| Library / Tipiṭaka / ཏིཔིཊཀ • Tipiṭaka / པཉྩཔཀརཎ-ཨཊྛཀཐཱ • Pañcapakaraṇa-aṭṭhakathā |
༧. ཨཉྙམཉྙཔཙྩཡནིདྡེསཝཎྞནཱ
7. Aññamaññapaccayaniddesavaṇṇanā
༧. ཨཉྙམཉྙཔཙྩཡནིདྡེསེ སཧཛཱཏཔཙྩཡནིདྡེསསྶ པུརིམཱནཾ ཏིཎྞཾ ཀོཊྛཱསཱནཾ ཝསེན པཱལི༹ ཨཱགཏཱ། ཏསྶཱ ཏཏྠ ཝུཏྟསདིསཱཝ ཝཎྞནཱཏི པུན ན གཧིཏཱ། ཨཡམྤི ཙ ཨཉྙམཉྙཔཙྩཡོ ཛཱཏིཝསེན ཀུསལོ ཨཀུསལོ ཝིཔཱཀོ ཀིརིཡཾ རཱུཔནྟི པཉྩདྷཱ བྷིནྣོ། ཏཏྠ ཀུསལོ བྷཱུམིཏོ ཙཏུབྦིདྷོ། སབྦཾ པུརིམསདིསམེཝཱཏི ཨེཝམེཏྠ ནཱནཔྤཀཱརབྷེདཏོ ཝིཉྙཱཏབྦོ ཝིནིཙྪཡོ།
7. Aññamaññapaccayaniddese sahajātapaccayaniddesassa purimānaṃ tiṇṇaṃ koṭṭhāsānaṃ vasena pāḷi āgatā. Tassā tattha vuttasadisāva vaṇṇanāti puna na gahitā. Ayampi ca aññamaññapaccayo jātivasena kusalo akusalo vipāko kiriyaṃ rūpanti pañcadhā bhinno. Tattha kusalo bhūmito catubbidho. Sabbaṃ purimasadisamevāti evamettha nānappakārabhedato viññātabbo vinicchayo.
ཨེཝཾ བྷིནྣེ པནེཏྠ སབྦམྤི ཙཏུབྷཱུམཀཾ ཀུསལཾ ཨཏྟནཱ སམྤཡུཏྟདྷམྨཱནཾ ཨཉྙམཉྙཔཙྩཡེན པཙྩཡོ། ཏཐཱ ཨཀུསལཾ། ཝིཔཱཀེ པན ཀཱམཱཝཙརརཱུཔཱཝཙརཝིཔཱཀཾ པཊིསནྡྷིཡཾ ཝཏྠུརཱུཔསྶ, པཝཏྟེ སམྤཡུཏྟདྷམྨཱནཉྙེཝ། ཨརཱུཔཱཝཙརལོཀུཏྟརཝིཔཱཀཾ ཨཏྟནཱ སམྤཡུཏྟདྷམྨཱནཉྙེཝ ཨཉྙམཉྙཔཙྩཡེན པཙྩཡོ། སབྦམྤི ཀིརིཡཾ སམྤཡུཏྟདྷམྨཱནཉྙེཝ ཨཉྙམཉྙཔཙྩཡེན པཙྩཡོ། ཙཏུསམུཊྛཱནིཀརཱུཔསྶ ཀམྨསམུཊྛཱནེ ཨེཀཾ མཧཱབྷཱུཏཾ ཏིཎྞཾ, ཏཱིཎི ཨེཀསྶ, དྭེ དྭིནྣཾ མཧཱབྷཱུཏཱནཾ ཨཉྙམཉྙཔཙྩཡེན པཙྩཡོ། ཀཱམཱཝཙརརཱུཔཱཝཙརཔཊིསནྡྷིཡཾ ཝཏྠུརཱུཔཾ ཝིཔཱཀཀྑནྡྷཱནཾ ཨཉྙམཉྙཔཙྩཡེན པཙྩཡོ། ཨུཏུཙིཏྟཱཧཱརསམུཊྛཱནེསུ མཧཱབྷཱུཏཱནེཝ མཧཱབྷཱུཏཱནཾ ཨཉྙམཉྙཔཙྩཡེན པཙྩཡོཏི ཨེཝམེཏྠ པཙྩཡུཔྤནྣཏོཔི ཝིཉྙཱཏབྦོ ཝིནིཙྪཡོཏི།
Evaṃ bhinne panettha sabbampi catubhūmakaṃ kusalaṃ attanā sampayuttadhammānaṃ aññamaññapaccayena paccayo. Tathā akusalaṃ. Vipāke pana kāmāvacararūpāvacaravipākaṃ paṭisandhiyaṃ vatthurūpassa, pavatte sampayuttadhammānaññeva. Arūpāvacaralokuttaravipākaṃ attanā sampayuttadhammānaññeva aññamaññapaccayena paccayo. Sabbampi kiriyaṃ sampayuttadhammānaññeva aññamaññapaccayena paccayo. Catusamuṭṭhānikarūpassa kammasamuṭṭhāne ekaṃ mahābhūtaṃ tiṇṇaṃ, tīṇi ekassa, dve dvinnaṃ mahābhūtānaṃ aññamaññapaccayena paccayo. Kāmāvacararūpāvacarapaṭisandhiyaṃ vatthurūpaṃ vipākakkhandhānaṃ aññamaññapaccayena paccayo. Utucittāhārasamuṭṭhānesu mahābhūtāneva mahābhūtānaṃ aññamaññapaccayena paccayoti evamettha paccayuppannatopi viññātabbo vinicchayoti.
ཨཉྙམཉྙཔཙྩཡནིདྡེསཝཎྞནཱ།
Aññamaññapaccayaniddesavaṇṇanā.
Related texts:
ཏིཔིཊཀ (མཱུལ) • Tipiṭaka (Mūla) / ཨབྷིདྷམྨཔིཊཀ • Abhidhammapiṭaka / པཊྛཱནཔཱལི༹ • Paṭṭhānapāḷi / (༢) པཙྩཡནིདྡེསོ • (2) Paccayaniddeso
