| Library / Tipiṭaka / திபிடக • Tipiṭaka / மஹாவிப⁴ங்க³ • Mahāvibhaṅga |
6. அஞ்ஞாதகவிஞ்ஞத்திஸிக்கா²பத³ங்
6. Aññātakaviññattisikkhāpadaṃ
515. தேன ஸமயேன பு³த்³தோ⁴ ப⁴க³வா ஸாவத்தி²யங் விஹரதி ஜேதவனே அனாத²பிண்டி³கஸ்ஸ ஆராமே . தேன கோ² பன ஸமயேன ஆயஸ்மா உபனந்தோ³ ஸக்யபுத்தோ பட்டோ 1 ஹோதி த⁴ம்மிங் கத²ங் காதுங். அத² கோ² அஞ்ஞதரோ ஸெட்டி²புத்தோ யேனாயஸ்மா உபனந்தோ³ ஸக்யபுத்தோ தேனுபஸங்கமி ; உபஸங்கமித்வா ஆயஸ்மந்தங் உபனந்த³ங் ஸக்யபுத்தங் அபி⁴வாதெ³த்வா ஏகமந்தங் நிஸீதி³. ஏகமந்தங் நிஸின்னங் கோ² தங் ஸெட்டி²புத்தங் ஆயஸ்மா உபனந்தோ³ ஸக்யபுத்தோ த⁴ம்மியா கதா²ய ஸந்த³ஸ்ஸேஸி ஸமாத³பேஸி ஸமுத்தேஜேஸி ஸம்பஹங்ஸேஸி. அத² கோ² ஸோ ஸெட்டி²புத்தோ ஆயஸ்மதா உபனந்தே³ன ஸக்யபுத்தேன த⁴ம்மியா கதா²ய ஸந்த³ஸ்ஸிதோ ஸமாத³பிதோ ஸமுத்தேஜிதோ ஸம்பஹங்ஸிதோ ஆயஸ்மந்தங் உபனந்த³ங் ஸக்யபுத்தங் ஏதத³வோச – ‘‘வதெ³ய்யாத², ப⁴ந்தே, யேன அத்தோ². படிப³லா மயங் அய்யஸ்ஸ தா³துங் யதி³த³ங் சீவரபிண்ட³பாதஸேனாஸனகி³லானப்பச்சயபே⁴ஸஜ்ஜபரிக்கா²ர’’ந்தி. ‘‘ஸசே மே த்வங், ஆவுஸோ, தா³துகாமோஸி, இதோ ஏகங் ஸாடகங் தே³ஹீ’’தி. ‘‘அம்ஹாகங் கோ², ப⁴ந்தே, குலபுத்தானங் கிஸ்மிங் விய ஏகஸாடகங் க³ந்துங். ஆக³மேஹி, ப⁴ந்தே, யாவ க⁴ரங் க³ச்சா²மி. க⁴ரங் க³தோ இதோ வா ஏகங் ஸாடகங் பஹிணிஸ்ஸாமி இதோ வா ஸுந்த³ரதர’’ந்தி. து³தியம்பி கோ² ஆயஸ்மா உபனந்தோ³ ஸக்யபுத்தோ தங் ஸெட்டி²புத்தங் ஏதத³வோச ‘‘ஸசே மே த்வங் ஆவுஸோ தா³துகாமோஸி இதோ ஏகங் ஸாடகங் தே³ஹீ’’தி. அம்ஹாகங் கோ² ப⁴ந்தே குலபுத்தானங் கிஸ்மிங் விய ஏகஸாடகங் க³ந்துங், ஆக³மேஹி ப⁴ந்தே யாவ க⁴ரங் க³ச்சா²மி, க⁴ரங் க³தோ இதோ வா ஏகங் ஸாடகங் பஹிணிஸ்ஸாமி இதோ வா ஸுந்த³ரதரந்தி. ததியம்பி கோ² ஆயஸ்மா உபனந்தோ³ ஸக்யபுத்தோ தங் ஸெட்டி²புத்தங் ஏதத³வோச ‘‘ஸசே மே த்வங் ஆவுஸோ தா³துகாமோஸி, இதோ ஏகங் ஸாடகங் தே³ஹீ’’தி. அம்ஹாகங் கோ² ப⁴ந்தே குலபுத்தானங் கிஸ்மிங் விய ஏகஸாடகங் க³ந்துங், ஆக³மேஹி ப⁴ந்தே யாவ க⁴ரங் க³ச்சா²மி, க⁴ரங் க³தோ இதோ வா ஏகங் ஸாடகங் பஹிணிஸ்ஸாமி இதோ வா ஸுந்த³ரதரந்தி. ‘‘கிங் பன தயா, ஆவுஸோ, அதா³துகாமேன பவாரிதேன யங் த்வங் பவாரெத்வா ந தே³ஸீ’’தி.
515. Tena samayena buddho bhagavā sāvatthiyaṃ viharati jetavane anāthapiṇḍikassa ārāme . Tena kho pana samayena āyasmā upanando sakyaputto paṭṭo 2 hoti dhammiṃ kathaṃ kātuṃ. Atha kho aññataro seṭṭhiputto yenāyasmā upanando sakyaputto tenupasaṅkami ; upasaṅkamitvā āyasmantaṃ upanandaṃ sakyaputtaṃ abhivādetvā ekamantaṃ nisīdi. Ekamantaṃ nisinnaṃ kho taṃ seṭṭhiputtaṃ āyasmā upanando sakyaputto dhammiyā kathāya sandassesi samādapesi samuttejesi sampahaṃsesi. Atha kho so seṭṭhiputto āyasmatā upanandena sakyaputtena dhammiyā kathāya sandassito samādapito samuttejito sampahaṃsito āyasmantaṃ upanandaṃ sakyaputtaṃ etadavoca – ‘‘vadeyyātha, bhante, yena attho. Paṭibalā mayaṃ ayyassa dātuṃ yadidaṃ cīvarapiṇḍapātasenāsanagilānappaccayabhesajjaparikkhāra’’nti. ‘‘Sace me tvaṃ, āvuso, dātukāmosi, ito ekaṃ sāṭakaṃ dehī’’ti. ‘‘Amhākaṃ kho, bhante, kulaputtānaṃ kismiṃ viya ekasāṭakaṃ gantuṃ. Āgamehi, bhante, yāva gharaṃ gacchāmi. Gharaṃ gato ito vā ekaṃ sāṭakaṃ pahiṇissāmi ito vā sundaratara’’nti. Dutiyampi kho āyasmā upanando sakyaputto taṃ seṭṭhiputtaṃ etadavoca ‘‘sace me tvaṃ āvuso dātukāmosi ito ekaṃ sāṭakaṃ dehī’’ti. Amhākaṃ kho bhante kulaputtānaṃ kismiṃ viya ekasāṭakaṃ gantuṃ, āgamehi bhante yāva gharaṃ gacchāmi, gharaṃ gato ito vā ekaṃ sāṭakaṃ pahiṇissāmi ito vā sundarataranti. Tatiyampi kho āyasmā upanando sakyaputto taṃ seṭṭhiputtaṃ etadavoca ‘‘sace me tvaṃ āvuso dātukāmosi, ito ekaṃ sāṭakaṃ dehī’’ti. Amhākaṃ kho bhante kulaputtānaṃ kismiṃ viya ekasāṭakaṃ gantuṃ, āgamehi bhante yāva gharaṃ gacchāmi, gharaṃ gato ito vā ekaṃ sāṭakaṃ pahiṇissāmi ito vā sundarataranti. ‘‘Kiṃ pana tayā, āvuso, adātukāmena pavāritena yaṃ tvaṃ pavāretvā na desī’’ti.
அத² கோ² ஸோ ஸெட்டி²புத்தோ ஆயஸ்மதா உபனந்தே³ன ஸக்யபுத்தேன நிப்பீளியமானோ ஏகங் ஸாடகங் த³த்வா அக³மாஸி. மனுஸ்ஸா தங் ஸெட்டி²புத்தங் ஏதத³வோசுங் – ‘‘கிஸ்ஸ த்வங் அய்யோ ஏகஸாடகோ ஆக³ச்ச²ஸீ’’தி? அத² கோ² ஸோ ஸெட்டி²புத்தோ தேஸங் மனுஸ்ஸானங் ஏதமத்த²ங் ஆரோசேஸி. மனுஸ்ஸா உஜ்ஜா²யந்தி கி²ய்யந்தி விபாசெந்தி – ‘‘மஹிச்சா² இமே ஸமணா ஸக்யபுத்தியா அஸந்துட்டா². நயிமேஸங் ஸுகரா த⁴ம்மனிமந்தனாபி காதுங் 3. கத²ஞ்ஹி நாம ஸெட்டி²புத்தேன த⁴ம்மனிமந்தனாய கயிரமானாய ஸாடகங் க³ஹெஸ்ஸந்தீ’’தி! அஸ்ஸோஸுங் கோ² பி⁴க்கூ² தேஸங் மனுஸ்ஸானங் உஜ்ஜா²யந்தானங் கி²ய்யந்தானங் விபாசெந்தானங். யே தே பி⁴க்கூ² அப்பிச்சா²…பே॰… தே உஜ்ஜா²யந்தி கி²ய்யந்தி விபாசெந்தி – ‘‘கத²ஞ்ஹி நாம ஆயஸ்மா உபனந்தோ³ ஸக்யபுத்தோ ஸெட்டி²புத்தங் சீவரங் விஞ்ஞாபெஸ்ஸதீ’’தி! அத² கோ² தே பி⁴க்கூ² ஆயஸ்மந்தங் உபனந்த³ங் ஸக்யபுத்தங் அனேகபரியாயேன விக³ரஹித்வா ப⁴க³வதோ ஏதமத்த²ங் ஆரோசேஸுங்…பே॰… ‘‘ஸச்சங் கிர த்வங், உபனந்த³, ஸெட்டி²புத்தங் சீவரங் விஞ்ஞாபேஸீ’’தி? ‘‘ஸச்சங், ப⁴க³வா’’தி. ‘‘ஞாதகோ தே, உபனந்த³, அஞ்ஞாதகோ’’தி? ‘‘அஞ்ஞாதகோ, ப⁴க³வா’’தி. ‘‘அஞ்ஞாதகோ, மோக⁴புரிஸ, அஞ்ஞாதகஸ்ஸ ந ஜானாதி பதிரூபங் வா அப்பதிரூபங் வா ஸந்தங் வா அஸந்தங் வா. தத்த² நாம த்வங், மோக⁴புரிஸ, அஞ்ஞாதகங் ஸெட்டி²புத்தங் சீவரங் விஞ்ஞாபெஸ்ஸஸி! நேதங், மோக⁴புரிஸ, அப்பஸன்னானங் வா பஸாதா³ய…பே॰… ஏவஞ்ச பன, பி⁴க்க²வே, இமங் ஸிக்கா²பத³ங் உத்³தி³ஸெய்யாத² –
Atha kho so seṭṭhiputto āyasmatā upanandena sakyaputtena nippīḷiyamāno ekaṃ sāṭakaṃ datvā agamāsi. Manussā taṃ seṭṭhiputtaṃ etadavocuṃ – ‘‘kissa tvaṃ ayyo ekasāṭako āgacchasī’’ti? Atha kho so seṭṭhiputto tesaṃ manussānaṃ etamatthaṃ ārocesi. Manussā ujjhāyanti khiyyanti vipācenti – ‘‘mahicchā ime samaṇā sakyaputtiyā asantuṭṭhā. Nayimesaṃ sukarā dhammanimantanāpi kātuṃ 4. Kathañhi nāma seṭṭhiputtena dhammanimantanāya kayiramānāya sāṭakaṃ gahessantī’’ti! Assosuṃ kho bhikkhū tesaṃ manussānaṃ ujjhāyantānaṃ khiyyantānaṃ vipācentānaṃ. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma āyasmā upanando sakyaputto seṭṭhiputtaṃ cīvaraṃ viññāpessatī’’ti! Atha kho te bhikkhū āyasmantaṃ upanandaṃ sakyaputtaṃ anekapariyāyena vigarahitvā bhagavato etamatthaṃ ārocesuṃ…pe… ‘‘saccaṃ kira tvaṃ, upananda, seṭṭhiputtaṃ cīvaraṃ viññāpesī’’ti? ‘‘Saccaṃ, bhagavā’’ti. ‘‘Ñātako te, upananda, aññātako’’ti? ‘‘Aññātako, bhagavā’’ti. ‘‘Aññātako, moghapurisa, aññātakassa na jānāti patirūpaṃ vā appatirūpaṃ vā santaṃ vā asantaṃ vā. Tattha nāma tvaṃ, moghapurisa, aññātakaṃ seṭṭhiputtaṃ cīvaraṃ viññāpessasi! Netaṃ, moghapurisa, appasannānaṃ vā pasādāya…pe… evañca pana, bhikkhave, imaṃ sikkhāpadaṃ uddiseyyātha –
516. ‘‘யோ பன பி⁴க்கு² அஞ்ஞாதகங் க³ஹபதிங் வா க³ஹபதானிங் வா சீவரங் விஞ்ஞாபெய்ய, நிஸ்ஸக்³கி³யங் பாசித்திய’’ந்தி.
516.‘‘Yo pana bhikkhu aññātakaṃ gahapatiṃ vā gahapatāniṃ vā cīvaraṃ viññāpeyya, nissaggiyaṃ pācittiya’’nti.
ஏவஞ்சித³ங் ப⁴க³வதா பி⁴க்கூ²னங் ஸிக்கா²பத³ங் பஞ்ஞத்தங் ஹோதி.
Evañcidaṃ bhagavatā bhikkhūnaṃ sikkhāpadaṃ paññattaṃ hoti.
517. தேன கோ² பன ஸமயேன ஸம்ப³ஹுலா பி⁴க்கூ² ஸாகேதா ஸாவத்தி²ங் 2 அத்³தா⁴னமக்³க³ப்படிபன்னா ஹொந்தி. அந்தராமக்³கே³ சோரா நிக்க²மித்வா தே பி⁴க்கூ² அச்சி²ந்தி³ங்ஸு. அத² கோ² தே பி⁴க்கூ² – ‘‘ப⁴க³வதா படிக்கி²த்தங் அஞ்ஞாதகங் க³ஹபதிங் வா க³ஹபதானிங் வா சீவரங் விஞ்ஞாபேது’’ந்தி, குக்குச்சாயந்தா ந விஞ்ஞாபேஸுங். யதா²னக்³கா³வ ஸாவத்தி²ங் க³ந்த்வா பி⁴க்கூ² அபி⁴வாதெ³ந்தி. பி⁴க்கூ² ஏவமாஹங்ஸு – ‘‘ஸுந்த³ரா கோ² இமே, ஆவுஸோ, ஆஜீவகா யே இமே பி⁴க்கூ²ஸு அபி⁴வாதெ³ந்தீ’’தி. தே ஏவமாஹங்ஸு – ‘‘ந மயங், ஆவுஸோ, ஆஜீவகா, பி⁴க்கூ² மய’’ந்தி. பி⁴க்கூ² ஆயஸ்மந்தங் உபாலிங் ஏதத³வோசுங் – ‘‘இங்கா⁴வுஸோ உபாலி, இமே அனுயுஞ்ஜாஹீ’’தி. அத² கோ² ஆயஸ்மதா உபாலினா அனுயுஞ்ஜியமானா தே பி⁴க்கூ² ஏதமத்த²ங் ஆரோசேஸுங். அத² கோ² ஆயஸ்மா உபாலி தே பி⁴க்கூ² அனுயுஞ்ஜித்வா பி⁴க்கூ² ஏதத³வோச – ‘‘பி⁴க்கூ² இமே, ஆவுஸோ. தே³த² நேஸங் சீவரானீ’’தி. யே தே பி⁴க்கூ² அப்பிச்சா²…பே॰… தே உஜ்ஜா²யந்தி கி²ய்யந்தி விபாசெந்தி – ‘‘கத²ஞ்ஹி நாம பி⁴க்கூ² நக்³கா³ ஆக³ச்சி²ஸ்ஸந்தி! நனு நாம திணேன வா பண்ணேன வா படிச்சா²தெ³த்வா ஆக³ந்தப்³ப³’’ந்தி. அத² கோ² தே பி⁴க்கூ² தே அனேகபரியாயேன விக³ரஹித்வா ப⁴க³வதோ ஏதமத்த²ங் ஆரோசேஸுங். அத² கோ² ப⁴க³வா ஏதஸ்மிங் நிதா³னே ஏதஸ்மிங் பகரணே த⁴ம்மிங் கத²ங் கத்வா பி⁴க்கூ² ஆமந்தேஸி – ‘‘அனுஜானாமி, பி⁴க்க²வே, அச்சி²ன்னசீவரஸ்ஸ வா நட்ட²சீவரஸ்ஸ வா அஞ்ஞாதகங் க³ஹபதிங் வா க³ஹபதானிங் வா சீவரங் விஞ்ஞாபேதுங். யங் ஆவாஸங் பட²மங் உபக³ச்ச²தி, ஸசே தத்த² ஹோதி ஸங்க⁴ஸ்ஸ விஹாரசீவரங் வா உத்தரத்த²ரணங் வா பூ⁴மத்த²ரணங் வா பி⁴ஸிச்ச²வி வா, தங் க³ஹெத்வா பாருபிதுங் லபி⁴த்வா ஓத³ஹிஸ்ஸாமீ’’தி . நோ சே ஹோதி ஸங்க⁴ஸ்ஸ விஹாரசீவரங் வா உத்தரத்த²ரணங் வா பு⁴மத்த²ரணங் வா பி⁴ஸிச்ச²வி வா திணேன வா பண்ணேன வா படிச்சா²தெ³த்வா ஆக³ந்தப்³ப³ங்; ந த்வேவ நக்³கே³ன ஆக³ந்தப்³ப³ங். யோ ஆக³ச்செ²ய்ய, ஆபத்தி து³க்கடஸ்ஸ. ஏவஞ்ச பன, பி⁴க்க²வே, இமங் ஸிக்கா²பத³ங் உத்³தி³ஸெய்யாத² –
517. Tena kho pana samayena sambahulā bhikkhū sāketā sāvatthiṃ 2 addhānamaggappaṭipannā honti. Antarāmagge corā nikkhamitvā te bhikkhū acchindiṃsu. Atha kho te bhikkhū – ‘‘bhagavatā paṭikkhittaṃ aññātakaṃ gahapatiṃ vā gahapatāniṃ vā cīvaraṃ viññāpetu’’nti, kukkuccāyantā na viññāpesuṃ. Yathānaggāva sāvatthiṃ gantvā bhikkhū abhivādenti. Bhikkhū evamāhaṃsu – ‘‘sundarā kho ime, āvuso, ājīvakā ye ime bhikkhūsu abhivādentī’’ti. Te evamāhaṃsu – ‘‘na mayaṃ, āvuso, ājīvakā, bhikkhū maya’’nti. Bhikkhū āyasmantaṃ upāliṃ etadavocuṃ – ‘‘iṅghāvuso upāli, ime anuyuñjāhī’’ti. Atha kho āyasmatā upālinā anuyuñjiyamānā te bhikkhū etamatthaṃ ārocesuṃ. Atha kho āyasmā upāli te bhikkhū anuyuñjitvā bhikkhū etadavoca – ‘‘bhikkhū ime, āvuso. Detha nesaṃ cīvarānī’’ti. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma bhikkhū naggā āgacchissanti! Nanu nāma tiṇena vā paṇṇena vā paṭicchādetvā āgantabba’’nti. Atha kho te bhikkhū te anekapariyāyena vigarahitvā bhagavato etamatthaṃ ārocesuṃ. Atha kho bhagavā etasmiṃ nidāne etasmiṃ pakaraṇe dhammiṃ kathaṃ katvā bhikkhū āmantesi – ‘‘anujānāmi, bhikkhave, acchinnacīvarassa vā naṭṭhacīvarassa vā aññātakaṃ gahapatiṃ vā gahapatāniṃ vā cīvaraṃ viññāpetuṃ. Yaṃ āvāsaṃ paṭhamaṃ upagacchati, sace tattha hoti saṅghassa vihāracīvaraṃ vā uttarattharaṇaṃ vā bhūmattharaṇaṃ vā bhisicchavi vā, taṃ gahetvā pārupituṃ labhitvā odahissāmī’’ti . No ce hoti saṅghassa vihāracīvaraṃ vā uttarattharaṇaṃ vā bhumattharaṇaṃ vā bhisicchavi vā tiṇena vā paṇṇena vā paṭicchādetvā āgantabbaṃ; na tveva naggena āgantabbaṃ. Yo āgaccheyya, āpatti dukkaṭassa. Evañca pana, bhikkhave, imaṃ sikkhāpadaṃ uddiseyyātha –
518. ‘‘யோ பன பி⁴க்கு² அஞ்ஞாதகங் க³ஹபதிங் வா க³ஹபதானிங் வா சீவரங் விஞ்ஞாபெய்ய, அஞ்ஞத்ர ஸமயா, நிஸ்ஸக்³கி³யங் பாசித்தியங். தத்தா²யங் ஸமயோ – அச்சி²ன்னசீவரோ வா ஹோதி பி⁴க்கு² நட்ட²சீவரோ வா. அயங் தத்த² ஸமயோ’’தி.
518.‘‘Yo pana bhikkhu aññātakaṃ gahapatiṃ vā gahapatāniṃ vā cīvaraṃ viññāpeyya, aññatra samayā, nissaggiyaṃ pācittiyaṃ. Tatthāyaṃ samayo – acchinnacīvaro vā hoti bhikkhu naṭṭhacīvaro vā. Ayaṃ tattha samayo’’ti.
519. யோ பனாதி யோ யாதி³ஸோ…பே॰… பி⁴க்கூ²தி…பே॰… அயங் இமஸ்மிங் அத்தே² அதி⁴ப்பேதோ பி⁴க்கூ²தி.
519.Yo panāti yo yādiso…pe… bhikkhūti…pe… ayaṃ imasmiṃ atthe adhippeto bhikkhūti.
அஞ்ஞாதகோ நாம மாதிதோ வா பிதிதோ வா யாவ ஸத்தமா பிதாமஹயுகா³ அஸம்ப³த்³தோ⁴.
Aññātako nāma mātito vā pitito vā yāva sattamā pitāmahayugā asambaddho.
க³ஹபதி நாம யோ கோசி அகா³ரங் அஜ்ஜா²வஸதி.
Gahapati nāma yo koci agāraṃ ajjhāvasati.
க³ஹபதானீ நாம யா காசி அகா³ரங் அஜ்ஜா²வஸதி.
Gahapatānī nāma yā kāci agāraṃ ajjhāvasati.
சீவரங் நாம ச²ன்னங் சீவரானங் அஞ்ஞதரங் சீவரங் விகப்பனுபக³ங் பச்சி²மங்.
Cīvaraṃ nāma channaṃ cīvarānaṃ aññataraṃ cīvaraṃ vikappanupagaṃ pacchimaṃ.
அஞ்ஞத்ர ஸமயாதி ட²பெத்வா ஸமயங்.
Aññatra samayāti ṭhapetvā samayaṃ.
அச்சி²ன்னசீவரோ நாம பி⁴க்கு²ஸ்ஸ சீவரங் அச்சி²ன்னங் ஹோதி ராஜூஹி வா சோரேஹி வா து⁴த்தேஹி வா, யேஹி கேஹிசி வா அச்சி²ன்னங் ஹோதி.
Acchinnacīvaro nāma bhikkhussa cīvaraṃ acchinnaṃ hoti rājūhi vā corehi vā dhuttehi vā, yehi kehici vā acchinnaṃ hoti.
நட்ட²சீவரோ நாம பி⁴க்கு²ஸ்ஸ சீவரங் அக்³கி³னா வா த³ட்³ட⁴ங் ஹோதி, உத³கேன வா வுள்ஹங் ஹோதி, உந்தூ³ரேஹி வா உபசிகாஹி வா கா²யிதங் ஹோதி, பரிபோ⁴க³ஜிண்ணங் வா ஹோதி.
Naṭṭhacīvaro nāma bhikkhussa cīvaraṃ agginā vā daḍḍhaṃ hoti, udakena vā vuḷhaṃ hoti, undūrehi vā upacikāhi vā khāyitaṃ hoti, paribhogajiṇṇaṃ vā hoti.
அஞ்ஞத்ர ஸமயா விஞ்ஞாபேதி, பயோகே³ து³க்கடங். படிலாபே⁴ன நிஸ்ஸக்³கி³யங் ஹோதி. நிஸ்ஸஜ்ஜிதப்³ப³ங் ஸங்க⁴ஸ்ஸ வா க³ணஸ்ஸ வா புக்³க³லஸ்ஸ வா. ஏவஞ்ச பன, பி⁴க்க²வே , நிஸ்ஸஜ்ஜிதப்³ப³ங்…பே॰… இத³ங் மே, ப⁴ந்தே, சீவரங் அஞ்ஞாதகங் க³ஹபதிகங், அஞ்ஞத்ர ஸமயா விஞ்ஞாபிதங், நிஸ்ஸக்³கி³யங். இமாஹங் ஸங்க⁴ஸ்ஸ நிஸ்ஸஜ்ஜாமீதி…பே॰… த³தெ³ய்யாதி…பே॰… த³தெ³ய்யுந்தி…பே॰… ஆயஸ்மதோ த³ம்மீதி.
Aññatra samayā viññāpeti, payoge dukkaṭaṃ. Paṭilābhena nissaggiyaṃ hoti. Nissajjitabbaṃ saṅghassa vā gaṇassa vā puggalassa vā. Evañca pana, bhikkhave , nissajjitabbaṃ…pe… idaṃ me, bhante, cīvaraṃ aññātakaṃ gahapatikaṃ, aññatra samayā viññāpitaṃ, nissaggiyaṃ. Imāhaṃ saṅghassa nissajjāmīti…pe… dadeyyāti…pe… dadeyyunti…pe… āyasmato dammīti.
520. அஞ்ஞாதகே அஞ்ஞாதகஸஞ்ஞீ, அஞ்ஞத்ர ஸமயா, சீவரங் விஞ்ஞாபேதி, நிஸ்ஸக்³கி³யங் பாசித்தியங். அஞ்ஞாதகே வேமதிகோ, அஞ்ஞத்ர ஸமயா, சீவரங் விஞ்ஞாபேதி, நிஸ்ஸக்³கி³யங் பாசித்தியங். அஞ்ஞாதகே ஞாதகஸஞ்ஞீ, அஞ்ஞத்ர ஸமயா, சீவரங் விஞ்ஞாபேதி, நிஸ்ஸக்³கி³யங் பாசித்தியங்.
520. Aññātake aññātakasaññī, aññatra samayā, cīvaraṃ viññāpeti, nissaggiyaṃ pācittiyaṃ. Aññātake vematiko, aññatra samayā, cīvaraṃ viññāpeti, nissaggiyaṃ pācittiyaṃ. Aññātake ñātakasaññī, aññatra samayā, cīvaraṃ viññāpeti, nissaggiyaṃ pācittiyaṃ.
ஞாதகே அஞ்ஞாதகஸஞ்ஞீ, ஆபத்தி து³க்கடஸ்ஸ. ஞாதகே வேமதிகோ, ஆபத்தி து³க்கடஸ்ஸ. ஞாதகே ஞாதகஸஞ்ஞீ, அனாபத்தி.
Ñātake aññātakasaññī, āpatti dukkaṭassa. Ñātake vematiko, āpatti dukkaṭassa. Ñātake ñātakasaññī, anāpatti.
521. அனாபத்தி ஸமயே, ஞாதகானங், பவாரிதானங், அஞ்ஞஸ்ஸத்தா²ய, அத்தனோ த⁴னேன, உம்மத்தகஸ்ஸ, ஆதி³கம்மிகஸ்ஸாதி.
521. Anāpatti samaye, ñātakānaṃ, pavāritānaṃ, aññassatthāya, attano dhanena, ummattakassa, ādikammikassāti.
அஞ்ஞாதகவிஞ்ஞத்திஸிக்கா²பத³ங் நிட்டி²தங் ச²ட்ட²ங்.
Aññātakaviññattisikkhāpadaṃ niṭṭhitaṃ chaṭṭhaṃ.
Footnotes:
Related texts:
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவிப⁴ங்க³-அட்ட²கதா² • Mahāvibhaṅga-aṭṭhakathā / 6. அஞ்ஞாதகவிஞ்ஞத்திஸிக்கா²பத³வண்ணனா • 6. Aññātakaviññattisikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / 6. அஞ்ஞாதகவிஞ்ஞத்திஸிக்கா²பத³வண்ணனா • 6. Aññātakaviññattisikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 6. அஞ்ஞாதகவிஞ்ஞத்திஸிக்கா²பத³வண்ணனா • 6. Aññātakaviññattisikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / 6. அஞ்ஞாதகவிஞ்ஞத்திஸிக்கா²பத³வண்ணனா • 6. Aññātakaviññattisikkhāpadavaṇṇanā
