| Library / Tipiṭaka / திபிடக • Tipiṭaka / கங்கா²விதரணீ-அபி⁴னவ-டீகா • Kaṅkhāvitaraṇī-abhinava-ṭīkā |
6. அஞ்ஞாதகவிஞ்ஞத்திஸிக்கா²பத³வண்ணனா
6. Aññātakaviññattisikkhāpadavaṇṇanā
கே³ஹஸ்ஸ பதி ஜெட்டோ²தி க³ஹபதி, தங் க³ஹபதிங், இத⁴ பன அபப்³ப³ஜிதோ யோ கோசி மனுஸ்ஸோ அதி⁴ப்பேதோ. தேனாஹ ‘‘பி⁴க்கூ²ஸு அபப்³ப³ஜிதமனுஸ்ஸ’’ந்தி. ஏஸேவ நயோ க³ஹபதானிந்தி எத்தா²பி. ‘‘விஞ்ஞாபெய்யா’’தி இத³ங் ஸுத்³த⁴கத்துஅத்தே² ச ஹேதுகத்துஅத்தே² ச வத்ததீதி ஆஹ ‘‘யாசெய்ய வா யாசாபெய்ய வா’’தி. யாசாபனஞ்செத்த² அத்தனோ அத்தா²யேவாதி த³ட்ட²ப்³ப³ங். ஏவஞ்ச பன கத்வா ‘‘அனாணத்திக’’ந்தி இத³ங் ஸமத்தி²தங் ஹோதி. அஞ்ஞத்ர ஸமயாதி ஸமேதி எத்த², ஏதேன வா ஸங்க³ச்ச²தி ஸத்தோ, ஸபா⁴வத⁴ம்மோ வா ஸஹஜாதாதீ³ஹி, உப்பாதா³தீ³ஹி வாதி ஸமயோ, காலோ, த⁴ம்மப்பவத்திமத்ததாய அத்த²தோ அபூ⁴தோபி ஹி காலோ த⁴ம்மப்பவத்தியா அதி⁴கரணங், கரணங் விய ச கப்பனாமத்தஸித்³தே⁴ன ரூபேன வோஹரீயதி, தங் ஸமயங் ட²பெத்வாதி அத்தோ². தேனாஹ ‘‘யோ அச்சி²ன்னசீவரோ வா ஹோதீ’’திஆதி³. தத்த² ராஜாதீ³ஸு யேஹி கேஹிசி அச்சி²ன்னங் சீவரங் ஏதஸ்ஸாதி அச்சி²ன்னசீவரோ. யதா²ஹ ‘‘அச்சி²ன்னசீவரோ நாம பி⁴க்கு²ஸ்ஸ சீவரங் அச்சி²ன்னங் ஹோதி, ராஜூஹி வா சோரேஹி வா து⁴த்தேஹி வா யேஹி கேஹிசி வா அச்சி²ன்னங் ஹோதீ’’தி. அக்³கி³ஆதீ³ஸு யேன கேனசி நட்ட²ங் சீவரமேதஸ்ஸாதி நட்ட²சீவரோ. யதா²ஹ ‘‘நட்ட²சீவரோ நாம பி⁴க்கு²ஸ்ஸ சீவரங் அக்³கி³னா வா த³ட்³ட⁴ங் ஹோதி, உத³கேன வா வூள்ஹங் ஹோதி, உந்தூ³ரேஹி வா உபசிகாஹி வா கா²யிதங் ஹோதி , பரிபோ⁴க³ஜிண்ணங் வா ஹோதீ’’தி (பாரா॰ 519). ஸமயாதி அஞ்ஞத்ரஸத்³தா³பெக்கா²ய உபயோக³த்தே² நிஸ்ஸக்கவசனந்தி ஆஹ ‘‘தங் ஸமய’’ந்தி. அஞ்ஞஸ்மிந்தி அஞ்ஞஸ்மிங் ஸமயே.
Gehassa pati jeṭṭhoti gahapati, taṃ gahapatiṃ, idha pana apabbajito yo koci manusso adhippeto. Tenāha ‘‘bhikkhūsu apabbajitamanussa’’nti. Eseva nayo gahapatāninti etthāpi. ‘‘Viññāpeyyā’’ti idaṃ suddhakattuatthe ca hetukattuatthe ca vattatīti āha ‘‘yāceyya vā yācāpeyya vā’’ti. Yācāpanañcettha attano atthāyevāti daṭṭhabbaṃ. Evañca pana katvā ‘‘anāṇattika’’nti idaṃ samatthitaṃ hoti. Aññatra samayāti sameti ettha, etena vā saṃgacchati satto, sabhāvadhammo vā sahajātādīhi, uppādādīhi vāti samayo, kālo, dhammappavattimattatāya atthato abhūtopi hi kālo dhammappavattiyā adhikaraṇaṃ, karaṇaṃ viya ca kappanāmattasiddhena rūpena voharīyati, taṃ samayaṃ ṭhapetvāti attho. Tenāha ‘‘yo acchinnacīvaro vā hotī’’tiādi. Tattha rājādīsu yehi kehici acchinnaṃ cīvaraṃ etassāti acchinnacīvaro. Yathāha ‘‘acchinnacīvaro nāma bhikkhussa cīvaraṃ acchinnaṃ hoti, rājūhi vā corehi vā dhuttehi vā yehi kehici vā acchinnaṃ hotī’’ti. Aggiādīsu yena kenaci naṭṭhaṃ cīvarametassāti naṭṭhacīvaro. Yathāha ‘‘naṭṭhacīvaro nāma bhikkhussa cīvaraṃ agginā vā daḍḍhaṃ hoti, udakena vā vūḷhaṃ hoti, undūrehi vā upacikāhi vā khāyitaṃ hoti , paribhogajiṇṇaṃ vā hotī’’ti (pārā. 519). Samayāti aññatrasaddāpekkhāya upayogatthe nissakkavacananti āha ‘‘taṃ samaya’’nti. Aññasminti aññasmiṃ samaye.
திகபாசித்தியந்தி அஞ்ஞாதகே அஞ்ஞாதகஸஞ்ஞிவேமதிகஞ்ஞாதகஸஞ்ஞீனங் வஸேன தீணி பாசித்தியானி. ஸமயேதி யதா²வுத்தே அச்சி²ன்னசீவரகாலே ச நட்ட²சீவரகாலே ச. ஞாதகப்பவாரிதே வா விஞ்ஞாபெந்தஸ்ஸாதி ஞாதகே, பவாரிதே ச ‘‘தும்ஹாகங் ஸந்த²தங் தே³தா²’’தி யாசந்தஸ்ஸ. எத்த² (பாரா॰ அட்ட²॰ 2.521) ச ஸங்க⁴வஸேன பவாரிதே பமாணமேவ யாசிதுங் வட்டதி, புக்³க³லிகவஸேன பவாரிதே பன யங் யங் பவாரெந்தி, தங் தமேவ விஞ்ஞாபேதப்³ப³ங். யோ ஹி சதூஹி பச்சயேஹி பவாரெத்வா ஸயமேவ ஸல்லக்கெ²த்வா காலானுகாலங் சீவராதீ³னி தி³வஸே தி³வஸே யாகு³ப⁴த்தாதீ³னி தே³தி, ஏவங் யேன யேன அத்தோ², தங் தங் தே³தி, தஸ்ஸ விஞ்ஞாபனகிச்சங் நத்தி². யோ பன பவாரெத்வா பா³லதாய வா ஸதிஸம்மோஸேன வா ந தே³தி, ஸோ விஞ்ஞாபேதப்³போ³. யோ ‘‘மய்ஹங் கே³ஹங் பவாரேமீ’’தி வத³தி, தஸ்ஸ கே³ஹங் க³ந்த்வா யதா²ஸுக²ங் நிஸீதி³தப்³ப³ங் நிபஜ்ஜிதப்³ப³ங், ந கிஞ்சி க³ஹேதப்³ப³ங். யோ பன ‘‘யங் மய்ஹங் கே³ஹே அத்தி², தங் பவாரேமீ’’தி வத³தி, யங் தத்த² கப்பியங், தங் விஞ்ஞாபேதப்³ப³ங். கே³ஹே பன நிஸீதி³துங் வா நிபஜ்ஜிதுங் வா ந லப்³ப⁴தி. தஸ்ஸேவத்தா²யாதி ‘‘அஞ்ஞஸ்ஸா’’தி லத்³த⁴வோஹாரஸ்ஸ தஸ்ஸேவ பு³த்³த⁴ரக்கி²தஸ்ஸ வா த⁴ம்மரக்கி²தஸ்ஸ வா அத்தா²ய. அத்தனோ த⁴னேன க³ண்ஹந்தஸ்ஸாதி அத்தனோ கப்பியப⁴ண்டே³ன கப்பியவோஹாரேனேவ க³ண்ஹந்தஸ்ஸ சேதாபெந்தஸ்ஸ, பரிவத்தாபெந்தஸ்ஸாதி அத்தோ².
Tikapācittiyanti aññātake aññātakasaññivematikaññātakasaññīnaṃ vasena tīṇi pācittiyāni. Samayeti yathāvutte acchinnacīvarakāle ca naṭṭhacīvarakāle ca. Ñātakappavārite vā viññāpentassāti ñātake, pavārite ca ‘‘tumhākaṃ santhataṃ dethā’’ti yācantassa. Ettha (pārā. aṭṭha. 2.521) ca saṅghavasena pavārite pamāṇameva yācituṃ vaṭṭati, puggalikavasena pavārite pana yaṃ yaṃ pavārenti, taṃ tameva viññāpetabbaṃ. Yo hi catūhi paccayehi pavāretvā sayameva sallakkhetvā kālānukālaṃ cīvarādīni divase divase yāgubhattādīni deti, evaṃ yena yena attho, taṃ taṃ deti, tassa viññāpanakiccaṃ natthi. Yo pana pavāretvā bālatāya vā satisammosena vā na deti, so viññāpetabbo. Yo ‘‘mayhaṃ gehaṃ pavāremī’’ti vadati, tassa gehaṃ gantvā yathāsukhaṃ nisīditabbaṃ nipajjitabbaṃ, na kiñci gahetabbaṃ. Yo pana ‘‘yaṃ mayhaṃ gehe atthi, taṃ pavāremī’’ti vadati, yaṃ tattha kappiyaṃ, taṃ viññāpetabbaṃ. Gehe pana nisīdituṃ vā nipajjituṃ vā na labbhati. Tassevatthāyāti ‘‘aññassā’’ti laddhavohārassa tasseva buddharakkhitassa vā dhammarakkhitassa vā atthāya. Attano dhanena gaṇhantassāti attano kappiyabhaṇḍena kappiyavohāreneva gaṇhantassa cetāpentassa, parivattāpentassāti attho.
அஞ்ஞாதகவிஞ்ஞத்திஸிக்கா²பத³வண்ணனா நிட்டி²தா.
Aññātakaviññattisikkhāpadavaṇṇanā niṭṭhitā.
