| Library / Tipiṭaka / திபிடக • Tipiṭaka / கு²த்³த³ஸிக்கா²-மூலஸிக்கா² • Khuddasikkhā-mūlasikkhā |
24. அஞ்ஜனீனித்³தே³ஸவண்ணனா
24. Añjanīniddesavaṇṇanā
182. வட்டா வா அட்ட²ஸோளஸங்ஸா வா மட்டா² அஞ்ஜனீ வட்டதீதி யோஜனா. அட்ட² ச ஸோளஸ ச அங்ஸா கோணா யஸ்ஸா ஸாதி விக்³க³ஹோ. ஸோளஸங்ஸபதே³ஸவிப⁴த்தாய அட்ட²ங்ஸாஸுதியா அட்ட²ங்ஸபதே³ஸவிப⁴த்தா சதுரங்ஸாபி ஸாமத்தி²யா க³ய்ஹதீதி ஞாதப்³ப³ங். ‘‘உஜுகமேவ பன சதுரங்ஸாவா’’தி ஹி அட்ட²கதா²யங் (பாரா॰ அட்ட²॰ 1.85) வுத்தங். அஞ்ஜனீதி அஞ்ஜனநாளி. மூலே திஸ்ஸோபி லேகா² வட்டந்தீதி யோஜனா. மூலேதி பு³ந்தே³, ஹெட்ட²தோதி வுத்தங் ஹோதி. லேகா²தி வட்டலேகா². ப³ந்தி⁴துங் கீ³வாயங் ஏகா ஏவ லேகா² வட்டதீதி ஸம்ப³ந்தோ⁴. ப³ந்தி⁴துந்தி பிதா⁴னப³ந்த⁴னத்த²ங்.
182. Vaṭṭā vā aṭṭhasoḷasaṃsā vā maṭṭhā añjanī vaṭṭatīti yojanā. Aṭṭha ca soḷasa ca aṃsā koṇā yassā sāti viggaho. Soḷasaṃsapadesavibhattāya aṭṭhaṃsāsutiyā aṭṭhaṃsapadesavibhattā caturaṃsāpi sāmatthiyā gayhatīti ñātabbaṃ. ‘‘Ujukameva pana caturaṃsāvā’’ti hi aṭṭhakathāyaṃ (pārā. aṭṭha. 1.85) vuttaṃ. Añjanīti añjananāḷi. Mūle tissopi lekhā vaṭṭantīti yojanā. Mūleti bunde, heṭṭhatoti vuttaṃ hoti. Lekhāti vaṭṭalekhā. Bandhituṃ gīvāyaṃ ekā eva lekhā vaṭṭatīti sambandho. Bandhitunti pidhānabandhanatthaṃ.
183. யங் கிஞ்சி ரூபந்தி இத்தி²ரூபாதி³ யங் கிஞ்சி ரூபங். மாலாதி³கம்மந்தி மாலாகம்மங் லதாகம்மங். அட்³ட⁴சந்தா³தீ³தி எத்த² ஆதி³-ஸத்³தே³ன அக்³கி⁴யாதி³கங் க³ஹிதங். எத்தா²தி அஞ்ஜனியங்.
183.Yaṃ kiñci rūpanti itthirūpādi yaṃ kiñci rūpaṃ. Mālādikammanti mālākammaṃ latākammaṃ. Aḍḍhacandādīti ettha ādi-saddena agghiyādikaṃ gahitaṃ. Etthāti añjaniyaṃ.
184. த²விகாதி அஞ்ஜனித²விகா. ஸிபாடீதி கு²ரஸிபாடிகா. ஸலாகாபி அசித்தகா லப்³பா⁴தி ஸம்ப³ந்தோ⁴. ஸலாகாதி அஞ்ஜனிஸலாகா. நத்தி² சித்தமேதிஸ்ஸாதி அசித்தகா. தாதி³ஸங் பன லபி⁴த்வா உபாஹனாயோ விய நாஸெத்வா பரிபு⁴ஞ்ஜிதப்³ப³ங்.
184.Thavikāti añjanithavikā. Sipāṭīti khurasipāṭikā. Salākāpi acittakā labbhāti sambandho. Salākāti añjanisalākā. Natthi cittametissāti acittakā. Tādisaṃ pana labhitvā upāhanāyo viya nāsetvā paribhuñjitabbaṃ.
185. அட்டி²-ஸத்³தே³ன மனுஸ்ஸட்டி²ங் ட²பெத்வா யங் கிஞ்சி அட்டி² க³ஹிதங்.
185.Aṭṭhi-saddena manussaṭṭhiṃ ṭhapetvā yaṃ kiñci aṭṭhi gahitaṃ.
186. தூ⁴மனெத்தாதி தூ⁴மனாளிகா, நிஸ்ஸ ஆ-காராதே³ஸவஸேன வுத்தங். ஸத்த²கத³ண்டா³னீதி ஸத்த²த³ண்டா³ . நத்து²ங் தெ³ந்தி ஏதாயாதி நத்து²தா³னா. அனியமேன ஹி நதா³தி³தோ வா ஈ. தேஹி ஸங்க²னாபி⁴ஆதீ³ஹி நிப்³ப³த்தா தம்மயா.
186.Dhūmanettāti dhūmanāḷikā, nissa ā-kārādesavasena vuttaṃ. Satthakadaṇḍānīti satthadaṇḍā . Natthuṃ denti etāyāti natthudānā. Aniyamena hi nadādito vā ī. Tehi saṅkhanābhiādīhi nibbattā tammayā.
அஞ்ஜனீனித்³தே³ஸவண்ணனா நிட்டி²தா.
Añjanīniddesavaṇṇanā niṭṭhitā.
