| Library / Tipiṭaka / ติปิฎก • Tipiṭaka / ปริวาร-อฎฺฐกถา • Parivāra-aṭṭhakathā |
อุปาลิปญฺจกํ
Upālipañcakaṃ
อนิสฺสิตวคฺควณฺณนา
Anissitavaggavaṇṇanā
๔๑๗. อุปาลิปเญฺหสุ กติหิ นุ โข ภเนฺตติ ปุจฺฉาย อยํ สมฺพโนฺธฯ เถโร กิร รโหคโต สพฺพานิ อิมานิ ปญฺจกานิ อาวเชฺชตฺวา ‘‘ภควนฺตํ ทานิ ปุจฺฉิตฺวา อิเมสํ นิสฺสาย วสนกาทีนํ อตฺถาย ตนฺติํ ฐเปสฺสามี’’ติ ภควนฺตํ อุปสงฺกมิตฺวา ‘‘กติหิ นุ โข ภเนฺต’’ติอาทินา นเยน ปเญฺห ปุจฺฉิฯ เตสํ วิสฺสชฺชเน อุโปสถํ น ชานาตีติ นววิธํ อุโปสถํ น ชานาติฯ อุโปสถกมฺมํ น ชานาตีติ อธเมฺมนวคฺคาทิเภทํ จตุพฺพิธํ อุโปสถกมฺมํ น ชานาติฯ ปาติโมกฺขํ น ชานาตีติ เทฺว มาติกา น ชานาติฯ ปาติโมกฺขุเทฺทสํ น ชานาตีติ ภิกฺขูนํ ปญฺจวิธํ ภิกฺขุนีนํ จตุพฺพิธนฺติ นววิธํ ปาติโมกฺขุเทฺทสํ น ชานาติฯ
417. Upālipañhesu katihi nu kho bhanteti pucchāya ayaṃ sambandho. Thero kira rahogato sabbāni imāni pañcakāni āvajjetvā ‘‘bhagavantaṃ dāni pucchitvā imesaṃ nissāya vasanakādīnaṃ atthāya tantiṃ ṭhapessāmī’’ti bhagavantaṃ upasaṅkamitvā ‘‘katihi nu kho bhante’’tiādinā nayena pañhe pucchi. Tesaṃ vissajjane uposathaṃ na jānātīti navavidhaṃ uposathaṃ na jānāti. Uposathakammaṃ na jānātīti adhammenavaggādibhedaṃ catubbidhaṃ uposathakammaṃ na jānāti. Pātimokkhaṃ na jānātīti dve mātikā na jānāti. Pātimokkhuddesaṃ na jānātīti bhikkhūnaṃ pañcavidhaṃ bhikkhunīnaṃ catubbidhanti navavidhaṃ pātimokkhuddesaṃ na jānāti.
ปวารณํ น ชานาตีติ นววิธํ ปวารณํ น ชานาติฯ ปวารณากมฺมํ น ชานาตีติ อธเมฺมนวคฺคาทิเภทํ จตุพฺพิธํ ปวารณากมฺมํ น ชานาติฯ
Pavāraṇaṃ na jānātīti navavidhaṃ pavāraṇaṃ na jānāti. Pavāraṇākammaṃ na jānātīti adhammenavaggādibhedaṃ catubbidhaṃ pavāraṇākammaṃ na jānāti.
อาปตฺตานาปตฺติํ น ชานาตีติ ตสฺมิํ ตสฺมิํ สิกฺขาปเท นิทฺทิฎฺฐํ อาปตฺติญฺจ อนาปตฺติญฺจ น ชานาติฯ
Āpattānāpattiṃ na jānātīti tasmiṃ tasmiṃ sikkhāpade niddiṭṭhaṃ āpattiñca anāpattiñca na jānāti.
อาปโนฺน กมฺมกโตติ อาปตฺติํ อาปโนฺน ตปฺปจฺจยาว สเงฺฆน กมฺมํ กตํ โหติฯ
Āpanno kammakatoti āpattiṃ āpanno tappaccayāva saṅghena kammaṃ kataṃ hoti.
Related texts:
ติปิฎก (มูล) • Tipiṭaka (Mūla) / วินยปิฎก • Vinayapiṭaka / ปริวารปาฬิ • Parivārapāḷi / ๑. อนิสฺสิตวโคฺค • 1. Anissitavaggo
ฎีกา • Tīkā / วินยปิฎก (ฎีกา) • Vinayapiṭaka (ṭīkā) / ปาจิตฺยาทิโยชนาปาฬิ • Pācityādiyojanāpāḷi / อนิสฺสิตวคฺควณฺณนา • Anissitavaggavaṇṇanā
