| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
7. ஆணிஸுத்தவண்ணனா
7. Āṇisuttavaṇṇanā
229. ஸத்தமே த³ஸாரஹானந்தி ஏவங்னாமகானங் க²த்தியானங். தே கிர ஸததோ த³ஸபா⁴க³ங் க³ண்ஹிங்ஸு, தஸ்மா ‘‘த³ஸாரஹா’’தி பஞ்ஞாயிங்ஸு. ஆனகோதி ஏவங்லத்³த⁴னாமோ முதி³ங்கோ³. ஹிமவந்தே கிர மஹாகுளீரத³ஹோ அஹோஸி. தத்த² மஹந்தோ குளீரோ ஓதிண்ணோதிண்ணங் ஹத்தி²ங் கா²த³தி. அத² ஹத்தீ² உபத்³து³தா ஏகங் கரேணுங் ஸக்கரிங்ஸு ‘‘இமிஸ்ஸா புத்தங் நிஸ்ஸாய அம்ஹாகங் ஸொத்தி² ப⁴விஸ்ஸதீ’’தி. ஸாபி மஹேஸக்க²ங் புத்தங் விஜாயி. தே தம்பி ஸக்கரிங்ஸு. ஸோ வுத்³தி⁴ப்பத்தோ மாதரங் புச்சி², ‘‘கஸ்மா மங் ஏதே ஸக்கரொந்தீ’’தி? ஸா தங் பவத்திமாசிக்கி². ஸோ ‘‘கிங் மய்ஹங் குளீரோ பஹோதி? ஏத² க³ச்சா²மா’’தி மஹாஹத்தி²பரிவாரோ தத்த² க³ந்த்வா பட²மமேவ ஓதரி. குளீரோ உத³கஸத்³தே³னேவ ஆக³ந்த்வா தங் அக்³க³ஹேஸி. மஹந்தோ குளீரஸ்ஸ அளோ, ஸோ தங் இதோ வா எத்தோ வா சாலேதுங் அஸக்கொந்தோ முகே² ஸொண்ட³ங் பக்கி²பித்வா விரவி. ஹத்தி²னோ ‘‘யங்னிஸ்ஸாய மயங் ‘ஸொத்தி² ப⁴விஸ்ஸதீ’தி அமஞ்ஞிம்ஹா, ஸோ பட²மதரங் க³ஹிதோ’’தி ததோ ததோ பலாயிங்ஸு.
229. Sattame dasārahānanti evaṃnāmakānaṃ khattiyānaṃ. Te kira satato dasabhāgaṃ gaṇhiṃsu, tasmā ‘‘dasārahā’’ti paññāyiṃsu. Ānakoti evaṃladdhanāmo mudiṅgo. Himavante kira mahākuḷīradaho ahosi. Tattha mahanto kuḷīro otiṇṇotiṇṇaṃ hatthiṃ khādati. Atha hatthī upaddutā ekaṃ kareṇuṃ sakkariṃsu ‘‘imissā puttaṃ nissāya amhākaṃ sotthi bhavissatī’’ti. Sāpi mahesakkhaṃ puttaṃ vijāyi. Te tampi sakkariṃsu. So vuddhippatto mātaraṃ pucchi, ‘‘kasmā maṃ ete sakkarontī’’ti? Sā taṃ pavattimācikkhi. So ‘‘kiṃ mayhaṃ kuḷīro pahoti? Etha gacchāmā’’ti mahāhatthiparivāro tattha gantvā paṭhamameva otari. Kuḷīro udakasaddeneva āgantvā taṃ aggahesi. Mahanto kuḷīrassa aḷo, so taṃ ito vā etto vā cāletuṃ asakkonto mukhe soṇḍaṃ pakkhipitvā viravi. Hatthino ‘‘yaṃnissāya mayaṃ ‘sotthi bhavissatī’ti amaññimhā, so paṭhamataraṃ gahito’’ti tato tato palāyiṃsu.
அத²ஸ்ஸ மாதா அவிதூ³ரே ட²த்வா ‘‘மயங் த²லனாகா³, தும்ஹே உத³கனாகா³ நாம, நாகே³ஹி நாகோ³ ந விஹேடே²தப்³போ³’’தி குளீரங் பியவசனேன வத்வா இமங் கா³த²மாஹ –
Athassa mātā avidūre ṭhatvā ‘‘mayaṃ thalanāgā, tumhe udakanāgā nāma, nāgehi nāgo na viheṭhetabbo’’ti kuḷīraṃ piyavacanena vatvā imaṃ gāthamāha –
‘‘யே குளீரா ஸமுத்³த³ஸ்மிங், க³ங்கா³ய யமுனாய ச;
‘‘Ye kuḷīrā samuddasmiṃ, gaṅgāya yamunāya ca;
தேஸங் த்வங் வாரிஜோ ஸெட்டோ², முஞ்ச ரோத³ந்தியா பஜ’’ந்தி.
Tesaṃ tvaṃ vārijo seṭṭho, muñca rodantiyā paja’’nti.
மாதுகா³மஸத்³தோ³ நாம புரிஸே கோ²பெ⁴த்வா திட்ட²தி, தஸ்மா ஸோ க³ஹணங் ஸிதி²லமகாஸி. ஹத்தி²போதோ வேகே³ன உபோ⁴ பாதே³ உக்கி²பித்வா தங் பிட்டி²யங் அக்கமி. ஸஹ அக்கமனா பிட்டி² மத்திகபா⁴ஜனங் விய பி⁴ஜ்ஜி. அத² நங் த³ந்தேஹி விஜ்ஜி²த்வா உக்கி²பித்வா த²லே ச²ட்³டெ³த்வா துட்ட²ரவங் ரவி. அத² நங் ஹத்தீ² இதோ சிதோ ச ஆக³ந்த்வா மத்³தி³ங்ஸு. தஸ்ஸ ஏகோ அளோ படிக்கமித்வா பதி, தங் ஸக்கோ தே³வராஜா க³ஹெத்வா க³தோ.
Mātugāmasaddo nāma purise khobhetvā tiṭṭhati, tasmā so gahaṇaṃ sithilamakāsi. Hatthipoto vegena ubho pāde ukkhipitvā taṃ piṭṭhiyaṃ akkami. Saha akkamanā piṭṭhi mattikabhājanaṃ viya bhijji. Atha naṃ dantehi vijjhitvā ukkhipitvā thale chaḍḍetvā tuṭṭharavaṃ ravi. Atha naṃ hatthī ito cito ca āgantvā maddiṃsu. Tassa eko aḷo paṭikkamitvā pati, taṃ sakko devarājā gahetvā gato.
இதரோ பன அளோ வாதாதபேன ஸுக்கி²த்வா பக்கலாகா²ரஸவண்ணோ அஹோஸி, ஸோ தே³வே வுட்டே² உத³கோகே⁴ன வுய்ஹந்தோ த³ஸபா⁴திகானங் ராஜூனங் உபரிஸோதே ஜாலங் பஸாராபெத்வா க³ங்கா³ய கீளந்தானங் ஆக³ந்த்வா ஜாலே லக்³கி³. தே கீளாபரியோஸானே ஜாலம்ஹி உக்கி²பியமானே தங் தி³ஸ்வா புச்சி²ங்ஸு ‘‘கிங் ஏத’’ந்தி? ‘‘குளீரஅளோ ஸாமீ’’தி. ‘‘ந ஸக்கா ஏஸ ஆப⁴ரணத்தா²ய உபனேதுங், பரியோனந்தா⁴பெத்வா பே⁴ரிங் கரிஸ்ஸாமா’’தி? பரியோனந்தா⁴பெத்வா பஹரிங்ஸு. ஸத்³தோ³ த்³வாத³ஸயோஜனங் நக³ரங் அவத்த²ரி. ததோ ஆஹங்ஸு – ‘‘ந ஸக்கா இத³ங் தி³வஸே தி³வஸே வாதே³துங், ச²ணதி³வஸத்தா²ய மங்க³லபே⁴ரீ ஹோதூ’’தி மங்க³லபே⁴ரிங் அகங்ஸு. தஸ்மிங் வாதி³தே மஹாஜனோ அன்ஹாயித்வா அபிளந்தி⁴த்வா ஹத்தி²யானாதீ³னி ஆருய்ஹ ஸீக⁴ங் ஸன்னிபதந்தி. இதி மஹாஜனங் பக்கோஸித்வா விய ஆனேதீதி ஆனகோ த்வேவஸ்ஸ நாமங் அஹோஸி.
Itaro pana aḷo vātātapena sukkhitvā pakkalākhārasavaṇṇo ahosi, so deve vuṭṭhe udakoghena vuyhanto dasabhātikānaṃ rājūnaṃ uparisote jālaṃ pasārāpetvā gaṅgāya kīḷantānaṃ āgantvā jāle laggi. Te kīḷāpariyosāne jālamhi ukkhipiyamāne taṃ disvā pucchiṃsu ‘‘kiṃ eta’’nti? ‘‘Kuḷīraaḷo sāmī’’ti. ‘‘Na sakkā esa ābharaṇatthāya upanetuṃ, pariyonandhāpetvā bheriṃ karissāmā’’ti? Pariyonandhāpetvā pahariṃsu. Saddo dvādasayojanaṃ nagaraṃ avatthari. Tato āhaṃsu – ‘‘na sakkā idaṃ divase divase vādetuṃ, chaṇadivasatthāya maṅgalabherī hotū’’ti maṅgalabheriṃ akaṃsu. Tasmiṃ vādite mahājano anhāyitvā apiḷandhitvā hatthiyānādīni āruyha sīghaṃ sannipatanti. Iti mahājanaṃ pakkositvā viya ānetīti ānako tvevassa nāmaṃ ahosi.
அஞ்ஞங் ஆணிங் ஓத³ஹிங்ஸூதி அஞ்ஞங் ஸுவண்ணரஜதாதி³மயங் ஆணிங் க⁴டயிங்ஸு. ஆணிஸங்கா⁴டோவ அவஸிஸ்ஸீதி ஸுவண்ணாதி³மயானங் ஆணீனங் ஸங்கா⁴டமத்தமேவ அவஸேஸங் அஹோஸி. அத²ஸ்ஸ த்³வாத³ஸயோஜனப்பமாணோ ஸத்³தோ³ அந்தோஸாலாயம்பி து³க்கே²ன ஸுய்யித்த².
Aññaṃāṇiṃ odahiṃsūti aññaṃ suvaṇṇarajatādimayaṃ āṇiṃ ghaṭayiṃsu. Āṇisaṅghāṭova avasissīti suvaṇṇādimayānaṃ āṇīnaṃ saṅghāṭamattameva avasesaṃ ahosi. Athassa dvādasayojanappamāṇo saddo antosālāyampi dukkhena suyyittha.
க³ம்பீ⁴ராதி பாளிவஸேன க³ம்பீ⁴ரா ஸல்லஸுத்தஸதி³ஸா. க³ம்பீ⁴ரத்தா²தி அத்த²வஸேன க³ம்பீ⁴ரா மஹாவேத³ல்லஸுத்தஸதி³ஸா (ம॰ நி॰ 1.449 ஆத³யோ). லோகுத்தராதி லோகுத்தரஅத்த²தீ³பகா. ஸுஞ்ஞதப்படிஸங்யுத்தாதி ஸத்தஸுஞ்ஞதத⁴ம்மமத்தமேவ பகாஸகா ஸங்கி²த்தஸங்யுத்தஸதி³ஸா. உக்³க³ஹேதப்³ப³ங் பரியாபுணிதப்³ப³ந்தி உக்³க³ஹேதப்³பே³ ச பரியாபுணிதப்³பே³ ச. கவிகதாதி கவீஹி கதா. இதரங் தஸ்ஸேவ வேவசனங். சித்தக்க²ராதி விசித்ரஅக்க²ரா. இதரங் தஸ்ஸேவ வேவசனங். பா³ஹிரகாதி ஸாஸனதோ ப³ஹிபூ⁴தா. ஸாவகபா⁴ஸிதாதி தேஸங் தேஸங் ஸாவகேஹி பா⁴ஸிதா. ஸுஸ்ஸூஸிஸ்ஸந்தீதி அக்க²ரசித்ததாய சேவ ஸவனஸம்பத்தியா ச அத்தமனா ஹுத்வா ஸாமணேரத³ஹரபி⁴க்கு²மாதுகா³மமஹாக³ஹபதிகாத³யோ ‘‘ஏஸ த⁴ம்மகதி²கோ’’தி ஸன்னிபதித்வா ஸோதுகாமா ப⁴விஸ்ஸந்தி. தஸ்மாதி யஸ்மா ததா²க³தபா⁴ஸிதா ஸுத்தந்தா அனுக்³க³ய்ஹமானா அந்தரதா⁴யந்தி, தஸ்மா. ஸத்தமங்.
Gambhīrāti pāḷivasena gambhīrā sallasuttasadisā. Gambhīratthāti atthavasena gambhīrā mahāvedallasuttasadisā (ma. ni. 1.449 ādayo). Lokuttarāti lokuttaraatthadīpakā. Suññatappaṭisaṃyuttāti sattasuññatadhammamattameva pakāsakā saṃkhittasaṃyuttasadisā. Uggahetabbaṃ pariyāpuṇitabbanti uggahetabbe ca pariyāpuṇitabbe ca. Kavikatāti kavīhi katā. Itaraṃ tasseva vevacanaṃ. Cittakkharāti vicitraakkharā. Itaraṃ tasseva vevacanaṃ. Bāhirakāti sāsanato bahibhūtā. Sāvakabhāsitāti tesaṃ tesaṃ sāvakehi bhāsitā. Sussūsissantīti akkharacittatāya ceva savanasampattiyā ca attamanā hutvā sāmaṇeradaharabhikkhumātugāmamahāgahapatikādayo ‘‘esa dhammakathiko’’ti sannipatitvā sotukāmā bhavissanti. Tasmāti yasmā tathāgatabhāsitā suttantā anuggayhamānā antaradhāyanti, tasmā. Sattamaṃ.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 7. ஆணிஸுத்தங் • 7. Āṇisuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 7. ஆணிஸுத்தவண்ணனா • 7. Āṇisuttavaṇṇanā
