| Library / Tipiṭaka / তিপিটক • Tipiṭaka / পঞ্চপকরণ-অট্ঠকথা • Pañcapakaraṇa-aṭṭhakathā |
১০. অনিচ্চতাকথাৰণ্ণনা
10. Aniccatākathāvaṇṇanā
৬২৮. ইদানি অনিচ্চতাকথা নাম হোতি। তত্থ ‘‘অনিচ্চানং রূপাদীনং অনিচ্চতাপি রূপাদযো ৰিয পরিনিপ্ফন্না’’তি যেসং লদ্ধি, সেয্যথাপি অন্ধকানং; তে সন্ধায পুচ্ছা সকৰাদিস্স, পটিঞ্ঞা ইতরস্স। অথ নং ‘‘যদি তে রূপাদযো ৰিয অনিচ্চতা পরিনিপ্ফন্না, তস্সাপি অঞ্ঞায পরিনিপ্ফন্নায অনিচ্চতায ভৰিতব্ব’’ন্তি চোদেতুং তায অনিচ্চতাযাতিআদিমাহ। ইতরো দ্ৰিন্নং অনিচ্চতায একতো অভাৰেন পটিক্খিপিত্ৰা পুন যস্মা সা অনিচ্চতা নিচ্চা ন হোতি, তেনেৰ অনিচ্চেন সদ্ধিং অন্তরধাযতি, তস্মা পটিজানাতি। অথস্স সকৰাদী লেসোকাসং অদত্ৰা যা তেন দুতিযা অনিচ্চতা পটিঞ্ঞাতা , তাযপি ততো পরাযপীতি পরম্পরৰসেন অনুপচ্ছেদদোসং আরোপেন্তো তায তাযেৰাতিআদিমাহ। জরা পরিনিপ্ফন্নাতিআদি যস্মা উপ্পন্নস্স জরামরণতো অঞ্ঞা অনিচ্চতা নাম নত্থি, তস্মা অনিচ্চতাৰিভাগানুযুঞ্জনৰসেন ৰুত্তং। তত্রাপি পরৰাদিনো পুরিমনযেনেৰ পটিঞ্ঞা চ পটিক্খেপো চ ৰেদিতব্বো।
628. Idāni aniccatākathā nāma hoti. Tattha ‘‘aniccānaṃ rūpādīnaṃ aniccatāpi rūpādayo viya parinipphannā’’ti yesaṃ laddhi, seyyathāpi andhakānaṃ; te sandhāya pucchā sakavādissa, paṭiññā itarassa. Atha naṃ ‘‘yadi te rūpādayo viya aniccatā parinipphannā, tassāpi aññāya parinipphannāya aniccatāya bhavitabba’’nti codetuṃ tāya aniccatāyātiādimāha. Itaro dvinnaṃ aniccatāya ekato abhāvena paṭikkhipitvā puna yasmā sā aniccatā niccā na hoti, teneva aniccena saddhiṃ antaradhāyati, tasmā paṭijānāti. Athassa sakavādī lesokāsaṃ adatvā yā tena dutiyā aniccatā paṭiññātā , tāyapi tato parāyapīti paramparavasena anupacchedadosaṃ āropento tāya tāyevātiādimāha. Jarā parinipphannātiādi yasmā uppannassa jarāmaraṇato aññā aniccatā nāma natthi, tasmā aniccatāvibhāgānuyuñjanavasena vuttaṃ. Tatrāpi paravādino purimanayeneva paṭiññā ca paṭikkhepo ca veditabbo.
৬২৯. রূপং পরিনিপ্ফন্নন্তিআদি যেসং সা অনিচ্চতা, তেহি সদ্ধিং সংসন্দনত্থং ৰুত্তং। তত্থ ‘‘যথা পরিনিপ্ফন্নানং রূপাদীনং অনিচ্চতাজরামরণানি অত্থি, এৰং পরিনিপ্ফন্নানং অনিচ্চতাদীনং তানি নত্থী’’তি মঞ্ঞমানো একন্তেন পটিক্খিপতিযেৰাতি।
629. Rūpaṃ parinipphannantiādi yesaṃ sā aniccatā, tehi saddhiṃ saṃsandanatthaṃ vuttaṃ. Tattha ‘‘yathā parinipphannānaṃ rūpādīnaṃ aniccatājarāmaraṇāni atthi, evaṃ parinipphannānaṃ aniccatādīnaṃ tāni natthī’’ti maññamāno ekantena paṭikkhipatiyevāti.
অনিচ্চতাকথাৰণ্ণনা।
Aniccatākathāvaṇṇanā.
একাদসমো ৰগ্গো।
Ekādasamo vaggo.
Related texts:
তিপিটক (মূল) • Tipiṭaka (Mūla) / অভিধম্মপিটক • Abhidhammapiṭaka / কথাৰত্থুপাল়ি • Kathāvatthupāḷi / (১১৫) ১০. অনিচ্চতাকথা • (115) 10. Aniccatākathā
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / পঞ্চপকরণ-মূলটীকা • Pañcapakaraṇa-mūlaṭīkā / ১০. অনিচ্চতাকথাৰণ্ণনা • 10. Aniccatākathāvaṇṇanā
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / পঞ্চপকরণ-অনুটীকা • Pañcapakaraṇa-anuṭīkā / ১০. অনিচ্চতাকথাৰণ্ণনা • 10. Aniccatākathāvaṇṇanā
