| Library / Tipiṭaka / திபிடக • Tipiṭaka / கதா²வத்து²பாளி • Kathāvatthupāḷi |
9. நவமவக்³கோ³
9. Navamavaggo
(84) 1. ஆனிஸங்ஸத³ஸ்ஸாவீகதா²
(84) 1. Ānisaṃsadassāvīkathā
547. ஆனிஸங்ஸத³ஸ்ஸாவிஸ்ஸ ஸங்யோஜனானங் பஹானந்தி? ஆமந்தா. நனு ஸங்கா²ரே அனிச்சதோ மனஸிகரோதோ ஸங்யோஜனா பஹீயந்தீதி? ஆமந்தா. ஹஞ்சி ஸங்கா²ரே அனிச்சதோ மனஸிகரோதோ ஸங்யோஜனா பஹீயந்தி, நோ ச வத ரே வத்தப்³பே³ – ‘‘ஆனிஸங்ஸத³ஸ்ஸாவிஸ்ஸ ஸங்யோஜனானங் பஹான’’ந்தி.
547. Ānisaṃsadassāvissa saṃyojanānaṃ pahānanti? Āmantā. Nanu saṅkhāre aniccato manasikaroto saṃyojanā pahīyantīti? Āmantā. Hañci saṅkhāre aniccato manasikaroto saṃyojanā pahīyanti, no ca vata re vattabbe – ‘‘ānisaṃsadassāvissa saṃyojanānaṃ pahāna’’nti.
நனு ஸங்கா²ரே து³க்க²தோ…பே॰… ரோக³தோ… க³ண்ட³தோ… ஸல்லதோ… அக⁴தோ… ஆபா³த⁴தோ… பரதோ… பலோகதோ… ஈதிதோ… உபத்³த³வதோ… ப⁴யதோ… உபஸக்³க³தோ… சலதோ… பப⁴ங்கு³தோ… அத்³து⁴வதோ… அதாணதோ… அலேணதோ… அஸரணதோ… அஸரணீபூ⁴ததோ… ரித்ததோ… துச்ச²தோ… ஸுஞ்ஞதோ… அனத்ததோ… ஆதீ³னவதோ…பே॰… விபரிணாமத⁴ம்மதோ மனஸிகரோதோ ஸங்யோஜனா பஹீயந்தீதி? ஆமந்தா. ஹஞ்சி ஸங்கா²ரே விபரிணாமத⁴ம்மதோ மனஸிகரோதோ ஸங்யோஜனா பஹீயந்தி, நோ ச வத ரே வத்தப்³பே³ – ‘‘ஆனிஸங்ஸத³ஸ்ஸாவிஸ்ஸ ஸங்யோஜனானங் பஹான’’ந்தி.
Nanu saṅkhāre dukkhato…pe… rogato… gaṇḍato… sallato… aghato… ābādhato… parato… palokato… ītito… upaddavato… bhayato… upasaggato… calato… pabhaṅguto… addhuvato… atāṇato… aleṇato… asaraṇato… asaraṇībhūtato… rittato… tucchato… suññato… anattato… ādīnavato…pe… vipariṇāmadhammato manasikaroto saṃyojanā pahīyantīti? Āmantā. Hañci saṅkhāre vipariṇāmadhammato manasikaroto saṃyojanā pahīyanti, no ca vata re vattabbe – ‘‘ānisaṃsadassāvissa saṃyojanānaṃ pahāna’’nti.
ஸங்கா²ரே ச அனிச்சதோ மனஸி கரோதி நிப்³பா³னே ச ஆனிஸங்ஸத³ஸ்ஸாவீ ஹோதீதி? ந ஹேவங் வத்தப்³பே³…பே॰… ஸங்கா²ரே ச அனிச்சதோ மனஸி கரோதி நிப்³பா³னே ச ஆனிஸங்ஸத³ஸ்ஸாவீ ஹோதீதி? ஆமந்தா. த்³வின்னங் ப²ஸ்ஸானங்…பே॰… த்³வின்னங் சித்தானங் ஸமோதா⁴னங் ஹோதீதி? ந ஹேவங் வத்தப்³பே³…பே॰… ஸங்கா²ரே ச து³க்க²தோ…பே॰… விபரிணாமத⁴ம்மதோ மனஸி கரோதி நிப்³பா³னே ச ஆனிஸங்ஸத³ஸ்ஸாவீ ஹோதீதி? ந ஹேவங் வத்தப்³பே³…பே॰… ஸங்கா²ரே ச விபரிணாமத⁴ம்மதோ மனஸி கரோதி நிப்³பா³னே ச ஆனிஸங்ஸத³ஸ்ஸாவீ ஹோதீதி? ஆமந்தா . த்³வின்னங் ப²ஸ்ஸானங்…பே॰… த்³வின்னங் சித்தானங் ஸமோதா⁴னங் ஹோதீதி? ந ஹேவங் வத்தப்³பே³…பே॰….
Saṅkhāre ca aniccato manasi karoti nibbāne ca ānisaṃsadassāvī hotīti? Na hevaṃ vattabbe…pe… saṅkhāre ca aniccato manasi karoti nibbāne ca ānisaṃsadassāvī hotīti? Āmantā. Dvinnaṃ phassānaṃ…pe… dvinnaṃ cittānaṃ samodhānaṃ hotīti? Na hevaṃ vattabbe…pe… saṅkhāre ca dukkhato…pe… vipariṇāmadhammato manasi karoti nibbāne ca ānisaṃsadassāvī hotīti? Na hevaṃ vattabbe…pe… saṅkhāre ca vipariṇāmadhammato manasi karoti nibbāne ca ānisaṃsadassāvī hotīti? Āmantā . Dvinnaṃ phassānaṃ…pe… dvinnaṃ cittānaṃ samodhānaṃ hotīti? Na hevaṃ vattabbe…pe….
548. ந வத்தப்³ப³ங் – ‘‘ஆனிஸங்ஸத³ஸ்ஸாவிஸ்ஸ ஸங்யோஜனானங் பஹான’’ந்தி? ஆமந்தா. நனு வுத்தங் ப⁴க³வதா – ‘‘இத⁴, பி⁴க்க²வே, பி⁴க்கு² நிப்³பா³னே ஸுகா²னுபஸ்ஸீ விஹரதி ஸுக²ஸஞ்ஞீ ஸுக²படிஸங்வேதீ³, ஸததங் ஸமிதங் அப்³போ³கிண்ணங் சேதஸா அதி⁴முச்சமானோ பஞ்ஞாய பரியோகா³ஹமானோ’’தி 1! அத்தே²வ ஸுத்தந்தோதி? ஆமந்தா. தேன ஹி ஆனிஸங்ஸத³ஸ்ஸாவிஸ்ஸ ஸங்யோஜனானங் பஹானந்தி.
548. Na vattabbaṃ – ‘‘ānisaṃsadassāvissa saṃyojanānaṃ pahāna’’nti? Āmantā. Nanu vuttaṃ bhagavatā – ‘‘idha, bhikkhave, bhikkhu nibbāne sukhānupassī viharati sukhasaññī sukhapaṭisaṃvedī, satataṃ samitaṃ abbokiṇṇaṃ cetasā adhimuccamāno paññāya pariyogāhamāno’’ti 2! Attheva suttantoti? Āmantā. Tena hi ānisaṃsadassāvissa saṃyojanānaṃ pahānanti.
ஆனிஸங்ஸத³ஸ்ஸாவீகதா² நிட்டி²தா.
Ānisaṃsadassāvīkathā niṭṭhitā.
Footnotes:
Related texts:
அட்ட²கதா² • Aṭṭhakathā / அபி⁴த⁴ம்மபிடக (அட்ட²கதா²) • Abhidhammapiṭaka (aṭṭhakathā) / பஞ்சபகரண-அட்ட²கதா² • Pañcapakaraṇa-aṭṭhakathā / 1. ஆனிஸங்ஸத³ஸ்ஸாவீகதா²வண்ணனா • 1. Ānisaṃsadassāvīkathāvaṇṇanā
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / பஞ்சபகரண-மூலடீகா • Pañcapakaraṇa-mūlaṭīkā / 1. ஆனிஸங்ஸத³ஸ்ஸாவீகதா²வண்ணனா • 1. Ānisaṃsadassāvīkathāvaṇṇanā
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / பஞ்சபகரண-அனுடீகா • Pañcapakaraṇa-anuṭīkā / 1. ஆனிஸங்ஸத³ஸ்ஸாவீகதா²வண்ணனா • 1. Ānisaṃsadassāvīkathāvaṇṇanā
