| Library / Tipiṭaka / திபிடக • Tipiṭaka / மிலிந்த³பஞ்ஹபாளி • Milindapañhapāḷi |
7. அஞ்ஞகாயஸங்கமனபஞ்ஹோ
7. Aññakāyasaṅkamanapañho
7. ராஜா ஆஹ ‘‘ப⁴ந்தே நாக³ஸேன, அத்தி² கோசி ஸத்தோ யோ இமம்ஹா காயா அஞ்ஞங் காயங் ஸங்கமதீ’’தி? ‘‘ந ஹி, மஹாராஜா’’தி. ‘‘யதி³, ப⁴ந்தே நாக³ஸேன, இமம்ஹா காயா அஞ்ஞங் காயங் ஸங்கமந்தோ நத்தி², நனு முத்தோ ப⁴விஸ்ஸதி பாபகேஹி கம்மேஹீ’’தி? ‘‘ஆம, மஹாராஜ, யதி³ ந படிஸந்த³ஹெய்ய, முத்தோ ப⁴விஸ்ஸதி பாபகேஹி கம்மேஹீதி, யஸ்மா ச கோ², மஹாராஜ, படிஸந்த³ஹதி, தஸ்மா ந பரிமுத்தோ பாபகேஹி கம்மேஹீ’’தி.
7. Rājā āha ‘‘bhante nāgasena, atthi koci satto yo imamhā kāyā aññaṃ kāyaṃ saṅkamatī’’ti? ‘‘Na hi, mahārājā’’ti. ‘‘Yadi, bhante nāgasena, imamhā kāyā aññaṃ kāyaṃ saṅkamanto natthi, nanu mutto bhavissati pāpakehi kammehī’’ti? ‘‘Āma, mahārāja, yadi na paṭisandaheyya, mutto bhavissati pāpakehi kammehīti, yasmā ca kho, mahārāja, paṭisandahati, tasmā na parimutto pāpakehi kammehī’’ti.
‘‘ஓபம்மங் கரோஹீ’’தி. ‘‘யதா², மஹாராஜ, கோசிதே³வ புரிஸோ அஞ்ஞதரஸ்ஸ புரிஸஸ்ஸ அம்ப³ங் அவஹரெய்ய, கிங் ஸோ த³ண்ட³ப்பத்தோ ப⁴வெய்யா’’தி? ‘‘ஆம, ப⁴ந்தே, த³ண்ட³ப்பத்தோ ப⁴வெய்யா’’தி. ‘‘ந கோ² ஸோ, மஹாராஜ, தானி அம்பா³னி அவஹரி, யானி தேன ரோபிதானி, கஸ்மா த³ண்ட³ப்பத்தோ ப⁴வெய்யா’’தி? ‘‘தானி, ப⁴ந்தே, அம்பா³னி நிஸ்ஸாய ஜாதானி, தஸ்மா த³ண்ட³ப்பத்தோ ப⁴வெய்யா’’தி. ‘‘ஏவமேவ கோ², மஹாராஜ, இமினா நாமரூபேன கம்மங் கரோதி ஸோப⁴னங் வா அஸோப⁴னங் வா, தேன கம்மேன அஞ்ஞங் நாமரூபங் படிஸந்த³ஹதி, தஸ்மா ந பரிமுத்தோ பாபகேஹி கம்மேஹீ’’தி.
‘‘Opammaṃ karohī’’ti. ‘‘Yathā, mahārāja, kocideva puriso aññatarassa purisassa ambaṃ avahareyya, kiṃ so daṇḍappatto bhaveyyā’’ti? ‘‘Āma, bhante, daṇḍappatto bhaveyyā’’ti. ‘‘Na kho so, mahārāja, tāni ambāni avahari, yāni tena ropitāni, kasmā daṇḍappatto bhaveyyā’’ti? ‘‘Tāni, bhante, ambāni nissāya jātāni, tasmā daṇḍappatto bhaveyyā’’ti. ‘‘Evameva kho, mahārāja, iminā nāmarūpena kammaṃ karoti sobhanaṃ vā asobhanaṃ vā, tena kammena aññaṃ nāmarūpaṃ paṭisandahati, tasmā na parimutto pāpakehi kammehī’’ti.
‘‘கல்லோஸி, ப⁴ந்தே நாக³ஸேனா’’தி.
‘‘Kallosi, bhante nāgasenā’’ti.
அஞ்ஞகாயஸங்கமனபஞ்ஹோ ஸத்தமோ.
Aññakāyasaṅkamanapañho sattamo.
