| Library / Tipiṭaka / திபிடக • Tipiṭaka / கங்கா²விதரணீ-புராண-டீகா • Kaṅkhāvitaraṇī-purāṇa-ṭīkā |
9. அஞ்ஞபா⁴கி³யஸிக்கா²பத³வண்ணனா
9. Aññabhāgiyasikkhāpadavaṇṇanā
அஞ்ஞபா⁴கோ³ வா அஸ்ஸ அத்தீ²தி யதா² ஸுவண்ணஸ்ஸேத³ங் ஸோவண்ணமித்யத்ர ஸுவண்ணவா அனேன ஸுவண்ணோ இத்யுச்சதே. தங் படிமாய ஸரீரங், ஸிலாபுத்தகஸ்ஸ ஸரீரந்தி ச நித³ஸ்ஸனங். ச²க³லகஸ்ஸ ‘‘த³ப்³போ³’’தி தி³ன்னங் நாமங் ‘‘தே³ஸோ’’தி வுச்சதி. கஸ்மா? தே²ரங் அனுத்³த⁴ங்ஸேதுங் தே²ரஸ்ஸாபி அபதி³ஸிதப்³ப³த்தா. அஞ்ஞம்பி வத்து²ங் ந தே²ரங்யேவ. லிஸ்ஸதி ஸிலிஸ்ஸதி வோஹாரமத்தேனேவந அத்த²தோ. ஈஸகங் அல்லீயதீதி லேஸோதி அதி⁴ப்பாயோ. லிஸஸேலச²கோலஅல்லீபா⁴வே. தேன வுத்தங் ‘‘ஈஸகங் அல்லீயதீதி லேஸோ’’தி. யஸ்மா தே³ஸலேஸா அத்த²தோ நின்னானாகரணங், தஸ்மா ‘‘கிஞ்சிதே³ஸங் லேஸமத்தங் உபாதா³யா’’தி பத³ங் உத்³த⁴ரித்வா ‘‘த³ஸ லேஸா ஜாதிலேஸோ’’திஆதி³ (பாரா॰ 394) பத³பா⁴ஜனே வுத்தங்.
Aññabhāgovā assa atthīti yathā suvaṇṇassedaṃ sovaṇṇamityatra suvaṇṇavā anena suvaṇṇo ityuccate. Taṃ paṭimāya sarīraṃ, silāputtakassa sarīranti ca nidassanaṃ. Chagalakassa ‘‘dabbo’’ti dinnaṃ nāmaṃ ‘‘deso’’ti vuccati. Kasmā? Theraṃ anuddhaṃsetuṃ therassāpi apadisitabbattā. Aññampi vatthuṃ na theraṃyeva. Lissati silissati vohāramattenevana atthato. Īsakaṃ allīyatīti lesoti adhippāyo. Lisaselachakolaallībhāve. Tena vuttaṃ ‘‘īsakaṃ allīyatīti leso’’ti. Yasmā desalesā atthato ninnānākaraṇaṃ, tasmā ‘‘kiñcidesaṃ lesamattaṃ upādāyā’’ti padaṃ uddharitvā ‘‘dasa lesā jātileso’’tiādi (pārā. 394) padabhājane vuttaṃ.
அட்டு²ப்பத்திவஸேனேவ ஆவிபூ⁴தந்தி எத்த² கிஞ்ச பி⁴ய்யோ அனியமத்தா. ந ஹி மெத்தியபூ⁴மஜகானங் விய அஞ்ஞேஸங் ஸப்³பே³ஸம்பி ‘‘ச²க³லகமேவெத்த² அஞ்ஞபா⁴கி³யங் அதி⁴கரணங் ஹோதி, அஞ்ஞங் கோ³மஹிங்ஸாதி³கம்பி ஹோதி, ந ச மெத்தியபூ⁴மஜகா விய ஸப்³பே³பி நாமலேஸமத்தமேவ உபாதி³யந்தி, அஞ்ஞம்பி ஜாதிலேஸாதி³ங் உபாதி³யந்தி, தஸ்மா அனியமத்தா ந விப⁴த்தங். கிஞ்ச பி⁴ய்யோ ததா²வுத்தே ச²க³லகஸ்ஸேவ அஞ்ஞபா⁴கி³யதா ஸம்ப⁴வதி, ந அஞ்ஞஸ்ஸ, யேன ஸோவ த³ஸ்ஸிதோ. லேஸோ ச நாம லேஸோவ, ந ஜாதிஆதி³, யேன ஸோவ த³ஸ்ஸிதோதி ஏவங் மிச்சா²கா³ஹப்பஸங்க³தோதி வேதி³தப்³ப³ங். இத⁴ ச…பே॰… ஸஞ்ஞினோபீதி இமஸ்மிங் ஸிக்கா²பதே³ ச அமூலகஸிக்கா²பதே³ சாதி அத்தோ².
Aṭṭhuppattivaseneva āvibhūtanti ettha kiñca bhiyyo aniyamattā. Na hi mettiyabhūmajakānaṃ viya aññesaṃ sabbesampi ‘‘chagalakamevettha aññabhāgiyaṃ adhikaraṇaṃ hoti, aññaṃ gomahiṃsādikampi hoti, na ca mettiyabhūmajakā viya sabbepi nāmalesamattameva upādiyanti, aññampi jātilesādiṃ upādiyanti, tasmā aniyamattā na vibhattaṃ. Kiñca bhiyyo tathāvutte chagalakasseva aññabhāgiyatā sambhavati, na aññassa, yena sova dassito. Leso ca nāma lesova, na jātiādi, yena sova dassitoti evaṃ micchāgāhappasaṅgatoti veditabbaṃ. Idha ca…pe… saññinopīti imasmiṃ sikkhāpade ca amūlakasikkhāpade cāti attho.
அஞ்ஞபா⁴கி³யஸிக்க²ங் யோ, நேவ ஸிக்க²தி யுத்திதோ;
Aññabhāgiyasikkhaṃ yo, neva sikkhati yuttito;
க³ச்சே² வினயவிஞ்ஞூஹி, அஞ்ஞபா⁴கி³யதங்வ ஸோ. (வஜிர॰ டீ॰ பாராஜிக 408);
Gacche vinayaviññūhi, aññabhāgiyataṃva so. (vajira. ṭī. pārājika 408);
அஞ்ஞபா⁴கி³யஸிக்கா²பத³வண்ணனா நிட்டி²தா.
Aññabhāgiyasikkhāpadavaṇṇanā niṭṭhitā.
