Annapurna Upanishad

॥ annapūrṇopaniṣat ॥

sarvāpahnavasaṃsiddhabrahmamātratayojjvalam ।
traipadaṃ śrīrāmatattvaṃ svamātramiti bhāvaye ॥

oṃ bhadraṃ karṇebhiḥ śṛṇuyāma devāḥ ॥ bhadraṃ paśyemākṣabhiryajatrāḥ ॥

sthirairaṅgaistuṣṭuvām̐sastanūbhiḥ ॥ vyaśema devahitaṃ yadāyuḥ ॥

svasti na indro vṛddhaśravāḥ ॥ svasti naḥ pūṣā viśvavedāḥ ॥

svasti nastārkṣyo ariṣṭanemiḥ ॥ svasti no bṛhaspatirdadhātu ॥

oṃ śāntiḥ śāntiḥ śāntiḥ ॥

hariḥ oṃ nidāgho nāma yogīndra ṛbhuṃ brahmavidāṃ varam ।
praṇamya daṇḍavadbhūmāvutthāya sa punarmuniḥ ॥ 1॥

ātmatattvamanubrūhītyevaṃ papraccha sādaram ।
kayopāsanayā brahmannīdṛśaṃ prāptavānasi ॥ 2॥

tāṃ me brūhi mahāvidyāṃ mokṣasāmrājyadāyinīm ।
nidāgha tvaṃ kṛtārtho'si śṛṇu vidyāṃ sanātanīm ॥ 3॥

yasyā vijñānamātreṇa jīvanmukto bhaviṣyasi ।
mūlaśṛṅgāṭamadhyasthā bindunādakalāśrayā ॥ 4॥

nityānandā nirādhārā vikhyātā vilasatkacā ।
viṣṭapeśī mahālakṣmīḥ kāmastāro natistathā ॥ 5॥

bhagavatyannapūrṇeti mamābhilaṣitaṃ tataḥ ।
annaṃ dehi tataḥ svāhā mantrasāreti viśrutā ॥ 6॥

saptaviṃśati varṇātmā yoginīgaṇasevitā ॥ 7॥

aiṃ hrīṃ sauṃ śrīṃ klīmonnamo bhagavatyannapūrṇe
mamābhilaṣitamannaṃ dehi svāhā ।
iti pitropadiṣṭo'smi tadādiniyamaḥ sthitaḥ ।
kṛtavānsvāśramācāro mantrānuṣṭhānamanvaham ॥ 8॥

evaṃ gate bahudine prādurāsīnmamāgrataḥ ।
annapūrṇā viśālākṣī smayamānamukhāmbujā ॥ 9॥

tāṃ dṛṣṭvā daṇḍavadbhūmau natvā prāñjalirāsthitaḥ ।
aho vatsa kṛtārtho'si varaṃ varaya mā ciram ॥ 10॥

evamukto viśālākṣyā mayoktaṃ munipuṅgava ।
ātmatattvaṃ manasi me prādurbhavatu pārvati ॥ 11॥

tathaivāsthiti māmuktvā tatraivāntaradhīyata ।
tadā me matirutpannā jagadvaicitryadarśanāt ॥ 12॥

bhramaḥ pañcavidho bhāti tadeveha samucyate ।
jīveśvarau bhinnarūpāviti prāthamiko bhramaḥ ॥ 12॥

ātmaniṣṭhaṃ kartṛguṇaṃ vāstavaṃ vā dvitīyakaḥ ।
śarīratrayasaṃyuktajīvaḥ saṅgī tṛtīyakaḥ ॥ 13॥

jagatkāraṇarūpasya vikāritvaṃ caturthakaḥ ।
kāraṇādbhinnajagataḥ satyatvaṃ pañcamo bhramaḥ ।
pañcabhramanivṛttiśca tadā sphurati cetasi ॥ 15॥

bimbapratibimbadarśanena bhedabhramo nivṛttaḥ ।
sphaṭikalohitadarśanena pāramārthikakartṛtvabhramo nivṛttaḥ ।
ghaṭamaṭhākāśadarśanena saṅgītibhramo nivṛttaḥ ।
rajjusarpadarśanena kāraṇādbhinnajagataḥ satyatvabhramo nivṛttaḥ ।
kanakarucakadarśanena vikāritvabhramo nivṛttaḥ ।
tadāprabhṛti maccittaṃ brahmākāramabhūtsvayam ।
nidāgha tvamapītthaṃ hi tattvajñānamavāpnuhi ॥ 16॥

nidāghaḥ praṇato bhūtvā ṛbhuṃ papraccha sādaram ।
brūhi me śraddadhānāya brahmavidyāmanuttamām ॥ 17॥

tathetyāha ṛbhuḥ prītastattvajñāṃ vadāmi te ।
mahākartā mahābhoktā mahātyāgī bhavānagha ।
svasvarūpānusandhānamevaṃ kṛtvā sukhī bhava ॥ 18॥

nityoditaṃ vimalamādyamanatarūpaṃ
brahmāsmi netarakalākalanaṃ hi kiṃcit ।
ityeva bhāvaya nirañjanatāmupeto
nirvāṇamehi sakalāmalaśāntavṛttiḥ ॥ 19॥

yadidaṃ dṛśyate kiṃcittattannāstīti bhāvaya ।
yathā gandharvanagaraṃ yathā vāri marusthale ॥ 20॥

yattu no dṛśyate kiṃcidyannu kiṃcidiva sthitam ।
manaḥṣaṣṭhendriyātītaṃ tanmayo bhava vai mune ॥ 21॥

avināśi cidākāśaṃ sarvātmakamakhaṇḍitam ।
nīrandhraṃ bhūrivāśeṣaṃ tadasmīti vibhāvaya ॥ 22॥

yadā saṃkṣīyate cittamabhāvātyantabhāvanāt ।
citsāmānyasvarūpasya sattāsāmānyatā tadā ॥ 23॥

nūnaṃ caityāṃśarahitā cidyadātmani līyate ।
asadrūpavadatyacchā sattāsāmānyatā tadā ॥ 24॥

dṛṣṭireṣā hi paramā sadehādehayoḥ samā ।
muktayoḥ saṃbhavatyeva turyātītapadābhidhā ॥ 25॥

vyutthitasya bhavatyeṣā samādhisthasya cānagha ।
jñasya kevalamajñasya na bhavatyeva bodhajā ।
anānandasamānandamugdhamugdhamukhadyutiḥ ॥ 26॥

cirakālaparikṣīṇamananādiparibhramaḥ ।
padamāsādyate puṇyaṃ prajñayaivaikayā tathā ॥ 27॥

imaṃ guṇasamāhāramanātmatvena paśyataḥ ।
antaḥśītalayā yāsau samādhiriti kathyate ॥ 28॥

avāsanaṃ sthiraṃ proktaṃ manodhyānaṃ tadeva ca ।
tadeva kevalībhānaṃ śāntataiva ca tatsadā ॥ 29॥

tanuvāsanamatyuccaiḥ padāyodyatamucyate ।
avāsagaṃ mano'kartṛpadaṃ tasmādavāpyate ॥ 30॥

ghanavāsanametattu cetaḥkartṛtvabhāvanam ।
sarvaduḥkhapradaṃ tasmādvāsanāṃ tanutāṃ nayet ॥ 31॥

cetasā samparityajya sarvabhāvātmabhāvanām ।
sarvamākāśatāmeti nityamantarmukhasthiteḥ ॥ 32॥

yathā vipaṇagā lokā viharanto'pyasatsamāḥ ।
asaṃbandhāttathā jñasya grāmo'pi vipinopamaḥ ॥ 33॥

antarmukhatayā nityaṃ supto buddho vrajanpaṭhan ।
puraṃ janapadaṃ grāmamaraṇyamiva paśyati ॥ 34॥

antaḥśītalatāyāṃ tu labdhāyāṃ śītalaṃ jagat ।
antastṛṣṇopataptānāṃ dāvadāhamayaṃ jagat ॥ 35॥

bhavatyakhilajantūnāṃ yadantastadbahiḥ sthitam ॥ 36॥

yastvātmaratirevāntaḥ kurvankarmendriyaiḥ kriyāḥ ।
na vaśo harṣaśokābhyāṃ sa samāhita ucyate ॥ 37॥

ātmavatsarvabhūtāni paradravyāṇi loṣṭhavat ।
svabhāvādeva na bhayādyaḥ paśyati sa paśyati ॥ 38॥

adyaiva mṛtirāyātu kalpāntanicayena vā ।
nāsau kalaṅkamāpnoti hema paṅkagataṃ yathā ॥ 39॥

ko'haṃ kathamidaṃ kiṃ vā kathaṃ maraṇajanmanī ।
vicārayāntare vetthaṃ mahattatphalameṣyasi ॥ 40॥

vicāreṇa parijñātasvabhāvasya satastava ।
manaḥ svarūpamutsṛjya śamameṣyati vijvaram ॥ 41॥

vijvaratvaṃ gataṃ cetastava saṃsāravṛttiṣu ।
na nimajjati tadbrahmangoṣpadeṣviva vāraṇaḥ ॥ 42॥

kṛpaṇaṃ tu mano brahmangoṣpade'pi nimajjati ।
kārye goṣpadatoye'pi viśīrṇo maśako yathā ॥ 43॥

yāvadyāvanmuniśreṣṭha svayaṃ saṃtajyate'khilam ।
tāvattāvatparālokaḥ paramātmaiva śiṣyate ॥ 44॥

yāvatsarvaṃ na saṃtyaktaṃ tāvadātmā na labhyate ।
sarvavastuparityāge śeṣa ātmeti kathyate ॥ 45॥

ātmāvalokanārthaṃ tu tasmātsarvaṃ parityajet ।
sarvaṃ saṃtyajya dūreṇa yacchiṣṭaṃ tanmayo bhava ॥ 46॥

sarvaṃ kiṃcididaṃ dṛśyaṃ dṛśyate yajjagadgatam ।
cinniṣpandāṃśamātraṃ tannānyatkiṃcana śāśvatam ॥ 47॥

samāhitā nityatṛptā yathābhūtārthadarśinī ।
brahmansamādhiśabdena parā prajñocyate budhaiḥ ॥ 48॥

akṣubdhā nirahaṃkārā dvandveṣvananupātinī ।
proktā samādhiśabdena meroḥ sthiratarā sthitiḥ ॥ 49॥

niścitā vigatābhīṣṭā heyopadeyavarjitā ।
brahmansamādhiśabdena paripūrṇā manogatiḥ ॥ 50॥

kevalaṃ citprakāśāṃśakalpitā sthiratāṃ gatā ।
turyā sā prāpyate dṛṣṭirmahadbhirvedavittamaiḥ ॥ 51॥

adūragatasādṛśyā suṣuptasyopalakṣyate ।
manohaṃkāravilaye sarvabhāvāntarasthitā ॥ 52॥

samudeti parānandā yā tanuḥ pārameśvarī ।
manasaiva manaśchittvā sā svayaṃ labhyate gatiḥ ॥ 53॥

tadanu viṣayavāsanāvināśa-
stadanu śubhaḥ paramaḥ sphuṭaprakāśaḥ ।
tadanu ca samatāvaśātsvarūpe
pariṇamanaṃ mahatāmacintyarūpam ॥ 54॥

akhilamidamanantamanantamātmatattvaṃ
dṛḍhapariṇāmini cetasi sthito'ntaḥ ।
bahirupaśamite carācarātmā
svayamanubhūyata eva devadevaḥ ॥ 55॥

asaktaṃ nirmalaṃ cittaṃ yuktaṃ saṃsāryavisphuṭam ।
saktaṃ tu dīrghatapasā muktamapyatibaddhavat ॥ 56॥

antaḥsaṃsaktinirmukto jīvo madhuravṛttimān ।
bahiḥ kurvannakurvanvā kartā bhoktā na hi kvacit ॥ 57॥

iti prathamo'dhyāyaḥ ॥ 1॥

nidāgha uvāca ॥

saṅgaḥ kīdṛśa ityuktaḥ kaśca bandhāya dehinām ।
kaśca mokṣāya kathitaḥ kathaṃ tveṣa cikitsyate ॥ 1॥

dehadehivibhāgaikaparityāgena bhāvanā ।
dehamātre hi viśvāsaḥ saṅgo bandhāya kathyate ॥ 2॥

sarvamātmedamatrāhaṃ kiṃ vāñchāmi tyajāmi kim ।
ityasaṅgasthitiṃ viddhi jīvanmuktatanusthitām ॥ 3॥

nāhamasmi na cānyosti na cāyaṃ na ca netaraḥ ।
so'saṅga iti samprokto brahmāsmītyeva sarvadā ॥ 4॥

nābhinandati naiṣkarmyaṃ na karmasvanuṣajjate ।
susamo yaḥ parityāgī so'saṃsakta iti smṛtaḥ ॥ 5॥

sarvakarmaphalādīnāṃ manasaiva na karmaṇā ।
nipuṇo yaḥ parityāgī so'saṃsakta iti smṛtaḥ ॥ 6॥

asaṃkalpena sakalāśceṣṭā nānā vijṛṃbhitāḥ ।
cikitsitā bhavantīha śreyaḥ sampādayanti hi ॥ 7॥

na saktamiha ceṣṭāsu na cintāsu na vastuṣu ।
na gamāgamaceṣṭāsu na kālakalanāsu ca ॥ 8॥

kevalaṃ citi viśramya kiṃciccaityāvalaṃbyapi ।
sarvatra nīrasamiha tiṣṭhatyātmarasaṃ manaḥ ॥ 9॥

vyavahāramidaṃ sarvaṃ mā karotu karotu vā ।
akurvanvāpi kurvanvā jīvaḥ svātmaratikriyaḥ ॥ 10॥

athavā tamapi tyaktvā caityāṃśaṃ śāntacidghanaḥ ।
jīvastiṣṭhati saṃśānto jvalanmaṇirivātmani ॥ 11॥

citte caityadaśāhīne yā sthitiḥ kṣīṇacetasām ।
socyate śāntakalanā jāgratyeva suṣuptatā ॥ 12॥

eṣā nidāgha sauṣuptasthitirabhyāsayogataḥ ।
prauḍhā satī turīyeti kathitā tattvakovidaiḥ ॥ 13॥

asyāṃ turīyāvasthāyāṃ sthitiṃ prāpyāvināśinīm ।
ānandaikāntaśīlatvādanānandapadaṃ gataḥ ॥ 14॥

anānandamahānandakālātītastato'pi hi ।
mukta ityucyate yogī turyātītapadaṃ gataḥ ॥ 15॥

parigalitasamastajanmapāśaḥ
sakalavilīnatamomayābhimānaḥ ।
paramarasamayīṃ parātmasattāṃ
jalagatasaindhavakhaṇḍavanmahātmā ॥ 16॥

jaḍājaḍadṛśormadhye yattattvaṃ pāramārthikam ।
anubhūtimayaṃ tasmātsāraṃ brahmeti kathyate ॥ 17॥

dṛśyasaṃvalito bandhastanmuktau muktirucyate ।
dravyadarśanasaṃbandhe yānubhūtiranāmayā ॥ 18॥

tāmavaṣṭabhya tiṣṭha tvaṃ sauṣuptīṃ bhajate sthitim ।
saiva turyatvamāpnoti tasyāṃ dṛṣṭiṃ sthirāṃ kuru ॥ 19॥

ātmā sthūlo na caivāṇurna pratyakṣo na cetaraḥ ।
na cetano na ca jaḍo na caivāsanna sanmayaḥ ॥ 20॥

nāhaṃ nānyo na caivaiko na cāneko'dvayo'vyayaḥ ।
yadīdaṃ dṛśyatāṃ prāptaṃ manaḥ sarvendriyāspadam ॥ 21॥

dṛśyadarśanasaṃbandhe yatsukhaṃ pāramārthikam ।
tadatītaṃ padaṃ yasmāttanna kiṃcidivaiva tat ॥ 22॥

na mokṣo nabhasaḥ pṛṣṭhe na pātāle na bhūtale ।
sarvāśāsaṃkṣaye cetaḥkṣayo mokṣa itīṣyate ॥ 23॥

mokṣo me'stviti cintāntarjātā cedutthitaṃ manaḥ ।
mananotthe manasyaiṣa bandhaḥ sāṃsāriko dṛḍhaḥ ॥ 24॥

ātmanyatīte sarvasmātsarvarūpe'tha vā tate ।
ko bandhaḥ kaśca vā mokṣo nirmūlaṃ mananaṃ kuru ॥ 25॥

adhyātmaratirāśāntaḥ pūrṇapāvanamānasaḥ ।
prāptānuttamaviśrāntirna kiṃcidiha vāñchati ॥ 26॥

sarvādhiṣṭhānasanmātre nirvikalpe cidātmani ।
yo jīvati gatasnehaḥ sa jīvanmukta ucyate ॥ 27॥

nāpekṣate bhaviṣyacca vartamāne na tiṣṭhati ।
na saṃsmaratyatītaṃ ca sarvameva karoti ca ॥ 28॥

anubandhapare jantāvasaṃsargamanāḥ sadā ।
bhakte bhaktasamācaraḥ śaṭhe śaṭha iva sthitaḥ ॥ 29॥

bālo bāleṣu vṛddheṣu vṛddho dhīreṣu dhairyavān ।
yuvā yauvanavṛtteṣu duḥkhiteṣu suduḥkhadhīḥ ॥ 30॥

dhīradhīruditānandaḥ peśalaḥ puṇyakīrtanaḥ ।
prājñaḥ prasannamadhuro dainyādapagatāśayaḥ ॥ 31॥

abhyāsena parispande prāṇānāṃ kṣayamāgate ।
manaḥ praśamamāyāti nirvāṇamavaśiṣyate ॥ 32॥

yato vāco nivartante vikalpakalanānvitāḥ ।
vikalpasaṃkṣayājjantoḥ padaṃ tadavaśiṣyate ॥ 33॥

anādyantāvabhāsātmā paramātmaiva vidyate ।
ityetanniścayaṃ sphāraṃ samyagjñānaṃ vidurbudhāḥ ॥ 34॥

yathābhūtārthadarśitvametāvadbhuvanatraye ।
yadātmaiva jagatsarvamiti niścitya pūrṇatā ॥ 35॥

sarvamātmaiva kau dṛṣṭau bhāvābhāvau kva vā sthitau ।
kva bandhamokṣakalane brahmaivedaṃ vijṛmbhate ॥ 36॥

sarvamekaṃ paraṃ vyoma ko mokṣaḥ kasya bandhatā ।
brahmedaṃ bṛṃhitākāraṃ bṛhadbṛhadavasthitam ॥ 37॥

dūrādastamitadvitvaṃ bhavātmaiva tvamātmanā ।
samyagālokite rūpe kāṣṭhapāṣāṇavāsasām ॥ 38॥

manāgapi na bhedo'sti kvāsi saṃkalpanonmukhaḥ ।
ādāvante ca saṃśāntasvarūpamavināśi yat ॥ 39॥

vastūnāmātmanaścaitattanmayo bhava sarvadā ।
dvaitādvaitasamudbhedairjarāmaraṇavibhramaiḥ ॥ 40॥

sphuratyātmabhirātmaiva cittairabdhīva vīcibhiḥ ।
āpatkarañjaparaśuṃ parāyā nirvṛteḥ padam ॥ 41॥

śuddhamātmānamāliṅgya nityamantasthayā dhiyā ।
yaḥ sthitastaṃ ka ātmeha bhogo bādhayituṃ kṣamaḥ ॥ 42॥

kṛtasphāravicārasya manobhogādayo'rayaḥ ।
manāgapi na bhindanti śailaṃ mandānilā iva ॥ 43॥

nānātvamasti kalanāsu na vastuto'nta-
rnānāvidhāsu sarasīva jalādivānyat ।
ityekaniścayamayaḥ puruṣo vimukta
ityucyate samavalokitasamyagarthaḥ ॥ 44॥

iti dvitīyo'dhyāyaḥ ॥ 2॥

videhamukteḥ kiṃ rūpaṃ tadvānko vā mahāmuniḥ ।
kaṃ yogaṃ samupasthāya prāptavānparamaṃ padam ॥ 1॥

sumerorvasudhāpīṭhe māṇḍavyo nāma vai muniḥ ।
kauṇḍinyāttattvamāsthāya jīvanmukto bhavatyasau ॥ 2॥

jīvanmuktidaśāṃ prāpya kadācidbrahmavittamaḥ ।
sarvendriyāṇi saṃhartuṃ manaścakre mahāmuniḥ ॥ 3॥

baddhapadmāsanastiṣṭhannardhonmīlitalocanaḥ ।
bāhyānābhyāntarāṃścaiva sparśānpariharañchanaiḥ ॥ 4॥

tataḥ svamanasaḥ sthairyaṃ manasā vigatainasā ।
aho nu cañcalamidaṃ pratyāhṛtamapi sphuṭam ॥ 5॥

paṭādghaṭamupāyāti ghaṭācchakaṭamutkaṭam ।
cittamartheṣu carati pādapeṣviva markaṭaḥ ॥ 6॥

pañca dvārāṇi manasā cakṣurādīnyamūnyalam ।
buddhīndriyābhidhānāni tānyevālokayāmyaham ॥ 7॥

hantendriyagaṇā yūyaṃ tyajatākulatāṃ śanaiḥ ।
cidātmā bhagavānsarvasākṣitvena sthito'smyaham ॥ 8॥

tenātmanā bahujñena nirjñātāścakṣurādayaḥ ।
parinirvāmi śānto'smi diṣṭyāsmi vigatajvaraḥ ॥ 9॥

svātmanyevāvatiṣṭhe'haṃ turyarūpapade'niśam ।
antareva śaśāmāsya krameṇa prāṇasantatiḥ ॥ 10॥

jvālājālaparispando dagdhendhana ivānalaḥ ।
tadito'staṃ gata iva hyastaṃ gata ivoditaḥ ॥ 11॥

samaḥ samarasābhāsastiṣṭhāmi svacchatāṃ gataḥ ।
prabuddho'pi suṣuptisthaḥ suṣuptisthaḥ prabuddhavān ॥ 12॥

turyamālambya kāyāntastiṣṭhāmi stambhitasthitiḥ ।
sabāhyābhyantarānbhāvānsthūlānsūkṣmatarānapi ॥ 13॥

trailokyasaṃbhavāṃstyaktvā saṃkalpaikavinirmitān ।
saha praṇavaparyantadīrghaniḥsvanatantunā ॥ 14॥

jahāvindriyatanmātrajālaṃ khaga ivānalaḥ ।
tato'ṅgasaṃvidaṃ svacchāṃ pratibhāsamupāgatām ॥ 15॥

sadyojātaśiśujñānaṃ prāptavānmunipuṅgavaḥ ।
jahau cittaṃ caityadaśāṃ spandaśaktimivānilaḥ ॥ 16॥

citsāmānyamathāsādya sattāmātrātmakaṃ tataḥ ।
suṣuptapadamālambya tasthau giririvācalaḥ ॥ 17॥

suṣuptasthairyamāsādya turyarūpamupāyayau ।
nirānando'pi sānandaḥ saccāsacca babhūva saḥ ॥ 18॥

tatastu saṃbabhūvāsau yadgirāmapyagocaraḥ ।
yacchūnyavādināṃ śūnyaṃ brahma brahmavidāṃ ca yat ॥ 19॥

vijñānamātraṃ vijñānavidāṃ yadamalātmakam ।
puruṣaḥ sāṃkhyadṛṣṭīnāmīśvaro yogavādinām ॥ 20॥

śivaḥ śaivāgamasthānāṃ kālaḥ kālaikavādinām ।
yatsarvaśāstrasiddhāntaṃ yatsarvahṛdayānugam ॥ 21॥

yatsarvaṃ sarvagaṃ vastu yattattvaṃ tadasau sthitaḥ ।
yadanuktamaniṣpandaṃ dīpakaṃ tejasāmapi ॥ 22॥

svānubhūtyaikamānaṃ ca yattattvaṃ tadasau sthitaḥ ।
yadekaṃ cāpyanekaṃ ca sāñjanaṃ ca nirañjanam ।
yatsarvaṃ cāpyasarvaṃ ca yattattvaṃ tadasu sthitaḥ ॥ 23॥

ajamamaramanādyamādyamekaṃ
padamamalaṃ sakalaṃ ca niṣkalaṃ ca ।
sthita iti sa tadā nabhaḥsvarūpā-
dapivimalasthitirīśvaraḥ kṣaṇena ॥ 24॥

iti tṛtīyo'dhyāyaḥ ॥ 3॥

jīvanmuktasya kiṃ lakṣma hyākāśagamanādikam ।
tathā cenmuniśārdūla tatra naiva pralakṣyate ॥ 1॥

anātmavidamukto'pi nabhoviharaṇādikam ।
dravyamantrakriyākālaśaktyāpnotyeva sa dvijaḥ ॥2॥

nātmajñasyaiṣa viṣaya ātmajño hyātmamātradṛk ।
ātmanātmani saṃtṛpto nāvidyāmanudhāvati ॥ 3॥

ye ye bhāvāḥ sthitā loke tānavidyāmayānviduḥ ।
tyaktāvidyo mahāyogī kathaṃ teṣu nimajjati ॥ 4॥

yastu mūḍho'lpabuddhirvā siddhijālāni vāñchati ।
siddhisādhanairyogaistāni sādhayati kramāt ॥ 5॥

dravyamantrakriyākālayuktayaḥ sādhusiddhidāḥ ।
paramātmapadaprāptau nopakurvanti kāścana ॥ 6॥

yasyecchā vidyate kācitsā siddhiṃ sādhayatyaho ।
niricchoḥ paripūrṇasya necchā saṃbhavati kvacit ॥ 7॥

sarvecchājālasaṃjñāntāvātmalābho bhavenmune ।
sa kathaṃ siddhijālāni nūnaṃ vāñchantyacittakaḥ ॥ 8॥

api śītarucāvarke sutīkṣṇe'pīndumaṇḍale ।
apyadhaḥ prasaratyagnau jīvanmukto na vismayī ॥ 9॥

adhiṣṭhāne pare tattve kalpitā rajjusarpavat ।
kalpitāścaryajāleṣu nābhyudeti kutūhalam ॥ 10॥

ye hi vijñātavijñeyā vītarāgā mahādhiyaḥ ।
vicchinnagranthayaḥ sarve te svatantrāstanau sthitaḥ ॥ 11
sukhaduḥkhadaśādhīraṃ sāmyānna proddharanti yam ।
niśvāsā iva śailendraṃ cittaṃ tasya mṛtaṃ viduḥ ॥ 12॥

āpatkārpaṇyamutsāho mado māndyaṃ mahotsavaḥ ।
yaṃ nayanti na vairūpyaṃ tasya naṣṭaṃ mano viduḥ ॥ 13॥

dvividhacittanāśo'sti sarūpo'rūpa eva ca ।
jīvanmuktau sarūpaḥ syādarūpo dehamuktigaḥ ॥ 14॥

cittasatteha duḥkhāya cittanāśaḥ sukhāya ca ।
cittasattaṃ kṣayaṃ nītvā cittaṃ nāśamupānayet ॥ 15॥

manastāṃ mūḍhatāṃ viddhi yadā naśyati sānagha ।
cittanāśābhidhānaṃ hi tatsvarūpamitīritam ॥ 16॥

maitryādibhirguṇairyuktaṃ bhavatyuttamavāsanam ।
bhūyo janmavinirmuktaṃ jīvanmuktasya tanmanaḥ ॥ 17॥

sarūpo'sau manonāśo jīvanmuktasya vidyate ।
nidāghā'rūpanāśastu vartate dehamuktike ॥ 18॥

videhamukta evāsau vidyate niṣkalātmakaḥ ।
samagrāgryaguṇādhāramapi sattvaṃ pralīyate ॥ 19॥

videhamuktau vimale pade paramapāvane ।
videhamuktiviṣaye tasminsattvakṣayātmake ॥ 20॥

cittanāśe virūpākhye na kiṃcidiha vidyate ।
na guṇā nāguṇāstatra na śrīrnāśrīrna lokatā ॥ 21॥

na codayo nāstamayo na harṣāmarṣasaṃvidaḥ ।
na tejo na tamaḥ kiṃcinna sandhyādinarātrayaḥ ।
na sattāpi na cāsattā na ca madhyaṃ hi tatpadam ॥ 22॥

ye hi pāraṃ gatā buddheḥ saṃsārāḍambarasya ca ।
teṣāṃ tadāspadaṃ sphāraṃ pavanānāmivāmbaram ॥ 23॥

saṃśāntaduḥkhamajaḍātmakamekasupta-
mānandamantharamapetarajastamo yat ।
ākāśakośatanavo'tanavo mahānta-
stasminpade galitacittalavā bhavanti ॥ 24॥

he nidāgha mahāprājña nirvāsanamanā bhava ।
balāccetaḥ samādhāya nirvikalpamanā bhava ॥ 25॥

yajjagadbhāsakaṃ bhānaṃ nityaṃ bhāti svataḥ sphurat ।
sa eva jagataḥ sākṣī sarvātmā vimalākṛtiḥ ॥ 26॥

pratiṣṭhā sarvabhūtānāṃ prajñānaghanalakṣaṇaḥ ।
tadvidyāviṣayaṃ brahma satyajñānasukhādvanam ॥ 27॥

ekaṃ brahmāhamasmīti kṛtakṛtyo bhavenmuniḥ ॥ 28॥

sarvādhiṣṭhānamadvandvaṃ paraṃ brahma sanātanam ।
saccidānandarūpaṃ tadavāṅmanasagocaram ॥ 29॥

na tatra candrārkavapuḥ prakāśate
na vānti vātaḥ sakalāśca devatāḥ ।
sa eva devaḥ kṛtabhāvabhūtaḥ
svayaṃ viśuddho virajaḥ prakāśate ॥ 30॥

bhidyate hṛdayagranthiśchidyante sarvasaṃśayāḥ ।
kṣīyante cāsya karmāṇi tasmindṛṣṭe parāvare ॥ 31॥

dvau suparṇau śarīre'smiñjīveśākhyau saha sthitau ।
tayorjīvaḥ phalaṃ bhuṅkte karmaṇo na maheśvaraḥ ॥ 32॥

kevalaṃ sākṣirūpeṇa vinā bhogo maheśvaraḥ ।
prakāśate svayaṃ bhedaḥ kalpito māyayā tayoḥ ।
ciccidākārato bhinnā na bhinnā cittvahānitaḥ ॥ 33॥

tarkataśca pramāṇācca cidekatvavyavasthiteḥ ।
cidekatvaparijñāne na śocati na muhyati ॥ 34॥

adhiṣṭhānaṃ samastasya jagataḥ satyacidghanam ।
ahamasmīti niścitya vītaśoko bhavenmuniḥ ॥ 35॥

svaśarīre svayaṃjyotisvarūpaṃ sarvasākṣiṇam ।
kṣīṇadoṣāḥ prapaśyanti netare māyayāvṛtāḥ ॥ 36॥

tameva dhīro vijñāya prajñāṃ kurvīta brāhmaṇaḥ ।
nānudhyāyādbahūñchabdānvāco viglāpanaṃ hi tat ॥ 37॥

bālenaiva hi tiṣṭhāsennirvidya brahmavedanam ।
brahmavidyāṃ ca bālyaṃ ca nirvidya munirātmavān ॥ 38॥

antarlīnasamārambhaḥ śubhāśubhamahāṅkuram ।
saṃsṛtivrataterbījaṃ śarīraṃ viddhi bhautikam ॥ 39॥

bhāvābhāvadaśākośaṃ duḥkharatnasamudgakam ।
bījamasya śarīrasya cittamāśāvaśānugam ॥ 40॥

dve bīje cittavṛkṣasya vṛttivratatidhāriṇaḥ ।
ekaṃ prāṇaparispando dvitīyo dṛḍhabhāvanā ॥ 41॥

yadā praspandante prāṇo nāḍīsaṃsparśanodyataḥ ।
tadā saṃvedanamayaṃ cittamāśu prajāyate ॥ 42॥

sā hi sarvagatā saṃvitprāṇaspandena bodhyate ।
saṃvitsaṃrodhanaṃ śreyaḥ prāṇādispandanaṃ varam ॥ 43॥

yoginaścittaśāntyarthaṃ kurvanti prāṇarodhanam ।
prāṇāyāmaistathā dhyānaiḥ prayogairyuktikalpitaiḥ ॥ 44॥

cittopaśāntiphaladaṃ paramaṃ viddhi kāraṇam ।
sukhadaṃ saṃvidaḥ svāsthyaṃ prāṇasaṃrodhanaṃ viduḥ ॥ 45॥

dṛḍhabhāvanayā tyaktapūrvāparavicāraṇam ।
yadādānaṃ padārthasya vāsanā sā prakīrtitā ॥ 46॥

yadā na bhāvyate kiṃciddheyopādeyarūpi yat ।
sthīyate sakalaṃ tyaktvā tadā cittaṃ na jāyate ॥ 47॥

avāsanatvātsatataṃ yadā na manute manaḥ ।
amanastā tadodeti paramopaśamapradā ॥ 48॥

yadā na bhāvyate bhāvaḥ kvacijjagati vastuni ।
tadā hṛdambare śūnye kathaṃ cittaṃ prajāyate ॥ 49॥

yadabhāvanamāsthāya yadabhāvasya bhāvanam ।
yadyathā vastudarśitvaṃ tadacittatvamucyate ॥ 50॥

sarvamantaḥ parityajya śītalāśayavarti yat ।
vṛttisthamapi taccittamasadrūpamudāhṛtam ॥ 51॥

bhraṣṭabījopamā yeṣāṃ punarjananavarjitā ।
vāsanārasanāhīnā jīvanmuktā hi te smṛtāḥ ॥ 52॥

sattvarūpapariprāptacittāste jñānapāragāḥ ।
acittā iti kathyante dehānte vyomarūpiṇaḥ ॥ 53॥

saṃvedyasamparityāgātprāṇaspandanavāsane ।
samūlaṃ naśyataḥ kṣipraṃ mūlacchedādiva drumaḥ ॥ 54॥

pūrvadṛṣṭamadṛṣṭaṃ vā yadasyāḥ pratibhāsate ।
saṃvidastatprayatnena mārjanīyaṃ vijānatā ॥ 55॥

tadamārjanamātraṃ hi mahāsaṃsāratāṃ gatam ।
tatpramārjanamātraṃ tu mokṣa ityabhidhīyate ॥ 56॥

ajaḍo galitānandastyaktasaṃvedano bhava ॥ 57॥

saṃvidvastudaśālambaḥ sā yasyeha na vidyate ।
so'saṃvidajaḍaḥ proktaḥ kurvankāryaśatānyapi ॥ 58॥

saṃvedyena hṛdākāśe manāgapi na lipyate ।
yasyāsāvajaḍā saṃvijjīvanmuktaḥ sa kathyate ॥ 59॥

yadā na bhāvyate kiṃcinnirvāsanatayātmani ।
bālamūkādivijñānamiva ca sthīyate sthiram ॥ 60॥

tadā jāḍyavinirmuktamasaṃvedanamātatam ।
āśritaṃ bhavati prājño yasmādbhūyo na lipyate ॥ 61॥

samastā vāsanāstyaktvā nirvikalpasamādhitaḥ ।
tanmayatvādanādyante tadapyantarvilīyate ॥ 62॥

tiṣṭhangacchanspṛśañjighrannapi tallepavarjitaḥ ।
ajaḍo galitānandastyaktasaṃvedanaḥ sukhī ॥ 63॥

etāṃ dṛṣṭimavaṣṭabhya kaṣṭaceṣṭāyuto'pi san ।
taredduḥkhāmbudheḥ pāramapāraguṇasāgaraḥ ॥ 64॥

viśeṣaṃ samparityajya sanmātraṃ yadalepakam ।
ekarūpaṃ mahārūpaṃ sattāyāstatpadaṃ viduḥ ॥ 65॥

kālasattā kalāsattā vastusatteyamityapi ।
vibhāgakalanāṃ tyaktvā sanmātraikaparo bhava ॥ 66॥

sattāsāmānyamevaikaṃ bhāvayankevalaṃ vibhuḥ ।
paripūrṇaḥ parānandi tiṣṭhāpūritadigbharaḥ ॥ 67॥

sattāsāmānyaparyante yattatkalanayojjhitam ।
padamādyamanādyantaṃ tasya bījaṃ na vidyate ॥ 68॥

tatra saṃlīyate saṃvinnirvikalpaṃ ca tiṣṭhati ।
bhūyo na vartate duḥkhe tatra labdhapadaḥ pumān ॥ 69॥

taddhetuḥ sarvabhūtānāṃ tasya heturna vidyate ।
sa sāraḥ sarvasārāṇāṃ tasmātsāro na vidyate ॥ 70॥

tasmiṃściddarpaṇe sphāre samastā vastudṛṣṭayaḥ ।
imāstāḥ pratibimbanti sarasīva taṭadrumāḥ ॥ 71॥

tadamalamarajaṃ tadātmatattvaṃ
tadavagatāvupaśāntimeti cetaḥ ।
avagatavigataikatatsvarūpo
bhavabhayamuktapado'si samyageva ॥ 72॥

eteṣāṃ duḥkhabījānāṃ proktaṃ yadyanmayottaram ।
tasya tasya prayogeṇa śīghraṃ tatprāpyate padam ॥ 73॥

sattāsāmānyakoṭisthe drāgityeva pade yadi ।
pauruṣeṇa prayatnena balātsaṃtyajya vāsanām ॥ 74॥

sthitiṃ badhnāsi tattvajña kṣaṇamapyakṣayātmikām ।
kṣaṇe'sminneva tatsādhu padamāsādayasyalam ॥75॥

sattāsāmānyarūpe vā karoṣi sthitimādarāt ।
tatkiṃcidadhikeneha yatnenāpnoṣi tatpadam ॥ 76॥

saṃvittattve kṛtadhyāno nidāgha yadi tiṣṭhasi ।
tadyatnenādhikenoccairāsādayasi tatpadam ॥ 77॥

vāsanāsamparityāge yadi yatnaṃ karoṣi bhoḥ ।
yāvadvilīnaṃ na mano na tāvadvāsanākṣayaḥ ॥ 78॥

na kṣīṇā vāsanā yāvaccittaṃ tāvanna śāmyati ।
yāvanna tattvavijñānaṃ tāvaccittaśamaḥ kutaḥ ॥ 79॥

yāvanna cittopaśamo na tāvattattvavedanam ।
yāvanna vāsanānāśastāvattattvāgamaḥ kutaḥ ।
yāvanna tattvasamprāptirna tāvadvāsanakṣayaḥ ॥ 80॥

tattvajñānaṃ manonāśo vāsanākṣaya eva ca ।
mithaḥ kāraṇatāṃ gatvā duḥsādhāni sthitānyataḥ ॥ 81॥

bhogecchāṃ dūratastyaktvā trayametatsamācara ॥ 82॥

vāsanākṣayavijñānamanonāśā mahāmate ।
samakālaṃ cirābhyastā bhavanti phaladā matāḥ ॥ 83॥

tribhirebhiḥ samabhyastairhṛdayagranthayo dṛḍhāḥ ।
niḥśeṣameva truṭyanti bisacchedādguṇā iva ॥ 84॥

vāsanāsamparityāgasamaṃ prāṇanirodhanam ।
vidustattvavidastasmāttadapyevaṃ samāharet ॥ 85॥

vāsanāsamparityāgāccittaṃ gacchatyacittatām ।
prāṇaspandanirodhācca yathecchasi tathā kuru ॥ 86॥

prāṇāyāmadṛḍhādhyāsairyuktyā ca gurudattayā ।
āsanāśanayogena prāṇaspando nirudhyate ॥ 87॥

niḥsaṅgavyavahāratvādbhavabhāvanavarjanāt ।
śarīranāśadarśitvādvāsanā na pravartate ॥ 88॥

yaḥ prāṇapavanaspandaścittaspandaḥ sa eva hi ।
prāṇaspandajaye yatnaḥ kartavyo dhīmatoccakaiḥ ॥ 89॥

na śakyate mano jetuṃ vinā yuktimaninditām ।
śuddhāṃ saṃvidamāśrityavītarāgaḥ sthiro bhava ॥ 90॥

saṃvedyavarjitamanuttamamādyamekaṃ
saṃvidatpadaṃ vikalanaṃ kalayanmahātman ।
hṛdyeva tiṣṭha kalanārahitaḥ kriyāṃ tu
kurvannakartṛpadametya śamoditaśrīḥ ॥ 91॥

manāgapi vicāreṇa cetasaḥ svasya nigrahaḥ ।
puruṣeṇa kṛto yena tenāptaṃ janmanaḥ phalam ॥ 92॥

iti caturtho'dhyāyaḥ ॥ 4॥

gacchatastiṣṭhato vāpi jāgrataḥ svapato'pi vā ।
na vicāraparaṃ ceto yasyāsau mṛta ucyate ॥ 1॥

samyagjñānasamālokaḥ pumā'jñeyasamaḥ svayam ।
na bibheti na cādatte vaivaśyaṃ na ca dīnatām ॥ 2॥

apavitramapathyaṃ ca viṣasaṃsargadūṣitam ।
bhuktaṃ jarayati jñānī klinnaṃ naṣṭhaṃ ca mṛṣṭavat ॥ 3॥

sañṇgatyāgaṃ vidurmokṣaṃ saṅgatyāgādajanmatā ।
saṅgaṃ tyaja tvaṃ bhāvānāṃ jīvanmukto bhavānagha ॥ 4॥

bhāvābhāve padārthānāṃ harṣāmarṣavikāradā ।
malinā vāsanā yaiṣā sā'saṅga iti kathyate ॥ 5॥

jīvanmuktaśarīrāṇāmapunarjanmakāriṇī ।
muktā harṣaviṣādābhyāṃ śuddhā bhavati vāsanā ॥ 6॥

duḥkhairna glānimāyāsi hṛdi hṛṣyasi no sukhaiḥ ।
āśāvaivaśyamutsṛjya nidāghā'saṅgatāṃ vraja ॥ 7॥

dikkālādyanavacchinnamadṛṣṭobhayakoṭikam ।
cinmātramakṣayaṃ śāntamekaṃ brahmāsmi netarat ॥ 8॥

iti matvāhamityantarmuktāmuktavapuḥ pumān ।
ekarūpaḥ praśāntātmā maunī svātmasukho bhava ॥ 9॥

nāsti cittaṃ na cāvidyā na mano na ca jīvakaḥ ।
brahmaivaikamanādyantamabdhivatpravijṛmbhate ॥ 10॥

dehe yāvadahaṃbhāvo dṛśye'sminyāvadātmatā ।
yāvanmamedamityāsthā tāvaccittādivibhramaḥ ॥ 11॥

antarmukhatayā sarvaṃ cidvahnau trijagattṛṇam ।
juhvanto'ntarnivartante mune cittādivibhramāḥ ॥ 12॥

cidātmāsmi niraṃśo'smi parāparavivarjitaḥ ।
rūpaṃ smarannijaṃ sphāraṃ mā smṛtyā saṃmito bhava ॥ 13॥

adhyātmaśāstramantreṇa tṛṣṇāviṣaviṣūcikā ।
kṣīyate bhāvitenāntaḥ śaradā mihikā yathā ॥ 14॥

parijñāya parityāgo vāsānānaṃ ya uttamaḥ ।
sattāsāmānyarūpatvāttatkaivalyapadaṃ viduḥ ॥ 15॥

yannāsti vāsanā līnā tatsuṣuptaṃ na siddhaye ।
nirbījā vāsanā yatra tatturyaṃ siddhidaṃ smṛtam ॥ 16॥

vāsanāyāstathā vahnerṛṇavyādhidviṣāmapi ।
snehavairaviṣāṇa ca śeṣaḥ svalpo'pi bādhate ॥ 17॥

nirdagdhavāsanābījaḥ sattāsāmānyarūpavān ।
sadeho vā videho vā na bhūyo duḥkhabhāgbhavet ॥ 18॥

etāvadevāvidyātvaṃ nedaṃ brahmeti niścayaḥ ।
eṣa eva kṣayastasyā brahmedamiti niścayaḥ ॥ 19॥

brahma cidbrahma bhuvanaṃ brahma bhūtaparamparā ।
brahmāhaṃ brahma cicchatrurbrahma cinmitrabāndhavāḥ ॥ 20॥

brahmaiva sarvamityeva bhāvite brahma vai pumān ।
sarvatrāvasthitaṃ śāntaṃ cidbrahmetyanubhūyate ॥ 21॥

asaṃskṛtādhvagāloke manasyanyatra saṃsthite ।
yā pratītiranāgasakā taccidbrahmāsmi sarvagam ॥ 22॥

praśāntasarvasaṃkalpaṃ vigatākhilakautukam ।
vigatāśeṣasaṃraṃbhaṃ cidātmānaṃ samāśraya ॥ 23॥

evaṃ pūrṇadhiyo dhīrāḥ samā nīrāgacetasaḥ ।
na nandanti na nindanti jīvitaṃ maraṇaṃ tathā ॥ 24॥

prāṇo'yamaniśaṃ brahmaspandaśaktiḥ sadāgatiḥ ।
sabāhyābhyantare deheprāṇo'sāvūrdhvagaḥ sthitaḥ ॥ 25॥

apāno'pyaniśaṃ brahmaspandaśaktiḥ sadāgatiḥ ।
sabāhyābhyantare dehe apāno'yamavāksthitaḥ ॥ 26॥

jāgrataḥ svapataścaiva prāṇāyāmo'yamuttamaḥ ।
pravartate hyabhijñasya taṃ tāvacchreyase śṛṇu ॥ 27॥

dvādaśāṅgulaparyantaṃ bāhyamākramatāṃ tataḥ ।
prāṇāṅganāmā saṃsparśo yaḥ sa pūraka ucyate ॥ 28॥

apānaścandramā dehamāpyāyayati suvrata ।
prāṇaḥ sūryo'gniratha vā pacatyanatridaṃ vapuḥ ॥ 29॥

prāṇakṣayasamīpasthamapānodayakoṭigam ।
apānaprāṇayoraikyaṃ cidātmānaṃ samāśraya ॥ 30॥

apāno'staṃgato yatra prāṇo nābhyuditaḥ kṣaṇam ।
kalākalaṅkarahitaṃ taccittattvaṃ samāśraya ॥ 31॥

nāpāno'staṃgato yatra prāṇaścāstamupāgataḥ ।
nāsāgragamanāvartaṃ taccittattvamupāśraya ॥ 32॥

ābhāsamātramevedaṃ na sanāsajjagattrayam ।
ityanyakalanātyāgaṃ samyagjñānaṃ vidurbudhāḥ ॥ 33॥

ābhāsamātrakaṃ brahmaṃścittadarśakalaṅkitam ।
tatastadapi saṃtyajya nirābhāso bhavottama ॥34॥

bhayapradamakalyāṇaṃ dhairyasarvasvahāriṇam ।
manaḥpiśācamutsārya yo'si so'si sthiro bhava ॥ 35॥

cidvyomeva kilāstīha parāparavivarjitam ।
sarvatrāsaṃbhavaccaityaṃ yatkalpānte'vaśiṣyate ॥ 36॥

vāñchākṣaṇe tu yā tuṣṭistatra vāñchaiva kāraṇam ।
tuṣṭistvatuṣṭiparyantā tasmādvāñchāṃ parityaja ॥ 37॥

āśā yātu nirāśātvamabhāvaṃ yātu bhāvanā ।
amanastvaṃ mano yātu tavāsaṅgena jīvataḥ ॥ 38॥

vāsanārahitairantarindriyairāharankriyā ।
na vikāramavāpnoṣi khavatkṣobhaśatairapi ॥ 39॥

cittonmeṣanimeṣābhyāṃ saṃsārapralayodayau ।
vāsanāprāṇasaṃrodhamanunmeṣaṃ manaḥ kuru ॥ 40॥

prāṇonmeṣanimeṣābhyāṃ saṃsṛteḥ pralayodayau ।
tamabhyāsaprayogābhyāmunmeṣarahitaṃ kuru ॥ 41॥

maurkhyonmeṣanimeṣābhyāṃ karmaṇāṃ pralayodayau ।
tadvilīnaṃ kuru balādguruśāstrārthasaṃgamaiḥ ॥ 42॥

asaṃvitspandamātreṇa yāti cittamacittatām ।
prāṇānāṃ vā nirodhena tadeva paramaṃ padam ॥ 43॥

dṛśyadarśanasaṃbandhe yatsukhaṃ pāramārthikam ।
tadantaikāntasaṃvittyā brahmadṛṣṭyāvalokaya ॥ 44॥

yatra nābhyuditaṃ cittaṃ tadvai sukhamakṛtrimam ।
kṣayātiśayanirmuktaṃ nodeti na ca śāmyati ॥ 45॥

yasya cittaṃ na cittākhyaṃ cittaṃ cittattvameva hi ।
tadeva turyāvasthāyaṃ turyātītaṃ bhavatyataḥ ॥ 46॥

saṃnyastasarvasaṃkalpaḥ samaḥ śāntamanā muniḥ ।
saṃnyāsayogayuktātmā jñānavānmokṣavānbhava ॥ 47॥

sarvasaṃkalpasaṃśāntaṃ praśāntaghanavāsanam ।
na kiṃcidbhāvanākāraṃ yattadbrahma paraṃ viduḥ ॥ 48॥

samyagjñānāvarodhena nityamekasamādhinā ।
sāṃkhya evāvabuddhā ye te sāṃkhyā yoginaḥ pare ॥ 49॥

prāṇādyanilasaṃśāntau yuktyā ye padamāgatāḥ ।
anāmayamanādyantaṃ te smṛtā yogayoginaḥ ॥ 50॥

upādeyaṃ tu sarveṣāṃ śātaṃ padamakṛtrimam ।
ekārthābhyasanaṃ prāṇarodhaścetaḥ parikṣayaḥ ॥ 51॥

ekasminneva saṃsiddhe saṃsiddhyanti parasparam ।
avinābhāvinī nityaṃ jantūnāṃ prāṇacetasī ॥ 52॥

ādhārādheyavaccaite ekabhāve vinaśyataḥ ।
kurutaḥ svavināśena kāryaṃ mokṣākhyamuttamam ॥ 53॥

sarvametaddhiyā tyaktvā yadi tiṣṭhasi niścalaḥ ।
tadāhaṃkāravilaye tvameva paramaṃ padam ॥ 54॥

mahācidekaivehāsti mahāsatteti yocyate ।
niṣkalaṃkā samā śuddhā nirahaṃkārarūpiṇī ॥ 55॥

sakṛdvibhātā vimalā nityodayavatī samā ।
sā brahma paramātmeti nāmabhiḥ parigīyate ॥ 56॥

saivāhamiti niścitya nidāgha kṛtakṛtyavān ।
na bhūtaṃ na bhaviṣyacca cintayāmi kadācana ॥ 57॥

dṛṣṭimālambya tiṣṭhāmi vartamānāmihātmanā ।
idamadya mayā labdhamidaṃ prāpsyāmi sundaram ॥ 58॥

na staumi na ca nindāmi ātmano'nyannahi kvacit ।
na tuṣyāmi śubhaprāptau na khidyāmyaśubhāgame ॥ 59॥

praśāntacāpalaṃ vītaśokamastasamīhitam ।
mano mama mune śāntaṃ tena jīvāmyanāmayaḥ ॥ 60॥

ayaṃ bandhuḥ paraścāyaṃ mamāyamayamanyakaḥ ।
iti brahmanna jānāmi saṃsparśaṃ na dadāmyaham ॥ 61॥

vāsanāmātrasaṃtyāgājjarāmaraṇavarjitam ।
savāsanaṃ mano jñānaṃ jñeyaṃ nirvāsanaṃ manaḥ ॥ 62॥

citte tyakte layaṃ yāti dvaitametacca sarvataḥ ।
śiṣyate paramaṃ śāntamekamagacchamanāmayam ॥ 63॥

anantamajamavyaktamajaraṃ śāntamacyutam ।
advitīyamanādyantaṃ yadādyamupalambhanam ॥ 64॥

ekamādyantarahitaṃ cinmātramamalaṃ tatam ।
khādapyatitarāṃ sūkṣmaṃ tadbrahmāsmi na saṃśayaḥ ॥ 65॥

dikkālādyanavacchinnaṃ svacchaṃ nityoditaṃ tatam ।
sarvārthamayamekārthaṃ cinmātramamalaṃ bhava ॥ 66॥

sarvamekamidaṃ śāntamādimadhyāntavarjitam ।
bhāvābhāvamajaṃ sarvamiti matvā sukhī bhava ॥ 67॥

na baddho'smi na mukto'smi brahmaivāsmi nirāmayam ।
dvaitabhāvavimukto'smi saccidānandalakṣaṇaḥ ।
evaṃ bhāvaya yatnena jīvanmukto bhaviṣyasi ॥ 68॥

padārthavṛnde dehādidhiyā saṃtyajya dūrataḥ ।
āśītalāntaḥkaraṇo nityamātmaparo bhava ॥ 69॥

idaṃ ramyamidaṃ neti bījaṃ te duḥkhasaṃtateḥ ।
tasminsāmyāgninā dagdhe duḥkhasyāvasaraḥ kutaḥ ॥ 70॥

śāstrasajjanasamparkaiḥ prajñāmādau vivardhayet ॥ 71॥

ṛtaṃ satyaṃ paraṃ brahma sarvasaṃsārabheṣajam ।
atyarthamamalaṃ nityamādimadhyāntavarjitam ॥ 72॥

tathā sthūlamanākāśamasaṃspṛśyamacākṣuṣam ।
na rasaṃ na ca gandhākhyamaprameyamanūpamam ॥ 73॥

ātmānaṃ saccidānandamanantaṃ brahma suvrata ।
ahamasmītyabhidhyāyeddhyeyātītaṃ vimuktaye ॥ 74॥

samādhiḥ saṃvidutpattiḥ parajīvaikataṃ prati ।
nityaḥ sarvagato hyātmā kūṭastho doṣavarjitaḥ ॥ 75॥

ekaḥ sanbhidyate bhrāntyā māyayā na svarūpataḥ ।
tasmādadvaita evāsti na prapañco na saṃsṛtiḥ ॥ 76॥

yathākāśo ghaṭākāśo mahākāśa itīritaḥ ।
tathā bhrānterdvidhā prokto hyātmā jīveśvarātmanā ॥ 77॥

yadā manasi caitanyaṃ bhāti sarvatragaṃ sadā ।
yogino''vyavadhānena tadā sampadyate svayam ॥ 78॥

yadā sarvāṇi bhūtāni svātmanyeva hi paśyati ।
sarvabhūteṣu cātmānaṃ brahma sampadyate sadā ॥ 79॥

yadā sarvāṇi bhūtāni samādhistho na paśyati ।
ekībhūtaḥ pareṇāsau tadā bhavati kevalaḥ ॥ 80॥

śāstrasajjanasamparkavairāgyābhyāsarūpiṇī ।
prathamā bhūmikaiṣoktā mumukṣutvapradāyinī ॥ 81॥

vicāraṇā dvitīyā syāttṛtīyā sāṅgabhāvanā ।
vilāpinī caturthī syādvāsanā vilayātmikā ॥ 82॥

śuddhasaṃvinmanānandarūpā bhavati pañcamī ।
ardhasuptaprabuddhābho jīvanmukto'tra tiṣṭhati ॥ 83॥

asaṃvedanarūpā ca ṣaṣṭhī bhavati bhūmikā ।
ānandaikaghanākārā suṣuptasadṛśī sthitiḥ ॥ 84॥

turyāvasthopaśāntā sā muktireva hi kevalā ।
samatā svacchatā saumyā saptamī bhūmikā bhavet ॥ 85॥

turyātītā tu yāvasthā parā nirvāṇarūpiṇī ।
saptamī sā parā prauḍhā viṣayo naiva jīvatām ॥ 86॥

pūrvāvasthātrayaṃ tatra jāgradityeva saṃsthitam ।
caturthī svapna ityuktā svapnābhaṃ yatra vai jagat ॥ 87॥

ānandaikaghanākārā suṣuptākhyā tu pañcamī ।
asaṃvedanarūpā tu ṣaṣṭhī turyapadābhidhā ॥ 88॥

turyātītapadāvasthā saptamī bhūmikottamā ।
manovacobhiragrāhyā svaprakāśasadātmikā ॥ 89॥

antaḥ pratyāhṛtivaśāccaityaṃ cenna vibhāvitam ।
mukta eva na sandeho mahāsamatayā tayā ॥ 90॥

na mriye na ca jīvāmi nāhaṃ sannāpyasanmayaḥ ।
ahaṃ na kiṃcicciditi matvā dhīro na śocati ॥ 91॥

alepako'hamajaro nīrāgaḥ śāntavāsanaḥ ।
niraṃśo'smi cidākāśamiti matvā na śocati ॥ 92॥

ahaṃmatyā virahitaḥ śuddho buddho'jaro'maraḥ ।
śāntaḥ śamasamābhāsa iti matvā na śocati ॥ 93॥

tṛṇāgreṣvambare bhānau naranāgāmareṣu ca ।
yattiṣṭhati tadevāhamiti matvā na śocati ॥ 94॥

bhāvanāṃ sarvabhāvebhyaḥ samutsṛjya samutthitaḥ ।
avaśiṣṭaṃ paraṃ brahma kevalo'smīti bhāvaya ॥ 95॥

vācāmatītaviṣayo viṣayāśādaśojjhitaḥ ।
parānandarasākṣubdho ramate svātmanātmani ॥ 96॥

sarvakarmaparityāgī nityatṛpto nirāśrayaḥ ।
na puṇyena na pāpena netareṇa ca lipyate ॥ 97॥

sphaṭikaḥ pratibimbena yathā nāyāti rañjanam ।
tajjñaḥ karmaphalenāntastathā nāyāti rañjanam ॥ 98॥

viharañjanatāvṛnde devakīrtana pūjanaiḥ ।
khedāhlādau na jānāti pratibimbagatairiva ॥ 99॥

nisstotro nirvikāraśca pūjyapūjāvivarjitaḥ ।
saṃyuktaśca viyuktaśca sarvācāranayakramaiḥ ॥ 100॥

tanuṃ tyajatu vā tīrthe śvapacasya gṛhe'tha vā ।
jñānasampattisamaye mukto'sau vigatāśayaḥ ॥ 101॥

saṃkalpatvaṃ hi bandhasya kāraṇaṃ tatparityaja ।
mokṣo bhavedasaṃkalpāttadabhyāsaṃ dhiyā kuru ॥ 102॥

sāvadhāno bhava tvaṃ ca grāhyagrāhakasaṃgame ।
ajasrameva saṃkalpadaśāḥ pariharañśanaiḥ ॥ 103॥

mā bhava grāhyabhāvātmā grāhakātmā ca mā bhava ।
bhāvanāmakhilāṃ tyaktvā yacchiṣṭaṃ tanmayo bhava ॥ 104॥

kiṃciccedrocate tubhyaṃ tadbaddho'si bhavasthitau ।
na kiṃcidrocate cette tanmukto'si bhavasthitau ॥ 105॥

asmātpadārthanicayādyāvatsthāvarajaṅgamāt ।
tṛṇāderdehaparyantānmā kiṃcittatra rocatām ॥ 106॥

ahaṃbhāvānahaṃbhāvau tyaktvā sadasatī tathā ।
yadasaktaṃ samaṃ svacchaṃ sthitaṃ tatturyamucyate ॥ 107॥

yā svacchā samatā śāntā jīvanmuktavyavasthitiḥ ।
sākṣyavasthā vyavahṛtau sā turyā kalanocyate ॥ 108॥

naitajjāgranna ca svapnaḥ saṃkalpānāmasaṃbhavāt ।
suṣuptabhāvo nā'pyetadabhāvājjaḍatāsthiteḥ ॥ 109॥

śāntasamyakprabuddhānāṃ yathāsthitamidaṃ jagat ।
vilīnaṃ turyamityāhurabuddhānāṃ sthitaṃ sthiram ॥ 110॥

ahaṃkārakalātyāge samatāyāḥ samudgame ।
viśarārau kṛte citte turyāvasthopatiṣṭhate ॥ 111॥

siddhānto'dhyātmaśāstrāṇāṃ sarvāpahnava eva hi ।
nāvidyāstīha no māyā śāntaṃ brahmedamaklamam ॥ 112॥

śānta eva cidākāśe svacche śamasamātmani ।
samagraśaktikhacite brahmeti kalitābhidhe ॥ 113॥

sarvameva parityajya mahāmaunī bhavānagha ।
nirvāṇavānnirmananaḥ kṣīṇacittaḥ praśāntadhīḥ ॥ 114॥

ātmanyevāsva śāntātmā mūkāndhabadhiropamaḥ ।
nityamantarmukhaḥ svacchaḥ svātmanāntaḥ prapūrṇadhīḥ ॥ 115॥

jāgratyeva suṣuptasthaḥ kuru karmāṇi vai dvija ।
antaḥ sarvaparityāgī bahiḥ kuru yathāgatam ॥ 116॥

cittasattā paraṃ duḥkhaṃ cittatyāgaḥ paraṃ sukham ।
ataścittaṃ cidākāśe naya kṣayamavedanāt ॥ 117॥

dṛṣṭvā ramyamaramyaṃ vā stheyaṃ pāṣāṇavatsadā ।
etāvatātmayatnena jitā bhavati saṃsṛtiḥ ॥ 118॥

vedānte paramaṃ guhyaṃ purākalpapracoditam ।
nāpraśāntāya dātavyaṃ na cāśiṣyāya vai punaḥ ॥ 119॥

annapūrṇopaniṣadaṃ yo'dhīte gurvanugrahāt ।
sa jīvanmuktatāṃ prāpya brahmaiva bhavati svayam ॥ 120॥

ityupaniṣat ॥ iti pañcamo'dhyāyaḥ ॥ 5॥

oṃ bhadraṃ karṇebhiḥ śṛṇuyāma devāḥ ॥

bhadraṃ paśyemākṣabhiryajatrāḥ ॥

sthirairaṅgaistuṣṭuvām̐sastanūbhiḥ ॥

vyaśema devahitaṃ yadāyuḥ ॥

svasti na indro vṛddhaśravāḥ ॥

svasti naḥ pūṣā viśvavedāḥ ॥

svasti nastārkṣyo ariṣṭanemiḥ ॥

svasti no bṛhaspatirdadhātu ॥

oṃ śāntiḥ śāntiḥ śāntiḥ ॥

ityannapūrṇopaniṣatsamāptā ॥