| Library / Tipiṭaka / திபிடக • Tipiṭaka / அபதா³ன-அட்ட²கதா² • Apadāna-aṭṭhakathā |
5. அன்னஸங்ஸாவகத்தே²ரஅபதா³னவண்ணனா
5. Annasaṃsāvakattheraapadānavaṇṇanā
ஸுவண்ணவண்ணங் ஸம்பு³த்³த⁴ந்திஆதி³கங் ஆயஸ்மதோ அன்னஸங்ஸாவகத்தே²ரஸ்ஸ அபதா³னங். அயம்பி புரிமபு³த்³தே⁴ஸு கதாதி⁴காரோ தத்த² தத்த² ப⁴வே விவட்டூபனிஸ்ஸயானி புஞ்ஞானி உபசினந்தோ ஸித்³த⁴த்த²ஸ்ஸ ப⁴க³வதோ காலே ஏகஸ்மிங் குலகே³ஹே நிப்³ப³த்தோ பிண்டா³ய சரந்தங் த்³வத்திங்ஸமஹாபுரிஸலக்க²ணப்³யாமப்பபா⁴மண்ட³லோபஸோபி⁴தங் ப⁴க³வந்தங் தி³ஸ்வா பஸன்னமானஸோ ப⁴க³வந்தங் நிமந்தெத்வா கே³ஹங் நெத்வா வரஅன்னபானேன ஸந்தப்பெத்வா ஸம்பவாரெத்வா போ⁴ஜேஸி. ஸோ தேனேவ சித்தப்பஸாதே³ன ததோ சுதோ தே³வலோகே நிப்³ப³த்தித்வா தி³ப்³ப³ஸம்பத்திங் அனுப⁴வித்வா ததோ சவித்வா மனுஸ்ஸலோகே நிப்³ப³த்தித்வா மனுஸ்ஸஸம்பத்திங் அனுப⁴வித்வா ததோ அபராபரங் தே³வமனுஸ்ஸஸம்பத்தியோ அனுப⁴வித்வா இமஸ்மிங் பு³த்³து⁴ப்பாதே³ ஏகஸ்மிங் குலே நிப்³ப³த்தோ ஸாஸனே பஸீதி³த்வா பப்³ப³ஜித்வா விபஸ்ஸனங் வட்³டெ⁴த்வா அரஹத்தங் பாபுணி. ஸோ புப்³பே³ கதபுஞ்ஞனாமவஸேன அன்னஸங்ஸாவகத்தே²ரோதி பாகடனாமோ அஹோஸி.
Suvaṇṇavaṇṇaṃ sambuddhantiādikaṃ āyasmato annasaṃsāvakattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto siddhatthassa bhagavato kāle ekasmiṃ kulagehe nibbatto piṇḍāya carantaṃ dvattiṃsamahāpurisalakkhaṇabyāmappabhāmaṇḍalopasobhitaṃ bhagavantaṃ disvā pasannamānaso bhagavantaṃ nimantetvā gehaṃ netvā varaannapānena santappetvā sampavāretvā bhojesi. So teneva cittappasādena tato cuto devaloke nibbattitvā dibbasampattiṃ anubhavitvā tato cavitvā manussaloke nibbattitvā manussasampattiṃ anubhavitvā tato aparāparaṃ devamanussasampattiyo anubhavitvā imasmiṃ buddhuppāde ekasmiṃ kule nibbatto sāsane pasīditvā pabbajitvā vipassanaṃ vaḍḍhetvā arahattaṃ pāpuṇi. So pubbe katapuññanāmavasena annasaṃsāvakattheroti pākaṭanāmo ahosi.
155-6. ஸோ அபரபா⁴கே³ அத்தனோ புப்³ப³கம்மங் ஸரித்வா ஸோமனஸ்ஸஜாதோ ‘‘ஏவங் மயா இமினா புஞ்ஞஸம்பா⁴ரானுபா⁴வேன பத்தங் அரஹத்த’’ந்தி அத்தனோ புப்³ப³சரிதாபதா³னங் உதா³னவஸேன பகாஸெந்தோ ஸுவண்ணவண்ணந்திஆதி³மாஹ . தத்த² ஸுவண்ணஸ்ஸ வண்ணோ விய வண்ணோ யஸ்ஸ ப⁴க³வதோ ஸோயங் ஸுவண்ணவண்ணோ, தங் ஸுவண்ணவண்ணங் ஸம்பு³த்³த⁴ங் ஸித்³த⁴த்த²ந்தி அத்தோ². க³ச்ச²ந்தங் அந்தராபணேதி வெஸ்ஸானங் ஆபணபந்தீனங் அந்தரவீதி²யங் க³ச்ச²மானங். கஞ்சனக்³கி⁴யஸங்காஸந்தி ஸுவண்ணதோரணஸதி³ஸங் பா³த்திங்ஸவரலக்க²ணங் த்³வத்திங்ஸவரலக்க²ணேஹி ஸம்பன்னங் லோகபஜ்ஜோதங் ஸகலலோகதீ³பபூ⁴தங் அப்பமெய்யங் பமாணவிரஹிதங் அனோபமங் உபமாவிரஹிதங் ஜுதிந்த⁴ரங் பபா⁴தா⁴ரங் நீலபீதாதி³ச²ப்³ப³ண்ணபு³த்³த⁴ரங்ஸியோ தா⁴ரகங் ஸித்³த⁴த்த²ங் தி³ஸ்வா பரமங் உத்தமங் பீதிங் அலத்த²ங் அலபி⁴ந்தி ஸம்ப³ந்தோ⁴. ஸேஸங் ஸுவிஞ்ஞெய்யமேவாதி.
155-6. So aparabhāge attano pubbakammaṃ saritvā somanassajāto ‘‘evaṃ mayā iminā puññasambhārānubhāvena pattaṃ arahatta’’nti attano pubbacaritāpadānaṃ udānavasena pakāsento suvaṇṇavaṇṇantiādimāha . Tattha suvaṇṇassa vaṇṇo viya vaṇṇo yassa bhagavato soyaṃ suvaṇṇavaṇṇo, taṃ suvaṇṇavaṇṇaṃ sambuddhaṃ siddhatthanti attho. Gacchantaṃ antarāpaṇeti vessānaṃ āpaṇapantīnaṃ antaravīthiyaṃ gacchamānaṃ. Kañcanagghiyasaṃkāsanti suvaṇṇatoraṇasadisaṃ bāttiṃsavaralakkhaṇaṃ dvattiṃsavaralakkhaṇehi sampannaṃ lokapajjotaṃ sakalalokadīpabhūtaṃ appameyyaṃ pamāṇavirahitaṃ anopamaṃ upamāvirahitaṃ jutindharaṃ pabhādhāraṃ nīlapītādichabbaṇṇabuddharaṃsiyo dhārakaṃ siddhatthaṃ disvā paramaṃ uttamaṃ pītiṃ alatthaṃ alabhinti sambandho. Sesaṃ suviññeyyamevāti.
அன்னஸங்ஸாவகத்தே²ரஅபதா³னவண்ணனா ஸமத்தா.
Annasaṃsāvakattheraapadānavaṇṇanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / அபதா³னபாளி • Apadānapāḷi / 5. அன்னஸங்ஸாவகத்தே²ரஅபதா³னங் • 5. Annasaṃsāvakattheraapadānaṃ
