| Library / Tipiṭaka / တိပိဋက • Tipiṭaka / ပဉ္စပကရဏ-အဋ္ဌကထာ • Pañcapakaraṇa-aṭṭhakathā |
၂. အညမညပစ္စယကထာဝဏ္ဏနာ
2. Aññamaññapaccayakathāvaṇṇanā
၇၁၈-၇၁၉. ဣဒာနိ အညမညပစ္စယကထာ နာမ ဟောတိ။ တတ္ထ ယေသံ သမယေ ‘‘အဝိဇ္ဇာပစ္စယာ သင္ခာရာ’’တိ အယမေဝ တန္တိ, ‘‘သင္ခာရပစ္စယာပိ အဝိဇ္ဇာ’’တိ အယံ နတ္ထိ, တသ္မာ အဝိဇ္ဇာဝ သင္ခာရာနံ ပစ္စယော, န ပန သင္ခာရာ အဝိဇ္ဇာယာတိ လဒ္ဓိ, သေယ္ယထာပိ မဟာသင္ဃိကာနံ; တေ သန္ဓာယ အဝိဇ္ဇာသင္ခာရာဒီနံ အညမညပစ္စယတာပိ အတ္ထီတိ ဒသ္သေတုံ ပုစ္ဆာ သကဝာဒိသ္သ, ပဋိညာ ဣတရသ္သ ။ အဝိဇ္ဇာ သင္ခာရေနာတိ ဧတ္ထ အပုညာဘိသင္ခာရောဝ ဂဟိတော။ တသ္မာ သင္ခာရပစ္စယာပိ အဝိဇ္ဇာတိ ဧတ္ထ သဟဇာတအညမညအတ္ထိအဝိဂတသမ္ပယုတ္တဝသေန ပစ္စယတာ ဝေဒိတဗ္ဗာ။ ဥပာဒာနပစ္စယာပိ တဏ္ဟာတိ ဧတ္ထ ဌပေတ္ဝာ ကာမုပာဒာနံ သေသာနိ တီဏိ ဥပာဒာနာနိ အဝိဇ္ဇာယ သင္ခာရာ ဝိယ တဏ္ဟာယ ပစ္စယာ ဟောန္တီတိ ဝေဒိတဗ္ဗာနိ။ သေသံ ယထာပာဠိမေဝ နိယ္ယာတိ။ ဇရာမရဏပစ္စယာတိ ပုစ္ဆာ ပရဝာဒိသ္သ, နာမရူပံ ဝိညာဏပစ္စယာတိ သကဝာဒိသ္သာတိ။
718-719. Idāni aññamaññapaccayakathā nāma hoti. Tattha yesaṃ samaye ‘‘avijjāpaccayā saṅkhārā’’ti ayameva tanti, ‘‘saṅkhārapaccayāpi avijjā’’ti ayaṃ natthi, tasmā avijjāva saṅkhārānaṃ paccayo, na pana saṅkhārā avijjāyāti laddhi, seyyathāpi mahāsaṅghikānaṃ; te sandhāya avijjāsaṅkhārādīnaṃ aññamaññapaccayatāpi atthīti dassetuṃ pucchā sakavādissa, paṭiññā itarassa . Avijjā saṅkhārenāti ettha apuññābhisaṅkhārova gahito. Tasmā saṅkhārapaccayāpi avijjāti ettha sahajātaaññamaññaatthiavigatasampayuttavasena paccayatā veditabbā. Upādānapaccayāpi taṇhāti ettha ṭhapetvā kāmupādānaṃ sesāni tīṇi upādānāni avijjāya saṅkhārā viya taṇhāya paccayā hontīti veditabbāni. Sesaṃ yathāpāḷimeva niyyāti. Jarāmaraṇapaccayāti pucchā paravādissa, nāmarūpaṃ viññāṇapaccayāti sakavādissāti.
အညမညပစ္စယကထာဝဏ္ဏနာ။
Aññamaññapaccayakathāvaṇṇanā.
Related texts:
တိပိဋက (မူလ) • Tipiṭaka (Mūla) / အဘိဓမ္မပိဋက • Abhidhammapiṭaka / ကထာဝတ္ထုပာဠိ • Kathāvatthupāḷi / (၁၄၆) ၂. အညမညပစ္စယကထာ • (146) 2. Aññamaññapaccayakathā
ဋီကာ • Tīkā / အဘိဓမ္မပိဋက (ဋီကာ) • Abhidhammapiṭaka (ṭīkā) / ပဉ္စပကရဏ-မူလဋီကာ • Pañcapakaraṇa-mūlaṭīkā / ၂. အညမညပစ္စယကထာဝဏ္ဏနာ • 2. Aññamaññapaccayakathāvaṇṇanā
ဋီကာ • Tīkā / အဘိဓမ္မပိဋက (ဋီကာ) • Abhidhammapiṭaka (ṭīkā) / ပဉ္စပကရဏ-အနုဋီကာ • Pañcapakaraṇa-anuṭīkā / ၂. အညမညပစ္စယကထာဝဏ္ဏနာ • 2. Aññamaññapaccayakathāvaṇṇanā
