| Library / Tipiṭaka / තිපිටක • Tipiṭaka / පඤ්‌චපකරණ-අට්‌ඨකථා • Pañcapakaraṇa-aṭṭhakathā |
7. අඤ්‌ඤමඤ්‌ඤපච්‌චයනිද්‌දෙසවණ්‌ණනා
7. Aññamaññapaccayaniddesavaṇṇanā
7. අඤ්‌ඤමඤ්‌ඤපච්‌චයනිද්‌දෙසෙ සහජාතපච්‌චයනිද්‌දෙසස්‌ස පුරිමානං තිණ්‌ණං කොට්‌ඨාසානං වසෙන පාළි ආගතා. තස්‌සා තත්‌ථ වුත්‌තසදිසාව වණ්‌ණනාති පුන න ගහිතා. අයම්‌පි ච අඤ්‌ඤමඤ්‌ඤපච්‌චයො ජාතිවසෙන කුසලො අකුසලො විපාකො කිරියං රූපන්‌ති පඤ්‌චධා භින්‌නො. තත්‌ථ කුසලො භූමිතො චතුබ්‌බිධො. සබ්‌බං පුරිමසදිසමෙවාති එවමෙත්‌ථ නානප්‌පකාරභෙදතො විඤ්‌ඤාතබ්‌බො විනිච්‌ඡයො.
7. Aññamaññapaccayaniddese sahajātapaccayaniddesassa purimānaṃ tiṇṇaṃ koṭṭhāsānaṃ vasena pāḷi āgatā. Tassā tattha vuttasadisāva vaṇṇanāti puna na gahitā. Ayampi ca aññamaññapaccayo jātivasena kusalo akusalo vipāko kiriyaṃ rūpanti pañcadhā bhinno. Tattha kusalo bhūmito catubbidho. Sabbaṃ purimasadisamevāti evamettha nānappakārabhedato viññātabbo vinicchayo.
එවං භින්‌නෙ පනෙත්‌ථ සබ්‌බම්‌පි චතුභූමකං කුසලං අත්‌තනා සම්‌පයුත්‌තධම්‌මානං අඤ්‌ඤමඤ්‌ඤපච්‌චයෙන පච්‌චයො. තථා අකුසලං. විපාකෙ පන කාමාවචරරූපාවචරවිපාකං පටිසන්‌ධියං වත්‌ථුරූපස්‌ස, පවත්‌තෙ සම්‌පයුත්‌තධම්‌මානඤ්‌ඤෙව. අරූපාවචරලොකුත්‌තරවිපාකං අත්‌තනා සම්‌පයුත්‌තධම්‌මානඤ්‌ඤෙව අඤ්‌ඤමඤ්‌ඤපච්‌චයෙන පච්‌චයො. සබ්‌බම්‌පි කිරියං සම්‌පයුත්‌තධම්‌මානඤ්‌ඤෙව අඤ්‌ඤමඤ්‌ඤපච්‌චයෙන පච්‌චයො. චතුසමුට්‌ඨානිකරූපස්‌ස කම්‌මසමුට්‌ඨානෙ එකං මහාභූතං තිණ්‌ණං, තීණි එකස්‌ස, ද්‌වෙ ද්‌වින්‌නං මහාභූතානං අඤ්‌ඤමඤ්‌ඤපච්‌චයෙන පච්‌චයො. කාමාවචරරූපාවචරපටිසන්‌ධියං වත්‌ථුරූපං විපාකක්‌ඛන්‌ධානං අඤ්‌ඤමඤ්‌ඤපච්‌චයෙන පච්‌චයො. උතුචිත්‌තාහාරසමුට්‌ඨානෙසු මහාභූතානෙව මහාභූතානං අඤ්‌ඤමඤ්‌ඤපච්‌චයෙන පච්‌චයොති එවමෙත්‌ථ පච්‌චයුප්‌පන්‌නතොපි විඤ්‌ඤාතබ්‌බො විනිච්‌ඡයොති.
Evaṃ bhinne panettha sabbampi catubhūmakaṃ kusalaṃ attanā sampayuttadhammānaṃ aññamaññapaccayena paccayo. Tathā akusalaṃ. Vipāke pana kāmāvacararūpāvacaravipākaṃ paṭisandhiyaṃ vatthurūpassa, pavatte sampayuttadhammānaññeva. Arūpāvacaralokuttaravipākaṃ attanā sampayuttadhammānaññeva aññamaññapaccayena paccayo. Sabbampi kiriyaṃ sampayuttadhammānaññeva aññamaññapaccayena paccayo. Catusamuṭṭhānikarūpassa kammasamuṭṭhāne ekaṃ mahābhūtaṃ tiṇṇaṃ, tīṇi ekassa, dve dvinnaṃ mahābhūtānaṃ aññamaññapaccayena paccayo. Kāmāvacararūpāvacarapaṭisandhiyaṃ vatthurūpaṃ vipākakkhandhānaṃ aññamaññapaccayena paccayo. Utucittāhārasamuṭṭhānesu mahābhūtāneva mahābhūtānaṃ aññamaññapaccayena paccayoti evamettha paccayuppannatopi viññātabbo vinicchayoti.
අඤ්‌ඤමඤ්‌ඤපච්‌චයනිද්‌දෙසවණ්‌ණනා.
Aññamaññapaccayaniddesavaṇṇanā.
Related texts:
තිපිටක (මූල) • Tipiṭaka (Mūla) / අභිධම්‌මපිටක • Abhidhammapiṭaka / පට්‌ඨානපාළි • Paṭṭhānapāḷi / (2) පච්‌චයනිද්‌දෙසො • (2) Paccayaniddeso
