| Library / Tipiṭaka / တိပိဋက • Tipiṭaka / ပရိဝာရ-အဋ္ဌကထာ • Parivāra-aṭṭhakathā |
ဥပာလိပဉ္စကံ
Upālipañcakaṃ
အနိသ္သိတဝဂ္ဂဝဏ္ဏနာ
Anissitavaggavaṇṇanā
၄၁၇. ဥပာလိပဉ္ဟေသု ကတိဟိ နု ခော ဘန္တေတိ ပုစ္ဆာယ အယံ သမ္ဗန္ဓော။ ထေရော ကိရ ရဟောဂတော သဗ္ဗာနိ ဣမာနိ ပဉ္စကာနိ အာဝဇ္ဇေတ္ဝာ ‘‘ဘဂဝန္တံ ဒာနိ ပုစ္ဆိတ္ဝာ ဣမေသံ နိသ္သာယ ဝသနကာဒီနံ အတ္ထာယ တန္တိံ ဌပေသ္သာမီ’’တိ ဘဂဝန္တံ ဥပသင္ကမိတ္ဝာ ‘‘ကတိဟိ နု ခော ဘန္တေ’’တိအာဒိနာ နယေန ပဉ္ဟေ ပုစ္ဆိ။ တေသံ ဝိသ္သဇ္ဇနေ ဥပောသထံ န ဇာနာတီတိ နဝဝိဓံ ဥပောသထံ န ဇာနာတိ။ ဥပောသထကမ္မံ န ဇာနာတီတိ အဓမ္မေနဝဂ္ဂာဒိဘေဒံ စတုဗ္ဗိဓံ ဥပောသထကမ္မံ န ဇာနာတိ။ ပာတိမောက္ခံ န ဇာနာတီတိ ဒ္ဝေ မာတိကာ န ဇာနာတိ။ ပာတိမောက္ခုဒ္ဒေသံ န ဇာနာတီတိ ဘိက္ခူနံ ပဉ္စဝိဓံ ဘိက္ခုနီနံ စတုဗ္ဗိဓန္တိ နဝဝိဓံ ပာတိမောက္ခုဒ္ဒေသံ န ဇာနာတိ။
417. Upālipañhesu katihi nu kho bhanteti pucchāya ayaṃ sambandho. Thero kira rahogato sabbāni imāni pañcakāni āvajjetvā ‘‘bhagavantaṃ dāni pucchitvā imesaṃ nissāya vasanakādīnaṃ atthāya tantiṃ ṭhapessāmī’’ti bhagavantaṃ upasaṅkamitvā ‘‘katihi nu kho bhante’’tiādinā nayena pañhe pucchi. Tesaṃ vissajjane uposathaṃ na jānātīti navavidhaṃ uposathaṃ na jānāti. Uposathakammaṃ na jānātīti adhammenavaggādibhedaṃ catubbidhaṃ uposathakammaṃ na jānāti. Pātimokkhaṃ na jānātīti dve mātikā na jānāti. Pātimokkhuddesaṃ na jānātīti bhikkhūnaṃ pañcavidhaṃ bhikkhunīnaṃ catubbidhanti navavidhaṃ pātimokkhuddesaṃ na jānāti.
ပဝာရဏံ န ဇာနာတီတိ နဝဝိဓံ ပဝာရဏံ န ဇာနာတိ။ ပဝာရဏာကမ္မံ န ဇာနာတီတိ အဓမ္မေနဝဂ္ဂာဒိဘေဒံ စတုဗ္ဗိဓံ ပဝာရဏာကမ္မံ န ဇာနာတိ။
Pavāraṇaṃ na jānātīti navavidhaṃ pavāraṇaṃ na jānāti. Pavāraṇākammaṃ na jānātīti adhammenavaggādibhedaṃ catubbidhaṃ pavāraṇākammaṃ na jānāti.
အာပတ္တာနာပတ္တိံ န ဇာနာတီတိ တသ္မိံ တသ္မိံ သိက္ခာပဒေ နိဒ္ဒိဋ္ဌံ အာပတ္တိဉ္စ အနာပတ္တိဉ္စ န ဇာနာတိ။
Āpattānāpattiṃ na jānātīti tasmiṃ tasmiṃ sikkhāpade niddiṭṭhaṃ āpattiñca anāpattiñca na jānāti.
အာပန္နော ကမ္မကတောတိ အာပတ္တိံ အာပန္နော တပ္ပစ္စယာဝ သင္ဃေန ကမ္မံ ကတံ ဟောတိ။
Āpanno kammakatoti āpattiṃ āpanno tappaccayāva saṅghena kammaṃ kataṃ hoti.
Related texts:
တိပိဋက (မူလ) • Tipiṭaka (Mūla) / ဝိနယပိဋက • Vinayapiṭaka / ပရိဝာရပာဠိ • Parivārapāḷi / ၁. အနိသ္သိတဝဂ္ဂော • 1. Anissitavaggo
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ပာစိတ္ယာဒိယောဇနာပာဠိ • Pācityādiyojanāpāḷi / အနိသ္သိတဝဂ္ဂဝဏ္ဏနာ • Anissitavaggavaṇṇanā
