| Library / Tipiṭaka / ཏིཔིཊཀ • Tipiṭaka / པརིཝཱརཔཱལི༹ • Parivārapāḷi |
ཨུཔཱལིཔཉྩཀཾ
Upālipañcakaṃ
༡. ཨནིསྶིཏཝགྒོ
1. Anissitavaggo
༤༡༧. ཏེན སམཡེན བུདྡྷོ བྷགཝཱ སཱཝཏྠིཡཾ ཝིཧརཏི ཛེཏཝནེ ཨནཱཐཔིཎྜིཀསྶ ཨཱརཱམེ། ཨཐ ཁོ ཨཱཡསྨཱ ཨུཔཱལི ཡེན བྷགཝཱ ཏེནུཔསངྐམི; ཨུཔསངྐམིཏྭཱ བྷགཝནྟཾ ཨབྷིཝཱདེཏྭཱ ཨེཀམནྟཾ ནིསཱིདི། ཨེཀམནྟཾ ནིསིནྣོ ཁོ ཨཱཡསྨཱ ཨུཔཱལི བྷགཝནྟཾ ཨེཏདཝོཙ – ‘‘ཀཏིཧི ནུ ཁོ, བྷནྟེ, ཨངྒེཧི སམནྣཱགཏེན བྷིཀྑུནཱ ཡཱཝཛཱིཝཾ ནཱནིསྶིཏེན ཝཏྠབྦ’’ནྟི?
417. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Atha kho āyasmā upāli yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho āyasmā upāli bhagavantaṃ etadavoca – ‘‘katihi nu kho, bhante, aṅgehi samannāgatena bhikkhunā yāvajīvaṃ nānissitena vatthabba’’nti?
‘‘པཉྩཧུཔཱལི, ཨངྒེཧི སམནྣཱགཏེན བྷིཀྑུནཱ ཡཱཝཛཱིཝཾ ནཱནིསྶིཏེན ཝཏྠབྦཾ། 1 ཀཏམེཧི པཉྩཧི? ཨུཔོསཐཾ ན ཛཱནཱཏི, ཨུཔོསཐཀམྨཾ ན ཛཱནཱཏི, པཱཏིམོཀྑཾ ན ཛཱནཱཏི, པཱཏིམོཀྑུདྡེསཾ ན ཛཱནཱཏི, ཨཱུནཔཉྩཝསྶོ ཧོཏི – ཨིམེཧི ཁོ, ཨུཔཱལི, པཉྩཧངྒེཧི སམནྣཱགཏེན བྷིཀྑུནཱ ཡཱཝཛཱིཝཾ ནཱནིསྶིཏེན ཝཏྠབྦཾ། པཉྩཧུཔཱལི, ཨངྒེཧི སམནྣཱགཏེན བྷིཀྑུནཱ ཡཱཝཛཱིཝཾ ཨནིསྶིཏེན ཝཏྠབྦཾ། ཀཏམེཧི པཉྩཧི? ཨུཔོསཐཾ ཛཱནཱཏི, ཨུཔོསཐཀམྨཾ ཛཱནཱཏི, པཱཏིམོཀྑཾ ཛཱནཱཏི, པཱཏིམོཀྑུདྡེསཾ ཛཱནཱཏི, པཉྩཝསྶོ ཝཱ ཧོཏི ཨཏིརེཀཔཉྩཝསྶོ ཝཱ – ཨིམེཧི ཁོ, ཨུཔཱལི, པཉྩཧངྒེཧི སམནྣཱགཏེན བྷིཀྑུནཱ ཡཱཝཛཱིཝཾ ཨནིསྶིཏེན ཝཏྠབྦཾ།
‘‘Pañcahupāli, aṅgehi samannāgatena bhikkhunā yāvajīvaṃ nānissitena vatthabbaṃ. 2 Katamehi pañcahi? Uposathaṃ na jānāti, uposathakammaṃ na jānāti, pātimokkhaṃ na jānāti, pātimokkhuddesaṃ na jānāti, ūnapañcavasso hoti – imehi kho, upāli, pañcahaṅgehi samannāgatena bhikkhunā yāvajīvaṃ nānissitena vatthabbaṃ. Pañcahupāli, aṅgehi samannāgatena bhikkhunā yāvajīvaṃ anissitena vatthabbaṃ. Katamehi pañcahi? Uposathaṃ jānāti, uposathakammaṃ jānāti, pātimokkhaṃ jānāti, pātimokkhuddesaṃ jānāti, pañcavasso vā hoti atirekapañcavasso vā – imehi kho, upāli, pañcahaṅgehi samannāgatena bhikkhunā yāvajīvaṃ anissitena vatthabbaṃ.
‘‘ཨཔརེཧིཔི, ཨུཔཱལི, པཉྩཧངྒེཧི སམནྣཱགཏེན བྷིཀྑུནཱ ཡཱཝཛཱིཝཾ ནཱནིསྶིཏེན ཝཏྠབྦཾ། ཀཏམེཧི པཉྩཧི? པཝཱརཎཾ ན ཛཱནཱཏི, པཝཱརཎཱཀམྨཾ ན ཛཱནཱཏི, པཱཏིམོཀྑཾ ན ཛཱནཱཏི, པཱཏིམོཀྑུདྡེསཾ ན ཛཱནཱཏི, ཨཱུནཔཉྩཝསྶོ ཧོཏི – ཨིམེཧི ཁོ, ཨུཔཱལི, པཉྩཧངྒེཧི སམནྣཱགཏེན བྷིཀྑུནཱ ཡཱཝཛཱིཝཾ ནཱནིསྶིཏེན ཝཏྠབྦཾ། པཉྩཧུཔཱལི, ཨངྒེཧི སམནྣཱགཏེན བྷིཀྑུནཱ ཡཱཝཛཱིཝཾ ཨནིསྶིཏེན ཝཏྠབྦཾ། ཀཏམེཧི པཉྩཧི? པཝཱརཎཾ ཛཱནཱཏི , པཝཱརཎཱཀམྨཾ ཛཱནཱཏི, པཱཏིམོཀྑཾ ཛཱནཱཏི, པཱཏིམོཀྑུདྡེསཾ ཛཱནཱཏི, པཉྩཝསྶོ ཝཱ ཧོཏི ཨཏིརེཀཔཉྩཝསྶོ ཝཱ – ཨིམེཧི ཁོ, ཨུཔཱལི, པཉྩཧངྒེཧི སམནྣཱགཏེན བྷིཀྑུནཱ ཡཱཝཛཱིཝཾ ཨནིསྶིཏེན ཝཏྠབྦཾ།
‘‘Aparehipi, upāli, pañcahaṅgehi samannāgatena bhikkhunā yāvajīvaṃ nānissitena vatthabbaṃ. Katamehi pañcahi? Pavāraṇaṃ na jānāti, pavāraṇākammaṃ na jānāti, pātimokkhaṃ na jānāti, pātimokkhuddesaṃ na jānāti, ūnapañcavasso hoti – imehi kho, upāli, pañcahaṅgehi samannāgatena bhikkhunā yāvajīvaṃ nānissitena vatthabbaṃ. Pañcahupāli, aṅgehi samannāgatena bhikkhunā yāvajīvaṃ anissitena vatthabbaṃ. Katamehi pañcahi? Pavāraṇaṃ jānāti , pavāraṇākammaṃ jānāti, pātimokkhaṃ jānāti, pātimokkhuddesaṃ jānāti, pañcavasso vā hoti atirekapañcavasso vā – imehi kho, upāli, pañcahaṅgehi samannāgatena bhikkhunā yāvajīvaṃ anissitena vatthabbaṃ.
‘‘ཨཔརེཧིཔི, ཨུཔཱལི, པཉྩཧངྒེཧི སམནྣཱགཏེན བྷིཀྑུནཱ ཡཱཝཛཱིཝཾ ནཱནིསྶིཏེན ཝཏྠབྦཾ། ཀཏམེཧི པཉྩཧི? ཨཱཔཏྟཱནཱཔཏྟིཾ ན ཛཱནཱཏི, ལཧུཀགརུཀཾ ཨཱཔཏྟིཾ ན ཛཱནཱཏི, སཱཝསེསཱནཝསེསཾ ཨཱཔཏྟིཾ ན ཛཱནཱཏི, དུཊྛུལླཱདུཊྛུལླཾ ཨཱཔཏྟིཾ ན ཛཱནཱཏི, ཨཱུནཔཉྩཝསྶོ ཧོཏི – ཨིམེཧི ཁོ, ཨུཔཱལི, པཉྩཧངྒེཧི སམནྣཱགཏེན བྷིཀྑུནཱ ཡཱཝཛཱིཝཾ ནཱནིསྶིཏེན ཝཏྠབྦཾ། པཉྩཧུཔཱལི, ཨངྒེཧི སམནྣཱགཏེན བྷིཀྑུནཱ ཡཱཝཛཱིཝཾ ཨནིསྶིཏེན ཝཏྠབྦཾ། ཀཏམེཧི པཉྩཧི? ཨཱཔཏྟཱནཱཔཏྟིཾ ཛཱནཱཏི, ལཧུཀགརུཀཾ ཨཱཔཏྟིཾ ཛཱནཱཏི, སཱཝསེསཱནཝསེསཾ ཨཱཔཏྟིཾ ཛཱནཱཏི, དུཊྛུལླཱདུཊྛུལླཾ ཨཱཔཏྟིཾ ཛཱནཱཏི, པཉྩཝསྶོ ཝཱ ཧོཏི ཨཏིརེཀཔཉྩཝསྶོ ཝཱ – ཨིམེཧི ཁོ, ཨུཔཱལི, པཉྩཧངྒེཧི སམནྣཱགཏེན བྷིཀྑུནཱ ཡཱཝཛཱིཝཾ ཨནིསྶིཏེན ཝཏྠབྦཾ’’།
‘‘Aparehipi, upāli, pañcahaṅgehi samannāgatena bhikkhunā yāvajīvaṃ nānissitena vatthabbaṃ. Katamehi pañcahi? Āpattānāpattiṃ na jānāti, lahukagarukaṃ āpattiṃ na jānāti, sāvasesānavasesaṃ āpattiṃ na jānāti, duṭṭhullāduṭṭhullaṃ āpattiṃ na jānāti, ūnapañcavasso hoti – imehi kho, upāli, pañcahaṅgehi samannāgatena bhikkhunā yāvajīvaṃ nānissitena vatthabbaṃ. Pañcahupāli, aṅgehi samannāgatena bhikkhunā yāvajīvaṃ anissitena vatthabbaṃ. Katamehi pañcahi? Āpattānāpattiṃ jānāti, lahukagarukaṃ āpattiṃ jānāti, sāvasesānavasesaṃ āpattiṃ jānāti, duṭṭhullāduṭṭhullaṃ āpattiṃ jānāti, pañcavasso vā hoti atirekapañcavasso vā – imehi kho, upāli, pañcahaṅgehi samannāgatena bhikkhunā yāvajīvaṃ anissitena vatthabbaṃ’’.
༤༡༨. ‘‘ཀཏིཧི ནུ ཁོ, བྷནྟེ, ཨངྒེཧི སམནྣཱགཏེན བྷིཀྑུནཱ ན ཨུཔསམྤཱདེཏབྦཾ, ན ནིསྶཡོ དཱཏབྦོ, ན སཱམཎེརོ ཨུཔཊྛཱཔེཏབྦོ’’ཏི?
418. ‘‘Katihi nu kho, bhante, aṅgehi samannāgatena bhikkhunā na upasampādetabbaṃ, na nissayo dātabbo, na sāmaṇero upaṭṭhāpetabbo’’ti?
3 ‘‘པཉྩཧུཔཱལི, ཨངྒེཧི སམནྣཱགཏེན བྷིཀྑུནཱ ན ཨུཔསམྤཱདེཏབྦཾ, ན ནིསྶཡོ དཱཏབྦོ, ན སཱམཎེརོ ཨུཔཊྛཱཔེཏབྦོ། ཀཏམེཧི པཉྩཧི? ན པཊིབལོ ཧོཏི ཨནྟེཝཱསིཾ ཝཱ སདྡྷིཝིཧཱརིཾ ཝཱ གིལཱནཾ ཨུཔཊྛཱཏུཾ ཝཱ ཨུཔཊྛཱཔེཏུཾ ཝཱ, ཨནབྷིརཏཾ ཝཱུཔཀཱསེཏུཾ ཝཱ ཝཱུཔཀཱསཱཔེཏུཾ ཝཱ, ཨུཔྤནྣཾ ཀུཀྐུཙྩཾ དྷམྨཏོ ཝིནོདེཏུཾ 4, ཨབྷིདྷམྨེ ཝིནེཏུཾ, ཨབྷིཝིནཡེ ཝིནེཏུཾ – ཨིམེཧི ཁོ, ཨུཔཱལི, པཉྩཧངྒེཧི སམནྣཱགཏེན བྷིཀྑུནཱ ན ཨུཔསམྤཱདེཏབྦཾ, ན ནིསྶཡོ དཱཏབྦོ, ན སཱམཎེརོ ཨུཔཊྛཱཔེཏབྦོ། པཉྩཧུཔཱལི, ཨངྒེཧི སམནྣཱགཏེན བྷིཀྑུནཱ ཨུཔསམྤཱདེཏབྦཾ, ནིསྶཡོ དཱཏབྦོ, སཱམཎེརོ ཨུཔཊྛཱཔེཏབྦོ། ཀཏམེཧི པཉྩཧི? པཊིབལོ ཧོཏི ཨནྟེཝཱསིཾ ཝཱ སདྡྷིཝིཧཱརིཾ ཝཱ གིལཱནཾ ཨུཔཊྛཱཏུཾ ཝཱ ཨུཔཊྛཱཔེཏུཾ ཝཱ, ཨནབྷིརཏཾ ཝཱུཔཀཱསེཏུཾ ཝཱ ཝཱུཔཀཱསཱཔེཏུཾ ཝཱ, ཨུཔྤནྣཾ ཀུཀྐུཙྩཾ དྷམྨཏོ ཝིནོདེཏུཾ, ཨབྷིདྷམྨེ ཝིནེཏུཾ, ཨབྷིཝིནཡེ ཝིནེཏུཾ – ཨིམེཧི ཁོ, ཨུཔཱལི, པཉྩཧངྒེཧི སམནྣཱགཏེན བྷིཀྑུནཱ ཨུཔསམྤཱདེཏབྦཾ, ནིསྶཡོ དཱཏབྦོ, སཱམཎེརོ ཨུཔཊྛཱཔེཏབྦོ།
5 ‘‘Pañcahupāli, aṅgehi samannāgatena bhikkhunā na upasampādetabbaṃ, na nissayo dātabbo, na sāmaṇero upaṭṭhāpetabbo. Katamehi pañcahi? Na paṭibalo hoti antevāsiṃ vā saddhivihāriṃ vā gilānaṃ upaṭṭhātuṃ vā upaṭṭhāpetuṃ vā, anabhirataṃ vūpakāsetuṃ vā vūpakāsāpetuṃ vā, uppannaṃ kukkuccaṃ dhammato vinodetuṃ 6, abhidhamme vinetuṃ, abhivinaye vinetuṃ – imehi kho, upāli, pañcahaṅgehi samannāgatena bhikkhunā na upasampādetabbaṃ, na nissayo dātabbo, na sāmaṇero upaṭṭhāpetabbo. Pañcahupāli, aṅgehi samannāgatena bhikkhunā upasampādetabbaṃ, nissayo dātabbo, sāmaṇero upaṭṭhāpetabbo. Katamehi pañcahi? Paṭibalo hoti antevāsiṃ vā saddhivihāriṃ vā gilānaṃ upaṭṭhātuṃ vā upaṭṭhāpetuṃ vā, anabhirataṃ vūpakāsetuṃ vā vūpakāsāpetuṃ vā, uppannaṃ kukkuccaṃ dhammato vinodetuṃ, abhidhamme vinetuṃ, abhivinaye vinetuṃ – imehi kho, upāli, pañcahaṅgehi samannāgatena bhikkhunā upasampādetabbaṃ, nissayo dātabbo, sāmaṇero upaṭṭhāpetabbo.
‘‘ཨཔརེཧིཔི, ཨུཔཱལི, པཉྩཧངྒེཧི སམནྣཱགཏེན བྷིཀྑུནཱ ན ཨུཔསམྤཱདེཏབྦཾ, ན ནིསྶཡོ དཱཏབྦོ, ན སཱམཎེརོ ཨུཔཊྛཱཔེཏབྦོ། ཀཏམེཧི པཉྩཧི ? ན པཊིབལོ ཧོཏི ཨནྟེཝཱསིཾ ཝཱ སདྡྷིཝིཧཱརིཾ ཝཱ ཨབྷིསམཱཙཱརིཀཱཡ སིཀྑཱཡ སིཀྑཱཔེཏུཾ, ཨཱདིབྲཧྨཙཱརིཡཀཱཡ སིཀྑཱཡ ཝིནེཏུཾ, ཨདྷིསཱིལེ ཝིནེཏུཾ, ཨདྷིཙིཏྟེ ཝིནེཏུཾ, ཨདྷིཔཉྙཱཡ ཝིནེཏུཾ – ཨིམེཧི ཁོ, ཨུཔཱལི, པཉྩཧངྒེཧི སམནྣཱགཏེན བྷིཀྑུནཱ ན ཨུཔསམྤཱདེཏབྦཾ, ན ནིསྶཡོ དཱཏབྦོ, ན སཱམཎེརོ ཨུཔཊྛཱཔེཏབྦོ། པཉྩཧུཔཱལི, ཨངྒེཧི སམནྣཱགཏེན བྷིཀྑུནཱ ཨུཔསམྤཱདེཏབྦཾ, ནིསྶཡོ དཱཏབྦོ, སཱམཎེརོ ཨུཔཊྛཱཔེཏབྦོ། ཀཏམེཧི པཉྩཧི? པཊིབལོ ཧོཏི ཨནྟེཝཱསིཾ ཝཱ སདྡྷིཝིཧཱརིཾ ཝཱ ཨབྷིསམཱཙཱརིཀཱཡ སིཀྑཱཡ སིཀྑཱཔེཏུཾ, ཨཱདིབྲཧྨཙཱརིཡཀཱཡ སིཀྑཱཡ ཝིནེཏུཾ, ཨདྷིསཱིལེ ཝིནེཏུཾ, ཨདྷིཙིཏྟེ ཝིནེཏུཾ, ཨདྷིཔཉྙཱཡ ཝིནེཏུཾ – ཨིམེཧི ཁོ, ཨུཔཱལི, པཉྩཧངྒེཧི སམནྣཱགཏེན བྷིཀྑུནཱ ཨུཔསམྤཱདེཏབྦཾ, ནིསྶཡོ དཱཏབྦོ, སཱམཎེརོ ཨུཔཊྛཱཔེཏབྦོ’’ཏི།
‘‘Aparehipi, upāli, pañcahaṅgehi samannāgatena bhikkhunā na upasampādetabbaṃ, na nissayo dātabbo, na sāmaṇero upaṭṭhāpetabbo. Katamehi pañcahi ? Na paṭibalo hoti antevāsiṃ vā saddhivihāriṃ vā abhisamācārikāya sikkhāya sikkhāpetuṃ, ādibrahmacāriyakāya sikkhāya vinetuṃ, adhisīle vinetuṃ, adhicitte vinetuṃ, adhipaññāya vinetuṃ – imehi kho, upāli, pañcahaṅgehi samannāgatena bhikkhunā na upasampādetabbaṃ, na nissayo dātabbo, na sāmaṇero upaṭṭhāpetabbo. Pañcahupāli, aṅgehi samannāgatena bhikkhunā upasampādetabbaṃ, nissayo dātabbo, sāmaṇero upaṭṭhāpetabbo. Katamehi pañcahi? Paṭibalo hoti antevāsiṃ vā saddhivihāriṃ vā abhisamācārikāya sikkhāya sikkhāpetuṃ, ādibrahmacāriyakāya sikkhāya vinetuṃ, adhisīle vinetuṃ, adhicitte vinetuṃ, adhipaññāya vinetuṃ – imehi kho, upāli, pañcahaṅgehi samannāgatena bhikkhunā upasampādetabbaṃ, nissayo dātabbo, sāmaṇero upaṭṭhāpetabbo’’ti.
༤༡༩. ‘‘ཀཏིཧི ནུ ཁོ, བྷནྟེ, ཨངྒེཧི སམནྣཱགཏསྶ བྷིཀྑུནོ ཀམྨཾ ཀཱཏབྦ’’ནྟི?
419. ‘‘Katihi nu kho, bhante, aṅgehi samannāgatassa bhikkhuno kammaṃ kātabba’’nti?
པཉྩཧུཔཱལི, ཨངྒེཧི སམནྣཱགཏསྶ བྷིཀྑུནོ ཀམྨཾ ཀཱཏབྦཾ། ཀཏམེཧི པཉྩཧི? ཨལཛྫཱི ཙ ཧོཏི, བཱལོ ཙ, ཨཔཀཏཏྟོ ཙ, མིཙྪཱདིཊྛིཀོ ཙ ཧོཏི, ཨཱཛཱིཝཝིཔནྣོ ཙ – ཨིམེཧི ཁོ, ཨུཔཱལི, པཉྩཧངྒེཧི སམནྣཱགཏསྶ བྷིཀྑུནོ ཀམྨཾ ཀཱཏབྦཾ།
Pañcahupāli, aṅgehi samannāgatassa bhikkhuno kammaṃ kātabbaṃ. Katamehi pañcahi? Alajjī ca hoti, bālo ca, apakatatto ca, micchādiṭṭhiko ca hoti, ājīvavipanno ca – imehi kho, upāli, pañcahaṅgehi samannāgatassa bhikkhuno kammaṃ kātabbaṃ.
‘‘ཨཔརེཧིཔི, ཨུཔཱལི, པཉྩཧངྒེཧི སམནྣཱགཏསྶ བྷིཀྑུནོ ཀམྨཾ ཀཱཏབྦཾ། ཀཏམེཧི པཉྩཧི? ཨདྷིསཱིལེ སཱིལཝིཔནྣོ ཧོཏི, ཨཛ྄ཛྷཱཙཱརེ ཨཱཙཱརཝིཔནྣོ ཧོཏི, ཨཏིདིཊྛིཡཱ དིཊྛིཝིཔནྣོ ཧོཏི , མིཙྪཱདིཊྛིཀོ ཙ ཧོཏི, ཨཱཛཱིཝཝིཔནྣོ ཙ – ཨིམེཧི ཁོ, ཨུཔཱལི, པཉྩཧངྒེཧི སམནྣཱགཏསྶ བྷིཀྑུནོ ཀམྨཾ ཀཱཏབྦཾ།
‘‘Aparehipi, upāli, pañcahaṅgehi samannāgatassa bhikkhuno kammaṃ kātabbaṃ. Katamehi pañcahi? Adhisīle sīlavipanno hoti, ajjhācāre ācāravipanno hoti, atidiṭṭhiyā diṭṭhivipanno hoti , micchādiṭṭhiko ca hoti, ājīvavipanno ca – imehi kho, upāli, pañcahaṅgehi samannāgatassa bhikkhuno kammaṃ kātabbaṃ.
‘‘ཨཔརེཧིཔི, ཨུཔཱལི, པཉྩཧངྒེཧི སམནྣཱགཏསྶ བྷིཀྑུནོ ཀམྨཾ ཀཱཏབྦཾ། ཀཏམེཧི པཉྩཧི? ཀཱཡིཀེན དཝེན སམནྣཱགཏོ ཧོཏི, ཝཱཙསིཀེན དཝེན སམནྣཱགཏོ ཧོཏི, ཀཱཡིཀཝཱཙསིཀེན དཝེན སམནྣཱགཏོ ཧོཏི, མིཙྪཱདིཊྛིཀོ ཙ ཧོཏི, ཨཱཛཱིཝཝིཔནྣོ ཙ – ཨིམེཧི ཁོ, ཨུཔཱལི, པཉྩཧངྒེཧི སམནྣཱགཏསྶ བྷིཀྑུནོ ཀམྨཾ ཀཱཏབྦཾ།
‘‘Aparehipi, upāli, pañcahaṅgehi samannāgatassa bhikkhuno kammaṃ kātabbaṃ. Katamehi pañcahi? Kāyikena davena samannāgato hoti, vācasikena davena samannāgato hoti, kāyikavācasikena davena samannāgato hoti, micchādiṭṭhiko ca hoti, ājīvavipanno ca – imehi kho, upāli, pañcahaṅgehi samannāgatassa bhikkhuno kammaṃ kātabbaṃ.
‘‘ཨཔརེཧིཔི , ཨུཔཱལི, པཉྩཧངྒེཧི སམནྣཱགཏསྶ བྷིཀྑུནོ ཀམྨཾ ཀཱཏབྦཾ། ཀཏམེཧི པཉྩཧི? ཀཱཡིཀེན ཨནཱཙཱརེན སམནྣཱགཏོ ཧོཏི , ཝཱཙསིཀེན ཨནཱཙཱརེན སམནྣཱགཏོ ཧོཏི, ཀཱཡིཀཝཱཙསིཀེན ཨནཱཙཱརེན སམནྣཱགཏོ ཧོཏི, མིཙྪཱདིཊྛིཀོ ཙ ཧོཏི, ཨཱཛཱིཝཝིཔནྣོ ཙ – ཨིམེཧི ཁོ, ཨུཔཱལི, པཉྩཧངྒེཧི སམནྣཱགཏསྶ བྷིཀྑུནོ ཀམྨཾ ཀཱཏབྦཾ།
‘‘Aparehipi , upāli, pañcahaṅgehi samannāgatassa bhikkhuno kammaṃ kātabbaṃ. Katamehi pañcahi? Kāyikena anācārena samannāgato hoti , vācasikena anācārena samannāgato hoti, kāyikavācasikena anācārena samannāgato hoti, micchādiṭṭhiko ca hoti, ājīvavipanno ca – imehi kho, upāli, pañcahaṅgehi samannāgatassa bhikkhuno kammaṃ kātabbaṃ.
‘‘ཨཔརེཧིཔི, ཨུཔཱལི, པཉྩཧངྒེཧི སམནྣཱགཏསྶ བྷིཀྑུནོ ཀམྨཾ ཀཱཏབྦཾ། ཀཏམེཧི པཉྩཧི? ཀཱཡིཀེན ཨུཔགྷཱཏིཀེན སམནྣཱགཏོ ཧོཏི, ཝཱཙསིཀེན ཨུཔགྷཱཏིཀེན སམནྣཱགཏོ ཧོཏི, ཀཱཡིཀཝཱཙསིཀེན ཨུཔགྷཱཏིཀེན སམནྣཱགཏོ ཧོཏི, མིཙྪཱདིཊྛིཀོ ཙ ཧོཏི, ཨཱཛཱིཝཝིཔནྣོ ཙ – ཨིམེཧི ཁོ, ཨུཔཱལི, པཉྩཧངྒེཧི སམནྣཱགཏསྶ བྷིཀྑུནོ ཀམྨཾ ཀཱཏབྦཾ།
‘‘Aparehipi, upāli, pañcahaṅgehi samannāgatassa bhikkhuno kammaṃ kātabbaṃ. Katamehi pañcahi? Kāyikena upaghātikena samannāgato hoti, vācasikena upaghātikena samannāgato hoti, kāyikavācasikena upaghātikena samannāgato hoti, micchādiṭṭhiko ca hoti, ājīvavipanno ca – imehi kho, upāli, pañcahaṅgehi samannāgatassa bhikkhuno kammaṃ kātabbaṃ.
‘‘ཨཔརེཧིཔི, ཨུཔཱལི, པཉྩཧངྒེཧི སམནྣཱགཏསྶ བྷིཀྑུནོ ཀམྨཾ ཀཱཏབྦཾ། ཀཏམེཧི པཉྩཧི? ཀཱཡིཀེན མིཙྪཱཛཱིཝེན སམནྣཱགཏོ ཧོཏི, ཝཱཙསིཀེན མིཙྪཱཛཱིཝེན སམནྣཱགཏོ ཧོཏི, ཀཱཡིཀཝཱཙསིཀེན མིཙྪཱཛཱིཝེན སམནྣཱགཏོ ཧོཏི, མིཙྪཱདིཊྛིཀོ ཙ ཧོཏི, ཨཱཛཱིཝཝིཔནྣོ ཙ – ཨིམེཧི ཁོ, ཨུཔཱལི, པཉྩཧངྒེཧི སམནྣཱགཏསྶ བྷིཀྑུནོ ཀམྨཾ ཀཱཏབྦཾ།
‘‘Aparehipi, upāli, pañcahaṅgehi samannāgatassa bhikkhuno kammaṃ kātabbaṃ. Katamehi pañcahi? Kāyikena micchājīvena samannāgato hoti, vācasikena micchājīvena samannāgato hoti, kāyikavācasikena micchājīvena samannāgato hoti, micchādiṭṭhiko ca hoti, ājīvavipanno ca – imehi kho, upāli, pañcahaṅgehi samannāgatassa bhikkhuno kammaṃ kātabbaṃ.
‘‘ཨཔརེཧིཔི, ཨུཔཱལི, པཉྩཧངྒེཧི སམནྣཱགཏསྶ བྷིཀྑུནོ ཀམྨཾ ཀཱཏབྦཾ། ཀཏམེཧི པཉྩཧི? ཨཱཔཏྟིཾ ཨཱཔནྣོ ཀམྨཀཏོ ཨུཔསམྤཱདེཏི, ནིསྶཡཾ དེཏི, སཱམཎེརཾ ཨུཔཊྛཱཔེཏི, བྷིཀྑུནོཝཱདཀསམྨུཏིཾ སཱདིཡཏི, སམྨཏོཔི བྷིཀྑུནིཡོ ཨོཝདཏི – ཨིམེཧི ཁོ, ཨུཔཱལི, པཉྩཧངྒེཧི སམནྣཱགཏསྶ བྷིཀྑུནོ ཀམྨཾ ཀཱཏབྦཾ།
‘‘Aparehipi, upāli, pañcahaṅgehi samannāgatassa bhikkhuno kammaṃ kātabbaṃ. Katamehi pañcahi? Āpattiṃ āpanno kammakato upasampādeti, nissayaṃ deti, sāmaṇeraṃ upaṭṭhāpeti, bhikkhunovādakasammutiṃ sādiyati, sammatopi bhikkhuniyo ovadati – imehi kho, upāli, pañcahaṅgehi samannāgatassa bhikkhuno kammaṃ kātabbaṃ.
‘‘ཨཔརེཧིཔི, ཨུཔཱལི, པཉྩཧངྒེཧི སམནྣཱགཏསྶ བྷིཀྑུནོ ཀམྨཾ ཀཱཏབྦཾ། ཀཏམེཧི པཉྩཧི? ཡཱཡ ཨཱཔཏྟིཡཱ སངྒྷེན ཀམྨཾ ཀཏཾ ཧོཏི ཏཾ ཨཱཔཏྟིཾ ཨཱཔཛྫཏི, ཨཉྙཾ ཝཱ ཏཱདིསིཀཾ, ཏཏོ ཝཱ པཱཔིཊྛཏརཾ, ཀམྨཾ གརཧཏི, ཀམྨིཀེ གརཧཏི – ཨིམེཧི ཁོ, ཨུཔཱལི, པཉྩཧངྒེཧི སམནྣཱགཏསྶ བྷིཀྑུནོ ཀམྨཾ ཀཱཏབྦཾ།
‘‘Aparehipi, upāli, pañcahaṅgehi samannāgatassa bhikkhuno kammaṃ kātabbaṃ. Katamehi pañcahi? Yāya āpattiyā saṅghena kammaṃ kataṃ hoti taṃ āpattiṃ āpajjati, aññaṃ vā tādisikaṃ, tato vā pāpiṭṭhataraṃ, kammaṃ garahati, kammike garahati – imehi kho, upāli, pañcahaṅgehi samannāgatassa bhikkhuno kammaṃ kātabbaṃ.
‘‘ཨཔརེཧིཔི , ཨུཔཱལི, པཉྩཧངྒེཧི སམནྣཱགཏསྶ བྷིཀྑུནོ ཀམྨཾ ཀཱཏབྦཾ། ཀཏམེཧི པཉྩཧི? བུདྡྷསྶ ཨཝཎྞཾ བྷཱསཏི, དྷམྨསྶ ཨཝཎྞཾ བྷཱསཏི, སངྒྷསྶ ཨཝཎྞཾ བྷཱསཏི, མིཙྪཱདིཊྛིཀོ ཙ ཧོཏི, ཨཱཛཱིཝཝིཔནྣོ ཙ – ཨིམེཧི ཁོ, ཨུཔཱལི, པཉྩཧངྒེཧི སམནྣཱགཏསྶ བྷིཀྑུནོ ཀམྨཾ ཀཱཏབྦ’’ནྟི།
‘‘Aparehipi , upāli, pañcahaṅgehi samannāgatassa bhikkhuno kammaṃ kātabbaṃ. Katamehi pañcahi? Buddhassa avaṇṇaṃ bhāsati, dhammassa avaṇṇaṃ bhāsati, saṅghassa avaṇṇaṃ bhāsati, micchādiṭṭhiko ca hoti, ājīvavipanno ca – imehi kho, upāli, pañcahaṅgehi samannāgatassa bhikkhuno kammaṃ kātabba’’nti.
ཨནིསྶིཏཝགྒོ ནིཊྛིཏོ པཋམོ།
Anissitavaggo niṭṭhito paṭhamo.
ཏསྶུདྡཱནཾ –
Tassuddānaṃ –
ཨུཔོསཐཾ པཝཱརཎཾ, ཨཱཔཏྟི ཙ གིལཱནཀཾ།
Uposathaṃ pavāraṇaṃ, āpatti ca gilānakaṃ;
ཨབྷིསམཱཙཱརལཛྫཱི ཙ, ཨདྷིསཱིལེ དཝེན ཙ༎
Abhisamācāralajjī ca, adhisīle davena ca.
ཨནཱཙཱརཾ ཨུཔགྷཱཏི, མིཙྪཱ ཨཱཔཏྟིམེཝ ཙ།
Anācāraṃ upaghāti, micchā āpattimeva ca;
ཡཱཡཱཔཏྟིཡཱ བུདྡྷསྶ, པཋམོ ཝགྒསངྒཧོཏི༎
Yāyāpattiyā buddhassa, paṭhamo vaggasaṅgahoti.
Footnotes:
Related texts:
ཨཊྛཀཐཱ • Aṭṭhakathā / ཝིནཡཔིཊཀ (ཨཊྛཀཐཱ) • Vinayapiṭaka (aṭṭhakathā) / པརིཝཱར-ཨཊྛཀཐཱ • Parivāra-aṭṭhakathā / ཨནིསྶིཏཝགྒཝཎྞནཱ • Anissitavaggavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝཛིརབུདྡྷི-ཊཱིཀཱ • Vajirabuddhi-ṭīkā / ཨནིསྶིཏཝགྒཝཎྞནཱ • Anissitavaggavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / པཱཙིཏྱཱདིཡོཛནཱཔཱལི༹ • Pācityādiyojanāpāḷi / ཨནིསྶིཏཝགྒཝཎྞནཱ • Anissitavaggavaṇṇanā
