| Library / Tipiṭaka / ತಿಪಿಟಕ • Tipiṭaka / ಖುದ್ದಸಿಕ್ಖಾ-ಮೂಲಸಿಕ್ಖಾ • Khuddasikkhā-mūlasikkhā |
೨೪. ಅಞ್ಜನೀನಿದ್ದೇಸವಣ್ಣನಾ
24. Añjanīniddesavaṇṇanā
೧೮೨. ವಟ್ಟಾ ವಾ ಅಟ್ಠಸೋಳಸಂಸಾ ವಾ ಮಟ್ಠಾ ಅಞ್ಜನೀ ವಟ್ಟತೀತಿ ಯೋಜನಾ। ಅಟ್ಠ ಚ ಸೋಳಸ ಚ ಅಂಸಾ ಕೋಣಾ ಯಸ್ಸಾ ಸಾತಿ ವಿಗ್ಗಹೋ। ಸೋಳಸಂಸಪದೇಸವಿಭತ್ತಾಯ ಅಟ್ಠಂಸಾಸುತಿಯಾ ಅಟ್ಠಂಸಪದೇಸವಿಭತ್ತಾ ಚತುರಂಸಾಪಿ ಸಾಮತ್ಥಿಯಾ ಗಯ್ಹತೀತಿ ಞಾತಬ್ಬಂ। ‘‘ಉಜುಕಮೇವ ಪನ ಚತುರಂಸಾವಾ’’ತಿ ಹಿ ಅಟ್ಠಕಥಾಯಂ (ಪಾರಾ॰ ಅಟ್ಠ॰ ೧.೮೫) ವುತ್ತಂ। ಅಞ್ಜನೀತಿ ಅಞ್ಜನನಾಳಿ। ಮೂಲೇ ತಿಸ್ಸೋಪಿ ಲೇಖಾ ವಟ್ಟನ್ತೀತಿ ಯೋಜನಾ। ಮೂಲೇತಿ ಬುನ್ದೇ, ಹೇಟ್ಠತೋತಿ ವುತ್ತಂ ಹೋತಿ। ಲೇಖಾತಿ ವಟ್ಟಲೇಖಾ। ಬನ್ಧಿತುಂ ಗೀವಾಯಂ ಏಕಾ ಏವ ಲೇಖಾ ವಟ್ಟತೀತಿ ಸಮ್ಬನ್ಧೋ। ಬನ್ಧಿತುನ್ತಿ ಪಿಧಾನಬನ್ಧನತ್ಥಂ।
182. Vaṭṭā vā aṭṭhasoḷasaṃsā vā maṭṭhā añjanī vaṭṭatīti yojanā. Aṭṭha ca soḷasa ca aṃsā koṇā yassā sāti viggaho. Soḷasaṃsapadesavibhattāya aṭṭhaṃsāsutiyā aṭṭhaṃsapadesavibhattā caturaṃsāpi sāmatthiyā gayhatīti ñātabbaṃ. ‘‘Ujukameva pana caturaṃsāvā’’ti hi aṭṭhakathāyaṃ (pārā. aṭṭha. 1.85) vuttaṃ. Añjanīti añjananāḷi. Mūle tissopi lekhā vaṭṭantīti yojanā. Mūleti bunde, heṭṭhatoti vuttaṃ hoti. Lekhāti vaṭṭalekhā. Bandhituṃ gīvāyaṃ ekā eva lekhā vaṭṭatīti sambandho. Bandhitunti pidhānabandhanatthaṃ.
೧೮೩. ಯಂ ಕಿಞ್ಚಿ ರೂಪನ್ತಿ ಇತ್ಥಿರೂಪಾದಿ ಯಂ ಕಿಞ್ಚಿ ರೂಪಂ। ಮಾಲಾದಿಕಮ್ಮನ್ತಿ ಮಾಲಾಕಮ್ಮಂ ಲತಾಕಮ್ಮಂ। ಅಡ್ಢಚನ್ದಾದೀತಿ ಏತ್ಥ ಆದಿ-ಸದ್ದೇನ ಅಗ್ಘಿಯಾದಿಕಂ ಗಹಿತಂ। ಏತ್ಥಾತಿ ಅಞ್ಜನಿಯಂ।
183.Yaṃ kiñci rūpanti itthirūpādi yaṃ kiñci rūpaṃ. Mālādikammanti mālākammaṃ latākammaṃ. Aḍḍhacandādīti ettha ādi-saddena agghiyādikaṃ gahitaṃ. Etthāti añjaniyaṃ.
೧೮೪. ಥವಿಕಾತಿ ಅಞ್ಜನಿಥವಿಕಾ। ಸಿಪಾಟೀತಿ ಖುರಸಿಪಾಟಿಕಾ। ಸಲಾಕಾಪಿ ಅಚಿತ್ತಕಾ ಲಬ್ಭಾತಿ ಸಮ್ಬನ್ಧೋ। ಸಲಾಕಾತಿ ಅಞ್ಜನಿಸಲಾಕಾ। ನತ್ಥಿ ಚಿತ್ತಮೇತಿಸ್ಸಾತಿ ಅಚಿತ್ತಕಾ। ತಾದಿಸಂ ಪನ ಲಭಿತ್ವಾ ಉಪಾಹನಾಯೋ ವಿಯ ನಾಸೇತ್ವಾ ಪರಿಭುಞ್ಜಿತಬ್ಬಂ।
184.Thavikāti añjanithavikā. Sipāṭīti khurasipāṭikā. Salākāpi acittakā labbhāti sambandho. Salākāti añjanisalākā. Natthi cittametissāti acittakā. Tādisaṃ pana labhitvā upāhanāyo viya nāsetvā paribhuñjitabbaṃ.
೧೮೫. ಅಟ್ಠಿ-ಸದ್ದೇನ ಮನುಸ್ಸಟ್ಠಿಂ ಠಪೇತ್ವಾ ಯಂ ಕಿಞ್ಚಿ ಅಟ್ಠಿ ಗಹಿತಂ।
185.Aṭṭhi-saddena manussaṭṭhiṃ ṭhapetvā yaṃ kiñci aṭṭhi gahitaṃ.
೧೮೬. ಧೂಮನೇತ್ತಾತಿ ಧೂಮನಾಳಿಕಾ, ನಿಸ್ಸ ಆ-ಕಾರಾದೇಸವಸೇನ ವುತ್ತಂ। ಸತ್ಥಕದಣ್ಡಾನೀತಿ ಸತ್ಥದಣ್ಡಾ । ನತ್ಥುಂ ದೇನ್ತಿ ಏತಾಯಾತಿ ನತ್ಥುದಾನಾ। ಅನಿಯಮೇನ ಹಿ ನದಾದಿತೋ ವಾ ಈ। ತೇಹಿ ಸಙ್ಖನಾಭಿಆದೀಹಿ ನಿಬ್ಬತ್ತಾ ತಮ್ಮಯಾ।
186.Dhūmanettāti dhūmanāḷikā, nissa ā-kārādesavasena vuttaṃ. Satthakadaṇḍānīti satthadaṇḍā . Natthuṃ denti etāyāti natthudānā. Aniyamena hi nadādito vā ī. Tehi saṅkhanābhiādīhi nibbattā tammayā.
ಅಞ್ಜನೀನಿದ್ದೇಸವಣ್ಣನಾ ನಿಟ್ಠಿತಾ।
Añjanīniddesavaṇṇanā niṭṭhitā.
