| Library / Tipiṭaka / д̇ибидага • Tipiṭaka / сам̣яуд̇д̇анигааяа (адтагат̇аа) • Saṃyuttanikāya (aṭṭhakathā) |
7. аан̣исуд̇д̇аван̣н̣анаа
7. Āṇisuttavaṇṇanā
229. сад̇д̇амз д̣̇асаарахаананд̇и звам̣наамагаанам̣ кад̇д̇ияаанам̣. д̇з гира сад̇ад̇о д̣̇асабхааг̇ам̣ г̇ан̣хим̣су, д̇асмаа ‘‘д̣̇асаарахаа’’д̇и бан̃н̃ааяим̣су. аанагод̇и звам̣лад̣̇д̇ханаамо муд̣̇ин̇г̇о. химаванд̇з гира махаагул̣ийрад̣̇ахо ахоси. д̇ад̇т̇а маханд̇о гул̣ийро од̇ин̣н̣од̇ин̣н̣ам̣ хад̇т̇им̣ каад̣̇ад̇и. ат̇а хад̇т̇ий убад̣̇д̣̇уд̇аа згам̣ гарзн̣ум̣ саггарим̣су ‘‘имиссаа буд̇д̇ам̣ ниссааяа амхаагам̣ сод̇т̇и бхависсад̇ий’’д̇и. сааби махзсагкам̣ буд̇д̇ам̣ виж̇ааяи. д̇з д̇амби саггарим̣су. со вуд̣̇д̇хиббад̇д̇о маад̇арам̣ бужчи, ‘‘гасмаа мам̣ зд̇з саггаронд̇ий’’д̇и? саа д̇ам̣ бавад̇д̇имаажигки. со ‘‘гим̣ маяхам̣ гул̣ийро баход̇и? зт̇а г̇ажчаамаа’’д̇и махаахад̇т̇ибаривааро д̇ад̇т̇а г̇анд̇ваа батамамзва од̇ари. гул̣ийро уд̣̇агасад̣̇д̣̇знзва ааг̇анд̇ваа д̇ам̣ аг̇г̇ахзси. маханд̇о гул̣ийрасса ал̣о, со д̇ам̣ ид̇о ваа зд̇д̇о ваа жаалзд̇ум̣ асаггонд̇о мукз сон̣д̣ам̣ багкибид̇ваа вирави. хад̇т̇ино ‘‘яам̣ниссааяа маяам̣ ‘сод̇т̇и бхависсад̇ий’д̇и аман̃н̃имхаа, со батамад̇арам̣ г̇ахид̇о’’д̇и д̇ад̇о д̇ад̇о балааяим̣су.
229. Sattame dasārahānanti evaṃnāmakānaṃ khattiyānaṃ. Te kira satato dasabhāgaṃ gaṇhiṃsu, tasmā ‘‘dasārahā’’ti paññāyiṃsu. Ānakoti evaṃladdhanāmo mudiṅgo. Himavante kira mahākuḷīradaho ahosi. Tattha mahanto kuḷīro otiṇṇotiṇṇaṃ hatthiṃ khādati. Atha hatthī upaddutā ekaṃ kareṇuṃ sakkariṃsu ‘‘imissā puttaṃ nissāya amhākaṃ sotthi bhavissatī’’ti. Sāpi mahesakkhaṃ puttaṃ vijāyi. Te tampi sakkariṃsu. So vuddhippatto mātaraṃ pucchi, ‘‘kasmā maṃ ete sakkarontī’’ti? Sā taṃ pavattimācikkhi. So ‘‘kiṃ mayhaṃ kuḷīro pahoti? Etha gacchāmā’’ti mahāhatthiparivāro tattha gantvā paṭhamameva otari. Kuḷīro udakasaddeneva āgantvā taṃ aggahesi. Mahanto kuḷīrassa aḷo, so taṃ ito vā etto vā cāletuṃ asakkonto mukhe soṇḍaṃ pakkhipitvā viravi. Hatthino ‘‘yaṃnissāya mayaṃ ‘sotthi bhavissatī’ti amaññimhā, so paṭhamataraṃ gahito’’ti tato tato palāyiṃsu.
ат̇асса маад̇аа авид̣̇уурз тад̇ваа ‘‘маяам̣ т̇аланааг̇аа, д̇умхз уд̣̇аганааг̇аа наама, нааг̇зхи нааг̇о на вихзтзд̇аб̣б̣о’’д̇и гул̣ийрам̣ бияаважанзна вад̇ваа имам̣ г̇аат̇амааха –
Athassa mātā avidūre ṭhatvā ‘‘mayaṃ thalanāgā, tumhe udakanāgā nāma, nāgehi nāgo na viheṭhetabbo’’ti kuḷīraṃ piyavacanena vatvā imaṃ gāthamāha –
‘‘яз гул̣ийраа самуд̣̇д̣̇асмим̣, г̇ан̇г̇ааяа яамунааяа жа;
‘‘Ye kuḷīrā samuddasmiṃ, gaṅgāya yamunāya ca;
д̇зсам̣ д̇вам̣ ваариж̇о сздто, мун̃жа род̣̇анд̇ияаа баж̇а’’нд̇и.
Tesaṃ tvaṃ vārijo seṭṭho, muñca rodantiyā paja’’nti.
маад̇уг̇аамасад̣̇д̣̇о наама бурисз кобхзд̇ваа д̇идтад̇и, д̇асмаа со г̇ахан̣ам̣ сит̇иламагааси. хад̇т̇ибод̇о взг̇зна убхо баад̣̇з угкибид̇ваа д̇ам̣ бидтияам̣ аггами. саха аггаманаа бидти мад̇д̇игабхааж̇анам̣ вияа бхиж̇ж̇и. ат̇а нам̣ д̣̇анд̇зхи виж̇жхид̇ваа угкибид̇ваа т̇алз чад̣д̣зд̇ваа д̇удтаравам̣ рави. ат̇а нам̣ хад̇т̇ий ид̇о жид̇о жа ааг̇анд̇ваа мад̣̇д̣̇им̣су. д̇асса зго ал̣о бадиггамид̇ваа бад̇и, д̇ам̣ сагго д̣̇зварааж̇аа г̇ахзд̇ваа г̇ад̇о.
Mātugāmasaddo nāma purise khobhetvā tiṭṭhati, tasmā so gahaṇaṃ sithilamakāsi. Hatthipoto vegena ubho pāde ukkhipitvā taṃ piṭṭhiyaṃ akkami. Saha akkamanā piṭṭhi mattikabhājanaṃ viya bhijji. Atha naṃ dantehi vijjhitvā ukkhipitvā thale chaḍḍetvā tuṭṭharavaṃ ravi. Atha naṃ hatthī ito cito ca āgantvā maddiṃsu. Tassa eko aḷo paṭikkamitvā pati, taṃ sakko devarājā gahetvā gato.
ид̇аро бана ал̣о ваад̇аад̇абзна сугкид̇ваа баггалаакаарасаван̣н̣о ахоси, со д̣̇звз вудтз уд̣̇агогхзна вуяханд̇о д̣̇асабхаад̇игаанам̣ рааж̇уунам̣ убарисод̇з ж̇аалам̣ басаараабзд̇ваа г̇ан̇г̇ааяа гийл̣анд̇аанам̣ ааг̇анд̇ваа ж̇аалз лаг̇г̇и. д̇з гийл̣аабарияосаанз ж̇ааламхи угкибияамаанз д̇ам̣ д̣̇исваа бужчим̣су ‘‘гим̣ зд̇а’’нд̇и? ‘‘гул̣ийраал̣о саамий’’д̇и. ‘‘на саггаа зса аабхаран̣ад̇т̇ааяа убанзд̇ум̣, барияонанд̇хаабзд̇ваа бхзрим̣ гариссаамаа’’д̇и? барияонанд̇хаабзд̇ваа бахарим̣су. сад̣̇д̣̇о д̣̇ваад̣̇асаяож̇анам̣ наг̇арам̣ авад̇т̇ари. д̇ад̇о аахам̣су – ‘‘на саггаа ид̣̇ам̣ д̣̇ивасз д̣̇ивасз ваад̣̇зд̇ум̣, чан̣ад̣̇ивасад̇т̇ааяа ман̇г̇алабхзрий ход̇уу’’д̇и ман̇г̇алабхзрим̣ агам̣су. д̇асмим̣ ваад̣̇ид̇з махааж̇ано анхааяид̇ваа абил̣анд̇хид̇ваа хад̇т̇ияаанаад̣̇ийни ааруяха сийгхам̣ саннибад̇анд̇и. ид̇и махааж̇анам̣ баггосид̇ваа вияа аанзд̇ийд̇и аанаго д̇взвасса наамам̣ ахоси.
Itaro pana aḷo vātātapena sukkhitvā pakkalākhārasavaṇṇo ahosi, so deve vuṭṭhe udakoghena vuyhanto dasabhātikānaṃ rājūnaṃ uparisote jālaṃ pasārāpetvā gaṅgāya kīḷantānaṃ āgantvā jāle laggi. Te kīḷāpariyosāne jālamhi ukkhipiyamāne taṃ disvā pucchiṃsu ‘‘kiṃ eta’’nti? ‘‘Kuḷīraaḷo sāmī’’ti. ‘‘Na sakkā esa ābharaṇatthāya upanetuṃ, pariyonandhāpetvā bheriṃ karissāmā’’ti? Pariyonandhāpetvā pahariṃsu. Saddo dvādasayojanaṃ nagaraṃ avatthari. Tato āhaṃsu – ‘‘na sakkā idaṃ divase divase vādetuṃ, chaṇadivasatthāya maṅgalabherī hotū’’ti maṅgalabheriṃ akaṃsu. Tasmiṃ vādite mahājano anhāyitvā apiḷandhitvā hatthiyānādīni āruyha sīghaṃ sannipatanti. Iti mahājanaṃ pakkositvā viya ānetīti ānako tvevassa nāmaṃ ahosi.
ан̃н̃ам̣ аан̣им̣ од̣̇ахим̣сууд̇и ан̃н̃ам̣ суван̣н̣араж̇ад̇аад̣̇имаяам̣ аан̣им̣ гхадаяим̣су. аан̣исан̇гхаадова авасиссийд̇и суван̣н̣аад̣̇имаяаанам̣ аан̣ийнам̣ сан̇гхаадамад̇д̇амзва авасзсам̣ ахоси. ат̇асса д̣̇ваад̣̇асаяож̇анаббамаан̣о сад̣̇д̣̇о анд̇осаалааяамби д̣̇угкзна суяяид̇т̇а.
Aññaṃāṇiṃ odahiṃsūti aññaṃ suvaṇṇarajatādimayaṃ āṇiṃ ghaṭayiṃsu. Āṇisaṅghāṭova avasissīti suvaṇṇādimayānaṃ āṇīnaṃ saṅghāṭamattameva avasesaṃ ahosi. Athassa dvādasayojanappamāṇo saddo antosālāyampi dukkhena suyyittha.
г̇амбхийраад̇и баал̣ивасзна г̇амбхийраа салласуд̇д̇асад̣̇исаа. г̇амбхийрад̇т̇аад̇и ад̇т̇авасзна г̇амбхийраа махаавзд̣̇алласуд̇д̇асад̣̇исаа (ма. ни. 1.449 аад̣̇аяо). логуд̇д̇араад̇и логуд̇д̇араад̇т̇ад̣̇ийбагаа. сун̃н̃ад̇аббадисам̣яуд̇д̇аад̇и сад̇д̇асун̃н̃ад̇ад̇хаммамад̇д̇амзва багаасагаа сам̣кид̇д̇асам̣яуд̇д̇асад̣̇исаа. уг̇г̇ахзд̇аб̣б̣ам̣ барияаабун̣ид̇аб̣б̣анд̇и уг̇г̇ахзд̇аб̣б̣з жа барияаабун̣ид̇аб̣б̣з жа. гавигад̇аад̇и гавийхи гад̇аа. ид̇арам̣ д̇ассзва взважанам̣. жид̇д̇агкараад̇и вижид̇раагкараа. ид̇арам̣ д̇ассзва взважанам̣. б̣аахирагаад̇и саасанад̇о б̣ахибхууд̇аа. саавагабхаасид̇аад̇и д̇зсам̣ д̇зсам̣ саавагзхи бхаасид̇аа. суссуусиссанд̇ийд̇и агкаражид̇д̇ад̇ааяа жзва саванасамбад̇д̇ияаа жа ад̇д̇аманаа худ̇ваа сааман̣зрад̣̇ахарабхигкумаад̇уг̇аамамахааг̇ахабад̇игаад̣̇аяо ‘‘зса д̇хаммагат̇иго’’д̇и саннибад̇ид̇ваа сод̇угаамаа бхависсанд̇и. д̇асмаад̇и яасмаа д̇ат̇ааг̇ад̇абхаасид̇аа суд̇д̇анд̇аа ануг̇г̇аяхамаанаа анд̇арад̇хааяанд̇и, д̇асмаа. сад̇д̇амам̣.
Gambhīrāti pāḷivasena gambhīrā sallasuttasadisā. Gambhīratthāti atthavasena gambhīrā mahāvedallasuttasadisā (ma. ni. 1.449 ādayo). Lokuttarāti lokuttaraatthadīpakā. Suññatappaṭisaṃyuttāti sattasuññatadhammamattameva pakāsakā saṃkhittasaṃyuttasadisā. Uggahetabbaṃ pariyāpuṇitabbanti uggahetabbe ca pariyāpuṇitabbe ca. Kavikatāti kavīhi katā. Itaraṃ tasseva vevacanaṃ. Cittakkharāti vicitraakkharā. Itaraṃ tasseva vevacanaṃ. Bāhirakāti sāsanato bahibhūtā. Sāvakabhāsitāti tesaṃ tesaṃ sāvakehi bhāsitā. Sussūsissantīti akkharacittatāya ceva savanasampattiyā ca attamanā hutvā sāmaṇeradaharabhikkhumātugāmamahāgahapatikādayo ‘‘esa dhammakathiko’’ti sannipatitvā sotukāmā bhavissanti. Tasmāti yasmā tathāgatabhāsitā suttantā anuggayhamānā antaradhāyanti, tasmā. Sattamaṃ.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / сам̣яуд̇д̇анигааяа • Saṃyuttanikāya / 7. аан̣исуд̇д̇ам̣ • 7. Āṇisuttaṃ
дийгаа • Tīkā / суд̇д̇абидага (дийгаа) • Suttapiṭaka (ṭīkā) / сам̣яуд̇д̇анигааяа (дийгаа) • Saṃyuttanikāya (ṭīkā) / 7. аан̣исуд̇д̇аван̣н̣анаа • 7. Āṇisuttavaṇṇanā
