| Library / Tipiṭaka / තිපිටක • Tipiṭaka / පඤ්‌චපකරණ-අට්‌ඨකථා • Pañcapakaraṇa-aṭṭhakathā |
10. අනිච්‌චතාකථාවණ්‌ණනා
10. Aniccatākathāvaṇṇanā
628. ඉදානි අනිච්‌චතාකථා නාම හොති. තත්‌ථ ‘‘අනිච්‌චානං රූපාදීනං අනිච්‌චතාපි රූපාදයො විය පරිනිප්‌ඵන්‌නා’’ති යෙසං ලද්‌ධි, සෙය්‍යථාපි අන්‌ධකානං; තෙ සන්‌ධාය පුච්‌ඡා සකවාදිස්‌ස, පටිඤ්‌ඤා ඉතරස්‌ස. අථ නං ‘‘යදි තෙ රූපාදයො විය අනිච්‌චතා පරිනිප්‌ඵන්‌නා, තස්‌සාපි අඤ්‌ඤාය පරිනිප්‌ඵන්‌නාය අනිච්‌චතාය භවිතබ්‌බ’’න්‌ති චොදෙතුං තාය අනිච්‌චතායාතිආදිමාහ. ඉතරො ද්‌වින්‌නං අනිච්‌චතාය එකතො අභාවෙන පටික්‌ඛිපිත්‌වා පුන යස්‌මා සා අනිච්‌චතා නිච්‌චා න හොති, තෙනෙව අනිච්‌චෙන සද්‌ධිං අන්‌තරධායති, තස්‌මා පටිජානාති. අථස්‌ස සකවාදී ලෙසොකාසං අදත්‌වා යා තෙන දුතියා අනිච්‌චතා පටිඤ්‌ඤාතා , තායපි තතො පරායපීති පරම්‌පරවසෙන අනුපච්‌ඡෙදදොසං ආරොපෙන්‌තො තාය තායෙවාතිආදිමාහ. ජරා පරිනිප්‌ඵන්‌නාතිආදි යස්‌මා උප්‌පන්‌නස්‌ස ජරාමරණතො අඤ්‌ඤා අනිච්‌චතා නාම නත්‌ථි, තස්‌මා අනිච්‌චතාවිභාගානුයුඤ්‌ජනවසෙන වුත්‌තං. තත්‍රාපි පරවාදිනො පුරිමනයෙනෙව පටිඤ්‌ඤා ච පටික්‌ඛෙපො ච වෙදිතබ්‌බො.
628. Idāni aniccatākathā nāma hoti. Tattha ‘‘aniccānaṃ rūpādīnaṃ aniccatāpi rūpādayo viya parinipphannā’’ti yesaṃ laddhi, seyyathāpi andhakānaṃ; te sandhāya pucchā sakavādissa, paṭiññā itarassa. Atha naṃ ‘‘yadi te rūpādayo viya aniccatā parinipphannā, tassāpi aññāya parinipphannāya aniccatāya bhavitabba’’nti codetuṃ tāya aniccatāyātiādimāha. Itaro dvinnaṃ aniccatāya ekato abhāvena paṭikkhipitvā puna yasmā sā aniccatā niccā na hoti, teneva aniccena saddhiṃ antaradhāyati, tasmā paṭijānāti. Athassa sakavādī lesokāsaṃ adatvā yā tena dutiyā aniccatā paṭiññātā , tāyapi tato parāyapīti paramparavasena anupacchedadosaṃ āropento tāya tāyevātiādimāha. Jarā parinipphannātiādi yasmā uppannassa jarāmaraṇato aññā aniccatā nāma natthi, tasmā aniccatāvibhāgānuyuñjanavasena vuttaṃ. Tatrāpi paravādino purimanayeneva paṭiññā ca paṭikkhepo ca veditabbo.
629. රූපං පරිනිප්‌ඵන්‌නන්‌තිආදි යෙසං සා අනිච්‌චතා, තෙහි සද්‌ධිං සංසන්‌දනත්‌ථං වුත්‌තං. තත්‌ථ ‘‘යථා පරිනිප්‌ඵන්‌නානං රූපාදීනං අනිච්‌චතාජරාමරණානි අත්‌ථි, එවං පරිනිප්‌ඵන්‌නානං අනිච්‌චතාදීනං තානි නත්‌ථී’’ති මඤ්‌ඤමානො එකන්‌තෙන පටික්‌ඛිපතියෙවාති.
629. Rūpaṃ parinipphannantiādi yesaṃ sā aniccatā, tehi saddhiṃ saṃsandanatthaṃ vuttaṃ. Tattha ‘‘yathā parinipphannānaṃ rūpādīnaṃ aniccatājarāmaraṇāni atthi, evaṃ parinipphannānaṃ aniccatādīnaṃ tāni natthī’’ti maññamāno ekantena paṭikkhipatiyevāti.
අනිච්‌චතාකථාවණ්‌ණනා.
Aniccatākathāvaṇṇanā.
එකාදසමො වග්‌ගො.
Ekādasamo vaggo.
Related texts:
තිපිටක (මූල) • Tipiṭaka (Mūla) / අභිධම්‌මපිටක • Abhidhammapiṭaka / කථාවත්‌ථුපාළි • Kathāvatthupāḷi / (115) 10. අනිච්‌චතාකථා • (115) 10. Aniccatākathā
ටීකා • Tīkā / අභිධම්‌මපිටක (ටීකා) • Abhidhammapiṭaka (ṭīkā) / පඤ්‌චපකරණ-මූලටීකා • Pañcapakaraṇa-mūlaṭīkā / 10. අනිච්‌චතාකථාවණ්‌ණනා • 10. Aniccatākathāvaṇṇanā
ටීකා • Tīkā / අභිධම්‌මපිටක (ටීකා) • Abhidhammapiṭaka (ṭīkā) / පඤ්‌චපකරණ-අනුටීකා • Pañcapakaraṇa-anuṭīkā / 10. අනිච්‌චතාකථාවණ්‌ණනා • 10. Aniccatākathāvaṇṇanā
