| Library / Tipiṭaka / တိပိဋက • Tipiṭaka / မိလိန္ဒပဉ္ဟပာဠိ • Milindapañhapāḷi |
၇. အညကာယသင္ကမနပဉ္ဟော
7. Aññakāyasaṅkamanapañho
၇. ရာဇာ အာဟ ‘‘ဘန္တေ နာဂသေန, အတ္ထိ ကောစိ သတ္တော ယော ဣမမ္ဟာ ကာယာ အညံ ကာယံ သင္ကမတီ’’တိ? ‘‘န ဟိ, မဟာရာဇာ’’တိ။ ‘‘ယဒိ, ဘန္တေ နာဂသေန, ဣမမ္ဟာ ကာယာ အညံ ကာယံ သင္ကမန္တော နတ္ထိ, နနု မုတ္တော ဘဝိသ္သတိ ပာပကေဟိ ကမ္မေဟီ’’တိ? ‘‘အာမ, မဟာရာဇ, ယဒိ န ပဋိသန္ဒဟေယ္ယ, မုတ္တော ဘဝိသ္သတိ ပာပကေဟိ ကမ္မေဟီတိ, ယသ္မာ စ ခော, မဟာရာဇ, ပဋိသန္ဒဟတိ, တသ္မာ န ပရိမုတ္တော ပာပကေဟိ ကမ္မေဟီ’’တိ။
7. Rājā āha ‘‘bhante nāgasena, atthi koci satto yo imamhā kāyā aññaṃ kāyaṃ saṅkamatī’’ti? ‘‘Na hi, mahārājā’’ti. ‘‘Yadi, bhante nāgasena, imamhā kāyā aññaṃ kāyaṃ saṅkamanto natthi, nanu mutto bhavissati pāpakehi kammehī’’ti? ‘‘Āma, mahārāja, yadi na paṭisandaheyya, mutto bhavissati pāpakehi kammehīti, yasmā ca kho, mahārāja, paṭisandahati, tasmā na parimutto pāpakehi kammehī’’ti.
‘‘ဩပမ္မံ ကရောဟီ’’တိ။ ‘‘ယထာ, မဟာရာဇ, ကောစိဒေဝ ပုရိသော အညတရသ္သ ပုရိသသ္သ အမ္ဗံ အဝဟရေယ္ယ, ကိံ သော ဒဏ္ဍပ္ပတ္တော ဘဝေယ္ယာ’’တိ? ‘‘အာမ, ဘန္တေ, ဒဏ္ဍပ္ပတ္တော ဘဝေယ္ယာ’’တိ။ ‘‘န ခော သော, မဟာရာဇ, တာနိ အမ္ဗာနိ အဝဟရိ, ယာနိ တေန ရောပိတာနိ, ကသ္မာ ဒဏ္ဍပ္ပတ္တော ဘဝေယ္ယာ’’တိ? ‘‘တာနိ, ဘန္တေ, အမ္ဗာနိ နိသ္သာယ ဇာတာနိ, တသ္မာ ဒဏ္ဍပ္ပတ္တော ဘဝေယ္ယာ’’တိ။ ‘‘ဧဝမေဝ ခော, မဟာရာဇ, ဣမိနာ နာမရူပေန ကမ္မံ ကရောတိ သောဘနံ ဝာ အသောဘနံ ဝာ, တေန ကမ္မေန အညံ နာမရူပံ ပဋိသန္ဒဟတိ, တသ္မာ န ပရိမုတ္တော ပာပကေဟိ ကမ္မေဟီ’’တိ။
‘‘Opammaṃ karohī’’ti. ‘‘Yathā, mahārāja, kocideva puriso aññatarassa purisassa ambaṃ avahareyya, kiṃ so daṇḍappatto bhaveyyā’’ti? ‘‘Āma, bhante, daṇḍappatto bhaveyyā’’ti. ‘‘Na kho so, mahārāja, tāni ambāni avahari, yāni tena ropitāni, kasmā daṇḍappatto bhaveyyā’’ti? ‘‘Tāni, bhante, ambāni nissāya jātāni, tasmā daṇḍappatto bhaveyyā’’ti. ‘‘Evameva kho, mahārāja, iminā nāmarūpena kammaṃ karoti sobhanaṃ vā asobhanaṃ vā, tena kammena aññaṃ nāmarūpaṃ paṭisandahati, tasmā na parimutto pāpakehi kammehī’’ti.
‘‘ကလ္လောသိ, ဘန္တေ နာဂသေနာ’’တိ။
‘‘Kallosi, bhante nāgasenā’’ti.
အညကာယသင္ကမနပဉ္ဟော သတ္တမော။
Aññakāyasaṅkamanapañho sattamo.
