| Library / Tipiṭaka / တိပိဋက • Tipiṭaka / သံယုတ္တနိကာယ • Saṃyuttanikāya |
၄. အနိစ္စသုတ္တံ
4. Aniccasuttaṃ
၆၆. သာဝတ္ထိနိဒာနံ ။ အထ ခော အညတရော ဘိက္ခု။ပေ.။ ဧကမန္တံ နိသိန္နော ခော သော ဘိက္ခု ဘဂဝန္တံ ဧတဒဝောစ – ‘‘သာဓု မေ, ဘန္တေ, ဘဂဝာ သံခိတ္တေန ဓမ္မံ ဒေသေတု။ပေ.။ အာတာပီ ပဟိတတ္တော ဝိဟရေယ္ယ’’န္တိ။ ‘‘ယံ ခော, ဘိက္ခု, အနိစ္စံ; တတ္ရ တေ ဆန္ဒော ပဟာတဗ္ဗော’’တိ။ ‘‘အညာတံ ဘဂဝာ; အညာတံ သုဂတာ’’တိ။
66. Sāvatthinidānaṃ . Atha kho aññataro bhikkhu…pe… ekamantaṃ nisinno kho so bhikkhu bhagavantaṃ etadavoca – ‘‘sādhu me, bhante, bhagavā saṃkhittena dhammaṃ desetu…pe… ātāpī pahitatto vihareyya’’nti. ‘‘Yaṃ kho, bhikkhu, aniccaṃ; tatra te chando pahātabbo’’ti. ‘‘Aññātaṃ bhagavā; aññātaṃ sugatā’’ti.
‘‘ယထာ ကထံ ပန တ္ဝံ, ဘိက္ခု, မယာ သံခိတ္တေန ဘာသိတသ္သ ဝိတ္ထာရေန အတ္ထံ အာဇာနာသီ’’တိ? ‘‘ရူပံ ခော, ဘန္တေ, အနိစ္စံ; တတ္ရ မေ ဆန္ဒော ပဟာတဗ္ဗော။ ဝေဒနာ။ သညာ။ သင္ခာရာ။ ဝိညာဏံ အနိစ္စံ; တတ္ရ မေ ဆန္ဒော ပဟာတဗ္ဗော။ ဣမသ္သ ခ္ဝာဟံ, ဘန္တေ, ဘဂဝတာ သံခိတ္တေန ဘာသိတသ္သ ဧဝံ ဝိတ္ထာရေန အတ္ထံ အာဇာနာမီ’’တိ။
‘‘Yathā kathaṃ pana tvaṃ, bhikkhu, mayā saṃkhittena bhāsitassa vitthārena atthaṃ ājānāsī’’ti? ‘‘Rūpaṃ kho, bhante, aniccaṃ; tatra me chando pahātabbo. Vedanā… saññā… saṅkhārā… viññāṇaṃ aniccaṃ; tatra me chando pahātabbo. Imassa khvāhaṃ, bhante, bhagavatā saṃkhittena bhāsitassa evaṃ vitthārena atthaṃ ājānāmī’’ti.
‘‘သာဓု သာဓု, ဘိက္ခု! သာဓု ခော တ္ဝံ, ဘိက္ခု, မယာ သံခိတ္တေန ဘာသိတသ္သ ဝိတ္ထာရေန အတ္ထံ အာဇာနာသိ။ ရူပံ ခော, ဘိက္ခု, အနိစ္စံ; တတ္ရ တေ ဆန္ဒော ပဟာတဗ္ဗော။ ဝေဒနာ အနိစ္စာ။ သညာ။ သင္ခာရာ။ ဝိညာဏံ အနိစ္စံ; တတ္ရ ခော တေ ဆန္ဒော ပဟာတဗ္ဗော။ ဣမသ္သ ခော, ဘိက္ခု, မယာ သံခိတ္တေန ဘာသိတသ္သ ဧဝံ ဝိတ္ထာရေန အတ္ထော ဒဋ္ဌဗ္ဗော’’တိ။ပေ.။ အညတရော စ ပန သော ဘိက္ခု အရဟတံ အဟောသီတိ။ စတုတ္ထံ။
‘‘Sādhu sādhu, bhikkhu! Sādhu kho tvaṃ, bhikkhu, mayā saṃkhittena bhāsitassa vitthārena atthaṃ ājānāsi. Rūpaṃ kho, bhikkhu, aniccaṃ; tatra te chando pahātabbo. Vedanā aniccā… saññā… saṅkhārā… viññāṇaṃ aniccaṃ; tatra kho te chando pahātabbo. Imassa kho, bhikkhu, mayā saṃkhittena bhāsitassa evaṃ vitthārena attho daṭṭhabbo’’ti…pe… aññataro ca pana so bhikkhu arahataṃ ahosīti. Catutthaṃ.
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၄-၅. အနိစ္စသုတ္တာဒိဝဏ္ဏနာ • 4-5. Aniccasuttādivaṇṇanā
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / သံယုတ္တနိကာယ (ဋီကာ) • Saṃyuttanikāya (ṭīkā) / ၂-၆. မညမာနသုတ္တာဒိဝဏ္ဏနာ • 2-6. Maññamānasuttādivaṇṇanā
