| Library / Tipiṭaka / තිපිටක • Tipiṭaka / මිලින්‌දපඤ්‌හපාළි • Milindapañhapāḷi |
7. අඤ්‌ඤකායසඞ්‌කමනපඤ්‌හො
7. Aññakāyasaṅkamanapañho
7. රාජා ආහ ‘‘භන්‌තෙ නාගසෙන, අත්‌ථි කොචි සත්‌තො යො ඉමම්‌හා කායා අඤ්‌ඤං කායං සඞ්‌කමතී’’ති? ‘‘න හි, මහාරාජා’’ති. ‘‘යදි, භන්‌තෙ නාගසෙන, ඉමම්‌හා කායා අඤ්‌ඤං කායං සඞ්‌කමන්‌තො නත්‌ථි, නනු මුත්‌තො භවිස්‌සති පාපකෙහි කම්‌මෙහී’’ති? ‘‘ආම, මහාරාජ, යදි න පටිසන්‌දහෙය්‍ය, මුත්‌තො භවිස්‌සති පාපකෙහි කම්‌මෙහීති, යස්‌මා ච ඛො, මහාරාජ, පටිසන්‌දහති, තස්‌මා න පරිමුත්‌තො පාපකෙහි කම්‌මෙහී’’ති.
7. Rājā āha ‘‘bhante nāgasena, atthi koci satto yo imamhā kāyā aññaṃ kāyaṃ saṅkamatī’’ti? ‘‘Na hi, mahārājā’’ti. ‘‘Yadi, bhante nāgasena, imamhā kāyā aññaṃ kāyaṃ saṅkamanto natthi, nanu mutto bhavissati pāpakehi kammehī’’ti? ‘‘Āma, mahārāja, yadi na paṭisandaheyya, mutto bhavissati pāpakehi kammehīti, yasmā ca kho, mahārāja, paṭisandahati, tasmā na parimutto pāpakehi kammehī’’ti.
‘‘ඔපම්‌මං කරොහී’’ති. ‘‘යථා, මහාරාජ, කොචිදෙව පුරිසො අඤ්‌ඤතරස්‌ස පුරිසස්‌ස අම්‌බං අවහරෙය්‍ය, කිං සො දණ්‌ඩප්‌පත්‌තො භවෙය්‍යා’’ති? ‘‘ආම, භන්‌තෙ, දණ්‌ඩප්‌පත්‌තො භවෙය්‍යා’’ති. ‘‘න ඛො සො, මහාරාජ, තානි අම්‌බානි අවහරි, යානි තෙන රොපිතානි, කස්‌මා දණ්‌ඩප්‌පත්‌තො භවෙය්‍යා’’ති? ‘‘තානි, භන්‌තෙ, අම්‌බානි නිස්‌සාය ජාතානි, තස්‌මා දණ්‌ඩප්‌පත්‌තො භවෙය්‍යා’’ති. ‘‘එවමෙව ඛො, මහාරාජ, ඉමිනා නාමරූපෙන කම්‌මං කරොති සොභනං වා අසොභනං වා, තෙන කම්‌මෙන අඤ්‌ඤං නාමරූපං පටිසන්‌දහති, තස්‌මා න පරිමුත්‌තො පාපකෙහි කම්‌මෙහී’’ති.
‘‘Opammaṃ karohī’’ti. ‘‘Yathā, mahārāja, kocideva puriso aññatarassa purisassa ambaṃ avahareyya, kiṃ so daṇḍappatto bhaveyyā’’ti? ‘‘Āma, bhante, daṇḍappatto bhaveyyā’’ti. ‘‘Na kho so, mahārāja, tāni ambāni avahari, yāni tena ropitāni, kasmā daṇḍappatto bhaveyyā’’ti? ‘‘Tāni, bhante, ambāni nissāya jātāni, tasmā daṇḍappatto bhaveyyā’’ti. ‘‘Evameva kho, mahārāja, iminā nāmarūpena kammaṃ karoti sobhanaṃ vā asobhanaṃ vā, tena kammena aññaṃ nāmarūpaṃ paṭisandahati, tasmā na parimutto pāpakehi kammehī’’ti.
‘‘කල්‌ලොසි, භන්‌තෙ නාගසෙනා’’ති.
‘‘Kallosi, bhante nāgasenā’’ti.
අඤ්‌ඤකායසඞ්‌කමනපඤ්‌හො සත්‌තමො.
Aññakāyasaṅkamanapañho sattamo.
