| Library / Tipiṭaka / ཏིཔིཊཀ • Tipiṭaka / པཉྩཔཀརཎ-ཨཊྛཀཐཱ • Pañcapakaraṇa-aṭṭhakathā |
༡༠. ཨནིཙྩཏཱཀཐཱཝཎྞནཱ
10. Aniccatākathāvaṇṇanā
༦༢༨. ཨིདཱནི ཨནིཙྩཏཱཀཐཱ ནཱམ ཧོཏི། ཏཏྠ ‘‘ཨནིཙྩཱནཾ རཱུཔཱདཱིནཾ ཨནིཙྩཏཱཔི རཱུཔཱདཡོ ཝིཡ པརིནིཔྥནྣཱ’’ཏི ཡེསཾ ལདྡྷི, སེཡྻཐཱཔི ཨནྡྷཀཱནཾ; ཏེ སནྡྷཱཡ པུཙྪཱ སཀཝཱདིསྶ, པཊིཉྙཱ ཨིཏརསྶ། ཨཐ ནཾ ‘‘ཡདི ཏེ རཱུཔཱདཡོ ཝིཡ ཨནིཙྩཏཱ པརིནིཔྥནྣཱ, ཏསྶཱཔི ཨཉྙཱཡ པརིནིཔྥནྣཱཡ ཨནིཙྩཏཱཡ བྷཝིཏབྦ’’ནྟི ཙོདེཏུཾ ཏཱཡ ཨནིཙྩཏཱཡཱཏིཨཱདིམཱཧ། ཨིཏརོ དྭིནྣཾ ཨནིཙྩཏཱཡ ཨེཀཏོ ཨབྷཱཝེན པཊིཀྑིཔིཏྭཱ པུན ཡསྨཱ སཱ ཨནིཙྩཏཱ ནིཙྩཱ ན ཧོཏི, ཏེནེཝ ཨནིཙྩེན སདྡྷིཾ ཨནྟརདྷཱཡཏི, ཏསྨཱ པཊིཛཱནཱཏི། ཨཐསྶ སཀཝཱདཱི ལེསོཀཱསཾ ཨདཏྭཱ ཡཱ ཏེན དུཏིཡཱ ཨནིཙྩཏཱ པཊིཉྙཱཏཱ , ཏཱཡཔི ཏཏོ པརཱཡཔཱིཏི པརམྤརཝསེན ཨནུཔཙྪེདདོསཾ ཨཱརོཔེནྟོ ཏཱཡ ཏཱཡེཝཱཏིཨཱདིམཱཧ། ཛརཱ པརིནིཔྥནྣཱཏིཨཱདི ཡསྨཱ ཨུཔྤནྣསྶ ཛརཱམརཎཏོ ཨཉྙཱ ཨནིཙྩཏཱ ནཱམ ནཏྠི, ཏསྨཱ ཨནིཙྩཏཱཝིབྷཱགཱནུཡུཉྫནཝསེན ཝུཏྟཾ། ཏཏྲཱཔི པརཝཱདིནོ པུརིམནཡེནེཝ པཊིཉྙཱ ཙ པཊིཀྑེཔོ ཙ ཝེདིཏབྦོ།
628. Idāni aniccatākathā nāma hoti. Tattha ‘‘aniccānaṃ rūpādīnaṃ aniccatāpi rūpādayo viya parinipphannā’’ti yesaṃ laddhi, seyyathāpi andhakānaṃ; te sandhāya pucchā sakavādissa, paṭiññā itarassa. Atha naṃ ‘‘yadi te rūpādayo viya aniccatā parinipphannā, tassāpi aññāya parinipphannāya aniccatāya bhavitabba’’nti codetuṃ tāya aniccatāyātiādimāha. Itaro dvinnaṃ aniccatāya ekato abhāvena paṭikkhipitvā puna yasmā sā aniccatā niccā na hoti, teneva aniccena saddhiṃ antaradhāyati, tasmā paṭijānāti. Athassa sakavādī lesokāsaṃ adatvā yā tena dutiyā aniccatā paṭiññātā , tāyapi tato parāyapīti paramparavasena anupacchedadosaṃ āropento tāya tāyevātiādimāha. Jarā parinipphannātiādi yasmā uppannassa jarāmaraṇato aññā aniccatā nāma natthi, tasmā aniccatāvibhāgānuyuñjanavasena vuttaṃ. Tatrāpi paravādino purimanayeneva paṭiññā ca paṭikkhepo ca veditabbo.
༦༢༩. རཱུཔཾ པརིནིཔྥནྣནྟིཨཱདི ཡེསཾ སཱ ཨནིཙྩཏཱ, ཏེཧི སདྡྷིཾ སཾསནྡནཏྠཾ ཝུཏྟཾ། ཏཏྠ ‘‘ཡཐཱ པརིནིཔྥནྣཱནཾ རཱུཔཱདཱིནཾ ཨནིཙྩཏཱཛརཱམརཎཱནི ཨཏྠི, ཨེཝཾ པརིནིཔྥནྣཱནཾ ཨནིཙྩཏཱདཱིནཾ ཏཱནི ནཏྠཱི’’ཏི མཉྙམཱནོ ཨེཀནྟེན པཊིཀྑིཔཏིཡེཝཱཏི།
629. Rūpaṃ parinipphannantiādi yesaṃ sā aniccatā, tehi saddhiṃ saṃsandanatthaṃ vuttaṃ. Tattha ‘‘yathā parinipphannānaṃ rūpādīnaṃ aniccatājarāmaraṇāni atthi, evaṃ parinipphannānaṃ aniccatādīnaṃ tāni natthī’’ti maññamāno ekantena paṭikkhipatiyevāti.
ཨནིཙྩཏཱཀཐཱཝཎྞནཱ།
Aniccatākathāvaṇṇanā.
ཨེཀཱདསམོ ཝགྒོ།
Ekādasamo vaggo.
Related texts:
ཏིཔིཊཀ (མཱུལ) • Tipiṭaka (Mūla) / ཨབྷིདྷམྨཔིཊཀ • Abhidhammapiṭaka / ཀཐཱཝཏྠུཔཱལི༹ • Kathāvatthupāḷi / (༡༡༥) ༡༠. ཨནིཙྩཏཱཀཐཱ • (115) 10. Aniccatākathā
ཊཱིཀཱ • Tīkā / ཨབྷིདྷམྨཔིཊཀ (ཊཱིཀཱ) • Abhidhammapiṭaka (ṭīkā) / པཉྩཔཀརཎ-མཱུལཊཱིཀཱ • Pañcapakaraṇa-mūlaṭīkā / ༡༠. ཨནིཙྩཏཱཀཐཱཝཎྞནཱ • 10. Aniccatākathāvaṇṇanā
ཊཱིཀཱ • Tīkā / ཨབྷིདྷམྨཔིཊཀ (ཊཱིཀཱ) • Abhidhammapiṭaka (ṭīkā) / པཉྩཔཀརཎ-ཨནུཊཱིཀཱ • Pañcapakaraṇa-anuṭīkā / ༡༠. ཨནིཙྩཏཱཀཐཱཝཎྞནཱ • 10. Aniccatākathāvaṇṇanā
