| Library / Tipiṭaka / ತಿಪಿಟಕ • Tipiṭaka / ಪಞ್ಚಪಕರಣ-ಅಟ್ಠಕಥಾ • Pañcapakaraṇa-aṭṭhakathā |
೧೦. ಅನಿಚ್ಚತಾಕಥಾವಣ್ಣನಾ
10. Aniccatākathāvaṇṇanā
೬೨೮. ಇದಾನಿ ಅನಿಚ್ಚತಾಕಥಾ ನಾಮ ಹೋತಿ। ತತ್ಥ ‘‘ಅನಿಚ್ಚಾನಂ ರೂಪಾದೀನಂ ಅನಿಚ್ಚತಾಪಿ ರೂಪಾದಯೋ ವಿಯ ಪರಿನಿಪ್ಫನ್ನಾ’’ತಿ ಯೇಸಂ ಲದ್ಧಿ, ಸೇಯ್ಯಥಾಪಿ ಅನ್ಧಕಾನಂ; ತೇ ಸನ್ಧಾಯ ಪುಚ್ಛಾ ಸಕವಾದಿಸ್ಸ, ಪಟಿಞ್ಞಾ ಇತರಸ್ಸ। ಅಥ ನಂ ‘‘ಯದಿ ತೇ ರೂಪಾದಯೋ ವಿಯ ಅನಿಚ್ಚತಾ ಪರಿನಿಪ್ಫನ್ನಾ, ತಸ್ಸಾಪಿ ಅಞ್ಞಾಯ ಪರಿನಿಪ್ಫನ್ನಾಯ ಅನಿಚ್ಚತಾಯ ಭವಿತಬ್ಬ’’ನ್ತಿ ಚೋದೇತುಂ ತಾಯ ಅನಿಚ್ಚತಾಯಾತಿಆದಿಮಾಹ। ಇತರೋ ದ್ವಿನ್ನಂ ಅನಿಚ್ಚತಾಯ ಏಕತೋ ಅಭಾವೇನ ಪಟಿಕ್ಖಿಪಿತ್ವಾ ಪುನ ಯಸ್ಮಾ ಸಾ ಅನಿಚ್ಚತಾ ನಿಚ್ಚಾ ನ ಹೋತಿ, ತೇನೇವ ಅನಿಚ್ಚೇನ ಸದ್ಧಿಂ ಅನ್ತರಧಾಯತಿ, ತಸ್ಮಾ ಪಟಿಜಾನಾತಿ। ಅಥಸ್ಸ ಸಕವಾದೀ ಲೇಸೋಕಾಸಂ ಅದತ್ವಾ ಯಾ ತೇನ ದುತಿಯಾ ಅನಿಚ್ಚತಾ ಪಟಿಞ್ಞಾತಾ , ತಾಯಪಿ ತತೋ ಪರಾಯಪೀತಿ ಪರಮ್ಪರವಸೇನ ಅನುಪಚ್ಛೇದದೋಸಂ ಆರೋಪೇನ್ತೋ ತಾಯ ತಾಯೇವಾತಿಆದಿಮಾಹ। ಜರಾ ಪರಿನಿಪ್ಫನ್ನಾತಿಆದಿ ಯಸ್ಮಾ ಉಪ್ಪನ್ನಸ್ಸ ಜರಾಮರಣತೋ ಅಞ್ಞಾ ಅನಿಚ್ಚತಾ ನಾಮ ನತ್ಥಿ, ತಸ್ಮಾ ಅನಿಚ್ಚತಾವಿಭಾಗಾನುಯುಞ್ಜನವಸೇನ ವುತ್ತಂ। ತತ್ರಾಪಿ ಪರವಾದಿನೋ ಪುರಿಮನಯೇನೇವ ಪಟಿಞ್ಞಾ ಚ ಪಟಿಕ್ಖೇಪೋ ಚ ವೇದಿತಬ್ಬೋ।
628. Idāni aniccatākathā nāma hoti. Tattha ‘‘aniccānaṃ rūpādīnaṃ aniccatāpi rūpādayo viya parinipphannā’’ti yesaṃ laddhi, seyyathāpi andhakānaṃ; te sandhāya pucchā sakavādissa, paṭiññā itarassa. Atha naṃ ‘‘yadi te rūpādayo viya aniccatā parinipphannā, tassāpi aññāya parinipphannāya aniccatāya bhavitabba’’nti codetuṃ tāya aniccatāyātiādimāha. Itaro dvinnaṃ aniccatāya ekato abhāvena paṭikkhipitvā puna yasmā sā aniccatā niccā na hoti, teneva aniccena saddhiṃ antaradhāyati, tasmā paṭijānāti. Athassa sakavādī lesokāsaṃ adatvā yā tena dutiyā aniccatā paṭiññātā , tāyapi tato parāyapīti paramparavasena anupacchedadosaṃ āropento tāya tāyevātiādimāha. Jarā parinipphannātiādi yasmā uppannassa jarāmaraṇato aññā aniccatā nāma natthi, tasmā aniccatāvibhāgānuyuñjanavasena vuttaṃ. Tatrāpi paravādino purimanayeneva paṭiññā ca paṭikkhepo ca veditabbo.
೬೨೯. ರೂಪಂ ಪರಿನಿಪ್ಫನ್ನನ್ತಿಆದಿ ಯೇಸಂ ಸಾ ಅನಿಚ್ಚತಾ, ತೇಹಿ ಸದ್ಧಿಂ ಸಂಸನ್ದನತ್ಥಂ ವುತ್ತಂ। ತತ್ಥ ‘‘ಯಥಾ ಪರಿನಿಪ್ಫನ್ನಾನಂ ರೂಪಾದೀನಂ ಅನಿಚ್ಚತಾಜರಾಮರಣಾನಿ ಅತ್ಥಿ, ಏವಂ ಪರಿನಿಪ್ಫನ್ನಾನಂ ಅನಿಚ್ಚತಾದೀನಂ ತಾನಿ ನತ್ಥೀ’’ತಿ ಮಞ್ಞಮಾನೋ ಏಕನ್ತೇನ ಪಟಿಕ್ಖಿಪತಿಯೇವಾತಿ।
629. Rūpaṃ parinipphannantiādi yesaṃ sā aniccatā, tehi saddhiṃ saṃsandanatthaṃ vuttaṃ. Tattha ‘‘yathā parinipphannānaṃ rūpādīnaṃ aniccatājarāmaraṇāni atthi, evaṃ parinipphannānaṃ aniccatādīnaṃ tāni natthī’’ti maññamāno ekantena paṭikkhipatiyevāti.
ಅನಿಚ್ಚತಾಕಥಾವಣ್ಣನಾ।
Aniccatākathāvaṇṇanā.
ಏಕಾದಸಮೋ ವಗ್ಗೋ।
Ekādasamo vaggo.
Related texts:
ತಿಪಿಟಕ (ಮೂಲ) • Tipiṭaka (Mūla) / ಅಭಿಧಮ್ಮಪಿಟಕ • Abhidhammapiṭaka / ಕಥಾವತ್ಥುಪಾಳಿ • Kathāvatthupāḷi / (೧೧೫) ೧೦. ಅನಿಚ್ಚತಾಕಥಾ • (115) 10. Aniccatākathā
ಟೀಕಾ • Tīkā / ಅಭಿಧಮ್ಮಪಿಟಕ (ಟೀಕಾ) • Abhidhammapiṭaka (ṭīkā) / ಪಞ್ಚಪಕರಣ-ಮೂಲಟೀಕಾ • Pañcapakaraṇa-mūlaṭīkā / ೧೦. ಅನಿಚ್ಚತಾಕಥಾವಣ್ಣನಾ • 10. Aniccatākathāvaṇṇanā
ಟೀಕಾ • Tīkā / ಅಭಿಧಮ್ಮಪಿಟಕ (ಟೀಕಾ) • Abhidhammapiṭaka (ṭīkā) / ಪಞ್ಚಪಕರಣ-ಅನುಟೀಕಾ • Pañcapakaraṇa-anuṭīkā / ೧೦. ಅನಿಚ್ಚತಾಕಥಾವಣ್ಣನಾ • 10. Aniccatākathāvaṇṇanā
