| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
9. அனிமித்தபஞ்ஹாஸுத்தங்
9. Animittapañhāsuttaṃ
340. ‘‘‘அனிமித்தோ சேதோஸமாதி⁴, அனிமித்தோ சேதோஸமாதீ⁴’தி வுச்சதி. கதமோ நு கோ² அனிமித்தோ சேதோஸமாதீ⁴தி? தஸ்ஸ மய்ஹங், ஆவுஸோ, ஏதத³ஹோஸி – ‘இத⁴ பி⁴க்கு² ஸப்³ப³னிமித்தானங் அமனஸிகாரா அனிமித்தங் சேதோஸமாதி⁴ங் உபஸம்பஜ்ஜ விஹரதி. அயங் வுச்சதி அனிமித்தோ சேதோஸமாதீ⁴’தி. ஸோ க்²வாஹங், ஆவுஸோ, ஸப்³ப³னிமித்தானங் அமனஸிகாரா அனிமித்தங் சேதோஸமாதி⁴ங் உபஸம்பஜ்ஜ விஹராமி. தஸ்ஸ மய்ஹங், ஆவுஸோ, இமினா விஹாரேன விஹரதோ நிமித்தானுஸாரி விஞ்ஞாணங் ஹோதி.
340. ‘‘‘Animitto cetosamādhi, animitto cetosamādhī’ti vuccati. Katamo nu kho animitto cetosamādhīti? Tassa mayhaṃ, āvuso, etadahosi – ‘idha bhikkhu sabbanimittānaṃ amanasikārā animittaṃ cetosamādhiṃ upasampajja viharati. Ayaṃ vuccati animitto cetosamādhī’ti. So khvāhaṃ, āvuso, sabbanimittānaṃ amanasikārā animittaṃ cetosamādhiṃ upasampajja viharāmi. Tassa mayhaṃ, āvuso, iminā vihārena viharato nimittānusāri viññāṇaṃ hoti.
‘‘அத² கோ² மங், ஆவுஸோ, ப⁴க³வா இத்³தி⁴யா உபஸங்கமித்வா ஏதத³வோச – ‘மொக்³க³ல்லான, மொக்³க³ல்லான! மா, ப்³ராஹ்மண, அனிமித்தங் சேதோஸமாதி⁴ங் பமாதோ³, அனிமித்தே சேதோஸமாதி⁴ஸ்மிங் சித்தங் ஸண்ட²பேஹி, அனிமித்தே சேதோஸமாதி⁴ஸ்மிங் சித்தங் ஏகோதி³ங் கரோஹி, அனிமித்தே சேதோஸமாதி⁴ஸ்மிங் சித்தங் ஸமாத³ஹா’தி. ஸோ க்²வாஹங், ஆவுஸோ, அபரேன ஸமயேன ஸப்³ப³னிமித்தானங் அமனஸிகாரா அனிமித்தங் சேதோஸமாதி⁴ங் உபஸம்பஜ்ஜ விஹாஸிங். யஞ்ஹி தங், ஆவுஸோ, ஸம்மா வத³மானோ வதெ³ய்ய – ‘ஸத்தா²ரானுக்³க³ஹிதோ ஸாவகோ மஹாபி⁴ஞ்ஞதங் பத்தோ’தி, மமங் தங் ஸம்மா வத³மானோ வதெ³ய்ய – ‘ஸத்தா²ரானுக்³க³ஹிதோ ஸாவகோ மஹாபி⁴ஞ்ஞதங் பத்தோ’’’தி. நவமங்.
‘‘Atha kho maṃ, āvuso, bhagavā iddhiyā upasaṅkamitvā etadavoca – ‘moggallāna, moggallāna! Mā, brāhmaṇa, animittaṃ cetosamādhiṃ pamādo, animitte cetosamādhismiṃ cittaṃ saṇṭhapehi, animitte cetosamādhismiṃ cittaṃ ekodiṃ karohi, animitte cetosamādhismiṃ cittaṃ samādahā’ti. So khvāhaṃ, āvuso, aparena samayena sabbanimittānaṃ amanasikārā animittaṃ cetosamādhiṃ upasampajja vihāsiṃ. Yañhi taṃ, āvuso, sammā vadamāno vadeyya – ‘satthārānuggahito sāvako mahābhiññataṃ patto’ti, mamaṃ taṃ sammā vadamāno vadeyya – ‘satthārānuggahito sāvako mahābhiññataṃ patto’’’ti. Navamaṃ.
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 9. அனிமித்தபஞ்ஹாஸுத்தவண்ணனா • 9. Animittapañhāsuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 9. அனிமித்தபஞ்ஹஸுத்தவண்ணனா • 9. Animittapañhasuttavaṇṇanā
