| Library / Tipiṭaka / តិបិដក • Tipiṭaka / កថាវត្ថុបាឡិ • Kathāvatthupāḷi |
៩. នវមវគ្គោ
9. Navamavaggo
(៨៤) ១. អានិសំសទស្សាវីកថា
(84) 1. Ānisaṃsadassāvīkathā
៥៤៧. អានិសំសទស្សាវិស្ស សំយោជនានំ បហានន្តិ? អាមន្តា។ ននុ សង្ខារេ អនិច្ចតោ មនសិករោតោ សំយោជនា បហីយន្តីតិ? អាមន្តា។ ហញ្ចិ សង្ខារេ អនិច្ចតោ មនសិករោតោ សំយោជនា បហីយន្តិ, នោ ច វត រេ វត្តព្ពេ – ‘‘អានិសំសទស្សាវិស្ស សំយោជនានំ បហាន’’ន្តិ។
547. Ānisaṃsadassāvissa saṃyojanānaṃ pahānanti? Āmantā. Nanu saṅkhāre aniccato manasikaroto saṃyojanā pahīyantīti? Āmantā. Hañci saṅkhāre aniccato manasikaroto saṃyojanā pahīyanti, no ca vata re vattabbe – ‘‘ānisaṃsadassāvissa saṃyojanānaṃ pahāna’’nti.
ននុ សង្ខារេ ទុក្ខតោ…បេ.… រោគតោ… គណ្ឌតោ… សល្លតោ… អឃតោ… អាពាធតោ… បរតោ… បលោកតោ… ឦតិតោ… ឧបទ្ទវតោ… ភយតោ… ឧបសគ្គតោ… ចលតោ… បភង្គុតោ… អទ្ធុវតោ… អតាណតោ… អលេណតោ… អសរណតោ… អសរណីភូតតោ… រិត្តតោ… តុច្ឆតោ… សុញ្ញតោ… អនត្តតោ… អាទីនវតោ…បេ.… វិបរិណាមធម្មតោ មនសិករោតោ សំយោជនា បហីយន្តីតិ? អាមន្តា។ ហញ្ចិ សង្ខារេ វិបរិណាមធម្មតោ មនសិករោតោ សំយោជនា បហីយន្តិ, នោ ច វត រេ វត្តព្ពេ – ‘‘អានិសំសទស្សាវិស្ស សំយោជនានំ បហាន’’ន្តិ។
Nanu saṅkhāre dukkhato…pe… rogato… gaṇḍato… sallato… aghato… ābādhato… parato… palokato… ītito… upaddavato… bhayato… upasaggato… calato… pabhaṅguto… addhuvato… atāṇato… aleṇato… asaraṇato… asaraṇībhūtato… rittato… tucchato… suññato… anattato… ādīnavato…pe… vipariṇāmadhammato manasikaroto saṃyojanā pahīyantīti? Āmantā. Hañci saṅkhāre vipariṇāmadhammato manasikaroto saṃyojanā pahīyanti, no ca vata re vattabbe – ‘‘ānisaṃsadassāvissa saṃyojanānaṃ pahāna’’nti.
សង្ខារេ ច អនិច្ចតោ មនសិ ករោតិ និព្ពានេ ច អានិសំសទស្សាវី ហោតីតិ? ន ហេវំ វត្តព្ពេ…បេ.… សង្ខារេ ច អនិច្ចតោ មនសិ ករោតិ និព្ពានេ ច អានិសំសទស្សាវី ហោតីតិ? អាមន្តា។ ទ្វិន្នំ ផស្សានំ…បេ.… ទ្វិន្នំ ចិត្តានំ សមោធានំ ហោតីតិ? ន ហេវំ វត្តព្ពេ…បេ.… សង្ខារេ ច ទុក្ខតោ…បេ.… វិបរិណាមធម្មតោ មនសិ ករោតិ និព្ពានេ ច អានិសំសទស្សាវី ហោតីតិ? ន ហេវំ វត្តព្ពេ…បេ.… សង្ខារេ ច វិបរិណាមធម្មតោ មនសិ ករោតិ និព្ពានេ ច អានិសំសទស្សាវី ហោតីតិ? អាមន្តា ។ ទ្វិន្នំ ផស្សានំ…បេ.… ទ្វិន្នំ ចិត្តានំ សមោធានំ ហោតីតិ? ន ហេវំ វត្តព្ពេ…បេ.…។
Saṅkhāre ca aniccato manasi karoti nibbāne ca ānisaṃsadassāvī hotīti? Na hevaṃ vattabbe…pe… saṅkhāre ca aniccato manasi karoti nibbāne ca ānisaṃsadassāvī hotīti? Āmantā. Dvinnaṃ phassānaṃ…pe… dvinnaṃ cittānaṃ samodhānaṃ hotīti? Na hevaṃ vattabbe…pe… saṅkhāre ca dukkhato…pe… vipariṇāmadhammato manasi karoti nibbāne ca ānisaṃsadassāvī hotīti? Na hevaṃ vattabbe…pe… saṅkhāre ca vipariṇāmadhammato manasi karoti nibbāne ca ānisaṃsadassāvī hotīti? Āmantā . Dvinnaṃ phassānaṃ…pe… dvinnaṃ cittānaṃ samodhānaṃ hotīti? Na hevaṃ vattabbe…pe….
៥៤៨. ន វត្តព្ពំ – ‘‘អានិសំសទស្សាវិស្ស សំយោជនានំ បហាន’’ន្តិ? អាមន្តា។ ននុ វុត្តំ ភគវតា – ‘‘ឥធ, ភិក្ខវេ, ភិក្ខុ និព្ពានេ សុខានុបស្សី វិហរតិ សុខសញ្ញី សុខបដិសំវេទី, សតតំ សមិតំ អព្ពោកិណ្ណំ ចេតសា អធិមុច្ចមានោ បញ្ញាយ បរិយោគាហមានោ’’តិ 1! អត្ថេវ សុត្តន្តោតិ? អាមន្តា។ តេន ហិ អានិសំសទស្សាវិស្ស សំយោជនានំ បហានន្តិ។
548. Na vattabbaṃ – ‘‘ānisaṃsadassāvissa saṃyojanānaṃ pahāna’’nti? Āmantā. Nanu vuttaṃ bhagavatā – ‘‘idha, bhikkhave, bhikkhu nibbāne sukhānupassī viharati sukhasaññī sukhapaṭisaṃvedī, satataṃ samitaṃ abbokiṇṇaṃ cetasā adhimuccamāno paññāya pariyogāhamāno’’ti 2! Attheva suttantoti? Āmantā. Tena hi ānisaṃsadassāvissa saṃyojanānaṃ pahānanti.
អានិសំសទស្សាវីកថា និដ្ឋិតា។
Ānisaṃsadassāvīkathā niṭṭhitā.
Footnotes:
Related texts:
អដ្ឋកថា • Aṭṭhakathā / អភិធម្មបិដក (អដ្ឋកថា) • Abhidhammapiṭaka (aṭṭhakathā) / បញ្ចបករណ-អដ្ឋកថា • Pañcapakaraṇa-aṭṭhakathā / ១. អានិសំសទស្សាវីកថាវណ្ណនា • 1. Ānisaṃsadassāvīkathāvaṇṇanā
ដីកា • Tīkā / អភិធម្មបិដក (ដីកា) • Abhidhammapiṭaka (ṭīkā) / បញ្ចបករណ-មូលដីកា • Pañcapakaraṇa-mūlaṭīkā / ១. អានិសំសទស្សាវីកថាវណ្ណនា • 1. Ānisaṃsadassāvīkathāvaṇṇanā
ដីកា • Tīkā / អភិធម្មបិដក (ដីកា) • Abhidhammapiṭaka (ṭīkā) / បញ្ចបករណ-អនុដីកា • Pañcapakaraṇa-anuṭīkā / ១. អានិសំសទស្សាវីកថាវណ្ណនា • 1. Ānisaṃsadassāvīkathāvaṇṇanā
