| Library / Tipiṭaka / তিপিটক • Tipiṭaka / ৰিনযৰিনিচ্ছয-টীকা • Vinayavinicchaya-ṭīkā |
অনিযতকথাৰণ্ণনা
Aniyatakathāvaṇṇanā
৫৪২-৩. ইদানি সঙ্ঘাদিসেসকথানন্তরং অনিযতকথং দস্সেতুমাহ ‘‘রহোনিসজ্জস্সাদেনা’’তিআদি। রহসি নিসজ্জা রহোনিসজ্জা, তস্সা অস্সাদো রহোনিসজ্জস্সাদো, তেন রহোনিসজ্জস্সাদেন, মেথুনধম্মসন্নিস্সিতেন কিলেসেনাতি অত্থো। ৰুত্তঞ্হি অট্ঠকথাযং ‘‘রহোনিসজ্জস্সাদোতি মেথুনধম্মসন্নিস্সিতকিলেসো ৰুচ্চতী’’তি (পারা॰ অট্ঠ॰ ২.৪৫১)। ‘‘রহো নাম চক্খুস্স রহো সোতস্স রহো। চক্খুস্স রহো নাম ন সক্কা হোতি অক্খিং ৰা নিখণিযমানে ভমুকং ৰা উক্খিপিযমানে সীসং ৰা উক্খিপিযমানে পস্সিতুং। সোতস্স রহো নাম ন সক্কা হোতি পকতিকথা সোতু’’ন্তি (পারা॰ ৪৪৫) পদভাজনে ৰুত্তরহেসু চক্খুস্স রহো এৰ ইধাধিপ্পেতো। যথাহ অট্ঠকথাযং ‘‘কিঞ্চাপি পাল়িযং ‘সোতস্স রহো’তি আগতং, চক্খুস্স রহেনেৰ পন পরিচ্ছেদো ৰেদিতব্বো’’তি (পারা॰ অট্ঠ॰ ২.৪৪৪-৪৪৫)।
542-3. Idāni saṅghādisesakathānantaraṃ aniyatakathaṃ dassetumāha ‘‘rahonisajjassādenā’’tiādi. Rahasi nisajjā rahonisajjā, tassā assādo rahonisajjassādo, tena rahonisajjassādena, methunadhammasannissitena kilesenāti attho. Vuttañhi aṭṭhakathāyaṃ ‘‘rahonisajjassādoti methunadhammasannissitakileso vuccatī’’ti (pārā. aṭṭha. 2.451). ‘‘Raho nāma cakkhussa raho sotassa raho. Cakkhussa raho nāma na sakkā hoti akkhiṃ vā nikhaṇiyamāne bhamukaṃ vā ukkhipiyamāne sīsaṃ vā ukkhipiyamāne passituṃ. Sotassa raho nāma na sakkā hoti pakatikathā sotu’’nti (pārā. 445) padabhājane vuttarahesu cakkhussa raho eva idhādhippeto. Yathāha aṭṭhakathāyaṃ ‘‘kiñcāpi pāḷiyaṃ ‘sotassa raho’ti āgataṃ, cakkhussa raheneva pana paricchedo veditabbo’’ti (pārā. aṭṭha. 2.444-445).
চক্খুস্স রহত্তা ‘‘পটিচ্ছন্ন’’ন্তি ইমম্পি পটিচ্ছন্নত্তা এৰ ‘‘অলংকম্মনিয’’ন্তি ইমম্পি সঙ্গণ্হাতি। নিসজ্জসদ্দোপাদানেন ‘‘আসনে’’তি ইদম্পি গহিতমেৰ। ‘‘মাতুগামস্স সন্তিকং গন্তুকামো’’তি ইমিনা ‘‘মাতুগামেন সদ্ধি’’ন্তি ইদম্পি গহিতমেৰ। এৰং সামত্থিযা লব্ভমানপদোপাদানেন যো পন ভিক্খু মাতুগামেন সদ্ধিং একো একায রহো পটিচ্ছন্নে আসনে অলংকম্মনিযে নিসজ্জস্সাদেনাতি ৰুত্তং হোতি। চক্খুস্স রহভাৰেন কুট্টাদিপটিচ্ছন্নে তেনেৰ মেথুনসেৰনকম্মস্স অনুরূপে আসনে তদহুজাতাযপি মনুস্সিত্থিযা সহ নিসজ্জস্সাদরাগেন সমন্নাগতো হুত্ৰাতি অত্থো। এত্থ ‘‘মাতুগামস্সা’’তি তদহুজাতম্পি ইত্থিং গণ্হাতীতি কুতো লব্ভতীতি? ‘‘মাতুগামো নাম মনুস্সিত্থী, ন যক্খী, ন পেতী, ন তিরচ্ছানগতা, অন্তমসো তদহুজাতাপি দারিকা, পগেৰ মহত্তরী’’তি (পারা॰ ৪৪৫) পদভাজনতো লব্ভতি।
Cakkhussa rahattā ‘‘paṭicchanna’’nti imampi paṭicchannattā eva ‘‘alaṃkammaniya’’nti imampi saṅgaṇhāti. Nisajjasaddopādānena ‘‘āsane’’ti idampi gahitameva. ‘‘Mātugāmassa santikaṃ gantukāmo’’ti iminā ‘‘mātugāmena saddhi’’nti idampi gahitameva. Evaṃ sāmatthiyā labbhamānapadopādānena yo pana bhikkhu mātugāmena saddhiṃ eko ekāya raho paṭicchanne āsane alaṃkammaniye nisajjassādenāti vuttaṃ hoti. Cakkhussa rahabhāvena kuṭṭādipaṭicchanne teneva methunasevanakammassa anurūpe āsane tadahujātāyapi manussitthiyā saha nisajjassādarāgena samannāgato hutvāti attho. Ettha ‘‘mātugāmassā’’ti tadahujātampi itthiṃ gaṇhātīti kuto labbhatīti? ‘‘Mātugāmo nāma manussitthī, na yakkhī, na petī, na tiracchānagatā, antamaso tadahujātāpi dārikā, pageva mahattarī’’ti (pārā. 445) padabhājanato labbhati.
‘‘নিৰাসেতী’’তি ইমিনা ‘‘কাযবন্ধনং বন্ধতি, চীৰরং পারুপতী’’তি ইদং লক্খীযতি। সব্বত্থাতি যথাৰুত্তং পযোগতো পুব্বাপরপযোগে সঙ্গণ্হাতি। তেনেৰ ‘‘পযোগে চ পযোগে চা’’তি ৰিচ্ছাপযোগো কতো। নিসীদতো চস্স দুক্কটন্তি যোজনা। ‘‘উভিন্নম্পি নিসজ্জায পাচিত্তিয’’ন্তি ৰক্খমানত্তা দুক্কটং সন্ধায এককস্স নিসীদতোতি গহেতব্বং।
‘‘Nivāsetī’’ti iminā ‘‘kāyabandhanaṃ bandhati, cīvaraṃ pārupatī’’ti idaṃ lakkhīyati. Sabbatthāti yathāvuttaṃ payogato pubbāparapayoge saṅgaṇhāti. Teneva ‘‘payoge ca payoge cā’’ti vicchāpayogo kato. Nisīdato cassa dukkaṭanti yojanā. ‘‘Ubhinnampi nisajjāya pācittiya’’nti vakkhamānattā dukkaṭaṃ sandhāya ekakassa nisīdatoti gahetabbaṃ.
৫৪৪. নিসজ্জায উভিন্নম্পীতি এত্থ ‘‘সকি’’ন্তি সেসো, উভিন্নং নিসজ্জাপূরণৰসেন অঞ্ঞমঞ্ঞস্স পুরে ৰা পচ্ছা ৰা একক্খণে ৰা মাতুগামস্স ৰা ভিক্খুস্স ৰা একৰারং নিসজ্জাযাতি ৰুত্তং হোতি। ৰুত্তঞ্হেতং পাল়িযং ‘‘মাতুগামে নিসিন্নে ভিক্খু উপনিসিন্নো ৰা হোতী’’তিআদি (পারা॰ ৪৪৫)। হোতি পাচিত্তিযন্তি যোজনা। পযোগগণনায চ হোন্তি পাচিত্তিযানীতি গহেতব্বং, মাতুগামস্স ৰা ভিক্খুনো ৰা উভিন্নং ৰা উট্ঠাযুট্ঠায পুনপ্পুনং উপনিসীদনপযোগগণনায চাতি অত্থো। ‘‘আপত্তীহিপি তীহিপী’’তি ৰক্খমানত্তা পাচিত্তিযগ্গহণং পারাজিকসঙ্ঘাদিসেসানং উপলক্খণং হোতি, তীসু একং হোতীতি ৰুত্তং হোতি। এত্থ ‘‘পযোগগণনাযা’’তি ইদং পারাজিকায ন লব্ভতি একপযোগেনেৰ সিজ্ঝনতো। কাযসংসগ্গসঙ্ঘাদিসেসো, পন সরীরতো পুনপ্পুনং ৰিযুজ্জিত্ৰা ফুসনেন পাচিত্তিযঞ্চ যথাৰুত্তনযেনেৰ লব্ভতি।
544.Nisajjāyaubhinnampīti ettha ‘‘saki’’nti seso, ubhinnaṃ nisajjāpūraṇavasena aññamaññassa pure vā pacchā vā ekakkhaṇe vā mātugāmassa vā bhikkhussa vā ekavāraṃ nisajjāyāti vuttaṃ hoti. Vuttañhetaṃ pāḷiyaṃ ‘‘mātugāme nisinne bhikkhu upanisinno vā hotī’’tiādi (pārā. 445). Hoti pācittiyanti yojanā. Payogagaṇanāya ca honti pācittiyānīti gahetabbaṃ, mātugāmassa vā bhikkhuno vā ubhinnaṃ vā uṭṭhāyuṭṭhāya punappunaṃ upanisīdanapayogagaṇanāya cāti attho. ‘‘Āpattīhipi tīhipī’’ti vakkhamānattā pācittiyaggahaṇaṃ pārājikasaṅghādisesānaṃ upalakkhaṇaṃ hoti, tīsu ekaṃ hotīti vuttaṃ hoti. Ettha ‘‘payogagaṇanāyā’’ti idaṃ pārājikāya na labbhati ekapayogeneva sijjhanato. Kāyasaṃsaggasaṅghādiseso, pana sarīrato punappunaṃ viyujjitvā phusanena pācittiyañca yathāvuttanayeneva labbhati.
বহূসুপি মাতুগামেসু বহুকানি পাচিত্তিযানি হোন্তীতি যোজনা। বহূসু মাতুগামেসু নিসিন্নেসু নিসিন্নানং গণনায একেনেৰ পযোগেন বহূনি পাচিত্তিযানি চ সঙ্ঘাদিসেসা চ হোন্তি। ‘‘পযোগগণনায চা’’তি ইমস্স এত্থাপি যুজ্জমানত্তা তাসু ৰিসুং ৰিসুং উট্ঠাযুট্ঠায পুনপ্পুনং নিসীদন্তীসু, সযঞ্চ উট্ঠাযুট্ঠায পুনপ্পুনং নিসীদতো তাসং গণনায আপজ্জিতব্বাপত্তিযো পযোগগণনায চ বহূ হোন্তীতি ইদং লব্ভতি। এত্থাপি পন পারাজিকং ন লব্ভতি, সঙ্ঘাদিসেসো, পাচিত্তিযঞ্চ লব্ভতি।
Bahūsupi mātugāmesu bahukāni pācittiyāni hontīti yojanā. Bahūsu mātugāmesu nisinnesu nisinnānaṃ gaṇanāya ekeneva payogena bahūni pācittiyāni ca saṅghādisesā ca honti. ‘‘Payogagaṇanāya cā’’ti imassa etthāpi yujjamānattā tāsu visuṃ visuṃ uṭṭhāyuṭṭhāya punappunaṃ nisīdantīsu, sayañca uṭṭhāyuṭṭhāya punappunaṃ nisīdato tāsaṃ gaṇanāya āpajjitabbāpattiyo payogagaṇanāya ca bahū hontīti idaṃ labbhati. Etthāpi pana pārājikaṃ na labbhati, saṅghādiseso, pācittiyañca labbhati.
৫৪৫. সমীপে ঠিতোপি অন্ধো অনাপত্তিং ন করোতীতি সোতস্স রহভাৰে অসতিপি পধানভূতস্স ‘‘চক্খুস্স রহো’’তি ইমস্স অঙ্গস্স ৰিজ্জমানত্তা ৰুত্তং ‘‘অন্তোদ্ৰাদসহত্থকে’’তি, ইমিনা সৰনূপচারে ৰিজ্জমানেপীতি ৰুত্তং হোতি। ইত্থীনং তু সতম্পি চ ন করোতি অনাপত্তিন্তি যোজনা, ৰিঞ্ঞুনো পুরিসস্স অসন্নিহিতভাৰেনাতি অধিপ্পাযো। ‘‘ইত্থীনম্পি সতম্পি চা’’তি লিখন্তি, ততোপি অযমেৰ পাঠো সুন্দরো। পি-সদ্দো ৰা তু-সদ্দত্থে দট্ঠব্বো।
545. Samīpe ṭhitopi andho anāpattiṃ na karotīti sotassa rahabhāve asatipi padhānabhūtassa ‘‘cakkhussa raho’’ti imassa aṅgassa vijjamānattā vuttaṃ ‘‘antodvādasahatthake’’ti, iminā savanūpacāre vijjamānepīti vuttaṃ hoti. Itthīnaṃ tu satampi ca na karoti anāpattinti yojanā, viññuno purisassa asannihitabhāvenāti adhippāyo. ‘‘Itthīnampi satampi cā’’ti likhanti, tatopi ayameva pāṭho sundaro. Pi-saddo vā tu-saddatthe daṭṭhabbo.
৫৪৬. নিপজ্জিত্ৰাতি এত্থ ‘‘সমীপে’’তি সেসো, ‘‘নিদ্দাযন্তোপী’’তি এতস্স ৰিসেসকেন ‘‘নিপজ্জিত্ৰা’’তি ইমিনা নিসীদিত্ৰা নিদ্দাযন্তোতি ইমস্স নিৰত্তিতত্তা সমীপে নিসীদিত্ৰা নিদ্দাযন্তোপি অনন্ধো মনুস্সপুরিসো অনাপত্তিং করোতীতি লব্ভতি। ‘‘কেৰল’’ন্তি ৰিসেসনেন বলৰনিদ্দূপগতো গহিতোতি তথা অহুত্ৰা অন্তরন্তরা আপন্নাপন্নে ৰিনিচ্ছিনিত্ৰা পৰত্তমানায কপিনিদ্দায নিদ্দাযন্তোপি অনাপত্তিং করোতীতি অযমত্থো লব্ভতি। ‘‘পিহিতদ্ৰারগব্ভস্সা’’তি ৰত্তব্বে মজ্ঝপদলোপীসমাসৰসেন ‘‘পিহিতগব্ভস্সা’’তি ৰুত্তং। ‘‘দ্ৰারে’’তি ইমিনা দ্ৰারেকদেসভূতং উম্মারং ৰা তংসমীপং ৰা উপচারেন ৰুত্তন্তি দট্ঠব্বং। সচে গব্ভো পিহিতদ্ৰারো ন হোতি, অনাপত্তীতি ব্যতিরেকতো দস্সিতং।
546.Nipajjitvāti ettha ‘‘samīpe’’ti seso, ‘‘niddāyantopī’’ti etassa visesakena ‘‘nipajjitvā’’ti iminā nisīditvā niddāyantoti imassa nivattitattā samīpe nisīditvā niddāyantopi anandho manussapuriso anāpattiṃ karotīti labbhati. ‘‘Kevala’’nti visesanena balavaniddūpagato gahitoti tathā ahutvā antarantarā āpannāpanne vinicchinitvā pavattamānāya kapiniddāya niddāyantopi anāpattiṃ karotīti ayamattho labbhati. ‘‘Pihitadvāragabbhassā’’ti vattabbe majjhapadalopīsamāsavasena ‘‘pihitagabbhassā’’ti vuttaṃ. ‘‘Dvāre’’ti iminā dvārekadesabhūtaṃ ummāraṃ vā taṃsamīpaṃ vā upacārena vuttanti daṭṭhabbaṃ. Sace gabbho pihitadvāro na hoti, anāpattīti byatirekato dassitaṃ.
৫৪৭. ইমস্মিং অনিযতসিক্খাপদে পাল়িযং অনাপত্তিৰারে অসতিপি ‘‘যো পন ভিক্খু মাতুগামেন সদ্ধিং রহো পটিচ্ছন্নে আসনে নিসজ্জং কপ্পেয্য, পাচিত্তিয’’ন্তি (পাচি॰ ২৮৫) পঞ্চমস্স অচেলকৰগ্গস্স চতুত্থসিক্খাপদে অনাপত্তিৰারে ‘‘অনাপত্তি যো কোচি ৰিঞ্ঞূ পুরিসো দুতিযো হোতি, তিট্ঠতি ন নিসীদতি, অরহোপেক্খো, অঞ্ঞৰিহিতো নিসীদতি, উম্মত্তকস্স আদিকম্মিকস্সা’’তি (পাচি॰ ২৮৮) ৰুত্তে অনাপত্তিৰারে সঙ্গহেতুমাহ ‘‘অনন্ধে সতী’’তিআদি। ‘‘এতস্স সমীপে’’তি পকরণতো লব্ভতি। ইধ পুল্লিঙ্গনিদ্দেসেন পুরিসো লব্ভতি, ‘‘তেনাপি অবালেন ভৰিতব্বং, মনুস্সজাতিকেন ভৰিতব্ব’’ন্তি ইদঞ্চ ‘‘ৰিঞ্ঞুস্মি’’ন্তি ইমিনা লব্ভতি। অন্ধসদিসনিদ্দূপগতপটিপক্খৰাচিঅনন্ধপদেন ‘‘অনিদ্দাযন্তে’’তি লব্ভতি, মনাপামনাপং জানন্তে অনিদ্দাযন্তে মনুস্সপুরিসে দস্সনূপচারস্স অন্তো ৰিজ্জমানেতি অত্থো।
547. Imasmiṃ aniyatasikkhāpade pāḷiyaṃ anāpattivāre asatipi ‘‘yo pana bhikkhu mātugāmena saddhiṃ raho paṭicchanne āsane nisajjaṃ kappeyya, pācittiya’’nti (pāci. 285) pañcamassa acelakavaggassa catutthasikkhāpade anāpattivāre ‘‘anāpatti yo koci viññū puriso dutiyo hoti, tiṭṭhati na nisīdati, arahopekkho, aññavihito nisīdati, ummattakassa ādikammikassā’’ti (pāci. 288) vutte anāpattivāre saṅgahetumāha ‘‘anandhe satī’’tiādi. ‘‘Etassa samīpe’’ti pakaraṇato labbhati. Idha pulliṅganiddesena puriso labbhati, ‘‘tenāpi abālena bhavitabbaṃ, manussajātikena bhavitabba’’nti idañca ‘‘viññusmi’’nti iminā labbhati. Andhasadisaniddūpagatapaṭipakkhavācianandhapadena ‘‘aniddāyante’’ti labbhati, manāpāmanāpaṃ jānante aniddāyante manussapurise dassanūpacārassa anto vijjamāneti attho.
‘‘নিসজ্জপচ্চযা দোসো নত্থী’’তি ইমিনা সম্বন্ধো, এৰরূপে রহো আসনে মাতুগামেন সদ্ধিং নিসিন্নপচ্চযা আপত্তি নত্থীতি অত্থো। ‘‘ঠিতস্সা’’তি ইমিনাপি তদেৰ পদং যোজেতব্বং। ৰিঞ্ঞুম্হি পটিবলে মনুস্সপুরিসে অসন্নিহিতেপি তথাৰিধে রহো আসনে মাতুগামে আসনে নিসিন্নেপি সযানেপি ঠিতেপি সযং ঠিতস্স নিসজ্জায অভাৰা তপ্পচ্চযা আপত্তি ন হোতীতি অত্থো। অরহসঞ্ঞিনো নিসজ্জপচ্চযা দোসো নত্থীতি রহো আসনে মাতুগামেন সদ্ধিং নিসজ্জন্তস্সাপি ‘‘রহো’’তি সঞ্ঞারহিতস্স নিসীদতো নিসজ্জপচ্চযা অনাপত্তীতি অত্থো। ৰিক্খিত্তচেতসো নিসজ্জপচ্চযা দোসো নত্থীতি যোজনা।
‘‘Nisajjapaccayā doso natthī’’ti iminā sambandho, evarūpe raho āsane mātugāmena saddhiṃ nisinnapaccayā āpatti natthīti attho. ‘‘Ṭhitassā’’ti imināpi tadeva padaṃ yojetabbaṃ. Viññumhi paṭibale manussapurise asannihitepi tathāvidhe raho āsane mātugāme āsane nisinnepi sayānepi ṭhitepi sayaṃ ṭhitassa nisajjāya abhāvā tappaccayā āpatti na hotīti attho. Arahasaññino nisajjapaccayā doso natthīti raho āsane mātugāmena saddhiṃ nisajjantassāpi ‘‘raho’’ti saññārahitassa nisīdato nisajjapaccayā anāpattīti attho. Vikkhittacetaso nisajjapaccayā doso natthīti yojanā.
৫৪৮. এত্তাৰতা পাচিত্তিযাপত্তিমত্ততো অনাপত্তিপ্পকারং দস্সেত্ৰা ইদানি ইমস্স সিক্খাপদস্স অনিযতৰোহারহেতুভূতাহি তীহি আপত্তীহি অনাপত্তিপকারং দস্সেতুমাহ ‘‘ন দোসো’’তিআদি। আপত্তীহিপি তীহিপীতি ‘‘নিসজ্জং ভিক্খু পটিজানমানো তিণ্ণং ধম্মানং অঞ্ঞতরেন কারেতব্বো পারাজিকেন ৰা সঙ্ঘাদিসেসেন ৰা পাচিত্তিযেন ৰা’’তি (পারা॰ ৪৪৪) পাল়িযং ৰুত্তাহি ‘‘পঠমপারাজিকাপত্তিকাযসংসগ্গসঙ্ঘাদিসেসাপত্তিপাচিত্তিযাপত্তী’’তি ইমাহি তীহিপি আপত্তীহীতি ৰুত্তং হোতীতি।
548. Ettāvatā pācittiyāpattimattato anāpattippakāraṃ dassetvā idāni imassa sikkhāpadassa aniyatavohārahetubhūtāhi tīhi āpattīhi anāpattipakāraṃ dassetumāha ‘‘na doso’’tiādi. Āpattīhipi tīhipīti ‘‘nisajjaṃ bhikkhu paṭijānamāno tiṇṇaṃ dhammānaṃ aññatarena kāretabbo pārājikena vā saṅghādisesena vā pācittiyena vā’’ti (pārā. 444) pāḷiyaṃ vuttāhi ‘‘paṭhamapārājikāpattikāyasaṃsaggasaṅghādisesāpattipācittiyāpattī’’ti imāhi tīhipi āpattīhīti vuttaṃ hotīti.
পঠমানিযতকথাৰণ্ণনা।
Paṭhamāniyatakathāvaṇṇanā.
৫৪৯. ৰত্তব্বভাৰেনাধিকতদুতিযানিযতৰিনিচ্ছযতো পঠমানিযতে ৰুত্তৰিনিচ্ছযেহি সমং ৰিনিচ্ছযং পহায তত্থ অৰুত্তং ইমস্সেৰ ৰিনিচ্ছযৰিসেসং দস্সেতুমাহ ‘‘অনন্ধা’’তিআদি। ইধ দুট্ঠুল্লৰাচাসঙ্ঘাদিসেসস্সাপি গহিতত্তা ততো অনাপত্তিকরং দস্সেতুং ‘‘অবধিরো’’তি ৰুত্তং। অনন্ধো অবধিরোতি ‘‘পুরিসো’’তি ইদং সন্ধায ৰুত্তং। ‘‘ইত্থী’’তি ইদং সন্ধায ‘‘অনন্ধাবধিরা’’তি গহেতব্বং। এৰমুপরিপি। তেনাপি সৰনূপচারন্তোগধেন ভৰিতব্বন্তি দস্সেতুং ‘‘অন্তোদ্ৰাদসহত্থট্ঠো’’তি ৰুত্তং।
549. Vattabbabhāvenādhikatadutiyāniyatavinicchayato paṭhamāniyate vuttavinicchayehi samaṃ vinicchayaṃ pahāya tattha avuttaṃ imasseva vinicchayavisesaṃ dassetumāha ‘‘anandhā’’tiādi. Idha duṭṭhullavācāsaṅghādisesassāpi gahitattā tato anāpattikaraṃ dassetuṃ ‘‘abadhiro’’ti vuttaṃ. Anandho abadhiroti ‘‘puriso’’ti idaṃ sandhāya vuttaṃ. ‘‘Itthī’’ti idaṃ sandhāya ‘‘anandhābadhirā’’ti gahetabbaṃ. Evamuparipi. Tenāpi savanūpacārantogadhena bhavitabbanti dassetuṃ ‘‘antodvādasahatthaṭṭho’’ti vuttaṃ.
৫৫০. ‘‘অন্ধো অবধিরো অনাপত্তিং ন করোতী’’তি ইদং কাযসংসগ্গসঙ্ঘাদিসেসং সন্ধায ৰুত্তং। ‘‘বধিরো ৰাপি চক্খুমা, ন করোতি অনাপত্তি’’ন্তি ইদং পন দুট্ঠুল্লৰাচাসঙ্ঘাদিসেসং সন্ধায ৰুত্তন্তি এৰমেত্থ সন্ধায ভাসিতত্থো ৰেদিতব্বো।
550.‘‘Andho abadhiro anāpattiṃ na karotī’’ti idaṃ kāyasaṃsaggasaṅghādisesaṃ sandhāya vuttaṃ. ‘‘Badhiro vāpi cakkhumā, na karoti anāpatti’’nti idaṃ pana duṭṭhullavācāsaṅghādisesaṃ sandhāya vuttanti evamettha sandhāya bhāsitattho veditabbo.
পুরিমানিযতকথায অৰুত্তৰিসেসস্স দুতিযানিযতকথায ৰত্তুমিচ্ছিতত্তা অযম্পি ৰিসেসো ইধ ৰত্তব্বো। কোযং ৰিসেসো, যো ইধ ৰত্তব্বোতি চে? তত্থ ‘‘পটিচ্ছন্নে আসনে অলংকম্মনিযে’’তি (পারা॰ ৪৪৪) ৰুত্তং আসনঙ্গদ্ৰযং ইধ ‘‘ন হেৰ খো পন পটিচ্ছন্নং আসনং হোতি নালংকম্মনিয’’ন্তি (পারা॰ ৪৫৩) নিসেধেত্ৰা ‘‘অলঞ্চ খো হোতি মাতুগামং দুট্ঠুল্লাহি ৰাচাহি ওভাসিতু’’ন্তি (পারা॰ ৪৫৩) ইদং অপুব্বঙ্গং ৰুত্তং। তত্র মাতুগামোতি অন্তমসো তদহুজাতাপি দারিকা গহিতা, ইধ ‘‘মাতুগামো নাম মনুস্সিত্থী, ন যক্খী, ন পেতী, ন তিরচ্ছানগতা, ৰিঞ্ঞূ পটিবলা সুভাসিতদুব্ভাসিতং দুট্ঠুল্লাদুট্ঠুল্লং আজানিতু’’ন্তি (পারা॰ ৪৫৪) ৰিঞ্ঞূ পটিবলো মাতুগামোৰ ৰুত্তো। তত্থ ‘‘পারাজিকেন ৰা সঙ্ঘাদিসেসেন ৰা পাচিত্তিযেন ৰা’’তি (পারা॰ ৪৪৪) তিস্সো আপত্তিযো ৰুত্তা, ইধ ‘‘নিসজ্জং ভিক্খু পটিজানমানো দ্ৰিন্নং ধম্মানং অঞ্ঞতরেন কারেতব্বো সঙ্ঘাদিসেসেন ৰা পাচিত্তিযেন ৰা’’তি (পারা॰ ৪৫৩) দ্ৰেযেৰ আপত্তিযো ৰুত্তা। সঙ্ঘাদিসেসেসু চ তত্থ ‘‘সা চে এৰং ৰদেয্য ‘অয্যো মযা দিট্ঠো নিসিন্নো মাতুগামেন সদ্ধিং কাযসংসগ্গং সমাপজ্জন্তো’তি, সো চ তং পটিজানাতি, আপত্তিযা কারেতব্বো’’তি (পারা॰ ৪৪৮) কাযসংসগ্গসঙ্ঘাদিসেসোৰ ৰুত্তো, ইধ সো চ ৰুত্তো, ‘‘সা চে এৰং ৰদেয্য ‘অয্যস্স মযা সুতং নিসিন্নস্স মাতুগামং দুট্ঠুল্লাহি ৰাচাহি ওভাসেন্তস্সা’তি, সো চ তং পটিজানাতি, আপত্তিযা কারেতব্বো’’তি (পারা॰ ৪৫৫) দুট্ঠুল্লৰাচাসঙ্ঘাদিসেসো চ ৰুত্তো। এত্তকো উভিন্নমনিযতানং ৰিসেসো।
Purimāniyatakathāya avuttavisesassa dutiyāniyatakathāya vattumicchitattā ayampi viseso idha vattabbo. Koyaṃ viseso, yo idha vattabboti ce? Tattha ‘‘paṭicchanne āsane alaṃkammaniye’’ti (pārā. 444) vuttaṃ āsanaṅgadvayaṃ idha ‘‘na heva kho pana paṭicchannaṃ āsanaṃ hoti nālaṃkammaniya’’nti (pārā. 453) nisedhetvā ‘‘alañca kho hoti mātugāmaṃ duṭṭhullāhi vācāhi obhāsitu’’nti (pārā. 453) idaṃ apubbaṅgaṃ vuttaṃ. Tatra mātugāmoti antamaso tadahujātāpi dārikā gahitā, idha ‘‘mātugāmo nāma manussitthī, na yakkhī, na petī, na tiracchānagatā, viññū paṭibalā subhāsitadubbhāsitaṃ duṭṭhullāduṭṭhullaṃ ājānitu’’nti (pārā. 454) viññū paṭibalo mātugāmova vutto. Tattha ‘‘pārājikena vā saṅghādisesena vā pācittiyena vā’’ti (pārā. 444) tisso āpattiyo vuttā, idha ‘‘nisajjaṃ bhikkhu paṭijānamāno dvinnaṃ dhammānaṃ aññatarena kāretabbo saṅghādisesena vā pācittiyena vā’’ti (pārā. 453) dveyeva āpattiyo vuttā. Saṅghādisesesu ca tattha ‘‘sā ce evaṃ vadeyya ‘ayyo mayā diṭṭho nisinno mātugāmena saddhiṃ kāyasaṃsaggaṃ samāpajjanto’ti, so ca taṃ paṭijānāti, āpattiyā kāretabbo’’ti (pārā. 448) kāyasaṃsaggasaṅghādisesova vutto, idha so ca vutto, ‘‘sā ce evaṃ vadeyya ‘ayyassa mayā sutaṃ nisinnassa mātugāmaṃ duṭṭhullāhi vācāhi obhāsentassā’ti, so ca taṃ paṭijānāti, āpattiyā kāretabbo’’ti (pārā. 455) duṭṭhullavācāsaṅghādiseso ca vutto. Ettako ubhinnamaniyatānaṃ viseso.
অযং কস্মা ন ৰুত্তোতি? অযং সম্বোধৰত্থুৰিসেসো ৰত্তুমিচ্ছিতো পন অট্ঠকথাগতৰিনিচ্ছযৰিসেসতোতি তস্মা ন ৰুত্তোতি দট্ঠব্বো। তিসমুট্ঠানমেৰিদং কাযচিত্তৰাচাচিত্তকাযৰাচাচিত্তৰসেন তীণি সমুট্ঠানানি এতস্সাতি কত্ৰা।
Ayaṃ kasmā na vuttoti? Ayaṃ sambodhavatthuviseso vattumicchito pana aṭṭhakathāgatavinicchayavisesatoti tasmā na vuttoti daṭṭhabbo. Tisamuṭṭhānamevidaṃ kāyacittavācācittakāyavācācittavasena tīṇi samuṭṭhānāni etassāti katvā.
ইমেহিপি দ্ৰীহি অনিযতসিক্খাপদেহি সিক্খাপদন্তরেসু পঞ্ঞত্তাযেৰ আপত্তিযো, অনাপত্তিযো চ দস্সিতা, ন কোচি আপত্তিৰিসেসো ৰুত্তো, তস্মা কিমেতেসং ৰচনেনাতি? ৰুচ্চতে – ৰিনযৰিনিচ্ছযলক্খণং ঠপেতুং ভগৰতা উপ্পন্নে ৰত্থুম্হি দ্ৰে অনিযতা পঞ্ঞত্তা। কথং? এৰরূপাযপি সদ্ধেয্যৰচনায উপাসিকায ৰুচ্চমানো পটিজানমানোৰ আপত্তিযা কারেতব্বো, ন অপ্পটিজানমানো, তস্মা ‘‘যায কাযচি আপত্তিযা যেন কেনচি চোদিতে পটিঞ্ঞাতকরণংযেৰঙ্গং কাতব্ব’’ন্তি ইমেহি সিক্খাপদেহি ৰিনিচ্ছযলক্খণং ঠপিতন্তি ৰেদিতব্বং। অথ কস্মা ভিক্খুনীনং অনিযতং ন ৰুত্তন্তি? ইদমেৰ লক্খণং সব্বত্থ অনুগতন্তি ন ৰুত্তং।
Imehipi dvīhi aniyatasikkhāpadehi sikkhāpadantaresu paññattāyeva āpattiyo, anāpattiyo ca dassitā, na koci āpattiviseso vutto, tasmā kimetesaṃ vacanenāti? Vuccate – vinayavinicchayalakkhaṇaṃ ṭhapetuṃ bhagavatā uppanne vatthumhi dve aniyatā paññattā. Kathaṃ? Evarūpāyapi saddheyyavacanāya upāsikāya vuccamāno paṭijānamānova āpattiyā kāretabbo, na appaṭijānamāno, tasmā ‘‘yāya kāyaci āpattiyā yena kenaci codite paṭiññātakaraṇaṃyevaṅgaṃ kātabba’’nti imehi sikkhāpadehi vinicchayalakkhaṇaṃ ṭhapitanti veditabbaṃ. Atha kasmā bhikkhunīnaṃ aniyataṃ na vuttanti? Idameva lakkhaṇaṃ sabbattha anugatanti na vuttaṃ.
দুতিযানিযতকথাৰণ্ণনা।
Dutiyāniyatakathāvaṇṇanā.
ইতি ৰিনযত্থসারসন্দীপনিযা
Iti vinayatthasārasandīpaniyā
ৰিনযৰিনিচ্ছযৰণ্ণনায
Vinayavinicchayavaṇṇanāya
অনিযতকথাৰণ্ণনা নিট্ঠিতা।
Aniyatakathāvaṇṇanā niṭṭhitā.
