| Library / Tipiṭaka / তিপিটক • Tipiṭaka / কথাৰত্থুপাল়ি • Kathāvatthupāḷi |
৯. নৰমৰগ্গো
9. Navamavaggo
(৮৪) ১. আনিসংসদস্সাৰীকথা
(84) 1. Ānisaṃsadassāvīkathā
৫৪৭. আনিসংসদস্সাৰিস্স সংযোজনানং পহানন্তি? আমন্তা। ননু সঙ্খারে অনিচ্চতো মনসিকরোতো সংযোজনা পহীযন্তীতি? আমন্তা। হঞ্চি সঙ্খারে অনিচ্চতো মনসিকরোতো সংযোজনা পহীযন্তি, নো চ ৰত রে ৰত্তব্বে – ‘‘আনিসংসদস্সাৰিস্স সংযোজনানং পহান’’ন্তি।
547. Ānisaṃsadassāvissa saṃyojanānaṃ pahānanti? Āmantā. Nanu saṅkhāre aniccato manasikaroto saṃyojanā pahīyantīti? Āmantā. Hañci saṅkhāre aniccato manasikaroto saṃyojanā pahīyanti, no ca vata re vattabbe – ‘‘ānisaṃsadassāvissa saṃyojanānaṃ pahāna’’nti.
ননু সঙ্খারে দুক্খতো…পে॰… রোগতো… গণ্ডতো… সল্লতো… অঘতো… আবাধতো… পরতো… পলোকতো… ঈতিতো… উপদ্দৰতো… ভযতো… উপসগ্গতো… চলতো… পভঙ্গুতো… অদ্ধুৰতো… অতাণতো… অলেণতো… অসরণতো… অসরণীভূততো… রিত্ততো… তুচ্ছতো… সুঞ্ঞতো… অনত্ততো… আদীনৰতো…পে॰… ৰিপরিণামধম্মতো মনসিকরোতো সংযোজনা পহীযন্তীতি? আমন্তা। হঞ্চি সঙ্খারে ৰিপরিণামধম্মতো মনসিকরোতো সংযোজনা পহীযন্তি, নো চ ৰত রে ৰত্তব্বে – ‘‘আনিসংসদস্সাৰিস্স সংযোজনানং পহান’’ন্তি।
Nanu saṅkhāre dukkhato…pe… rogato… gaṇḍato… sallato… aghato… ābādhato… parato… palokato… ītito… upaddavato… bhayato… upasaggato… calato… pabhaṅguto… addhuvato… atāṇato… aleṇato… asaraṇato… asaraṇībhūtato… rittato… tucchato… suññato… anattato… ādīnavato…pe… vipariṇāmadhammato manasikaroto saṃyojanā pahīyantīti? Āmantā. Hañci saṅkhāre vipariṇāmadhammato manasikaroto saṃyojanā pahīyanti, no ca vata re vattabbe – ‘‘ānisaṃsadassāvissa saṃyojanānaṃ pahāna’’nti.
সঙ্খারে চ অনিচ্চতো মনসি করোতি নিব্বানে চ আনিসংসদস্সাৰী হোতীতি? ন হেৰং ৰত্তব্বে…পে॰… সঙ্খারে চ অনিচ্চতো মনসি করোতি নিব্বানে চ আনিসংসদস্সাৰী হোতীতি? আমন্তা। দ্ৰিন্নং ফস্সানং…পে॰… দ্ৰিন্নং চিত্তানং সমোধানং হোতীতি? ন হেৰং ৰত্তব্বে…পে॰… সঙ্খারে চ দুক্খতো…পে॰… ৰিপরিণামধম্মতো মনসি করোতি নিব্বানে চ আনিসংসদস্সাৰী হোতীতি? ন হেৰং ৰত্তব্বে…পে॰… সঙ্খারে চ ৰিপরিণামধম্মতো মনসি করোতি নিব্বানে চ আনিসংসদস্সাৰী হোতীতি? আমন্তা । দ্ৰিন্নং ফস্সানং…পে॰… দ্ৰিন্নং চিত্তানং সমোধানং হোতীতি? ন হেৰং ৰত্তব্বে…পে॰…।
Saṅkhāre ca aniccato manasi karoti nibbāne ca ānisaṃsadassāvī hotīti? Na hevaṃ vattabbe…pe… saṅkhāre ca aniccato manasi karoti nibbāne ca ānisaṃsadassāvī hotīti? Āmantā. Dvinnaṃ phassānaṃ…pe… dvinnaṃ cittānaṃ samodhānaṃ hotīti? Na hevaṃ vattabbe…pe… saṅkhāre ca dukkhato…pe… vipariṇāmadhammato manasi karoti nibbāne ca ānisaṃsadassāvī hotīti? Na hevaṃ vattabbe…pe… saṅkhāre ca vipariṇāmadhammato manasi karoti nibbāne ca ānisaṃsadassāvī hotīti? Āmantā . Dvinnaṃ phassānaṃ…pe… dvinnaṃ cittānaṃ samodhānaṃ hotīti? Na hevaṃ vattabbe…pe….
৫৪৮. ন ৰত্তব্বং – ‘‘আনিসংসদস্সাৰিস্স সংযোজনানং পহান’’ন্তি? আমন্তা। ননু ৰুত্তং ভগৰতা – ‘‘ইধ, ভিক্খৰে, ভিক্খু নিব্বানে সুখানুপস্সী ৰিহরতি সুখসঞ্ঞী সুখপটিসংৰেদী, সততং সমিতং অব্বোকিণ্ণং চেতসা অধিমুচ্চমানো পঞ্ঞায পরিযোগাহমানো’’তি 1! অত্থেৰ সুত্তন্তোতি? আমন্তা। তেন হি আনিসংসদস্সাৰিস্স সংযোজনানং পহানন্তি।
548. Na vattabbaṃ – ‘‘ānisaṃsadassāvissa saṃyojanānaṃ pahāna’’nti? Āmantā. Nanu vuttaṃ bhagavatā – ‘‘idha, bhikkhave, bhikkhu nibbāne sukhānupassī viharati sukhasaññī sukhapaṭisaṃvedī, satataṃ samitaṃ abbokiṇṇaṃ cetasā adhimuccamāno paññāya pariyogāhamāno’’ti 2! Attheva suttantoti? Āmantā. Tena hi ānisaṃsadassāvissa saṃyojanānaṃ pahānanti.
আনিসংসদস্সাৰীকথা নিট্ঠিতা।
Ānisaṃsadassāvīkathā niṭṭhitā.
Footnotes:
Related texts:
অট্ঠকথা • Aṭṭhakathā / অভিধম্মপিটক (অট্ঠকথা) • Abhidhammapiṭaka (aṭṭhakathā) / পঞ্চপকরণ-অট্ঠকথা • Pañcapakaraṇa-aṭṭhakathā / ১. আনিসংসদস্সাৰীকথাৰণ্ণনা • 1. Ānisaṃsadassāvīkathāvaṇṇanā
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / পঞ্চপকরণ-মূলটীকা • Pañcapakaraṇa-mūlaṭīkā / ১. আনিসংসদস্সাৰীকথাৰণ্ণনা • 1. Ānisaṃsadassāvīkathāvaṇṇanā
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / পঞ্চপকরণ-অনুটীকা • Pañcapakaraṇa-anuṭīkā / ১. আনিসংসদস্সাৰীকথাৰণ্ণনা • 1. Ānisaṃsadassāvīkathāvaṇṇanā
