| Library / Tipiṭaka / တိပိဋက • Tipiṭaka / ကထာဝတ္ထုပာဠိ • Kathāvatthupāḷi |
၉. နဝမဝဂ္ဂော
9. Navamavaggo
(၈၄) ၁. အာနိသံသဒသ္သာဝီကထာ
(84) 1. Ānisaṃsadassāvīkathā
၅၄၇. အာနိသံသဒသ္သာဝိသ္သ သံယောဇနာနံ ပဟာနန္တိ? အာမန္တာ။ နနု သင္ခာရေ အနိစ္စတော မနသိကရောတော သံယောဇနာ ပဟီယန္တီတိ? အာမန္တာ။ ဟဉ္စိ သင္ခာရေ အနိစ္စတော မနသိကရောတော သံယောဇနာ ပဟီယန္တိ, နော စ ဝတ ရေ ဝတ္တဗ္ဗေ – ‘‘အာနိသံသဒသ္သာဝိသ္သ သံယောဇနာနံ ပဟာန’’န္တိ။
547. Ānisaṃsadassāvissa saṃyojanānaṃ pahānanti? Āmantā. Nanu saṅkhāre aniccato manasikaroto saṃyojanā pahīyantīti? Āmantā. Hañci saṅkhāre aniccato manasikaroto saṃyojanā pahīyanti, no ca vata re vattabbe – ‘‘ānisaṃsadassāvissa saṃyojanānaṃ pahāna’’nti.
နနု သင္ခာရေ ဒုက္ခတော။ပေ.။ ရောဂတော။ ဂဏ္ဍတော။ သလ္လတော။ အဃတော။ အာဗာဓတော။ ပရတော။ ပလောကတော။ ဤတိတော။ ဥပဒ္ဒဝတော။ ဘယတော။ ဥပသဂ္ဂတော။ စလတော။ ပဘင္ဂုတော။ အဒ္ဓုဝတော။ အတာဏတော။ အလေဏတော။ အသရဏတော။ အသရဏီဘူတတော။ ရိတ္တတော။ တုစ္ဆတော။ သုညတော။ အနတ္တတော။ အာဒီနဝတော။ပေ.။ ဝိပရိဏာမဓမ္မတော မနသိကရောတော သံယောဇနာ ပဟီယန္တီတိ? အာမန္တာ။ ဟဉ္စိ သင္ခာရေ ဝိပရိဏာမဓမ္မတော မနသိကရောတော သံယောဇနာ ပဟီယန္တိ, နော စ ဝတ ရေ ဝတ္တဗ္ဗေ – ‘‘အာနိသံသဒသ္သာဝိသ္သ သံယောဇနာနံ ပဟာန’’န္တိ။
Nanu saṅkhāre dukkhato…pe… rogato… gaṇḍato… sallato… aghato… ābādhato… parato… palokato… ītito… upaddavato… bhayato… upasaggato… calato… pabhaṅguto… addhuvato… atāṇato… aleṇato… asaraṇato… asaraṇībhūtato… rittato… tucchato… suññato… anattato… ādīnavato…pe… vipariṇāmadhammato manasikaroto saṃyojanā pahīyantīti? Āmantā. Hañci saṅkhāre vipariṇāmadhammato manasikaroto saṃyojanā pahīyanti, no ca vata re vattabbe – ‘‘ānisaṃsadassāvissa saṃyojanānaṃ pahāna’’nti.
သင္ခာရေ စ အနိစ္စတော မနသိ ကရောတိ နိဗ္ဗာနေ စ အာနိသံသဒသ္သာဝီ ဟောတီတိ? န ဟေဝံ ဝတ္တဗ္ဗေ။ပေ.။ သင္ခာရေ စ အနိစ္စတော မနသိ ကရောတိ နိဗ္ဗာနေ စ အာနိသံသဒသ္သာဝီ ဟောတီတိ? အာမန္တာ။ ဒ္ဝိန္နံ ဖသ္သာနံ။ပေ.။ ဒ္ဝိန္နံ စိတ္တာနံ သမောဓာနံ ဟောတီတိ? န ဟေဝံ ဝတ္တဗ္ဗေ။ပေ.။ သင္ခာရေ စ ဒုက္ခတော။ပေ.။ ဝိပရိဏာမဓမ္မတော မနသိ ကရောတိ နိဗ္ဗာနေ စ အာနိသံသဒသ္သာဝီ ဟောတီတိ? န ဟေဝံ ဝတ္တဗ္ဗေ။ပေ.။ သင္ခာရေ စ ဝိပရိဏာမဓမ္မတော မနသိ ကရောတိ နိဗ္ဗာနေ စ အာနိသံသဒသ္သာဝီ ဟောတီတိ? အာမန္တာ ။ ဒ္ဝိန္နံ ဖသ္သာနံ။ပေ.။ ဒ္ဝိန္နံ စိတ္တာနံ သမောဓာနံ ဟောတီတိ? န ဟေဝံ ဝတ္တဗ္ဗေ။ပေ.။။
Saṅkhāre ca aniccato manasi karoti nibbāne ca ānisaṃsadassāvī hotīti? Na hevaṃ vattabbe…pe… saṅkhāre ca aniccato manasi karoti nibbāne ca ānisaṃsadassāvī hotīti? Āmantā. Dvinnaṃ phassānaṃ…pe… dvinnaṃ cittānaṃ samodhānaṃ hotīti? Na hevaṃ vattabbe…pe… saṅkhāre ca dukkhato…pe… vipariṇāmadhammato manasi karoti nibbāne ca ānisaṃsadassāvī hotīti? Na hevaṃ vattabbe…pe… saṅkhāre ca vipariṇāmadhammato manasi karoti nibbāne ca ānisaṃsadassāvī hotīti? Āmantā . Dvinnaṃ phassānaṃ…pe… dvinnaṃ cittānaṃ samodhānaṃ hotīti? Na hevaṃ vattabbe…pe….
၅၄၈. န ဝတ္တဗ္ဗံ – ‘‘အာနိသံသဒသ္သာဝိသ္သ သံယောဇနာနံ ပဟာန’’န္တိ? အာမန္တာ။ နနု ဝုတ္တံ ဘဂဝတာ – ‘‘ဣဓ, ဘိက္ခဝေ, ဘိက္ခု နိဗ္ဗာနေ သုခာနုပသ္သီ ဝိဟရတိ သုခသညီ သုခပဋိသံဝေဒီ, သတတံ သမိတံ အဗ္ဗောကိဏ္ဏံ စေတသာ အဓိမုစ္စမာနော ပညာယ ပရိယောဂာဟမာနော’’တိ 1! အတ္ထေဝ သုတ္တန္တောတိ? အာမန္တာ။ တေန ဟိ အာနိသံသဒသ္သာဝိသ္သ သံယောဇနာနံ ပဟာနန္တိ။
548. Na vattabbaṃ – ‘‘ānisaṃsadassāvissa saṃyojanānaṃ pahāna’’nti? Āmantā. Nanu vuttaṃ bhagavatā – ‘‘idha, bhikkhave, bhikkhu nibbāne sukhānupassī viharati sukhasaññī sukhapaṭisaṃvedī, satataṃ samitaṃ abbokiṇṇaṃ cetasā adhimuccamāno paññāya pariyogāhamāno’’ti 2! Attheva suttantoti? Āmantā. Tena hi ānisaṃsadassāvissa saṃyojanānaṃ pahānanti.
အာနိသံသဒသ္သာဝီကထာ နိဋ္ဌိတာ။
Ānisaṃsadassāvīkathā niṭṭhitā.
Footnotes:
Related texts:
အဋ္ဌကထာ • Aṭṭhakathā / အဘိဓမ္မပိဋက (အဋ္ဌကထာ) • Abhidhammapiṭaka (aṭṭhakathā) / ပဉ္စပကရဏ-အဋ္ဌကထာ • Pañcapakaraṇa-aṭṭhakathā / ၁. အာနိသံသဒသ္သာဝီကထာဝဏ္ဏနာ • 1. Ānisaṃsadassāvīkathāvaṇṇanā
ဋီကာ • Tīkā / အဘိဓမ္မပိဋက (ဋီကာ) • Abhidhammapiṭaka (ṭīkā) / ပဉ္စပကရဏ-မူလဋီကာ • Pañcapakaraṇa-mūlaṭīkā / ၁. အာနိသံသဒသ္သာဝီကထာဝဏ္ဏနာ • 1. Ānisaṃsadassāvīkathāvaṇṇanā
ဋီကာ • Tīkā / အဘိဓမ္မပိဋက (ဋီကာ) • Abhidhammapiṭaka (ṭīkā) / ပဉ္စပကရဏ-အနုဋီကာ • Pañcapakaraṇa-anuṭīkā / ၁. အာနိသံသဒသ္သာဝီကထာဝဏ္ဏနာ • 1. Ānisaṃsadassāvīkathāvaṇṇanā
