| Library / Tipiṭaka / තිපිටක • Tipiṭaka / පරිවාර-අට්‌ඨකථා • Parivāra-aṭṭhakathā |
උපාලිපඤ්‌චකං
Upālipañcakaṃ
අනිස්‌සිතවග්‌ගවණ්‌ණනා
Anissitavaggavaṇṇanā
417. උපාලිපඤ්‌හෙසු කතිහි නු ඛො භන්‌තෙති පුච්‌ඡාය අයං සම්‌බන්‌ධො. ථෙරො කිර රහොගතො සබ්‌බානි ඉමානි පඤ්‌චකානි ආවජ්‌ජෙත්‌වා ‘‘භගවන්‌තං දානි පුච්‌ඡිත්‌වා ඉමෙසං නිස්‌සාය වසනකාදීනං අත්‌ථාය තන්‌තිං ඨපෙස්‌සාමී’’ති භගවන්‌තං උපසඞ්‌කමිත්‌වා ‘‘කතිහි නු ඛො භන්‌තෙ’’තිආදිනා නයෙන පඤ්‌හෙ පුච්‌ඡි. තෙසං විස්‌සජ්‌ජනෙ උපොසථං න ජානාතීති නවවිධං උපොසථං න ජානාති. උපොසථකම්‌මං න ජානාතීති අධම්‌මෙනවග්‌ගාදිභෙදං චතුබ්‌බිධං උපොසථකම්‌මං න ජානාති. පාතිමොක්‌ඛං න ජානාතීති ද්‌වෙ මාතිකා න ජානාති. පාතිමොක්‌ඛුද්‌දෙසං න ජානාතීති භික්‌ඛූනං පඤ්‌චවිධං භික්‌ඛුනීනං චතුබ්‌බිධන්‌ති නවවිධං පාතිමොක්‌ඛුද්‌දෙසං න ජානාති.
417. Upālipañhesu katihi nu kho bhanteti pucchāya ayaṃ sambandho. Thero kira rahogato sabbāni imāni pañcakāni āvajjetvā ‘‘bhagavantaṃ dāni pucchitvā imesaṃ nissāya vasanakādīnaṃ atthāya tantiṃ ṭhapessāmī’’ti bhagavantaṃ upasaṅkamitvā ‘‘katihi nu kho bhante’’tiādinā nayena pañhe pucchi. Tesaṃ vissajjane uposathaṃ na jānātīti navavidhaṃ uposathaṃ na jānāti. Uposathakammaṃ na jānātīti adhammenavaggādibhedaṃ catubbidhaṃ uposathakammaṃ na jānāti. Pātimokkhaṃ na jānātīti dve mātikā na jānāti. Pātimokkhuddesaṃ na jānātīti bhikkhūnaṃ pañcavidhaṃ bhikkhunīnaṃ catubbidhanti navavidhaṃ pātimokkhuddesaṃ na jānāti.
පවාරණං න ජානාතීති නවවිධං පවාරණං න ජානාති. පවාරණාකම්‌මං න ජානාතීති අධම්‌මෙනවග්‌ගාදිභෙදං චතුබ්‌බිධං පවාරණාකම්‌මං න ජානාති.
Pavāraṇaṃ na jānātīti navavidhaṃ pavāraṇaṃ na jānāti. Pavāraṇākammaṃ na jānātīti adhammenavaggādibhedaṃ catubbidhaṃ pavāraṇākammaṃ na jānāti.
ආපත්‌තානාපත්‌තිං න ජානාතීති තස්‌මිං තස්‌මිං සික්‌ඛාපදෙ නිද්‌දිට්‌ඨං ආපත්‌තිඤ්‌ච අනාපත්‌තිඤ්‌ච න ජානාති.
Āpattānāpattiṃ na jānātīti tasmiṃ tasmiṃ sikkhāpade niddiṭṭhaṃ āpattiñca anāpattiñca na jānāti.
ආපන්‌නො කම්‌මකතොති ආපත්‌තිං ආපන්‌නො තප්‌පච්‌චයාව සඞ්‌ඝෙන කම්‌මං කතං හොති.
Āpanno kammakatoti āpattiṃ āpanno tappaccayāva saṅghena kammaṃ kataṃ hoti.
Related texts:
තිපිටක (මූල) • Tipiṭaka (Mūla) / විනයපිටක • Vinayapiṭaka / පරිවාරපාළි • Parivārapāḷi / 1. අනිස්‌සිතවග්‌ගො • 1. Anissitavaggo
ටීකා • Tīkā / විනයපිටක (ටීකා) • Vinayapiṭaka (ṭīkā) / පාචිත්‍යාදියොජනාපාළි • Pācityādiyojanāpāḷi / අනිස්‌සිතවග්‌ගවණ්‌ණනා • Anissitavaggavaṇṇanā
