| Library / Tipiṭaka / တိပိဋက • Tipiṭaka / ပဉ္စပကရဏ-အဋ္ဌကထာ • Pañcapakaraṇa-aṭṭhakathā |
၉. နဝမဝဂ္ဂော
9. Navamavaggo
၁. အာနိသံသဒသ္သာဝီကထာဝဏ္ဏနာ
1. Ānisaṃsadassāvīkathāvaṇṇanā
၅၄၇. ဣဒာနိ အာနိသံသဒသ္သာဝီကထာ နာမ ဟောတိ။ တတ္ထ သကသမယေ သင္ခာရေ အာဒီနဝတော နိဗ္ဗာနဉ္စ အာနိသံသတော ပသ္သန္တသ္သ သံယောဇနပ္ပဟာနံ ဟောတီတိ နိစ္ဆယော။ ယေသံ ပန တေသု ဒ္ဝီသုပိ ဧကံသိကဝာဒံ ဂဟေတ္ဝာ ‘‘အာနိသံသဒသ္သာဝိနောဝ သံယောဇနပ္ပဟာနံ ဟောတီ’’တိ လဒ္ဓိ, သေယ္ယထာပိ အန္ဓကာနံ; တေ သန္ဓာယ ပုစ္ဆာ သကဝာဒိသ္သ, ပဋိညာ ဣတရသ္သ။ အထသ္သ ‘‘ဧကံသိကဝာဒော တယာ ဂဟိတော, အာဒီနဝောပိ ဒဋ္ဌဗ္ဗောယေဝာ’’တိ ဝိဘာဂဒသ္သနတ္ထံ သကဝာဒီ သင္ခာရေတိအာဒိမာဟ။
547. Idāni ānisaṃsadassāvīkathā nāma hoti. Tattha sakasamaye saṅkhāre ādīnavato nibbānañca ānisaṃsato passantassa saṃyojanappahānaṃ hotīti nicchayo. Yesaṃ pana tesu dvīsupi ekaṃsikavādaṃ gahetvā ‘‘ānisaṃsadassāvinova saṃyojanappahānaṃ hotī’’ti laddhi, seyyathāpi andhakānaṃ; te sandhāya pucchā sakavādissa, paṭiññā itarassa. Athassa ‘‘ekaṃsikavādo tayā gahito, ādīnavopi daṭṭhabboyevā’’ti vibhāgadassanatthaṃ sakavādī saṅkhāretiādimāha.
သင္ခာရေ စ အနိစ္စတော မနသိကရောတိ, နိဗ္ဗာနေ စ အာနိသံသဒသ္သာဝီ ဟောတီတိ ပဉ္ဟသ္မိံ အယမဓိပ္ပာယော – အာနိသံသဒသ္သာဝိသ္သ သံယောဇနာနံ ပဟာနံ ဟောတီတိ တေသံ လဒ္ဓိ။ နနု သင္ခာရေ အနိစ္စတော မနသိကရောတော သံယောဇနာ ပဟီယန္တီတိ စ ပုဋ္ဌော အာမန္တာတိ ပဋိဇာနာတိ။ တေန တေ သင္ခာရေ စ အနိစ္စတော မနသိကရောတိ, နိဗ္ဗာနေ စ အာနိသံသဒသ္သာဝီ ဟောတီတိ ဣဒံ အာပဇ္ဇတိ, ကိံ သမ္ပဋိစ္ဆသိ ဧတန္တိ။ တတော ပရဝာဒီ ဧကစိတ္တက္ခဏံ သန္ဓာယ ပဋိက္ခိပတိ, ဒုတိယံ ပုဋ္ဌော နာနာစိတ္တဝသေန ပဋိဇာနာတိ။ သကဝာဒီ ပနသ္သ အဓိပ္ပာယံ မဒ္ဒိတ္ဝာ အနိစ္စမနသိကာရသ္သ အာနိသံသဒသ္သာဝိတာယ စ ဧကတော ပဋိညာတတ္တာ ဒ္ဝိန္နံ ဖသ္သာနံ ဒ္ဝိန္နံ စိတ္တာနံ သမောဓာနံ ဟောတီတိ ပုစ္ဆတိ။ ဣတရော ဒ္ဝိန္နံ သမောဓာနံ အပသ္သန္တော ပဋိက္ခိပတိ။ ဒုက္ခတောတိအာဒိပဉ္ဟေသုပိ ဧသေဝ နယော။ ကိံ ပနေတ္ထ သန္နိဋ္ဌာနံ, ကိံ အနိစ္စာဒိတော မနသိကရောတော သံယောဇနာ ပဟီယန္တိ, ဥဒာဟု နိဗ္ဗာနေ အာနိသံသဒသ္သာဝိသ္သ, ဥဒာဟု ဒ္ဝေပိ ဧကတော ကရောန္တသ္သာတိ။ ယဒိ တာဝ အနိစ္စာဒိတော မနသိကရောတော ပဟာနံ ဘဝေယ္ယ, ဝိပသ္သနာစိတ္တေနေဝ ဘဝေယ္ယ။ အထ အာနိသံသဒသ္သာဝိနော, အနုသ္သဝဝသေန နိဗ္ဗာနေ အာနိသံသံ ပသ္သန္တသ္သ ဝိပသ္သနာစိတ္တေနေဝ ဘဝေယ္ယ, အထ ဒ္ဝေပိ ဧကတော ကရောန္တသ္သ ဘဝေယ္ယ, ဒ္ဝိန္နံ ဖသ္သာဒီနံ သမောဓာနံ ဘဝေယ္ယ။ ယသ္မာ ပန အရိယမဂ္ဂက္ခဏေ အနိစ္စာဒိမနသိကာရသ္သ ကိစ္စံ နိပ္ဖတ္တိံ ဂစ္ဆတိ ပုန နိစ္စတောတိအာဒိဂဟဏသ္သ အနုပ္ပတ္တိဓမ္မဘာဝတော, နိဗ္ဗာနေ စ ပစ္စက္ခတောဝ အာနိသံသဒသ္သနံ ဣဇ္ဈတိ, တသ္မာ ကိစ္စနိပ္ဖတ္တိဝသေန အနိစ္စာဒိတော မနသိကရောတော အာရမ္မဏံ ကတ္ဝာ ပဝတ္တိဝသေန စ နိဗ္ဗာနေ အာနိသံသဒသ္သာဝိသ္သ သံယောဇနာနံ ပဟာနံ ဟောတီတိ ဝေဒိတဗ္ဗံ။
Saṅkhāreca aniccato manasikaroti, nibbāne ca ānisaṃsadassāvī hotīti pañhasmiṃ ayamadhippāyo – ānisaṃsadassāvissa saṃyojanānaṃ pahānaṃ hotīti tesaṃ laddhi. Nanu saṅkhāre aniccato manasikaroto saṃyojanā pahīyantīti ca puṭṭho āmantāti paṭijānāti. Tena te saṅkhāre ca aniccato manasikaroti, nibbāne ca ānisaṃsadassāvī hotīti idaṃ āpajjati, kiṃ sampaṭicchasi etanti. Tato paravādī ekacittakkhaṇaṃ sandhāya paṭikkhipati, dutiyaṃ puṭṭho nānācittavasena paṭijānāti. Sakavādī panassa adhippāyaṃ madditvā aniccamanasikārassa ānisaṃsadassāvitāya ca ekato paṭiññātattā dvinnaṃ phassānaṃ dvinnaṃ cittānaṃ samodhānaṃ hotīti pucchati. Itaro dvinnaṃ samodhānaṃ apassanto paṭikkhipati. Dukkhatotiādipañhesupi eseva nayo. Kiṃ panettha sanniṭṭhānaṃ, kiṃ aniccādito manasikaroto saṃyojanā pahīyanti, udāhu nibbāne ānisaṃsadassāvissa, udāhu dvepi ekato karontassāti. Yadi tāva aniccādito manasikaroto pahānaṃ bhaveyya, vipassanācitteneva bhaveyya. Atha ānisaṃsadassāvino, anussavavasena nibbāne ānisaṃsaṃ passantassa vipassanācitteneva bhaveyya, atha dvepi ekato karontassa bhaveyya, dvinnaṃ phassādīnaṃ samodhānaṃ bhaveyya. Yasmā pana ariyamaggakkhaṇe aniccādimanasikārassa kiccaṃ nipphattiṃ gacchati puna niccatotiādigahaṇassa anuppattidhammabhāvato, nibbāne ca paccakkhatova ānisaṃsadassanaṃ ijjhati, tasmā kiccanipphattivasena aniccādito manasikaroto ārammaṇaṃ katvā pavattivasena ca nibbāne ānisaṃsadassāvissa saṃyojanānaṃ pahānaṃ hotīti veditabbaṃ.
၅၄၈. နိဗ္ဗာနေ သုခာနုပသ္သီတိ သုတ္တံ နိဗ္ဗာနေ သုခာနုပသ္သနာဒိဘာဝမေဝ သာဓေတိ, န အာနိသံသဒသ္သာဝိတာမတ္တေန သံယောဇနာနံ ပဟာနံ။ တသ္မာ အာဘတမ္ပိ အနာဘတသဒိသမေဝာတိ။
548. Nibbāne sukhānupassīti suttaṃ nibbāne sukhānupassanādibhāvameva sādheti, na ānisaṃsadassāvitāmattena saṃyojanānaṃ pahānaṃ. Tasmā ābhatampi anābhatasadisamevāti.
အာနိသံသဒသ္သာဝီကထာဝဏ္ဏနာ။
Ānisaṃsadassāvīkathāvaṇṇanā.
Related texts:
တိပိဋက (မူလ) • Tipiṭaka (Mūla) / အဘိဓမ္မပိဋက • Abhidhammapiṭaka / ကထာဝတ္ထုပာဠိ • Kathāvatthupāḷi / (၈၄) ၁. အာနိသံသဒသ္သာဝီကထာ • (84) 1. Ānisaṃsadassāvīkathā
ဋီကာ • Tīkā / အဘိဓမ္မပိဋက (ဋီကာ) • Abhidhammapiṭaka (ṭīkā) / ပဉ္စပကရဏ-မူလဋီကာ • Pañcapakaraṇa-mūlaṭīkā / ၁. အာနိသံသဒသ္သာဝီကထာဝဏ္ဏနာ • 1. Ānisaṃsadassāvīkathāvaṇṇanā
ဋီကာ • Tīkā / အဘိဓမ္မပိဋက (ဋီကာ) • Abhidhammapiṭaka (ṭīkā) / ပဉ္စပကရဏ-အနုဋီကာ • Pañcapakaraṇa-anuṭīkā / ၁. အာနိသံသဒသ္သာဝီကထာဝဏ္ဏနာ • 1. Ānisaṃsadassāvīkathāvaṇṇanā
