| Library / Tipiṭaka / ཏིཔིཊཀ • Tipiṭaka / མཧཱཝིབྷངྒ • Mahāvibhaṅga |
༦. ཨཉྙཱཏཀཝིཉྙཏྟིསིཀྑཱཔདཾ
6. Aññātakaviññattisikkhāpadaṃ
༥༡༥. ཏེན སམཡེན བུདྡྷོ བྷགཝཱ སཱཝཏྠིཡཾ ཝིཧརཏི ཛེཏཝནེ ཨནཱཐཔིཎྜིཀསྶ ཨཱརཱམེ ། ཏེན ཁོ པན སམཡེན ཨཱཡསྨཱ ཨུཔནནྡོ སཀྱཔུཏྟོ པཊྚོ 1 ཧོཏི དྷམྨིཾ ཀཐཾ ཀཱཏུཾ། ཨཐ ཁོ ཨཉྙཏརོ སེཊྛིཔུཏྟོ ཡེནཱཡསྨཱ ཨུཔནནྡོ སཀྱཔུཏྟོ ཏེནུཔསངྐམི ; ཨུཔསངྐམིཏྭཱ ཨཱཡསྨནྟཾ ཨུཔནནྡཾ སཀྱཔུཏྟཾ ཨབྷིཝཱདེཏྭཱ ཨེཀམནྟཾ ནིསཱིདི། ཨེཀམནྟཾ ནིསིནྣཾ ཁོ ཏཾ སེཊྛིཔུཏྟཾ ཨཱཡསྨཱ ཨུཔནནྡོ སཀྱཔུཏྟོ དྷམྨིཡཱ ཀཐཱཡ སནྡསྶེསི སམཱདཔེསི སམུཏྟེཛེསི སམྤཧཾསེསི། ཨཐ ཁོ སོ སེཊྛིཔུཏྟོ ཨཱཡསྨཏཱ ཨུཔནནྡེན སཀྱཔུཏྟེན དྷམྨིཡཱ ཀཐཱཡ སནྡསྶིཏོ སམཱདཔིཏོ སམུཏྟེཛིཏོ སམྤཧཾསིཏོ ཨཱཡསྨནྟཾ ཨུཔནནྡཾ སཀྱཔུཏྟཾ ཨེཏདཝོཙ – ‘‘ཝདེཡྻཱཐ, བྷནྟེ, ཡེན ཨཏྠོ། པཊིབལཱ མཡཾ ཨཡྻསྶ དཱཏུཾ ཡདིདཾ ཙཱིཝརཔིཎྜཔཱཏསེནཱསནགིལཱནཔྤཙྩཡབྷེསཛྫཔརིཀྑཱར’’ནྟི། ‘‘སཙེ མེ ཏྭཾ, ཨཱཝུསོ, དཱཏུཀཱམོསི, ཨིཏོ ཨེཀཾ སཱཊཀཾ དེཧཱི’’ཏི། ‘‘ཨམྷཱཀཾ ཁོ, བྷནྟེ, ཀུལཔུཏྟཱནཾ ཀིསྨིཾ ཝིཡ ཨེཀསཱཊཀཾ གནྟུཾ། ཨཱགམེཧི, བྷནྟེ, ཡཱཝ གྷརཾ གཙྪཱམི། གྷརཾ གཏོ ཨིཏོ ཝཱ ཨེཀཾ སཱཊཀཾ པཧིཎིསྶཱམི ཨིཏོ ཝཱ སུནྡརཏར’’ནྟི། དུཏིཡམྤི ཁོ ཨཱཡསྨཱ ཨུཔནནྡོ སཀྱཔུཏྟོ ཏཾ སེཊྛིཔུཏྟཾ ཨེཏདཝོཙ ‘‘སཙེ མེ ཏྭཾ ཨཱཝུསོ དཱཏུཀཱམོསི ཨིཏོ ཨེཀཾ སཱཊཀཾ དེཧཱི’’ཏི། ཨམྷཱཀཾ ཁོ བྷནྟེ ཀུལཔུཏྟཱནཾ ཀིསྨིཾ ཝིཡ ཨེཀསཱཊཀཾ གནྟུཾ, ཨཱགམེཧི བྷནྟེ ཡཱཝ གྷརཾ གཙྪཱམི, གྷརཾ གཏོ ཨིཏོ ཝཱ ཨེཀཾ སཱཊཀཾ པཧིཎིསྶཱམི ཨིཏོ ཝཱ སུནྡརཏརནྟི། ཏཏིཡམྤི ཁོ ཨཱཡསྨཱ ཨུཔནནྡོ སཀྱཔུཏྟོ ཏཾ སེཊྛིཔུཏྟཾ ཨེཏདཝོཙ ‘‘སཙེ མེ ཏྭཾ ཨཱཝུསོ དཱཏུཀཱམོསི, ཨིཏོ ཨེཀཾ སཱཊཀཾ དེཧཱི’’ཏི། ཨམྷཱཀཾ ཁོ བྷནྟེ ཀུལཔུཏྟཱནཾ ཀིསྨིཾ ཝིཡ ཨེཀསཱཊཀཾ གནྟུཾ, ཨཱགམེཧི བྷནྟེ ཡཱཝ གྷརཾ གཙྪཱམི, གྷརཾ གཏོ ཨིཏོ ཝཱ ཨེཀཾ སཱཊཀཾ པཧིཎིསྶཱམི ཨིཏོ ཝཱ སུནྡརཏརནྟི། ‘‘ཀིཾ པན ཏཡཱ, ཨཱཝུསོ, ཨདཱཏུཀཱམེན པཝཱརིཏེན ཡཾ ཏྭཾ པཝཱརེཏྭཱ ན དེསཱི’’ཏི།
515. Tena samayena buddho bhagavā sāvatthiyaṃ viharati jetavane anāthapiṇḍikassa ārāme . Tena kho pana samayena āyasmā upanando sakyaputto paṭṭo 2 hoti dhammiṃ kathaṃ kātuṃ. Atha kho aññataro seṭṭhiputto yenāyasmā upanando sakyaputto tenupasaṅkami ; upasaṅkamitvā āyasmantaṃ upanandaṃ sakyaputtaṃ abhivādetvā ekamantaṃ nisīdi. Ekamantaṃ nisinnaṃ kho taṃ seṭṭhiputtaṃ āyasmā upanando sakyaputto dhammiyā kathāya sandassesi samādapesi samuttejesi sampahaṃsesi. Atha kho so seṭṭhiputto āyasmatā upanandena sakyaputtena dhammiyā kathāya sandassito samādapito samuttejito sampahaṃsito āyasmantaṃ upanandaṃ sakyaputtaṃ etadavoca – ‘‘vadeyyātha, bhante, yena attho. Paṭibalā mayaṃ ayyassa dātuṃ yadidaṃ cīvarapiṇḍapātasenāsanagilānappaccayabhesajjaparikkhāra’’nti. ‘‘Sace me tvaṃ, āvuso, dātukāmosi, ito ekaṃ sāṭakaṃ dehī’’ti. ‘‘Amhākaṃ kho, bhante, kulaputtānaṃ kismiṃ viya ekasāṭakaṃ gantuṃ. Āgamehi, bhante, yāva gharaṃ gacchāmi. Gharaṃ gato ito vā ekaṃ sāṭakaṃ pahiṇissāmi ito vā sundaratara’’nti. Dutiyampi kho āyasmā upanando sakyaputto taṃ seṭṭhiputtaṃ etadavoca ‘‘sace me tvaṃ āvuso dātukāmosi ito ekaṃ sāṭakaṃ dehī’’ti. Amhākaṃ kho bhante kulaputtānaṃ kismiṃ viya ekasāṭakaṃ gantuṃ, āgamehi bhante yāva gharaṃ gacchāmi, gharaṃ gato ito vā ekaṃ sāṭakaṃ pahiṇissāmi ito vā sundarataranti. Tatiyampi kho āyasmā upanando sakyaputto taṃ seṭṭhiputtaṃ etadavoca ‘‘sace me tvaṃ āvuso dātukāmosi, ito ekaṃ sāṭakaṃ dehī’’ti. Amhākaṃ kho bhante kulaputtānaṃ kismiṃ viya ekasāṭakaṃ gantuṃ, āgamehi bhante yāva gharaṃ gacchāmi, gharaṃ gato ito vā ekaṃ sāṭakaṃ pahiṇissāmi ito vā sundarataranti. ‘‘Kiṃ pana tayā, āvuso, adātukāmena pavāritena yaṃ tvaṃ pavāretvā na desī’’ti.
ཨཐ ཁོ སོ སེཊྛིཔུཏྟོ ཨཱཡསྨཏཱ ཨུཔནནྡེན སཀྱཔུཏྟེན ནིཔྤཱིལི༹ཡམཱནོ ཨེཀཾ སཱཊཀཾ དཏྭཱ ཨགམཱསི། མནུསྶཱ ཏཾ སེཊྛིཔུཏྟཾ ཨེཏདཝོཙུཾ – ‘‘ཀིསྶ ཏྭཾ ཨཡྻོ ཨེཀསཱཊཀོ ཨཱགཙྪསཱི’’ཏི? ཨཐ ཁོ སོ སེཊྛིཔུཏྟོ ཏེསཾ མནུསྶཱནཾ ཨེཏམཏྠཾ ཨཱརོཙེསི། མནུསྶཱ ཨུཛ྄ཛྷཱཡནྟི ཁིཡྻནྟི ཝིཔཱཙེནྟི – ‘‘མཧིཙྪཱ ཨིམེ སམཎཱ སཀྱཔུཏྟིཡཱ ཨསནྟུཊྛཱ། ནཡིམེསཾ སུཀརཱ དྷམྨནིམནྟནཱཔི ཀཱཏུཾ 3། ཀཐཉྷི ནཱམ སེཊྛིཔུཏྟེན དྷམྨནིམནྟནཱཡ ཀཡིརམཱནཱཡ སཱཊཀཾ གཧེསྶནྟཱི’’ཏི! ཨསྶོསུཾ ཁོ བྷིཀྑཱུ ཏེསཾ མནུསྶཱནཾ ཨུཛ྄ཛྷཱཡནྟཱནཾ ཁིཡྻནྟཱནཾ ཝིཔཱཙེནྟཱནཾ། ཡེ ཏེ བྷིཀྑཱུ ཨཔྤིཙྪཱ…པེ॰… ཏེ ཨུཛ྄ཛྷཱཡནྟི ཁིཡྻནྟི ཝིཔཱཙེནྟི – ‘‘ཀཐཉྷི ནཱམ ཨཱཡསྨཱ ཨུཔནནྡོ སཀྱཔུཏྟོ སེཊྛིཔུཏྟཾ ཙཱིཝརཾ ཝིཉྙཱཔེསྶཏཱི’’ཏི! ཨཐ ཁོ ཏེ བྷིཀྑཱུ ཨཱཡསྨནྟཾ ཨུཔནནྡཾ སཀྱཔུཏྟཾ ཨནེཀཔརིཡཱཡེན ཝིགརཧིཏྭཱ བྷགཝཏོ ཨེཏམཏྠཾ ཨཱརོཙེསུཾ…པེ॰… ‘‘སཙྩཾ ཀིར ཏྭཾ, ཨུཔནནྡ, སེཊྛིཔུཏྟཾ ཙཱིཝརཾ ཝིཉྙཱཔེསཱི’’ཏི? ‘‘སཙྩཾ, བྷགཝཱ’’ཏི། ‘‘ཉཱཏཀོ ཏེ, ཨུཔནནྡ, ཨཉྙཱཏཀོ’’ཏི? ‘‘ཨཉྙཱཏཀོ, བྷགཝཱ’’ཏི། ‘‘ཨཉྙཱཏཀོ, མོགྷཔུརིས, ཨཉྙཱཏཀསྶ ན ཛཱནཱཏི པཏིརཱུཔཾ ཝཱ ཨཔྤཏིརཱུཔཾ ཝཱ སནྟཾ ཝཱ ཨསནྟཾ ཝཱ། ཏཏྠ ནཱམ ཏྭཾ, མོགྷཔུརིས, ཨཉྙཱཏཀཾ སེཊྛིཔུཏྟཾ ཙཱིཝརཾ ཝིཉྙཱཔེསྶསི! ནེཏཾ, མོགྷཔུརིས, ཨཔྤསནྣཱནཾ ཝཱ པསཱདཱཡ…པེ॰… ཨེཝཉྩ པན, བྷིཀྑཝེ, ཨིམཾ སིཀྑཱཔདཾ ཨུདྡིསེཡྻཱཐ –
Atha kho so seṭṭhiputto āyasmatā upanandena sakyaputtena nippīḷiyamāno ekaṃ sāṭakaṃ datvā agamāsi. Manussā taṃ seṭṭhiputtaṃ etadavocuṃ – ‘‘kissa tvaṃ ayyo ekasāṭako āgacchasī’’ti? Atha kho so seṭṭhiputto tesaṃ manussānaṃ etamatthaṃ ārocesi. Manussā ujjhāyanti khiyyanti vipācenti – ‘‘mahicchā ime samaṇā sakyaputtiyā asantuṭṭhā. Nayimesaṃ sukarā dhammanimantanāpi kātuṃ 4. Kathañhi nāma seṭṭhiputtena dhammanimantanāya kayiramānāya sāṭakaṃ gahessantī’’ti! Assosuṃ kho bhikkhū tesaṃ manussānaṃ ujjhāyantānaṃ khiyyantānaṃ vipācentānaṃ. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma āyasmā upanando sakyaputto seṭṭhiputtaṃ cīvaraṃ viññāpessatī’’ti! Atha kho te bhikkhū āyasmantaṃ upanandaṃ sakyaputtaṃ anekapariyāyena vigarahitvā bhagavato etamatthaṃ ārocesuṃ…pe… ‘‘saccaṃ kira tvaṃ, upananda, seṭṭhiputtaṃ cīvaraṃ viññāpesī’’ti? ‘‘Saccaṃ, bhagavā’’ti. ‘‘Ñātako te, upananda, aññātako’’ti? ‘‘Aññātako, bhagavā’’ti. ‘‘Aññātako, moghapurisa, aññātakassa na jānāti patirūpaṃ vā appatirūpaṃ vā santaṃ vā asantaṃ vā. Tattha nāma tvaṃ, moghapurisa, aññātakaṃ seṭṭhiputtaṃ cīvaraṃ viññāpessasi! Netaṃ, moghapurisa, appasannānaṃ vā pasādāya…pe… evañca pana, bhikkhave, imaṃ sikkhāpadaṃ uddiseyyātha –
༥༡༦. ‘‘ཡོ པན བྷིཀྑུ ཨཉྙཱཏཀཾ གཧཔཏིཾ ཝཱ གཧཔཏཱནིཾ ཝཱ ཙཱིཝརཾ ཝིཉྙཱཔེཡྻ, ནིསྶགྒིཡཾ པཱཙིཏྟིཡ’’ནྟི།
516.‘‘Yo pana bhikkhu aññātakaṃ gahapatiṃ vā gahapatāniṃ vā cīvaraṃ viññāpeyya, nissaggiyaṃ pācittiya’’nti.
ཨེཝཉྩིདཾ བྷགཝཏཱ བྷིཀྑཱུནཾ སིཀྑཱཔདཾ པཉྙཏྟཾ ཧོཏི།
Evañcidaṃ bhagavatā bhikkhūnaṃ sikkhāpadaṃ paññattaṃ hoti.
༥༡༧. ཏེན ཁོ པན སམཡེན སམྦཧུལཱ བྷིཀྑཱུ སཱཀེཏཱ སཱཝཏྠིཾ ༢ ཨདྡྷཱནམགྒཔྤཊིཔནྣཱ ཧོནྟི། ཨནྟརཱམགྒེ ཙོརཱ ནིཀྑམིཏྭཱ ཏེ བྷིཀྑཱུ ཨཙྪིནྡིཾསུ། ཨཐ ཁོ ཏེ བྷིཀྑཱུ – ‘‘བྷགཝཏཱ པཊིཀྑིཏྟཾ ཨཉྙཱཏཀཾ གཧཔཏིཾ ཝཱ གཧཔཏཱནིཾ ཝཱ ཙཱིཝརཾ ཝིཉྙཱཔེཏུ’’ནྟི, ཀུཀྐུཙྩཱཡནྟཱ ན ཝིཉྙཱཔེསུཾ། ཡཐཱནགྒཱཝ སཱཝཏྠིཾ གནྟྭཱ བྷིཀྑཱུ ཨབྷིཝཱདེནྟི། བྷིཀྑཱུ ཨེཝམཱཧཾསུ – ‘‘སུནྡརཱ ཁོ ཨིམེ, ཨཱཝུསོ, ཨཱཛཱིཝཀཱ ཡེ ཨིམེ བྷིཀྑཱུསུ ཨབྷིཝཱདེནྟཱི’’ཏི། ཏེ ཨེཝམཱཧཾསུ – ‘‘ན མཡཾ, ཨཱཝུསོ, ཨཱཛཱིཝཀཱ, བྷིཀྑཱུ མཡ’’ནྟི། བྷིཀྑཱུ ཨཱཡསྨནྟཾ ཨུཔཱལིཾ ཨེཏདཝོཙུཾ – ‘‘ཨིངྒྷཱཝུསོ ཨུཔཱལི, ཨིམེ ཨནུཡུཉྫཱཧཱི’’ཏི། ཨཐ ཁོ ཨཱཡསྨཏཱ ཨུཔཱལིནཱ ཨནུཡུཉྫིཡམཱནཱ ཏེ བྷིཀྑཱུ ཨེཏམཏྠཾ ཨཱརོཙེསུཾ། ཨཐ ཁོ ཨཱཡསྨཱ ཨུཔཱལི ཏེ བྷིཀྑཱུ ཨནུཡུཉྫིཏྭཱ བྷིཀྑཱུ ཨེཏདཝོཙ – ‘‘བྷིཀྑཱུ ཨིམེ, ཨཱཝུསོ། དེཐ ནེསཾ ཙཱིཝརཱནཱི’’ཏི། ཡེ ཏེ བྷིཀྑཱུ ཨཔྤིཙྪཱ…པེ॰… ཏེ ཨུཛ྄ཛྷཱཡནྟི ཁིཡྻནྟི ཝིཔཱཙེནྟི – ‘‘ཀཐཉྷི ནཱམ བྷིཀྑཱུ ནགྒཱ ཨཱགཙྪིསྶནྟི! ནནུ ནཱམ ཏིཎེན ཝཱ པཎྞེན ཝཱ པཊིཙྪཱདེཏྭཱ ཨཱགནྟབྦ’’ནྟི། ཨཐ ཁོ ཏེ བྷིཀྑཱུ ཏེ ཨནེཀཔརིཡཱཡེན ཝིགརཧིཏྭཱ བྷགཝཏོ ཨེཏམཏྠཾ ཨཱརོཙེསུཾ། ཨཐ ཁོ བྷགཝཱ ཨེཏསྨིཾ ནིདཱནེ ཨེཏསྨིཾ པཀརཎེ དྷམྨིཾ ཀཐཾ ཀཏྭཱ བྷིཀྑཱུ ཨཱམནྟེསི – ‘‘ཨནུཛཱནཱམི, བྷིཀྑཝེ, ཨཙྪིནྣཙཱིཝརསྶ ཝཱ ནཊྛཙཱིཝརསྶ ཝཱ ཨཉྙཱཏཀཾ གཧཔཏིཾ ཝཱ གཧཔཏཱནིཾ ཝཱ ཙཱིཝརཾ ཝིཉྙཱཔེཏུཾ། ཡཾ ཨཱཝཱསཾ པཋམཾ ཨུཔགཙྪཏི, སཙེ ཏཏྠ ཧོཏི སངྒྷསྶ ཝིཧཱརཙཱིཝརཾ ཝཱ ཨུཏྟརཏྠརཎཾ ཝཱ བྷཱུམཏྠརཎཾ ཝཱ བྷིསིཙྪཝི ཝཱ, ཏཾ གཧེཏྭཱ པཱརུཔིཏུཾ ལབྷིཏྭཱ ཨོདཧིསྶཱམཱི’’ཏི ། ནོ ཙེ ཧོཏི སངྒྷསྶ ཝིཧཱརཙཱིཝརཾ ཝཱ ཨུཏྟརཏྠརཎཾ ཝཱ བྷུམཏྠརཎཾ ཝཱ བྷིསིཙྪཝི ཝཱ ཏིཎེན ཝཱ པཎྞེན ཝཱ པཊིཙྪཱདེཏྭཱ ཨཱགནྟབྦཾ; ན ཏྭེཝ ནགྒེན ཨཱགནྟབྦཾ། ཡོ ཨཱགཙྪེཡྻ, ཨཱཔཏྟི དུཀྐཊསྶ། ཨེཝཉྩ པན, བྷིཀྑཝེ, ཨིམཾ སིཀྑཱཔདཾ ཨུདྡིསེཡྻཱཐ –
517. Tena kho pana samayena sambahulā bhikkhū sāketā sāvatthiṃ 2 addhānamaggappaṭipannā honti. Antarāmagge corā nikkhamitvā te bhikkhū acchindiṃsu. Atha kho te bhikkhū – ‘‘bhagavatā paṭikkhittaṃ aññātakaṃ gahapatiṃ vā gahapatāniṃ vā cīvaraṃ viññāpetu’’nti, kukkuccāyantā na viññāpesuṃ. Yathānaggāva sāvatthiṃ gantvā bhikkhū abhivādenti. Bhikkhū evamāhaṃsu – ‘‘sundarā kho ime, āvuso, ājīvakā ye ime bhikkhūsu abhivādentī’’ti. Te evamāhaṃsu – ‘‘na mayaṃ, āvuso, ājīvakā, bhikkhū maya’’nti. Bhikkhū āyasmantaṃ upāliṃ etadavocuṃ – ‘‘iṅghāvuso upāli, ime anuyuñjāhī’’ti. Atha kho āyasmatā upālinā anuyuñjiyamānā te bhikkhū etamatthaṃ ārocesuṃ. Atha kho āyasmā upāli te bhikkhū anuyuñjitvā bhikkhū etadavoca – ‘‘bhikkhū ime, āvuso. Detha nesaṃ cīvarānī’’ti. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma bhikkhū naggā āgacchissanti! Nanu nāma tiṇena vā paṇṇena vā paṭicchādetvā āgantabba’’nti. Atha kho te bhikkhū te anekapariyāyena vigarahitvā bhagavato etamatthaṃ ārocesuṃ. Atha kho bhagavā etasmiṃ nidāne etasmiṃ pakaraṇe dhammiṃ kathaṃ katvā bhikkhū āmantesi – ‘‘anujānāmi, bhikkhave, acchinnacīvarassa vā naṭṭhacīvarassa vā aññātakaṃ gahapatiṃ vā gahapatāniṃ vā cīvaraṃ viññāpetuṃ. Yaṃ āvāsaṃ paṭhamaṃ upagacchati, sace tattha hoti saṅghassa vihāracīvaraṃ vā uttarattharaṇaṃ vā bhūmattharaṇaṃ vā bhisicchavi vā, taṃ gahetvā pārupituṃ labhitvā odahissāmī’’ti . No ce hoti saṅghassa vihāracīvaraṃ vā uttarattharaṇaṃ vā bhumattharaṇaṃ vā bhisicchavi vā tiṇena vā paṇṇena vā paṭicchādetvā āgantabbaṃ; na tveva naggena āgantabbaṃ. Yo āgaccheyya, āpatti dukkaṭassa. Evañca pana, bhikkhave, imaṃ sikkhāpadaṃ uddiseyyātha –
༥༡༨. ‘‘ཡོ པན བྷིཀྑུ ཨཉྙཱཏཀཾ གཧཔཏིཾ ཝཱ གཧཔཏཱནིཾ ཝཱ ཙཱིཝརཾ ཝིཉྙཱཔེཡྻ, ཨཉྙཏྲ སམཡཱ, ནིསྶགྒིཡཾ པཱཙིཏྟིཡཾ། ཏཏྠཱཡཾ སམཡོ – ཨཙྪིནྣཙཱིཝརོ ཝཱ ཧོཏི བྷིཀྑུ ནཊྛཙཱིཝརོ ཝཱ། ཨཡཾ ཏཏྠ སམཡོ’’ཏི།
518.‘‘Yo pana bhikkhu aññātakaṃ gahapatiṃ vā gahapatāniṃ vā cīvaraṃ viññāpeyya, aññatra samayā, nissaggiyaṃ pācittiyaṃ. Tatthāyaṃ samayo – acchinnacīvaro vā hoti bhikkhu naṭṭhacīvaro vā. Ayaṃ tattha samayo’’ti.
༥༡༩. ཡོ པནཱཏི ཡོ ཡཱདིསོ…པེ॰… བྷིཀྑཱུཏི…པེ॰… ཨཡཾ ཨིམསྨིཾ ཨཏྠེ ཨདྷིཔྤེཏོ བྷིཀྑཱུཏི།
519.Yo panāti yo yādiso…pe… bhikkhūti…pe… ayaṃ imasmiṃ atthe adhippeto bhikkhūti.
ཨཉྙཱཏཀོ ནཱམ མཱཏིཏོ ཝཱ པིཏིཏོ ཝཱ ཡཱཝ སཏྟམཱ པིཏཱམཧཡུགཱ ཨསམྦདྡྷོ།
Aññātako nāma mātito vā pitito vā yāva sattamā pitāmahayugā asambaddho.
གཧཔཏི ནཱམ ཡོ ཀོཙི ཨགཱརཾ ཨཛ྄ཛྷཱཝསཏི།
Gahapati nāma yo koci agāraṃ ajjhāvasati.
གཧཔཏཱནཱི ནཱམ ཡཱ ཀཱཙི ཨགཱརཾ ཨཛ྄ཛྷཱཝསཏི།
Gahapatānī nāma yā kāci agāraṃ ajjhāvasati.
ཙཱིཝརཾ ནཱམ ཚནྣཾ ཙཱིཝརཱནཾ ཨཉྙཏརཾ ཙཱིཝརཾ ཝིཀཔྤནུཔགཾ པཙྪིམཾ།
Cīvaraṃ nāma channaṃ cīvarānaṃ aññataraṃ cīvaraṃ vikappanupagaṃ pacchimaṃ.
ཨཉྙཏྲ སམཡཱཏི ཋཔེཏྭཱ སམཡཾ།
Aññatra samayāti ṭhapetvā samayaṃ.
ཨཙྪིནྣཙཱིཝརོ ནཱམ བྷིཀྑུསྶ ཙཱིཝརཾ ཨཙྪིནྣཾ ཧོཏི རཱཛཱུཧི ཝཱ ཙོརེཧི ཝཱ དྷུཏྟེཧི ཝཱ, ཡེཧི ཀེཧིཙི ཝཱ ཨཙྪིནྣཾ ཧོཏི།
Acchinnacīvaro nāma bhikkhussa cīvaraṃ acchinnaṃ hoti rājūhi vā corehi vā dhuttehi vā, yehi kehici vā acchinnaṃ hoti.
ནཊྛཙཱིཝརོ ནཱམ བྷིཀྑུསྶ ཙཱིཝརཾ ཨགྒིནཱ ཝཱ དཌྜྷཾ ཧོཏི, ཨུདཀེན ཝཱ ཝུལ༹ྷཾ ཧོཏི, ཨུནྡཱུརེཧི ཝཱ ཨུཔཙིཀཱཧི ཝཱ ཁཱཡིཏཾ ཧོཏི, པརིབྷོགཛིཎྞཾ ཝཱ ཧོཏི།
Naṭṭhacīvaro nāma bhikkhussa cīvaraṃ agginā vā daḍḍhaṃ hoti, udakena vā vuḷhaṃ hoti, undūrehi vā upacikāhi vā khāyitaṃ hoti, paribhogajiṇṇaṃ vā hoti.
ཨཉྙཏྲ སམཡཱ ཝིཉྙཱཔེཏི, པཡོགེ དུཀྐཊཾ། པཊིལཱབྷེན ནིསྶགྒིཡཾ ཧོཏི། ནིསྶཛྫིཏབྦཾ སངྒྷསྶ ཝཱ གཎསྶ ཝཱ པུགྒལསྶ ཝཱ། ཨེཝཉྩ པན, བྷིཀྑཝེ , ནིསྶཛྫིཏབྦཾ…པེ॰… ཨིདཾ མེ, བྷནྟེ, ཙཱིཝརཾ ཨཉྙཱཏཀཾ གཧཔཏིཀཾ, ཨཉྙཏྲ སམཡཱ ཝིཉྙཱཔིཏཾ, ནིསྶགྒིཡཾ། ཨིམཱཧཾ སངྒྷསྶ ནིསྶཛྫཱམཱིཏི…པེ॰… དདེཡྻཱཏི…པེ॰… དདེཡྻུནྟི…པེ॰… ཨཱཡསྨཏོ དམྨཱིཏི།
Aññatra samayā viññāpeti, payoge dukkaṭaṃ. Paṭilābhena nissaggiyaṃ hoti. Nissajjitabbaṃ saṅghassa vā gaṇassa vā puggalassa vā. Evañca pana, bhikkhave , nissajjitabbaṃ…pe… idaṃ me, bhante, cīvaraṃ aññātakaṃ gahapatikaṃ, aññatra samayā viññāpitaṃ, nissaggiyaṃ. Imāhaṃ saṅghassa nissajjāmīti…pe… dadeyyāti…pe… dadeyyunti…pe… āyasmato dammīti.
༥༢༠. ཨཉྙཱཏཀེ ཨཉྙཱཏཀསཉྙཱི, ཨཉྙཏྲ སམཡཱ, ཙཱིཝརཾ ཝིཉྙཱཔེཏི, ནིསྶགྒིཡཾ པཱཙིཏྟིཡཾ། ཨཉྙཱཏཀེ ཝེམཏིཀོ, ཨཉྙཏྲ སམཡཱ, ཙཱིཝརཾ ཝིཉྙཱཔེཏི, ནིསྶགྒིཡཾ པཱཙིཏྟིཡཾ། ཨཉྙཱཏཀེ ཉཱཏཀསཉྙཱི, ཨཉྙཏྲ སམཡཱ, ཙཱིཝརཾ ཝིཉྙཱཔེཏི, ནིསྶགྒིཡཾ པཱཙིཏྟིཡཾ།
520. Aññātake aññātakasaññī, aññatra samayā, cīvaraṃ viññāpeti, nissaggiyaṃ pācittiyaṃ. Aññātake vematiko, aññatra samayā, cīvaraṃ viññāpeti, nissaggiyaṃ pācittiyaṃ. Aññātake ñātakasaññī, aññatra samayā, cīvaraṃ viññāpeti, nissaggiyaṃ pācittiyaṃ.
ཉཱཏཀེ ཨཉྙཱཏཀསཉྙཱི, ཨཱཔཏྟི དུཀྐཊསྶ། ཉཱཏཀེ ཝེམཏིཀོ, ཨཱཔཏྟི དུཀྐཊསྶ། ཉཱཏཀེ ཉཱཏཀསཉྙཱི, ཨནཱཔཏྟི།
Ñātake aññātakasaññī, āpatti dukkaṭassa. Ñātake vematiko, āpatti dukkaṭassa. Ñātake ñātakasaññī, anāpatti.
༥༢༡. ཨནཱཔཏྟི སམཡེ, ཉཱཏཀཱནཾ, པཝཱརིཏཱནཾ, ཨཉྙསྶཏྠཱཡ, ཨཏྟནོ དྷནེན, ཨུམྨཏྟཀསྶ, ཨཱདིཀམྨིཀསྶཱཏི།
521. Anāpatti samaye, ñātakānaṃ, pavāritānaṃ, aññassatthāya, attano dhanena, ummattakassa, ādikammikassāti.
ཨཉྙཱཏཀཝིཉྙཏྟིསིཀྑཱཔདཾ ནིཊྛིཏཾ ཚཊྛཾ།
Aññātakaviññattisikkhāpadaṃ niṭṭhitaṃ chaṭṭhaṃ.
Footnotes:
Related texts:
ཨཊྛཀཐཱ • Aṭṭhakathā / ཝིནཡཔིཊཀ (ཨཊྛཀཐཱ) • Vinayapiṭaka (aṭṭhakathā) / མཧཱཝིབྷངྒ-ཨཊྛཀཐཱ • Mahāvibhaṅga-aṭṭhakathā / ༦. ཨཉྙཱཏཀཝིཉྙཏྟིསིཀྑཱཔདཝཎྞནཱ • 6. Aññātakaviññattisikkhāpadavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / སཱརཏྠདཱིཔནཱི-ཊཱིཀཱ • Sāratthadīpanī-ṭīkā / ༦. ཨཉྙཱཏཀཝིཉྙཏྟིསིཀྑཱཔདཝཎྞནཱ • 6. Aññātakaviññattisikkhāpadavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝཛིརབུདྡྷི-ཊཱིཀཱ • Vajirabuddhi-ṭīkā / ༦. ཨཉྙཱཏཀཝིཉྙཏྟིསིཀྑཱཔདཝཎྞནཱ • 6. Aññātakaviññattisikkhāpadavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝིམཏིཝིནོདནཱི-ཊཱིཀཱ • Vimativinodanī-ṭīkā / ༦. ཨཉྙཱཏཀཝིཉྙཏྟིསིཀྑཱཔདཝཎྞནཱ • 6. Aññātakaviññattisikkhāpadavaṇṇanā
