| Library / Tipiṭaka / তিপিটক • Tipiṭaka / পঞ্চপকরণ-অট্ঠকথা • Pañcapakaraṇa-aṭṭhakathā |
৯. নৰমৰগ্গো
9. Navamavaggo
১. আনিসংসদস্সাৰীকথাৰণ্ণনা
1. Ānisaṃsadassāvīkathāvaṇṇanā
৫৪৭. ইদানি আনিসংসদস্সাৰীকথা নাম হোতি। তত্থ সকসমযে সঙ্খারে আদীনৰতো নিব্বানঞ্চ আনিসংসতো পস্সন্তস্স সংযোজনপ্পহানং হোতীতি নিচ্ছযো। যেসং পন তেসু দ্ৰীসুপি একংসিকৰাদং গহেত্ৰা ‘‘আনিসংসদস্সাৰিনোৰ সংযোজনপ্পহানং হোতী’’তি লদ্ধি, সেয্যথাপি অন্ধকানং; তে সন্ধায পুচ্ছা সকৰাদিস্স, পটিঞ্ঞা ইতরস্স। অথস্স ‘‘একংসিকৰাদো তযা গহিতো, আদীনৰোপি দট্ঠব্বোযেৰা’’তি ৰিভাগদস্সনত্থং সকৰাদী সঙ্খারেতিআদিমাহ।
547. Idāni ānisaṃsadassāvīkathā nāma hoti. Tattha sakasamaye saṅkhāre ādīnavato nibbānañca ānisaṃsato passantassa saṃyojanappahānaṃ hotīti nicchayo. Yesaṃ pana tesu dvīsupi ekaṃsikavādaṃ gahetvā ‘‘ānisaṃsadassāvinova saṃyojanappahānaṃ hotī’’ti laddhi, seyyathāpi andhakānaṃ; te sandhāya pucchā sakavādissa, paṭiññā itarassa. Athassa ‘‘ekaṃsikavādo tayā gahito, ādīnavopi daṭṭhabboyevā’’ti vibhāgadassanatthaṃ sakavādī saṅkhāretiādimāha.
সঙ্খারে চ অনিচ্চতো মনসিকরোতি, নিব্বানে চ আনিসংসদস্সাৰী হোতীতি পঞ্হস্মিং অযমধিপ্পাযো – আনিসংসদস্সাৰিস্স সংযোজনানং পহানং হোতীতি তেসং লদ্ধি। ননু সঙ্খারে অনিচ্চতো মনসিকরোতো সংযোজনা পহীযন্তীতি চ পুট্ঠো আমন্তাতি পটিজানাতি। তেন তে সঙ্খারে চ অনিচ্চতো মনসিকরোতি, নিব্বানে চ আনিসংসদস্সাৰী হোতীতি ইদং আপজ্জতি, কিং সম্পটিচ্ছসি এতন্তি। ততো পরৰাদী একচিত্তক্খণং সন্ধায পটিক্খিপতি, দুতিযং পুট্ঠো নানাচিত্তৰসেন পটিজানাতি। সকৰাদী পনস্স অধিপ্পাযং মদ্দিত্ৰা অনিচ্চমনসিকারস্স আনিসংসদস্সাৰিতায চ একতো পটিঞ্ঞাতত্তা দ্ৰিন্নং ফস্সানং দ্ৰিন্নং চিত্তানং সমোধানং হোতীতি পুচ্ছতি। ইতরো দ্ৰিন্নং সমোধানং অপস্সন্তো পটিক্খিপতি। দুক্খতোতিআদিপঞ্হেসুপি এসেৰ নযো। কিং পনেত্থ সন্নিট্ঠানং, কিং অনিচ্চাদিতো মনসিকরোতো সংযোজনা পহীযন্তি, উদাহু নিব্বানে আনিসংসদস্সাৰিস্স, উদাহু দ্ৰেপি একতো করোন্তস্সাতি। যদি তাৰ অনিচ্চাদিতো মনসিকরোতো পহানং ভৰেয্য, ৰিপস্সনাচিত্তেনেৰ ভৰেয্য। অথ আনিসংসদস্সাৰিনো, অনুস্সৰৰসেন নিব্বানে আনিসংসং পস্সন্তস্স ৰিপস্সনাচিত্তেনেৰ ভৰেয্য, অথ দ্ৰেপি একতো করোন্তস্স ভৰেয্য, দ্ৰিন্নং ফস্সাদীনং সমোধানং ভৰেয্য। যস্মা পন অরিযমগ্গক্খণে অনিচ্চাদিমনসিকারস্স কিচ্চং নিপ্ফত্তিং গচ্ছতি পুন নিচ্চতোতিআদিগহণস্স অনুপ্পত্তিধম্মভাৰতো, নিব্বানে চ পচ্চক্খতোৰ আনিসংসদস্সনং ইজ্ঝতি, তস্মা কিচ্চনিপ্ফত্তিৰসেন অনিচ্চাদিতো মনসিকরোতো আরম্মণং কত্ৰা পৰত্তিৰসেন চ নিব্বানে আনিসংসদস্সাৰিস্স সংযোজনানং পহানং হোতীতি ৰেদিতব্বং।
Saṅkhāreca aniccato manasikaroti, nibbāne ca ānisaṃsadassāvī hotīti pañhasmiṃ ayamadhippāyo – ānisaṃsadassāvissa saṃyojanānaṃ pahānaṃ hotīti tesaṃ laddhi. Nanu saṅkhāre aniccato manasikaroto saṃyojanā pahīyantīti ca puṭṭho āmantāti paṭijānāti. Tena te saṅkhāre ca aniccato manasikaroti, nibbāne ca ānisaṃsadassāvī hotīti idaṃ āpajjati, kiṃ sampaṭicchasi etanti. Tato paravādī ekacittakkhaṇaṃ sandhāya paṭikkhipati, dutiyaṃ puṭṭho nānācittavasena paṭijānāti. Sakavādī panassa adhippāyaṃ madditvā aniccamanasikārassa ānisaṃsadassāvitāya ca ekato paṭiññātattā dvinnaṃ phassānaṃ dvinnaṃ cittānaṃ samodhānaṃ hotīti pucchati. Itaro dvinnaṃ samodhānaṃ apassanto paṭikkhipati. Dukkhatotiādipañhesupi eseva nayo. Kiṃ panettha sanniṭṭhānaṃ, kiṃ aniccādito manasikaroto saṃyojanā pahīyanti, udāhu nibbāne ānisaṃsadassāvissa, udāhu dvepi ekato karontassāti. Yadi tāva aniccādito manasikaroto pahānaṃ bhaveyya, vipassanācitteneva bhaveyya. Atha ānisaṃsadassāvino, anussavavasena nibbāne ānisaṃsaṃ passantassa vipassanācitteneva bhaveyya, atha dvepi ekato karontassa bhaveyya, dvinnaṃ phassādīnaṃ samodhānaṃ bhaveyya. Yasmā pana ariyamaggakkhaṇe aniccādimanasikārassa kiccaṃ nipphattiṃ gacchati puna niccatotiādigahaṇassa anuppattidhammabhāvato, nibbāne ca paccakkhatova ānisaṃsadassanaṃ ijjhati, tasmā kiccanipphattivasena aniccādito manasikaroto ārammaṇaṃ katvā pavattivasena ca nibbāne ānisaṃsadassāvissa saṃyojanānaṃ pahānaṃ hotīti veditabbaṃ.
৫৪৮. নিব্বানে সুখানুপস্সীতি সুত্তং নিব্বানে সুখানুপস্সনাদিভাৰমেৰ সাধেতি, ন আনিসংসদস্সাৰিতামত্তেন সংযোজনানং পহানং। তস্মা আভতম্পি অনাভতসদিসমেৰাতি।
548. Nibbāne sukhānupassīti suttaṃ nibbāne sukhānupassanādibhāvameva sādheti, na ānisaṃsadassāvitāmattena saṃyojanānaṃ pahānaṃ. Tasmā ābhatampi anābhatasadisamevāti.
আনিসংসদস্সাৰীকথাৰণ্ণনা।
Ānisaṃsadassāvīkathāvaṇṇanā.
Related texts:
তিপিটক (মূল) • Tipiṭaka (Mūla) / অভিধম্মপিটক • Abhidhammapiṭaka / কথাৰত্থুপাল়ি • Kathāvatthupāḷi / (৮৪) ১. আনিসংসদস্সাৰীকথা • (84) 1. Ānisaṃsadassāvīkathā
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / পঞ্চপকরণ-মূলটীকা • Pañcapakaraṇa-mūlaṭīkā / ১. আনিসংসদস্সাৰীকথাৰণ্ণনা • 1. Ānisaṃsadassāvīkathāvaṇṇanā
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / পঞ্চপকরণ-অনুটীকা • Pañcapakaraṇa-anuṭīkā / ১. আনিসংসদস্সাৰীকথাৰণ্ণনা • 1. Ānisaṃsadassāvīkathāvaṇṇanā
