādiyatī’’tiādi. Santānetvāti kasanaṭṭhānaṃ sabbaso vitanetvā pattharitvā. Kilesāti upakkilesappabhedā kilesā. Aniccasaññāñāṇenāti aniccasaññāsahagatena ñāṇena.
ལཱཡནནྟི ལཱཡནཾ ཝིཡ ནཡནཾ ཝིཡ ནིཙྪོཊནཾ ཝིཡ ཙ ཨནིཙྩསཉྙཱཉཱཎཾ། ཨིམིནཱ ཨཏྠེནཱཏི ཨིམིནཱ ཡཐཱཝུཏྟེན པཱལི༹ཡཱ ཨཏྠེན, ཨུཔམཱ སཾསནྡེཏབྦཱཏི ཨེཏྠ པབྦཛལཱཡཀོ ཝིཡ ཡོགཱཝཙརོ། ལཱཡནཱདིནཱ ཏསྶ ཏཏྠ ཀཏཀིཙྩཏཱཡ པརིཏུཊྛི ཝིཡ ཨིམསྶ ཀིལེསེ སབྦསོ ཚིནྡིཏྭཱ ཕལསམཱཔཏྟིསུཁེན ཀཱལསྶ ཝཱིཏིནཱམནཱ།
Lāyananti lāyanaṃ viya nayanaṃ viya nicchoṭanaṃ viya ca aniccasaññāñāṇaṃ. Iminā atthenāti iminā yathāvuttena pāḷiyā atthena, upamā saṃsandetabbāti ettha pabbajalāyako viya yogāvacaro. Lāyanādinā tassa tattha katakiccatāya parituṭṭhi viya imassa kilese sabbaso chinditvā phalasamāpattisukhena kālassa vītināmanā.
ཀཱུཊཾ གཙྪནྟཱིཏི པཱརིམནྟེན ཀཱུཊཾ གཙྪནྟི། ཀཱུཊཾ པཝིསནབྷཱཝེནཱཏི ཀཱུཊཙྪིདྡཾ ཨགྒེན པཝིསནཝསེན། སམོསརིཏྭཱཏི ཚིདྡེ ཨནུཔཝིསནཝསེན ཙ ཨཱཧཙྩ ཨཝཊྛཱནེན ཙ སམོསརིཏྭཱ ཋིཏཱ། ཀཱུཊཾ ཝིཡ ཨནིཙྩསཉྙཱ ཨནིཙྩཱནུཔསྶནཱཝསེན ཨཝཊྛཱནསྶ མཱུལབྷཱཝཏོ། གོཔཱནསིཡོ ཝིཡ ཙཏུབྷཱུམཀཀུསལཱ དྷམྨཱ ཨནིཙྩསཉྙཱམཱུལཀཏྟཱ། ཀཱུཊཾ ཨགྒཾ སབྦགོཔཱནསཱིནཾ ཏཐཱཨདྷིཊྛཱནསྶ པདྷཱནཀཱརཎཏྟཱ། ཨནིཙྩསཉྙཱ ཨགྒཱཏི ཨེཏྠཱཔི ཨེསེཝ ནཡོ། ཨནིཙྩསཉྙཱ ལོཀིཡཱཏི ཨིདཾ ཨནིཙྩསཉྙཱནུཔསྶནཾ སནྡྷཱཡ ཝུཏྟཾ། ཨནིཙྩཱནུཔསྶནཱམུཁེན ཨདྷིགཏཨརིཡམགྒེ ཨུཔྤནྣསཉྙཱ ཨནིཙྩསཉྙཱཏི ཝཏྟབྦཏཾ ལབྷཏཱིཏི ‘‘ཨནིཙྩསཉྙཱ, བྷིཀྑཝེ, བྷཱཝིཏཱ བཧུལཱིཀཏཱ སབྦཾ ཀཱམརཱགཾ པརིཡཱདིཡཏཱི’’ཏིཨཱདི ཝུཏྟཾ། ཏཐཱ ཧི དྷམྨསངྒཧེ (དྷ॰ ས॰ ༣༥༧, ༣༦༠) ‘‘ཡསྨིཾ སམཡེ ལོཀུཏྟརཾ སཉྙཾ བྷཱཝེཏཱི’’ཏིཨཱདིནཱ སཉྙཱཔི ཨུདྡྷཊཱ། སབྦཱསུ ཨུཔམཱསཱུཏི མཱུལསནྟཱནཨུཔམཱདཱིསུ པཉྩསུ ཨུཔམཱསུ། པུརིམཱཧཱིཏི ཀསྶཀཔབྦཛལཱཡནཨམྦཔིཎྜིཨུཔམཱཧི ཨནིཙྩསཉྙཱཡ ཀིཙྩཾ ཝུཏྟཾ མཱུལསནྟཱནཀཔདཱལནཔབྦཛལཱཡནཝཎྚཙྪེདནཔདེསེན ཨནིཙྩསཉྙཱཡ པཊིཔཀྑཔཙྪེདནསྶ དསྶིཏཏྟཱ། པཙྪིམཱཧི བལཾ དསྶིཏཾ པཊིཔཀྑཱཏིབྷཱཝསྶ ཛོཏིཏཏྟཱ།
Kūṭaṃ gacchantīti pārimantena kūṭaṃ gacchanti. Kūṭaṃ pavisanabhāvenāti kūṭacchiddaṃ aggena pavisanavasena. Samosaritvāti chidde anupavisanavasena ca āhacca avaṭṭhānena ca samosaritvā ṭhitā. Kūṭaṃ viya aniccasaññā aniccānupassanāvasena avaṭṭhānassa mūlabhāvato. Gopānasiyo viya catubhūmakakusalā dhammā aniccasaññāmūlakattā. Kūṭaṃ aggaṃ sabbagopānasīnaṃ tathāadhiṭṭhānassa padhānakāraṇattā. Aniccasaññā aggāti etthāpi eseva nayo. Aniccasaññā lokiyāti idaṃ aniccasaññānupassanaṃ sandhāya vuttaṃ. Aniccānupassanāmukhena adhigataariyamagge uppannasaññā aniccasaññāti vattabbataṃ labhatīti ‘‘aniccasaññā, bhikkhave, bhāvitā bahulīkatā sabbaṃ kāmarāgaṃ pariyādiyatī’’tiādi vuttaṃ. Tathā hi dhammasaṅgahe (dha. sa. 357, 360) ‘‘yasmiṃ samaye lokuttaraṃ saññaṃ bhāvetī’’tiādinā saññāpi uddhaṭā. Sabbāsu upamāsūti mūlasantānaupamādīsu pañcasu upamāsu. Purimāhīti kassakapabbajalāyanaambapiṇḍiupamāhi aniccasaññāya kiccaṃ vuttaṃ mūlasantānakapadālanapabbajalāyanavaṇṭacchedanapadesena aniccasaññāya paṭipakkhapacchedanassa dassitattā. Pacchimāhi balaṃ dassitaṃ paṭipakkhātibhāvassa jotitattā.
ཨནིཙྩསཉྙཱསུཏྟཝཎྞནཱ ནིཊྛིཏཱ།
Aniccasaññāsuttavaṇṇanā niṭṭhitā.
པུཔྥཝགྒཝཎྞནཱ ནིཊྛིཏཱ།
Pupphavaggavaṇṇanā niṭṭhitā.
མཛ྄ཛྷིམཔཎྞཱསཀོ སམཏྟོ།
Majjhimapaṇṇāsako samatto.
Related texts:
ཏིཔིཊཀ (མཱུལ) • Tipiṭaka (Mūla) / སུཏྟཔིཊཀ • Suttapiṭaka / སཾཡུཏྟནིཀཱཡ • Saṃyuttanikāya / ༡༠. ཨནིཙྩསཉྙཱསུཏྟཾ • 10. Aniccasaññāsuttaṃ
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / སཾཡུཏྟནིཀཱཡ (ཨཊྛཀཐཱ) • Saṃyuttanikāya (aṭṭhakathā) / ༡༠. ཨནིཙྩསཉྙཱསུཏྟཝཎྞནཱ • 10. Aniccasaññāsuttavaṇṇanā
