| Library / Tipiṭaka / তিপিটক • Tipiṭaka / মহাৰিভঙ্গ • Mahāvibhaṅga |
৬. অঞ্ঞাতকৰিঞ্ঞত্তিসিক্খাপদং
6. Aññātakaviññattisikkhāpadaṃ
৫১৫. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে । তেন খো পন সমযেন আযস্মা উপনন্দো সক্যপুত্তো পট্টো 1 হোতি ধম্মিং কথং কাতুং। অথ খো অঞ্ঞতরো সেট্ঠিপুত্তো যেনাযস্মা উপনন্দো সক্যপুত্তো তেনুপসঙ্কমি ; উপসঙ্কমিত্ৰা আযস্মন্তং উপনন্দং সক্যপুত্তং অভিৰাদেত্ৰা একমন্তং নিসীদি। একমন্তং নিসিন্নং খো তং সেট্ঠিপুত্তং আযস্মা উপনন্দো সক্যপুত্তো ধম্মিযা কথায সন্দস্সেসি সমাদপেসি সমুত্তেজেসি সম্পহংসেসি। অথ খো সো সেট্ঠিপুত্তো আযস্মতা উপনন্দেন সক্যপুত্তেন ধম্মিযা কথায সন্দস্সিতো সমাদপিতো সমুত্তেজিতো সম্পহংসিতো আযস্মন্তং উপনন্দং সক্যপুত্তং এতদৰোচ – ‘‘ৰদেয্যাথ, ভন্তে, যেন অত্থো। পটিবলা মযং অয্যস্স দাতুং যদিদং চীৰরপিণ্ডপাতসেনাসনগিলানপ্পচ্চযভেসজ্জপরিক্খার’’ন্তি। ‘‘সচে মে ত্ৰং, আৰুসো, দাতুকামোসি, ইতো একং সাটকং দেহী’’তি। ‘‘অম্হাকং খো, ভন্তে, কুলপুত্তানং কিস্মিং ৰিয একসাটকং গন্তুং। আগমেহি, ভন্তে, যাৰ ঘরং গচ্ছামি। ঘরং গতো ইতো ৰা একং সাটকং পহিণিস্সামি ইতো ৰা সুন্দরতর’’ন্তি। দুতিযম্পি খো আযস্মা উপনন্দো সক্যপুত্তো তং সেট্ঠিপুত্তং এতদৰোচ ‘‘সচে মে ত্ৰং আৰুসো দাতুকামোসি ইতো একং সাটকং দেহী’’তি। অম্হাকং খো ভন্তে কুলপুত্তানং কিস্মিং ৰিয একসাটকং গন্তুং, আগমেহি ভন্তে যাৰ ঘরং গচ্ছামি, ঘরং গতো ইতো ৰা একং সাটকং পহিণিস্সামি ইতো ৰা সুন্দরতরন্তি। ততিযম্পি খো আযস্মা উপনন্দো সক্যপুত্তো তং সেট্ঠিপুত্তং এতদৰোচ ‘‘সচে মে ত্ৰং আৰুসো দাতুকামোসি, ইতো একং সাটকং দেহী’’তি। অম্হাকং খো ভন্তে কুলপুত্তানং কিস্মিং ৰিয একসাটকং গন্তুং, আগমেহি ভন্তে যাৰ ঘরং গচ্ছামি, ঘরং গতো ইতো ৰা একং সাটকং পহিণিস্সামি ইতো ৰা সুন্দরতরন্তি। ‘‘কিং পন তযা, আৰুসো, অদাতুকামেন পৰারিতেন যং ত্ৰং পৰারেত্ৰা ন দেসী’’তি।
515. Tena samayena buddho bhagavā sāvatthiyaṃ viharati jetavane anāthapiṇḍikassa ārāme . Tena kho pana samayena āyasmā upanando sakyaputto paṭṭo 2 hoti dhammiṃ kathaṃ kātuṃ. Atha kho aññataro seṭṭhiputto yenāyasmā upanando sakyaputto tenupasaṅkami ; upasaṅkamitvā āyasmantaṃ upanandaṃ sakyaputtaṃ abhivādetvā ekamantaṃ nisīdi. Ekamantaṃ nisinnaṃ kho taṃ seṭṭhiputtaṃ āyasmā upanando sakyaputto dhammiyā kathāya sandassesi samādapesi samuttejesi sampahaṃsesi. Atha kho so seṭṭhiputto āyasmatā upanandena sakyaputtena dhammiyā kathāya sandassito samādapito samuttejito sampahaṃsito āyasmantaṃ upanandaṃ sakyaputtaṃ etadavoca – ‘‘vadeyyātha, bhante, yena attho. Paṭibalā mayaṃ ayyassa dātuṃ yadidaṃ cīvarapiṇḍapātasenāsanagilānappaccayabhesajjaparikkhāra’’nti. ‘‘Sace me tvaṃ, āvuso, dātukāmosi, ito ekaṃ sāṭakaṃ dehī’’ti. ‘‘Amhākaṃ kho, bhante, kulaputtānaṃ kismiṃ viya ekasāṭakaṃ gantuṃ. Āgamehi, bhante, yāva gharaṃ gacchāmi. Gharaṃ gato ito vā ekaṃ sāṭakaṃ pahiṇissāmi ito vā sundaratara’’nti. Dutiyampi kho āyasmā upanando sakyaputto taṃ seṭṭhiputtaṃ etadavoca ‘‘sace me tvaṃ āvuso dātukāmosi ito ekaṃ sāṭakaṃ dehī’’ti. Amhākaṃ kho bhante kulaputtānaṃ kismiṃ viya ekasāṭakaṃ gantuṃ, āgamehi bhante yāva gharaṃ gacchāmi, gharaṃ gato ito vā ekaṃ sāṭakaṃ pahiṇissāmi ito vā sundarataranti. Tatiyampi kho āyasmā upanando sakyaputto taṃ seṭṭhiputtaṃ etadavoca ‘‘sace me tvaṃ āvuso dātukāmosi, ito ekaṃ sāṭakaṃ dehī’’ti. Amhākaṃ kho bhante kulaputtānaṃ kismiṃ viya ekasāṭakaṃ gantuṃ, āgamehi bhante yāva gharaṃ gacchāmi, gharaṃ gato ito vā ekaṃ sāṭakaṃ pahiṇissāmi ito vā sundarataranti. ‘‘Kiṃ pana tayā, āvuso, adātukāmena pavāritena yaṃ tvaṃ pavāretvā na desī’’ti.
অথ খো সো সেট্ঠিপুত্তো আযস্মতা উপনন্দেন সক্যপুত্তেন নিপ্পীল়িযমানো একং সাটকং দত্ৰা অগমাসি। মনুস্সা তং সেট্ঠিপুত্তং এতদৰোচুং – ‘‘কিস্স ত্ৰং অয্যো একসাটকো আগচ্ছসী’’তি? অথ খো সো সেট্ঠিপুত্তো তেসং মনুস্সানং এতমত্থং আরোচেসি। মনুস্সা উজ্ঝাযন্তি খিয্যন্তি ৰিপাচেন্তি – ‘‘মহিচ্ছা ইমে সমণা সক্যপুত্তিযা অসন্তুট্ঠা। নযিমেসং সুকরা ধম্মনিমন্তনাপি কাতুং 3। কথঞ্হি নাম সেট্ঠিপুত্তেন ধম্মনিমন্তনায কযিরমানায সাটকং গহেস্সন্তী’’তি! অস্সোসুং খো ভিক্খূ তেসং মনুস্সানং উজ্ঝাযন্তানং খিয্যন্তানং ৰিপাচেন্তানং। যে তে ভিক্খূ অপ্পিচ্ছা…পে॰… তে উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম আযস্মা উপনন্দো সক্যপুত্তো সেট্ঠিপুত্তং চীৰরং ৰিঞ্ঞাপেস্সতী’’তি! অথ খো তে ভিক্খূ আযস্মন্তং উপনন্দং সক্যপুত্তং অনেকপরিযাযেন ৰিগরহিত্ৰা ভগৰতো এতমত্থং আরোচেসুং…পে॰… ‘‘সচ্চং কির ত্ৰং, উপনন্দ, সেট্ঠিপুত্তং চীৰরং ৰিঞ্ঞাপেসী’’তি? ‘‘সচ্চং, ভগৰা’’তি। ‘‘ঞাতকো তে, উপনন্দ, অঞ্ঞাতকো’’তি? ‘‘অঞ্ঞাতকো, ভগৰা’’তি। ‘‘অঞ্ঞাতকো, মোঘপুরিস, অঞ্ঞাতকস্স ন জানাতি পতিরূপং ৰা অপ্পতিরূপং ৰা সন্তং ৰা অসন্তং ৰা। তত্থ নাম ত্ৰং, মোঘপুরিস, অঞ্ঞাতকং সেট্ঠিপুত্তং চীৰরং ৰিঞ্ঞাপেস্সসি! নেতং, মোঘপুরিস, অপ্পসন্নানং ৰা পসাদায…পে॰… এৰঞ্চ পন, ভিক্খৰে, ইমং সিক্খাপদং উদ্দিসেয্যাথ –
Atha kho so seṭṭhiputto āyasmatā upanandena sakyaputtena nippīḷiyamāno ekaṃ sāṭakaṃ datvā agamāsi. Manussā taṃ seṭṭhiputtaṃ etadavocuṃ – ‘‘kissa tvaṃ ayyo ekasāṭako āgacchasī’’ti? Atha kho so seṭṭhiputto tesaṃ manussānaṃ etamatthaṃ ārocesi. Manussā ujjhāyanti khiyyanti vipācenti – ‘‘mahicchā ime samaṇā sakyaputtiyā asantuṭṭhā. Nayimesaṃ sukarā dhammanimantanāpi kātuṃ 4. Kathañhi nāma seṭṭhiputtena dhammanimantanāya kayiramānāya sāṭakaṃ gahessantī’’ti! Assosuṃ kho bhikkhū tesaṃ manussānaṃ ujjhāyantānaṃ khiyyantānaṃ vipācentānaṃ. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma āyasmā upanando sakyaputto seṭṭhiputtaṃ cīvaraṃ viññāpessatī’’ti! Atha kho te bhikkhū āyasmantaṃ upanandaṃ sakyaputtaṃ anekapariyāyena vigarahitvā bhagavato etamatthaṃ ārocesuṃ…pe… ‘‘saccaṃ kira tvaṃ, upananda, seṭṭhiputtaṃ cīvaraṃ viññāpesī’’ti? ‘‘Saccaṃ, bhagavā’’ti. ‘‘Ñātako te, upananda, aññātako’’ti? ‘‘Aññātako, bhagavā’’ti. ‘‘Aññātako, moghapurisa, aññātakassa na jānāti patirūpaṃ vā appatirūpaṃ vā santaṃ vā asantaṃ vā. Tattha nāma tvaṃ, moghapurisa, aññātakaṃ seṭṭhiputtaṃ cīvaraṃ viññāpessasi! Netaṃ, moghapurisa, appasannānaṃ vā pasādāya…pe… evañca pana, bhikkhave, imaṃ sikkhāpadaṃ uddiseyyātha –
৫১৬. ‘‘যো পন ভিক্খু অঞ্ঞাতকং গহপতিং ৰা গহপতানিং ৰা চীৰরং ৰিঞ্ঞাপেয্য, নিস্সগ্গিযং পাচিত্তিয’’ন্তি।
516.‘‘Yo pana bhikkhu aññātakaṃ gahapatiṃ vā gahapatāniṃ vā cīvaraṃ viññāpeyya, nissaggiyaṃ pācittiya’’nti.
এৰঞ্চিদং ভগৰতা ভিক্খূনং সিক্খাপদং পঞ্ঞত্তং হোতি।
Evañcidaṃ bhagavatā bhikkhūnaṃ sikkhāpadaṃ paññattaṃ hoti.
৫১৭. তেন খো পন সমযেন সম্বহুলা ভিক্খূ সাকেতা সাৰত্থিং ২ অদ্ধানমগ্গপ্পটিপন্না হোন্তি। অন্তরামগ্গে চোরা নিক্খমিত্ৰা তে ভিক্খূ অচ্ছিন্দিংসু। অথ খো তে ভিক্খূ – ‘‘ভগৰতা পটিক্খিত্তং অঞ্ঞাতকং গহপতিং ৰা গহপতানিং ৰা চীৰরং ৰিঞ্ঞাপেতু’’ন্তি, কুক্কুচ্চাযন্তা ন ৰিঞ্ঞাপেসুং। যথানগ্গাৰ সাৰত্থিং গন্ত্ৰা ভিক্খূ অভিৰাদেন্তি। ভিক্খূ এৰমাহংসু – ‘‘সুন্দরা খো ইমে, আৰুসো, আজীৰকা যে ইমে ভিক্খূসু অভিৰাদেন্তী’’তি। তে এৰমাহংসু – ‘‘ন মযং, আৰুসো, আজীৰকা, ভিক্খূ ময’’ন্তি। ভিক্খূ আযস্মন্তং উপালিং এতদৰোচুং – ‘‘ইঙ্ঘাৰুসো উপালি, ইমে অনুযুঞ্জাহী’’তি। অথ খো আযস্মতা উপালিনা অনুযুঞ্জিযমানা তে ভিক্খূ এতমত্থং আরোচেসুং। অথ খো আযস্মা উপালি তে ভিক্খূ অনুযুঞ্জিত্ৰা ভিক্খূ এতদৰোচ – ‘‘ভিক্খূ ইমে, আৰুসো। দেথ নেসং চীৰরানী’’তি। যে তে ভিক্খূ অপ্পিচ্ছা…পে॰… তে উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম ভিক্খূ নগ্গা আগচ্ছিস্সন্তি! ননু নাম তিণেন ৰা পণ্ণেন ৰা পটিচ্ছাদেত্ৰা আগন্তব্ব’’ন্তি। অথ খো তে ভিক্খূ তে অনেকপরিযাযেন ৰিগরহিত্ৰা ভগৰতো এতমত্থং আরোচেসুং। অথ খো ভগৰা এতস্মিং নিদানে এতস্মিং পকরণে ধম্মিং কথং কত্ৰা ভিক্খূ আমন্তেসি – ‘‘অনুজানামি, ভিক্খৰে, অচ্ছিন্নচীৰরস্স ৰা নট্ঠচীৰরস্স ৰা অঞ্ঞাতকং গহপতিং ৰা গহপতানিং ৰা চীৰরং ৰিঞ্ঞাপেতুং। যং আৰাসং পঠমং উপগচ্ছতি, সচে তত্থ হোতি সঙ্ঘস্স ৰিহারচীৰরং ৰা উত্তরত্থরণং ৰা ভূমত্থরণং ৰা ভিসিচ্ছৰি ৰা, তং গহেত্ৰা পারুপিতুং লভিত্ৰা ওদহিস্সামী’’তি । নো চে হোতি সঙ্ঘস্স ৰিহারচীৰরং ৰা উত্তরত্থরণং ৰা ভুমত্থরণং ৰা ভিসিচ্ছৰি ৰা তিণেন ৰা পণ্ণেন ৰা পটিচ্ছাদেত্ৰা আগন্তব্বং; ন ত্ৰেৰ নগ্গেন আগন্তব্বং। যো আগচ্ছেয্য, আপত্তি দুক্কটস্স। এৰঞ্চ পন, ভিক্খৰে, ইমং সিক্খাপদং উদ্দিসেয্যাথ –
517. Tena kho pana samayena sambahulā bhikkhū sāketā sāvatthiṃ 2 addhānamaggappaṭipannā honti. Antarāmagge corā nikkhamitvā te bhikkhū acchindiṃsu. Atha kho te bhikkhū – ‘‘bhagavatā paṭikkhittaṃ aññātakaṃ gahapatiṃ vā gahapatāniṃ vā cīvaraṃ viññāpetu’’nti, kukkuccāyantā na viññāpesuṃ. Yathānaggāva sāvatthiṃ gantvā bhikkhū abhivādenti. Bhikkhū evamāhaṃsu – ‘‘sundarā kho ime, āvuso, ājīvakā ye ime bhikkhūsu abhivādentī’’ti. Te evamāhaṃsu – ‘‘na mayaṃ, āvuso, ājīvakā, bhikkhū maya’’nti. Bhikkhū āyasmantaṃ upāliṃ etadavocuṃ – ‘‘iṅghāvuso upāli, ime anuyuñjāhī’’ti. Atha kho āyasmatā upālinā anuyuñjiyamānā te bhikkhū etamatthaṃ ārocesuṃ. Atha kho āyasmā upāli te bhikkhū anuyuñjitvā bhikkhū etadavoca – ‘‘bhikkhū ime, āvuso. Detha nesaṃ cīvarānī’’ti. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma bhikkhū naggā āgacchissanti! Nanu nāma tiṇena vā paṇṇena vā paṭicchādetvā āgantabba’’nti. Atha kho te bhikkhū te anekapariyāyena vigarahitvā bhagavato etamatthaṃ ārocesuṃ. Atha kho bhagavā etasmiṃ nidāne etasmiṃ pakaraṇe dhammiṃ kathaṃ katvā bhikkhū āmantesi – ‘‘anujānāmi, bhikkhave, acchinnacīvarassa vā naṭṭhacīvarassa vā aññātakaṃ gahapatiṃ vā gahapatāniṃ vā cīvaraṃ viññāpetuṃ. Yaṃ āvāsaṃ paṭhamaṃ upagacchati, sace tattha hoti saṅghassa vihāracīvaraṃ vā uttarattharaṇaṃ vā bhūmattharaṇaṃ vā bhisicchavi vā, taṃ gahetvā pārupituṃ labhitvā odahissāmī’’ti . No ce hoti saṅghassa vihāracīvaraṃ vā uttarattharaṇaṃ vā bhumattharaṇaṃ vā bhisicchavi vā tiṇena vā paṇṇena vā paṭicchādetvā āgantabbaṃ; na tveva naggena āgantabbaṃ. Yo āgaccheyya, āpatti dukkaṭassa. Evañca pana, bhikkhave, imaṃ sikkhāpadaṃ uddiseyyātha –
৫১৮. ‘‘যো পন ভিক্খু অঞ্ঞাতকং গহপতিং ৰা গহপতানিং ৰা চীৰরং ৰিঞ্ঞাপেয্য, অঞ্ঞত্র সমযা, নিস্সগ্গিযং পাচিত্তিযং। তত্থাযং সমযো – অচ্ছিন্নচীৰরো ৰা হোতি ভিক্খু নট্ঠচীৰরো ৰা। অযং তত্থ সমযো’’তি।
518.‘‘Yo pana bhikkhu aññātakaṃ gahapatiṃ vā gahapatāniṃ vā cīvaraṃ viññāpeyya, aññatra samayā, nissaggiyaṃ pācittiyaṃ. Tatthāyaṃ samayo – acchinnacīvaro vā hoti bhikkhu naṭṭhacīvaro vā. Ayaṃ tattha samayo’’ti.
৫১৯. যো পনাতি যো যাদিসো…পে॰… ভিক্খূতি…পে॰… অযং ইমস্মিং অত্থে অধিপ্পেতো ভিক্খূতি।
519.Yo panāti yo yādiso…pe… bhikkhūti…pe… ayaṃ imasmiṃ atthe adhippeto bhikkhūti.
অঞ্ঞাতকো নাম মাতিতো ৰা পিতিতো ৰা যাৰ সত্তমা পিতামহযুগা অসম্বদ্ধো।
Aññātako nāma mātito vā pitito vā yāva sattamā pitāmahayugā asambaddho.
গহপতি নাম যো কোচি অগারং অজ্ঝাৰসতি।
Gahapati nāma yo koci agāraṃ ajjhāvasati.
গহপতানী নাম যা কাচি অগারং অজ্ঝাৰসতি।
Gahapatānī nāma yā kāci agāraṃ ajjhāvasati.
চীৰরং নাম ছন্নং চীৰরানং অঞ্ঞতরং চীৰরং ৰিকপ্পনুপগং পচ্ছিমং।
Cīvaraṃ nāma channaṃ cīvarānaṃ aññataraṃ cīvaraṃ vikappanupagaṃ pacchimaṃ.
অঞ্ঞত্র সমযাতি ঠপেত্ৰা সমযং।
Aññatra samayāti ṭhapetvā samayaṃ.
অচ্ছিন্নচীৰরো নাম ভিক্খুস্স চীৰরং অচ্ছিন্নং হোতি রাজূহি ৰা চোরেহি ৰা ধুত্তেহি ৰা, যেহি কেহিচি ৰা অচ্ছিন্নং হোতি।
Acchinnacīvaro nāma bhikkhussa cīvaraṃ acchinnaṃ hoti rājūhi vā corehi vā dhuttehi vā, yehi kehici vā acchinnaṃ hoti.
নট্ঠচীৰরো নাম ভিক্খুস্স চীৰরং অগ্গিনা ৰা দড্ঢং হোতি, উদকেন ৰা ৰুল়্হং হোতি, উন্দূরেহি ৰা উপচিকাহি ৰা খাযিতং হোতি, পরিভোগজিণ্ণং ৰা হোতি।
Naṭṭhacīvaro nāma bhikkhussa cīvaraṃ agginā vā daḍḍhaṃ hoti, udakena vā vuḷhaṃ hoti, undūrehi vā upacikāhi vā khāyitaṃ hoti, paribhogajiṇṇaṃ vā hoti.
অঞ্ঞত্র সমযা ৰিঞ্ঞাপেতি, পযোগে দুক্কটং। পটিলাভেন নিস্সগ্গিযং হোতি। নিস্সজ্জিতব্বং সঙ্ঘস্স ৰা গণস্স ৰা পুগ্গলস্স ৰা। এৰঞ্চ পন, ভিক্খৰে , নিস্সজ্জিতব্বং…পে॰… ইদং মে, ভন্তে, চীৰরং অঞ্ঞাতকং গহপতিকং, অঞ্ঞত্র সমযা ৰিঞ্ঞাপিতং, নিস্সগ্গিযং। ইমাহং সঙ্ঘস্স নিস্সজ্জামীতি…পে॰… দদেয্যাতি…পে॰… দদেয্যুন্তি…পে॰… আযস্মতো দম্মীতি।
Aññatra samayā viññāpeti, payoge dukkaṭaṃ. Paṭilābhena nissaggiyaṃ hoti. Nissajjitabbaṃ saṅghassa vā gaṇassa vā puggalassa vā. Evañca pana, bhikkhave , nissajjitabbaṃ…pe… idaṃ me, bhante, cīvaraṃ aññātakaṃ gahapatikaṃ, aññatra samayā viññāpitaṃ, nissaggiyaṃ. Imāhaṃ saṅghassa nissajjāmīti…pe… dadeyyāti…pe… dadeyyunti…pe… āyasmato dammīti.
৫২০. অঞ্ঞাতকে অঞ্ঞাতকসঞ্ঞী, অঞ্ঞত্র সমযা, চীৰরং ৰিঞ্ঞাপেতি, নিস্সগ্গিযং পাচিত্তিযং। অঞ্ঞাতকে ৰেমতিকো, অঞ্ঞত্র সমযা, চীৰরং ৰিঞ্ঞাপেতি, নিস্সগ্গিযং পাচিত্তিযং। অঞ্ঞাতকে ঞাতকসঞ্ঞী, অঞ্ঞত্র সমযা, চীৰরং ৰিঞ্ঞাপেতি, নিস্সগ্গিযং পাচিত্তিযং।
520. Aññātake aññātakasaññī, aññatra samayā, cīvaraṃ viññāpeti, nissaggiyaṃ pācittiyaṃ. Aññātake vematiko, aññatra samayā, cīvaraṃ viññāpeti, nissaggiyaṃ pācittiyaṃ. Aññātake ñātakasaññī, aññatra samayā, cīvaraṃ viññāpeti, nissaggiyaṃ pācittiyaṃ.
ঞাতকে অঞ্ঞাতকসঞ্ঞী, আপত্তি দুক্কটস্স। ঞাতকে ৰেমতিকো, আপত্তি দুক্কটস্স। ঞাতকে ঞাতকসঞ্ঞী, অনাপত্তি।
Ñātake aññātakasaññī, āpatti dukkaṭassa. Ñātake vematiko, āpatti dukkaṭassa. Ñātake ñātakasaññī, anāpatti.
৫২১. অনাপত্তি সমযে, ঞাতকানং, পৰারিতানং, অঞ্ঞস্সত্থায, অত্তনো ধনেন, উম্মত্তকস্স, আদিকম্মিকস্সাতি।
521. Anāpatti samaye, ñātakānaṃ, pavāritānaṃ, aññassatthāya, attano dhanena, ummattakassa, ādikammikassāti.
অঞ্ঞাতকৰিঞ্ঞত্তিসিক্খাপদং নিট্ঠিতং ছট্ঠং।
Aññātakaviññattisikkhāpadaṃ niṭṭhitaṃ chaṭṭhaṃ.
Footnotes:
Related texts:
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / মহাৰিভঙ্গ-অট্ঠকথা • Mahāvibhaṅga-aṭṭhakathā / ৬. অঞ্ঞাতকৰিঞ্ঞত্তিসিক্খাপদৰণ্ণনা • 6. Aññātakaviññattisikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / ৬. অঞ্ঞাতকৰিঞ্ঞত্তিসিক্খাপদৰণ্ণনা • 6. Aññātakaviññattisikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / ৬. অঞ্ঞাতকৰিঞ্ঞত্তিসিক্খাপদৰণ্ণনা • 6. Aññātakaviññattisikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / ৬. অঞ্ঞাতকৰিঞ্ঞত্তিসিক্খাপদৰণ্ণনা • 6. Aññātakaviññattisikkhāpadavaṇṇanā
