| Library / Tipiṭaka / තිපිටක • Tipiṭaka / සංයුත්‌තනිකාය • Saṃyuttanikāya |
9. අනිමිත්‌තපඤ්‌හාසුත්‌තං
9. Animittapañhāsuttaṃ
340. ‘‘‘අනිමිත්‌තො චෙතොසමාධි, අනිමිත්‌තො චෙතොසමාධී’ති වුච්‌චති. කතමො නු ඛො අනිමිත්‌තො චෙතොසමාධීති? තස්‌ස මය්‌හං, ආවුසො, එතදහොසි – ‘ඉධ භික්‌ඛු සබ්‌බනිමිත්‌තානං අමනසිකාරා අනිමිත්‌තං චෙතොසමාධිං උපසම්‌පජ්‌ජ විහරති. අයං වුච්‌චති අනිමිත්‌තො චෙතොසමාධී’ති. සො ඛ්‌වාහං, ආවුසො, සබ්‌බනිමිත්‌තානං අමනසිකාරා අනිමිත්‌තං චෙතොසමාධිං උපසම්‌පජ්‌ජ විහරාමි. තස්‌ස මය්‌හං, ආවුසො, ඉමිනා විහාරෙන විහරතො නිමිත්‌තානුසාරි විඤ්‌ඤාණං හොති.
340. ‘‘‘Animitto cetosamādhi, animitto cetosamādhī’ti vuccati. Katamo nu kho animitto cetosamādhīti? Tassa mayhaṃ, āvuso, etadahosi – ‘idha bhikkhu sabbanimittānaṃ amanasikārā animittaṃ cetosamādhiṃ upasampajja viharati. Ayaṃ vuccati animitto cetosamādhī’ti. So khvāhaṃ, āvuso, sabbanimittānaṃ amanasikārā animittaṃ cetosamādhiṃ upasampajja viharāmi. Tassa mayhaṃ, āvuso, iminā vihārena viharato nimittānusāri viññāṇaṃ hoti.
‘‘අථ ඛො මං, ආවුසො, භගවා ඉද්‌ධියා උපසඞ්‌කමිත්‌වා එතදවොච – ‘මොග්‌ගල්‌ලාන, මොග්‌ගල්‌ලාන! මා, බ්‍රාහ්‌මණ, අනිමිත්‌තං චෙතොසමාධිං පමාදො, අනිමිත්‌තෙ චෙතොසමාධිස්‌මිං චිත්‌තං සණ්‌ඨපෙහි, අනිමිත්‌තෙ චෙතොසමාධිස්‌මිං චිත්‌තං එකොදිං කරොහි, අනිමිත්‌තෙ චෙතොසමාධිස්‌මිං චිත්‌තං සමාදහා’ති. සො ඛ්‌වාහං, ආවුසො, අපරෙන සමයෙන සබ්‌බනිමිත්‌තානං අමනසිකාරා අනිමිත්‌තං චෙතොසමාධිං උපසම්‌පජ්‌ජ විහාසිං. යඤ්‌හි තං, ආවුසො, සම්‌මා වදමානො වදෙය්‍ය – ‘සත්‌ථාරානුග්‌ගහිතො සාවකො මහාභිඤ්‌ඤතං පත්‌තො’ති, මමං තං සම්‌මා වදමානො වදෙය්‍ය – ‘සත්‌ථාරානුග්‌ගහිතො සාවකො මහාභිඤ්‌ඤතං පත්‌තො’’’ති. නවමං.
‘‘Atha kho maṃ, āvuso, bhagavā iddhiyā upasaṅkamitvā etadavoca – ‘moggallāna, moggallāna! Mā, brāhmaṇa, animittaṃ cetosamādhiṃ pamādo, animitte cetosamādhismiṃ cittaṃ saṇṭhapehi, animitte cetosamādhismiṃ cittaṃ ekodiṃ karohi, animitte cetosamādhismiṃ cittaṃ samādahā’ti. So khvāhaṃ, āvuso, aparena samayena sabbanimittānaṃ amanasikārā animittaṃ cetosamādhiṃ upasampajja vihāsiṃ. Yañhi taṃ, āvuso, sammā vadamāno vadeyya – ‘satthārānuggahito sāvako mahābhiññataṃ patto’ti, mamaṃ taṃ sammā vadamāno vadeyya – ‘satthārānuggahito sāvako mahābhiññataṃ patto’’’ti. Navamaṃ.
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 9. අනිමිත්‌තපඤ්‌හාසුත්‌තවණ්‌ණනා • 9. Animittapañhāsuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 9. අනිමිත්‌තපඤ්‌හසුත්‌තවණ්‌ණනා • 9. Animittapañhasuttavaṇṇanā
