| Library / Tipiṭaka / திபிடக • Tipiṭaka / த்³வேமாதிகாபாளி • Dvemātikāpāḷi |
அனியதகண்டோ³
Aniyatakaṇḍo
1. பட²மானியதஸிக்கா²பத³வண்ணனா
1. Paṭhamāniyatasikkhāpadavaṇṇanā
அனியதுத்³தே³ஸே இமே கோ² பனாதிஆதி³ வுத்தனயமேவ. மாதுகா³மேனாதி தத³ஹுஜாதாயபி ஜீவமானகமனுஸ்ஸித்தி²யா. ஏகோ ஏகாயாதி ஏகோ பி⁴க்கு² மாதுகா³மஸங்கா²தாய ஏகாய இத்தி²யா ஸத்³தி⁴ங். ரஹோதி சக்கு²ஸ்ஸ ரஹோ. கிஞ்சாபி பாளியங் (பாரா॰ 445) ஸோதஸ்ஸ ரஹோ ஆக³தோ, சக்கு²ஸ்ஸேவ பன ரஹோ ‘‘ரஹோ’’தி இத⁴ அதி⁴ப்பேதோ. ஸசேபி ஹி பிஹிதகவாடஸ்ஸ க³ப்³ப⁴ஸ்ஸ த்³வாரே நிஸின்னோ விஞ்ஞூ புரிஸோ ஹோதி, நேவ அனாபத்திங் கரோதி. யத்த² பன ஸக்கா த³ட்டு²ங், தாதி³ஸே அந்தொத்³வாத³ஸஹத்தே²பி ஓகாஸே நிஸின்னோ ஸசக்கு²கோ விக்கி²த்தசித்தோபி நித்³தா³யந்தோபி அனாபத்திங் கரோதி, ஸமீபே டி²தோபி அந்தோ⁴ ந கரோதி, சக்கு²மாபி நிபஜ்ஜித்வா நித்³தா³யந்தோபி ந கரோதி, இத்தீ²னங் பன ஸதம்பி ந கரோதியேவ, தேன வுத்தங் ‘‘ரஹோதி சக்கு²ஸ்ஸ ரஹோ’’தி. படிச்ச²ன்னே ஆஸனேதி குட்டாதீ³ஹி படிச்ச²ன்னோகாஸே. அலங்கம்மனியேதி கம்மக்க²மங் கம்மயொக்³க³ந்தி கம்மனியங், அலங் பரியத்தங் கம்மனியபா⁴வாயாதி அலங்கம்மனியங், தஸ்மிங் அலங்கம்மனியே. யத்த² அஜ்ஜா²சாரங் கரொந்தா ஸக்கொந்தி தங் கம்மங் காதுங், தாதி³ஸேதி அத்தோ². நிஸஜ்ஜங் கப்பெய்யாதி நிஸஜ்ஜங் கரெய்ய, நிஸீதெ³ய்யாதி அத்தோ². எத்த² ச ஸயனம்பி நிஸஜ்ஜாய ஏவ ஸங்க³ஹிதங். ஸத்³தெ⁴ய்யவசஸாதி ஸத்³தா⁴தப்³ப³வசனா, அரியஸாவிகாதி அத்தோ². நிஸஜ்ஜங் பி⁴க்கு² படிஜானமானோதி கிஞ்சாபி ஏவரூபா உபாஸிகா தி³ஸ்வா வத³தி, அத² கோ² பி⁴க்கு² நிஸஜ்ஜங் படிஜானமானோவ திண்ணங் த⁴ம்மானங் அஞ்ஞதரேன காரேதப்³போ³, ந அப்படிஜானமானோதி அத்தோ². யேன வா ஸாதி நிஸஜ்ஜாதீ³ஸு ஆகாரேஸு யேன வா ஆகாரேன ஸத்³தி⁴ங் மேது²னாதீ³னி ஆரோபெத்வா ஸா உபாஸிகா வதெ³ய்ய, படிஜானமானோவ தேன ஸோ பி⁴க்கு² காரேதப்³போ³, ஏவரூபாயபி ஹி உபாஸிகாய வசனமத்தேன ஆகாரேன ந காரேதப்³போ³தி அத்தோ². கஸ்மா? யஸ்மா தி³ட்ட²ங் நாம ததா²பி ஹோதி, அஞ்ஞதா²பீதி. அயங் த⁴ம்மோ அனியதோதி திண்ணங் ஆபத்தீனங் யங் ஆபத்திங் வா வத்து²ங் வா படிஜானாதி, தஸ்ஸ வஸேன காரேதப்³ப³தாய அனியதோ.
Aniyatuddese ime kho panātiādi vuttanayameva. Mātugāmenāti tadahujātāyapi jīvamānakamanussitthiyā. Eko ekāyāti eko bhikkhu mātugāmasaṅkhātāya ekāya itthiyā saddhiṃ. Rahoti cakkhussa raho. Kiñcāpi pāḷiyaṃ (pārā. 445) sotassa raho āgato, cakkhusseva pana raho ‘‘raho’’ti idha adhippeto. Sacepi hi pihitakavāṭassa gabbhassa dvāre nisinno viññū puriso hoti, neva anāpattiṃ karoti. Yattha pana sakkā daṭṭhuṃ, tādise antodvādasahatthepi okāse nisinno sacakkhuko vikkhittacittopi niddāyantopi anāpattiṃ karoti, samīpe ṭhitopi andho na karoti, cakkhumāpi nipajjitvā niddāyantopi na karoti, itthīnaṃ pana satampi na karotiyeva, tena vuttaṃ ‘‘rahoti cakkhussa raho’’ti. Paṭicchanne āsaneti kuṭṭādīhi paṭicchannokāse. Alaṃkammaniyeti kammakkhamaṃ kammayogganti kammaniyaṃ, alaṃ pariyattaṃ kammaniyabhāvāyāti alaṃkammaniyaṃ, tasmiṃ alaṃkammaniye. Yattha ajjhācāraṃ karontā sakkonti taṃ kammaṃ kātuṃ, tādiseti attho. Nisajjaṃ kappeyyāti nisajjaṃ kareyya, nisīdeyyāti attho. Ettha ca sayanampi nisajjāya eva saṅgahitaṃ. Saddheyyavacasāti saddhātabbavacanā, ariyasāvikāti attho. Nisajjaṃ bhikkhu paṭijānamānoti kiñcāpi evarūpā upāsikā disvā vadati, atha kho bhikkhu nisajjaṃ paṭijānamānova tiṇṇaṃ dhammānaṃ aññatarena kāretabbo, na appaṭijānamānoti attho. Yena vā sāti nisajjādīsu ākāresu yena vā ākārena saddhiṃ methunādīni āropetvā sā upāsikā vadeyya, paṭijānamānova tena so bhikkhu kāretabbo, evarūpāyapi hi upāsikāya vacanamattena ākārena na kāretabboti attho. Kasmā? Yasmā diṭṭhaṃ nāma tathāpi hoti, aññathāpīti. Ayaṃ dhammo aniyatoti tiṇṇaṃ āpattīnaṃ yaṃ āpattiṃ vā vatthuṃ vā paṭijānāti, tassa vasena kāretabbatāya aniyato.
ஸாவத்தி²யங் உதா³யித்தே²ரங் ஆரப்³ப⁴ மாதுகா³மேன ஸத்³தி⁴ங் வுத்தப்பகாரே ஆஸனே நிஸஜ்ஜகப்பனவத்து²ஸ்மிங் பஞ்ஞத்தங், அஸாதா⁴ரணபஞ்ஞத்தி, அனாணத்திகங், மேது²னத⁴ம்மஸன்னிஸ்ஸிதகிலேஸஸங்கா²தேன ரஹஸ்ஸாதே³ன மாதுகா³மஸ்ஸ ஸந்திகங் க³ந்துகாமதாய அக்கி²அஞ்ஜனாதி³தோ பட்டா²ய ஸப்³ப³பயோகே³ஸு து³க்கடங். க³ந்த்வா தஸ்மிங் வா நிஸின்னே இத்தீ² நிஸீத³து, தஸ்ஸா வா நிஸின்னாய ஸோ நிஸீத³து, அபச்சா² அபுரிமங்யேவ உபோ⁴ வா நிஸீத³ந்து, உபி⁴ன்னங் நிஸஜ்ஜாய பாசித்தியங். ஸசே பன காயஸங்ஸக்³க³ங் வா மேது²னங் வா ஸமாபஜ்ஜதி, தேஸங் வஸேன காரேதப்³போ³. நிபஜ்ஜனேபி ஏஸேவ நயோ. வுத்தப்பகாரே புரிஸே நிபஜ்ஜித்வா அனித்³தா³யந்தே அனந்தே⁴ விஞ்ஞுபுரிஸே உபசாரக³தே ஸதி, டி²தஸ்ஸ, அரஹோபெக்க²ஸ்ஸ, அஞ்ஞவிஹிதஸ்ஸ ச நிஸஜ்ஜனபச்சயா அனாபத்தி. உம்மத்தகாதீ³னங் பன தீஹிபி ஆபத்தீஹி அனாபத்தி. ஸியா ஸீலவிபத்தி, ஸியா ஆசாரவிபத்தி. யங் பன ஆபத்திங் படிஜானாதி, தஸ்ஸா வஸேன அங்க³பே⁴தோ³ ஞாதப்³போ³. ஸமுட்டா²னாதீ³னி பட²மபாராஜிகஸதி³ஸானேவாதி.
Sāvatthiyaṃ udāyittheraṃ ārabbha mātugāmena saddhiṃ vuttappakāre āsane nisajjakappanavatthusmiṃ paññattaṃ, asādhāraṇapaññatti, anāṇattikaṃ, methunadhammasannissitakilesasaṅkhātena rahassādena mātugāmassa santikaṃ gantukāmatāya akkhiañjanādito paṭṭhāya sabbapayogesu dukkaṭaṃ. Gantvā tasmiṃ vā nisinne itthī nisīdatu, tassā vā nisinnāya so nisīdatu, apacchā apurimaṃyeva ubho vā nisīdantu, ubhinnaṃ nisajjāya pācittiyaṃ. Sace pana kāyasaṃsaggaṃ vā methunaṃ vā samāpajjati, tesaṃ vasena kāretabbo. Nipajjanepi eseva nayo. Vuttappakāre purise nipajjitvā aniddāyante anandhe viññupurise upacāragate sati, ṭhitassa, arahopekkhassa, aññavihitassa ca nisajjanapaccayā anāpatti. Ummattakādīnaṃ pana tīhipi āpattīhi anāpatti. Siyā sīlavipatti, siyā ācāravipatti. Yaṃ pana āpattiṃ paṭijānāti, tassā vasena aṅgabhedo ñātabbo. Samuṭṭhānādīni paṭhamapārājikasadisānevāti.
பட²மானியதஸிக்கா²பத³வண்ணனா நிட்டி²தா.
Paṭhamāniyatasikkhāpadavaṇṇanā niṭṭhitā.
2. து³தியானியதஸிக்கா²பத³வண்ணனா
2. Dutiyāniyatasikkhāpadavaṇṇanā
து³தியே இத்தீ²பி புரிஸோபி யோ கோசி விஞ்ஞூ அனந்தோ⁴ அப³தி⁴ரோ அந்தொத்³வாத³ஸஹத்தே² ஓகாஸே டி²தோ வா நிஸின்னோ வா விக்கி²த்தோபி நித்³தா³யந்தோபி அனாபத்திங் கரோதி. ப³தி⁴ரோ பன சக்கு²மாபி, அந்தோ⁴ வா அப³தி⁴ரோபி ந கரோதி. பாராஜிகாபத்திஞ்ச பரிஹாபெத்வா து³ட்டு²ல்லவாசாபத்தி வுத்தாதி அயங் விஸேஸோ. ஸேஸங் புரிமனயேனேவ வேதி³தப்³ப³ங். ஸமுட்டா²னாதீ³னி பனெத்த² அதி³ன்னாதா³னஸதி³ஸானேவாதி.
Dutiye itthīpi purisopi yo koci viññū anandho abadhiro antodvādasahatthe okāse ṭhito vā nisinno vā vikkhittopi niddāyantopi anāpattiṃ karoti. Badhiro pana cakkhumāpi, andho vā abadhiropi na karoti. Pārājikāpattiñca parihāpetvā duṭṭhullavācāpatti vuttāti ayaṃ viseso. Sesaṃ purimanayeneva veditabbaṃ. Samuṭṭhānādīni panettha adinnādānasadisānevāti.
து³தியானியதஸிக்கா²பத³வண்ணனா நிட்டி²தா.
Dutiyāniyatasikkhāpadavaṇṇanā niṭṭhitā.
உத்³தி³ட்டா² கோ²திஆதி³ ஸப்³ப³த்த² வுத்தனயேனேவ வேதி³தப்³ப³ங்.
Uddiṭṭhā khotiādi sabbattha vuttanayeneva veditabbaṃ.
கங்கா²விதரணியா பாதிமொக்க²வண்ணனாய
Kaṅkhāvitaraṇiyā pātimokkhavaṇṇanāya
அனியதவண்ணனா நிட்டி²தா.
Aniyatavaṇṇanā niṭṭhitā.
