| Library / Tipiṭaka / तिपिटक • Tipiṭaka / खुद्दसिक्खा-मूलसिक्खा • Khuddasikkhā-mūlasikkhā |
२४. अञ्जनीनिद्देसवण्णना
24. Añjanīniddesavaṇṇanā
१८२. वट्टा वा अट्ठसोळसंसा वा मट्ठा अञ्जनी वट्टतीति योजना। अट्ठ च सोळस च अंसा कोणा यस्सा साति विग्गहो। सोळसंसपदेसविभत्ताय अट्ठंसासुतिया अट्ठंसपदेसविभत्ता चतुरंसापि सामत्थिया गय्हतीति ञातब्बं। ‘‘उजुकमेव पन चतुरंसावा’’ति हि अट्ठकथायं (पारा॰ अट्ठ॰ १.८५) वुत्तं। अञ्जनीति अञ्जननाळि। मूले तिस्सोपि लेखा वट्टन्तीति योजना। मूलेति बुन्दे, हेट्ठतोति वुत्तं होति। लेखाति वट्टलेखा। बन्धितुं गीवायं एका एव लेखा वट्टतीति सम्बन्धो। बन्धितुन्ति पिधानबन्धनत्थं।
182. Vaṭṭā vā aṭṭhasoḷasaṃsā vā maṭṭhā añjanī vaṭṭatīti yojanā. Aṭṭha ca soḷasa ca aṃsā koṇā yassā sāti viggaho. Soḷasaṃsapadesavibhattāya aṭṭhaṃsāsutiyā aṭṭhaṃsapadesavibhattā caturaṃsāpi sāmatthiyā gayhatīti ñātabbaṃ. ‘‘Ujukameva pana caturaṃsāvā’’ti hi aṭṭhakathāyaṃ (pārā. aṭṭha. 1.85) vuttaṃ. Añjanīti añjananāḷi. Mūle tissopi lekhā vaṭṭantīti yojanā. Mūleti bunde, heṭṭhatoti vuttaṃ hoti. Lekhāti vaṭṭalekhā. Bandhituṃ gīvāyaṃ ekā eva lekhā vaṭṭatīti sambandho. Bandhitunti pidhānabandhanatthaṃ.
१८३. यं किञ्चि रूपन्ति इत्थिरूपादि यं किञ्चि रूपं। मालादिकम्मन्ति मालाकम्मं लताकम्मं। अड्ढचन्दादीति एत्थ आदि-सद्देन अग्घियादिकं गहितं। एत्थाति अञ्जनियं।
183.Yaṃ kiñci rūpanti itthirūpādi yaṃ kiñci rūpaṃ. Mālādikammanti mālākammaṃ latākammaṃ. Aḍḍhacandādīti ettha ādi-saddena agghiyādikaṃ gahitaṃ. Etthāti añjaniyaṃ.
१८४. थविकाति अञ्जनिथविका। सिपाटीति खुरसिपाटिका। सलाकापि अचित्तका लब्भाति सम्बन्धो। सलाकाति अञ्जनिसलाका। नत्थि चित्तमेतिस्साति अचित्तका। तादिसं पन लभित्वा उपाहनायो विय नासेत्वा परिभुञ्जितब्बं।
184.Thavikāti añjanithavikā. Sipāṭīti khurasipāṭikā. Salākāpi acittakā labbhāti sambandho. Salākāti añjanisalākā. Natthi cittametissāti acittakā. Tādisaṃ pana labhitvā upāhanāyo viya nāsetvā paribhuñjitabbaṃ.
१८५. अट्ठि-सद्देन मनुस्सट्ठिं ठपेत्वा यं किञ्चि अट्ठि गहितं।
185.Aṭṭhi-saddena manussaṭṭhiṃ ṭhapetvā yaṃ kiñci aṭṭhi gahitaṃ.
१८६. धूमनेत्ताति धूमनाळिका, निस्स आ-कारादेसवसेन वुत्तं। सत्थकदण्डानीति सत्थदण्डा । नत्थुं देन्ति एतायाति नत्थुदाना। अनियमेन हि नदादितो वा ई। तेहि सङ्खनाभिआदीहि निब्बत्ता तम्मया।
186.Dhūmanettāti dhūmanāḷikā, nissa ā-kārādesavasena vuttaṃ. Satthakadaṇḍānīti satthadaṇḍā . Natthuṃ denti etāyāti natthudānā. Aniyamena hi nadādito vā ī. Tehi saṅkhanābhiādīhi nibbattā tammayā.
अञ्जनीनिद्देसवण्णना निट्ठिता।
Añjanīniddesavaṇṇanā niṭṭhitā.
