| Library / Tipiṭaka / තිපිටක • Tipiṭaka / පඤ්‌චපකරණ-අට්‌ඨකථා • Pañcapakaraṇa-aṭṭhakathā |
2. අඤ්‌ඤමඤ්‌ඤපච්‌චයකථාවණ්‌ණනා
2. Aññamaññapaccayakathāvaṇṇanā
718-719. ඉදානි අඤ්‌ඤමඤ්‌ඤපච්‌චයකථා නාම හොති. තත්‌ථ යෙසං සමයෙ ‘‘අවිජ්‌ජාපච්‌චයා සඞ්‌ඛාරා’’ති අයමෙව තන්‌ති, ‘‘සඞ්‌ඛාරපච්‌චයාපි අවිජ්‌ජා’’ති අයං නත්‌ථි, තස්‌මා අවිජ්‌ජාව සඞ්‌ඛාරානං පච්‌චයො, න පන සඞ්‌ඛාරා අවිජ්‌ජායාති ලද්‌ධි, සෙය්‍යථාපි මහාසඞ්‌ඝිකානං; තෙ සන්‌ධාය අවිජ්‌ජාසඞ්‌ඛාරාදීනං අඤ්‌ඤමඤ්‌ඤපච්‌චයතාපි අත්‌ථීති දස්‌සෙතුං පුච්‌ඡා සකවාදිස්‌ස, පටිඤ්‌ඤා ඉතරස්‌ස . අවිජ්‌ජා සඞ්‌ඛාරෙනාති එත්‌ථ අපුඤ්‌ඤාභිසඞ්‌ඛාරොව ගහිතො. තස්‌මා සඞ්‌ඛාරපච්‌චයාපි අවිජ්‌ජාති එත්‌ථ සහජාතඅඤ්‌ඤමඤ්‌ඤඅත්‌ථිඅවිගතසම්‌පයුත්‌තවසෙන පච්‌චයතා වෙදිතබ්‌බා. උපාදානපච්‌චයාපි තණ්‌හාති එත්‌ථ ඨපෙත්‌වා කාමුපාදානං සෙසානි තීණි උපාදානානි අවිජ්‌ජාය සඞ්‌ඛාරා විය තණ්‌හාය පච්‌චයා හොන්‌තීති වෙදිතබ්‌බානි. සෙසං යථාපාළිමෙව නිය්‍යාති. ජරාමරණපච්‌චයාති පුච්‌ඡා පරවාදිස්‌ස, නාමරූපං විඤ්‌ඤාණපච්‌චයාති සකවාදිස්‌සාති.
718-719. Idāni aññamaññapaccayakathā nāma hoti. Tattha yesaṃ samaye ‘‘avijjāpaccayā saṅkhārā’’ti ayameva tanti, ‘‘saṅkhārapaccayāpi avijjā’’ti ayaṃ natthi, tasmā avijjāva saṅkhārānaṃ paccayo, na pana saṅkhārā avijjāyāti laddhi, seyyathāpi mahāsaṅghikānaṃ; te sandhāya avijjāsaṅkhārādīnaṃ aññamaññapaccayatāpi atthīti dassetuṃ pucchā sakavādissa, paṭiññā itarassa . Avijjā saṅkhārenāti ettha apuññābhisaṅkhārova gahito. Tasmā saṅkhārapaccayāpi avijjāti ettha sahajātaaññamaññaatthiavigatasampayuttavasena paccayatā veditabbā. Upādānapaccayāpi taṇhāti ettha ṭhapetvā kāmupādānaṃ sesāni tīṇi upādānāni avijjāya saṅkhārā viya taṇhāya paccayā hontīti veditabbāni. Sesaṃ yathāpāḷimeva niyyāti. Jarāmaraṇapaccayāti pucchā paravādissa, nāmarūpaṃ viññāṇapaccayāti sakavādissāti.
අඤ්‌ඤමඤ්‌ඤපච්‌චයකථාවණ්‌ණනා.
Aññamaññapaccayakathāvaṇṇanā.
Related texts:
තිපිටක (මූල) • Tipiṭaka (Mūla) / අභිධම්‌මපිටක • Abhidhammapiṭaka / කථාවත්‌ථුපාළි • Kathāvatthupāḷi / (146) 2. අඤ්‌ඤමඤ්‌ඤපච්‌චයකථා • (146) 2. Aññamaññapaccayakathā
ටීකා • Tīkā / අභිධම්‌මපිටක (ටීකා) • Abhidhammapiṭaka (ṭīkā) / පඤ්‌චපකරණ-මූලටීකා • Pañcapakaraṇa-mūlaṭīkā / 2. අඤ්‌ඤමඤ්‌ඤපච්‌චයකථාවණ්‌ණනා • 2. Aññamaññapaccayakathāvaṇṇanā
ටීකා • Tīkā / අභිධම්‌මපිටක (ටීකා) • Abhidhammapiṭaka (ṭīkā) / පඤ්‌චපකරණ-අනුටීකා • Pañcapakaraṇa-anuṭīkā / 2. අඤ්‌ඤමඤ්‌ඤපච්‌චයකථාවණ්‌ණනා • 2. Aññamaññapaccayakathāvaṇṇanā
