| Library / Tipiṭaka / திபிடக • Tipiṭaka / பஞ்சபகரண-அட்ட²கதா² • Pañcapakaraṇa-aṭṭhakathā |
9. நவமவக்³கோ³
9. Navamavaggo
1. ஆனிஸங்ஸத³ஸ்ஸாவீகதா²வண்ணனா
1. Ānisaṃsadassāvīkathāvaṇṇanā
547. இதா³னி ஆனிஸங்ஸத³ஸ்ஸாவீகதா² நாம ஹோதி. தத்த² ஸகஸமயே ஸங்கா²ரே ஆதீ³னவதோ நிப்³பா³னஞ்ச ஆனிஸங்ஸதோ பஸ்ஸந்தஸ்ஸ ஸங்யோஜனப்பஹானங் ஹோதீதி நிச்ச²யோ. யேஸங் பன தேஸு த்³வீஸுபி ஏகங்ஸிகவாத³ங் க³ஹெத்வா ‘‘ஆனிஸங்ஸத³ஸ்ஸாவினோவ ஸங்யோஜனப்பஹானங் ஹோதீ’’தி லத்³தி⁴, ஸெய்யதா²பி அந்த⁴கானங்; தே ஸந்தா⁴ய புச்சா² ஸகவாதி³ஸ்ஸ, படிஞ்ஞா இதரஸ்ஸ. அத²ஸ்ஸ ‘‘ஏகங்ஸிகவாதோ³ தயா க³ஹிதோ, ஆதீ³னவோபி த³ட்ட²ப்³போ³யேவா’’தி விபா⁴க³த³ஸ்ஸனத்த²ங் ஸகவாதீ³ ஸங்கா²ரேதிஆதி³மாஹ.
547. Idāni ānisaṃsadassāvīkathā nāma hoti. Tattha sakasamaye saṅkhāre ādīnavato nibbānañca ānisaṃsato passantassa saṃyojanappahānaṃ hotīti nicchayo. Yesaṃ pana tesu dvīsupi ekaṃsikavādaṃ gahetvā ‘‘ānisaṃsadassāvinova saṃyojanappahānaṃ hotī’’ti laddhi, seyyathāpi andhakānaṃ; te sandhāya pucchā sakavādissa, paṭiññā itarassa. Athassa ‘‘ekaṃsikavādo tayā gahito, ādīnavopi daṭṭhabboyevā’’ti vibhāgadassanatthaṃ sakavādī saṅkhāretiādimāha.
ஸங்கா²ரே ச அனிச்சதோ மனஸிகரோதி, நிப்³பா³னே ச ஆனிஸங்ஸத³ஸ்ஸாவீ ஹோதீதி பஞ்ஹஸ்மிங் அயமதி⁴ப்பாயோ – ஆனிஸங்ஸத³ஸ்ஸாவிஸ்ஸ ஸங்யோஜனானங் பஹானங் ஹோதீதி தேஸங் லத்³தி⁴. நனு ஸங்கா²ரே அனிச்சதோ மனஸிகரோதோ ஸங்யோஜனா பஹீயந்தீதி ச புட்டோ² ஆமந்தாதி படிஜானாதி. தேன தே ஸங்கா²ரே ச அனிச்சதோ மனஸிகரோதி, நிப்³பா³னே ச ஆனிஸங்ஸத³ஸ்ஸாவீ ஹோதீதி இத³ங் ஆபஜ்ஜதி, கிங் ஸம்படிச்ச²ஸி ஏதந்தி. ததோ பரவாதீ³ ஏகசித்தக்க²ணங் ஸந்தா⁴ய படிக்கி²பதி, து³தியங் புட்டோ² நானாசித்தவஸேன படிஜானாதி. ஸகவாதீ³ பனஸ்ஸ அதி⁴ப்பாயங் மத்³தி³த்வா அனிச்சமனஸிகாரஸ்ஸ ஆனிஸங்ஸத³ஸ்ஸாவிதாய ச ஏகதோ படிஞ்ஞாதத்தா த்³வின்னங் ப²ஸ்ஸானங் த்³வின்னங் சித்தானங் ஸமோதா⁴னங் ஹோதீதி புச்ச²தி. இதரோ த்³வின்னங் ஸமோதா⁴னங் அபஸ்ஸந்தோ படிக்கி²பதி. து³க்க²தோதிஆதி³பஞ்ஹேஸுபி ஏஸேவ நயோ. கிங் பனெத்த² ஸன்னிட்டா²னங், கிங் அனிச்சாதி³தோ மனஸிகரோதோ ஸங்யோஜனா பஹீயந்தி, உதா³ஹு நிப்³பா³னே ஆனிஸங்ஸத³ஸ்ஸாவிஸ்ஸ, உதா³ஹு த்³வேபி ஏகதோ கரொந்தஸ்ஸாதி. யதி³ தாவ அனிச்சாதி³தோ மனஸிகரோதோ பஹானங் ப⁴வெய்ய, விபஸ்ஸனாசித்தேனேவ ப⁴வெய்ய. அத² ஆனிஸங்ஸத³ஸ்ஸாவினோ, அனுஸ்ஸவவஸேன நிப்³பா³னே ஆனிஸங்ஸங் பஸ்ஸந்தஸ்ஸ விபஸ்ஸனாசித்தேனேவ ப⁴வெய்ய, அத² த்³வேபி ஏகதோ கரொந்தஸ்ஸ ப⁴வெய்ய, த்³வின்னங் ப²ஸ்ஸாதீ³னங் ஸமோதா⁴னங் ப⁴வெய்ய. யஸ்மா பன அரியமக்³க³க்க²ணே அனிச்சாதி³மனஸிகாரஸ்ஸ கிச்சங் நிப்ப²த்திங் க³ச்ச²தி புன நிச்சதோதிஆதி³க³ஹணஸ்ஸ அனுப்பத்தித⁴ம்மபா⁴வதோ, நிப்³பா³னே ச பச்சக்க²தோவ ஆனிஸங்ஸத³ஸ்ஸனங் இஜ்ஜ²தி, தஸ்மா கிச்சனிப்ப²த்திவஸேன அனிச்சாதி³தோ மனஸிகரோதோ ஆரம்மணங் கத்வா பவத்திவஸேன ச நிப்³பா³னே ஆனிஸங்ஸத³ஸ்ஸாவிஸ்ஸ ஸங்யோஜனானங் பஹானங் ஹோதீதி வேதி³தப்³ப³ங்.
Saṅkhāreca aniccato manasikaroti, nibbāne ca ānisaṃsadassāvī hotīti pañhasmiṃ ayamadhippāyo – ānisaṃsadassāvissa saṃyojanānaṃ pahānaṃ hotīti tesaṃ laddhi. Nanu saṅkhāre aniccato manasikaroto saṃyojanā pahīyantīti ca puṭṭho āmantāti paṭijānāti. Tena te saṅkhāre ca aniccato manasikaroti, nibbāne ca ānisaṃsadassāvī hotīti idaṃ āpajjati, kiṃ sampaṭicchasi etanti. Tato paravādī ekacittakkhaṇaṃ sandhāya paṭikkhipati, dutiyaṃ puṭṭho nānācittavasena paṭijānāti. Sakavādī panassa adhippāyaṃ madditvā aniccamanasikārassa ānisaṃsadassāvitāya ca ekato paṭiññātattā dvinnaṃ phassānaṃ dvinnaṃ cittānaṃ samodhānaṃ hotīti pucchati. Itaro dvinnaṃ samodhānaṃ apassanto paṭikkhipati. Dukkhatotiādipañhesupi eseva nayo. Kiṃ panettha sanniṭṭhānaṃ, kiṃ aniccādito manasikaroto saṃyojanā pahīyanti, udāhu nibbāne ānisaṃsadassāvissa, udāhu dvepi ekato karontassāti. Yadi tāva aniccādito manasikaroto pahānaṃ bhaveyya, vipassanācitteneva bhaveyya. Atha ānisaṃsadassāvino, anussavavasena nibbāne ānisaṃsaṃ passantassa vipassanācitteneva bhaveyya, atha dvepi ekato karontassa bhaveyya, dvinnaṃ phassādīnaṃ samodhānaṃ bhaveyya. Yasmā pana ariyamaggakkhaṇe aniccādimanasikārassa kiccaṃ nipphattiṃ gacchati puna niccatotiādigahaṇassa anuppattidhammabhāvato, nibbāne ca paccakkhatova ānisaṃsadassanaṃ ijjhati, tasmā kiccanipphattivasena aniccādito manasikaroto ārammaṇaṃ katvā pavattivasena ca nibbāne ānisaṃsadassāvissa saṃyojanānaṃ pahānaṃ hotīti veditabbaṃ.
548. நிப்³பா³னே ஸுகா²னுபஸ்ஸீதி ஸுத்தங் நிப்³பா³னே ஸுகா²னுபஸ்ஸனாதி³பா⁴வமேவ ஸாதே⁴தி, ந ஆனிஸங்ஸத³ஸ்ஸாவிதாமத்தேன ஸங்யோஜனானங் பஹானங். தஸ்மா ஆப⁴தம்பி அனாப⁴தஸதி³ஸமேவாதி.
548. Nibbāne sukhānupassīti suttaṃ nibbāne sukhānupassanādibhāvameva sādheti, na ānisaṃsadassāvitāmattena saṃyojanānaṃ pahānaṃ. Tasmā ābhatampi anābhatasadisamevāti.
ஆனிஸங்ஸத³ஸ்ஸாவீகதா²வண்ணனா.
Ānisaṃsadassāvīkathāvaṇṇanā.
Related texts:
திபிடக (மூல) • Tipiṭaka (Mūla) / அபி⁴த⁴ம்மபிடக • Abhidhammapiṭaka / கதா²வத்து²பாளி • Kathāvatthupāḷi / (84) 1. ஆனிஸங்ஸத³ஸ்ஸாவீகதா² • (84) 1. Ānisaṃsadassāvīkathā
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / பஞ்சபகரண-மூலடீகா • Pañcapakaraṇa-mūlaṭīkā / 1. ஆனிஸங்ஸத³ஸ்ஸாவீகதா²வண்ணனா • 1. Ānisaṃsadassāvīkathāvaṇṇanā
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / பஞ்சபகரண-அனுடீகா • Pañcapakaraṇa-anuṭīkā / 1. ஆனிஸங்ஸத³ஸ்ஸாவீகதா²வண்ணனா • 1. Ānisaṃsadassāvīkathāvaṇṇanā
