| Library / Tipiṭaka / তিপিটক • Tipiṭaka / সংযুত্তনিকায (টীকা) • Saṃyuttanikāya (ṭīkā) |
৯. অনিমিত্তপঞ্হসুত্তৰণ্ণনা
9. Animittapañhasuttavaṇṇanā
৩৪০. ৰিপস্সনাসমাধিংযেৰ, ন ফলসমাধিং। ছেজ্জকিচ্চং ন নিপ্ফজ্জতি অৰিচ্ছেদৰসেন অপ্পৰত্তনতো। নিকন্তীতি ৰিপস্সনং অস্সাদেন্তী পৰত্ততণ্হা। সাধেতুং নাসক্খি উপক্কিলিট্ঠত্তা। নিমিত্তানুসারীতি নিচ্চসুখঅত্তনিমিত্তানং অপূরণতো রাগদোসমোহনিমিত্তানিপেত্থ নিমিত্তানেৰ। ৰুট্ঠান…পে॰… সমাধিন্তি এতেন যাৰ মগ্গো নাধিগতো, তাৰ ৰুট্ঠানগামিনিৰিপস্সনমনুযুঞ্জন্তোপি যথারহং অনিমিত্তং অপ্পণিহিতং সুঞ্ঞতং চেতোসমাধিং অনুযুত্তো ৰিহরতীতি ৰত্তব্বতং অরহতীতি দস্সেতি। ৰিপস্সনাসম্পযুত্তন্তি ৰিপস্সনাসঙ্খাতঞাণসম্পযুত্তং। চেতোসমাধিন্তি চিত্তসীসেন ৰিপস্সনাসমাধিমাহ। উপরিমগ্গফলসমাধিন্তি পঠমমগ্গসমাধিস্স পগেৰ অধিগতত্তা।
340.Vipassanāsamādhiṃyeva, na phalasamādhiṃ. Chejjakiccaṃ na nipphajjati avicchedavasena appavattanato. Nikantīti vipassanaṃ assādentī pavattataṇhā. Sādhetuṃ nāsakkhi upakkiliṭṭhattā. Nimittānusārīti niccasukhaattanimittānaṃ apūraṇato rāgadosamohanimittānipettha nimittāneva. Vuṭṭhāna…pe… samādhinti etena yāva maggo nādhigato, tāva vuṭṭhānagāminivipassanamanuyuñjantopi yathārahaṃ animittaṃ appaṇihitaṃ suññataṃ cetosamādhiṃ anuyutto viharatīti vattabbataṃ arahatīti dasseti. Vipassanāsampayuttanti vipassanāsaṅkhātañāṇasampayuttaṃ. Cetosamādhinti cittasīsena vipassanāsamādhimāha. Uparimaggaphalasamādhinti paṭhamamaggasamādhissa pageva adhigatattā.
অনিমিত্তপঞ্হসুত্তৰণ্ণনা নিট্ঠিতা।
Animittapañhasuttavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / সংযুত্তনিকায • Saṃyuttanikāya / ৯. অনিমিত্তপঞ্হাসুত্তং • 9. Animittapañhāsuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ৯. অনিমিত্তপঞ্হাসুত্তৰণ্ণনা • 9. Animittapañhāsuttavaṇṇanā
