| Library / Tipiṭaka / ติปิฎก • Tipiṭaka / มิลินฺทปญฺหปาฬิ • Milindapañhapāḷi |
๗. อญฺญกายสงฺกมนปโญฺห
7. Aññakāyasaṅkamanapañho
๗. ราชา อาห ‘‘ภเนฺต นาคเสน, อตฺถิ โกจิ สโตฺต โย อิมมฺหา กายา อญฺญํ กายํ สงฺกมตี’’ติ? ‘‘น หิ, มหาราชา’’ติฯ ‘‘ยทิ, ภเนฺต นาคเสน, อิมมฺหา กายา อญฺญํ กายํ สงฺกมโนฺต นตฺถิ, นนุ มุโตฺต ภวิสฺสติ ปาปเกหิ กเมฺมหี’’ติ? ‘‘อาม, มหาราช, ยทิ น ปฎิสนฺทเหยฺย, มุโตฺต ภวิสฺสติ ปาปเกหิ กเมฺมหีติ, ยสฺมา จ โข, มหาราช, ปฎิสนฺทหติ, ตสฺมา น ปริมุโตฺต ปาปเกหิ กเมฺมหี’’ติฯ
7. Rājā āha ‘‘bhante nāgasena, atthi koci satto yo imamhā kāyā aññaṃ kāyaṃ saṅkamatī’’ti? ‘‘Na hi, mahārājā’’ti. ‘‘Yadi, bhante nāgasena, imamhā kāyā aññaṃ kāyaṃ saṅkamanto natthi, nanu mutto bhavissati pāpakehi kammehī’’ti? ‘‘Āma, mahārāja, yadi na paṭisandaheyya, mutto bhavissati pāpakehi kammehīti, yasmā ca kho, mahārāja, paṭisandahati, tasmā na parimutto pāpakehi kammehī’’ti.
‘‘โอปมฺมํ กโรหี’’ติฯ ‘‘ยถา, มหาราช, โกจิเทว ปุริโส อญฺญตรสฺส ปุริสสฺส อมฺพํ อวหเรยฺย, กิํ โส ทณฺฑปฺปโตฺต ภเวยฺยา’’ติ? ‘‘อาม, ภเนฺต, ทณฺฑปฺปโตฺต ภเวยฺยา’’ติฯ ‘‘น โข โส, มหาราช, ตานิ อมฺพานิ อวหริ, ยานิ เตน โรปิตานิ, กสฺมา ทณฺฑปฺปโตฺต ภเวยฺยา’’ติ? ‘‘ตานิ, ภเนฺต, อมฺพานิ นิสฺสาย ชาตานิ, ตสฺมา ทณฺฑปฺปโตฺต ภเวยฺยา’’ติฯ ‘‘เอวเมว โข, มหาราช, อิมินา นามรูเปน กมฺมํ กโรติ โสภนํ วา อโสภนํ วา, เตน กเมฺมน อญฺญํ นามรูปํ ปฎิสนฺทหติ, ตสฺมา น ปริมุโตฺต ปาปเกหิ กเมฺมหี’’ติฯ
‘‘Opammaṃ karohī’’ti. ‘‘Yathā, mahārāja, kocideva puriso aññatarassa purisassa ambaṃ avahareyya, kiṃ so daṇḍappatto bhaveyyā’’ti? ‘‘Āma, bhante, daṇḍappatto bhaveyyā’’ti. ‘‘Na kho so, mahārāja, tāni ambāni avahari, yāni tena ropitāni, kasmā daṇḍappatto bhaveyyā’’ti? ‘‘Tāni, bhante, ambāni nissāya jātāni, tasmā daṇḍappatto bhaveyyā’’ti. ‘‘Evameva kho, mahārāja, iminā nāmarūpena kammaṃ karoti sobhanaṃ vā asobhanaṃ vā, tena kammena aññaṃ nāmarūpaṃ paṭisandahati, tasmā na parimutto pāpakehi kammehī’’ti.
‘‘กโลฺลสิ, ภเนฺต นาคเสนา’’ติฯ
‘‘Kallosi, bhante nāgasenā’’ti.
อญฺญกายสงฺกมนปโญฺห สตฺตโมฯ
Aññakāyasaṅkamanapañho sattamo.
