| Library / Tipiṭaka / திபிடக • Tipiṭaka / பஞ்சபகரண-அட்ட²கதா² • Pañcapakaraṇa-aṭṭhakathā |
10. அனிச்சதாகதா²வண்ணனா
10. Aniccatākathāvaṇṇanā
628. இதா³னி அனிச்சதாகதா² நாம ஹோதி. தத்த² ‘‘அனிச்சானங் ரூபாதீ³னங் அனிச்சதாபி ரூபாத³யோ விய பரினிப்ப²ன்னா’’தி யேஸங் லத்³தி⁴, ஸெய்யதா²பி அந்த⁴கானங்; தே ஸந்தா⁴ய புச்சா² ஸகவாதி³ஸ்ஸ, படிஞ்ஞா இதரஸ்ஸ. அத² நங் ‘‘யதி³ தே ரூபாத³யோ விய அனிச்சதா பரினிப்ப²ன்னா, தஸ்ஸாபி அஞ்ஞாய பரினிப்ப²ன்னாய அனிச்சதாய ப⁴விதப்³ப³’’ந்தி சோதே³துங் தாய அனிச்சதாயாதிஆதி³மாஹ. இதரோ த்³வின்னங் அனிச்சதாய ஏகதோ அபா⁴வேன படிக்கி²பித்வா புன யஸ்மா ஸா அனிச்சதா நிச்சா ந ஹோதி, தேனேவ அனிச்சேன ஸத்³தி⁴ங் அந்தரதா⁴யதி, தஸ்மா படிஜானாதி. அத²ஸ்ஸ ஸகவாதீ³ லேஸோகாஸங் அத³த்வா யா தேன து³தியா அனிச்சதா படிஞ்ஞாதா , தாயபி ததோ பராயபீதி பரம்பரவஸேன அனுபச்சே²த³தோ³ஸங் ஆரோபெந்தோ தாய தாயேவாதிஆதி³மாஹ. ஜரா பரினிப்ப²ன்னாதிஆதி³ யஸ்மா உப்பன்னஸ்ஸ ஜராமரணதோ அஞ்ஞா அனிச்சதா நாம நத்தி², தஸ்மா அனிச்சதாவிபா⁴கா³னுயுஞ்ஜனவஸேன வுத்தங். தத்ராபி பரவாதி³னோ புரிமனயேனேவ படிஞ்ஞா ச படிக்கே²போ ச வேதி³தப்³போ³.
628. Idāni aniccatākathā nāma hoti. Tattha ‘‘aniccānaṃ rūpādīnaṃ aniccatāpi rūpādayo viya parinipphannā’’ti yesaṃ laddhi, seyyathāpi andhakānaṃ; te sandhāya pucchā sakavādissa, paṭiññā itarassa. Atha naṃ ‘‘yadi te rūpādayo viya aniccatā parinipphannā, tassāpi aññāya parinipphannāya aniccatāya bhavitabba’’nti codetuṃ tāya aniccatāyātiādimāha. Itaro dvinnaṃ aniccatāya ekato abhāvena paṭikkhipitvā puna yasmā sā aniccatā niccā na hoti, teneva aniccena saddhiṃ antaradhāyati, tasmā paṭijānāti. Athassa sakavādī lesokāsaṃ adatvā yā tena dutiyā aniccatā paṭiññātā , tāyapi tato parāyapīti paramparavasena anupacchedadosaṃ āropento tāya tāyevātiādimāha. Jarā parinipphannātiādi yasmā uppannassa jarāmaraṇato aññā aniccatā nāma natthi, tasmā aniccatāvibhāgānuyuñjanavasena vuttaṃ. Tatrāpi paravādino purimanayeneva paṭiññā ca paṭikkhepo ca veditabbo.
629. ரூபங் பரினிப்ப²ன்னந்திஆதி³ யேஸங் ஸா அனிச்சதா, தேஹி ஸத்³தி⁴ங் ஸங்ஸந்த³னத்த²ங் வுத்தங். தத்த² ‘‘யதா² பரினிப்ப²ன்னானங் ரூபாதீ³னங் அனிச்சதாஜராமரணானி அத்தி², ஏவங் பரினிப்ப²ன்னானங் அனிச்சதாதீ³னங் தானி நத்தீ²’’தி மஞ்ஞமானோ ஏகந்தேன படிக்கி²பதியேவாதி.
629. Rūpaṃ parinipphannantiādi yesaṃ sā aniccatā, tehi saddhiṃ saṃsandanatthaṃ vuttaṃ. Tattha ‘‘yathā parinipphannānaṃ rūpādīnaṃ aniccatājarāmaraṇāni atthi, evaṃ parinipphannānaṃ aniccatādīnaṃ tāni natthī’’ti maññamāno ekantena paṭikkhipatiyevāti.
அனிச்சதாகதா²வண்ணனா.
Aniccatākathāvaṇṇanā.
ஏகாத³ஸமோ வக்³கோ³.
Ekādasamo vaggo.
Related texts:
திபிடக (மூல) • Tipiṭaka (Mūla) / அபி⁴த⁴ம்மபிடக • Abhidhammapiṭaka / கதா²வத்து²பாளி • Kathāvatthupāḷi / (115) 10. அனிச்சதாகதா² • (115) 10. Aniccatākathā
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / பஞ்சபகரண-மூலடீகா • Pañcapakaraṇa-mūlaṭīkā / 10. அனிச்சதாகதா²வண்ணனா • 10. Aniccatākathāvaṇṇanā
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / பஞ்சபகரண-அனுடீகா • Pañcapakaraṇa-anuṭīkā / 10. அனிச்சதாகதா²வண்ணனா • 10. Aniccatākathāvaṇṇanā
