| Library / Tipiṭaka / திபிடக • Tipiṭaka / வஜிரபு³த்³தி⁴-டீகா • Vajirabuddhi-ṭīkā |
6. அஞ்ஞாதகவிஞ்ஞத்திஸிக்கா²பத³வண்ணனா
6. Aññātakaviññattisikkhāpadavaṇṇanā
515. பரிக்கா²ரானந்தி உபயோக³த்தே² ஸாமிவசனங். ஏகஸாடகந்தி பா⁴வனபுங்ஸகங், ‘‘அஞ்ஞாதகோ மோக⁴புரிஸா’’தி வசனேன பவாரிதோபி அதா³துகாமோ அஞ்ஞாதகோ அப்பவாரிதட்டா²னே திட்ட²தீதி தீ³பிதங் ஹோதி. அஞ்ஞதா² ‘‘அனாபத்தி பவாரிதான’’ந்தி இமினா விருஜ்ஜ²தி.
515.Parikkhārānanti upayogatthe sāmivacanaṃ. Ekasāṭakanti bhāvanapuṃsakaṃ, ‘‘aññātako moghapurisā’’ti vacanena pavāritopi adātukāmo aññātako appavāritaṭṭhāne tiṭṭhatīti dīpitaṃ hoti. Aññathā ‘‘anāpatti pavāritāna’’nti iminā virujjhati.
517. நேவ தாவ விஞ்ஞாபேதப்³ப³ங், ந ப⁴ஞ்ஜிதப்³ப³ந்தி அனச்சி²ன்னானங் சீவரானங் அத்தனோ ஸந்தகானங் அத்தி²தாய, தத்த² பச்சாஸாஸப்³பா⁴வதோ ச. பச்சாஸா கித்தகங் காலங் ரக்க²தீதி? யாவ கா³மந்தரா, யாவ அத்³த⁴யோஜனாதி ஏகே. யாவ த³ஸ்ஸனஸவனூபசாராதி ஏகே. யாவ அஞ்ஞே ந பஸ்ஸந்தீதி ஏகே. யாவ பச்சாஸா சி²ஜ்ஜதீதி ஏகே. யாவ ஸாகா²பலாஸபரியேஸனப⁴ஞ்ஜனஸஜ்ஜனகாலபரிச்சே²தா³தி ஏகே. இத³ங் ஸப்³ப³ங் யதா²ஸம்ப⁴வங் யுஜ்ஜதி. கத²ங் பஞ்ஞாயதீதி சே? ‘‘ஸசே பன ஏதேஸங் வுத்தப்பகாரானங் கி³ஹிவத்தா²தீ³னங் பி⁴ஸிச²விபரியந்தானங் கிஞ்சி ந லப்³ப⁴தி, தேன திணேன வா பண்ணேன வா படிச்சா²தெ³த்வா ஆக³ந்தப்³ப³’’ந்தி அட்ட²கதா²வசனதோ.
517.Neva tāva viññāpetabbaṃ, na bhañjitabbanti anacchinnānaṃ cīvarānaṃ attano santakānaṃ atthitāya, tattha paccāsāsabbhāvato ca. Paccāsā kittakaṃ kālaṃ rakkhatīti? Yāva gāmantarā, yāva addhayojanāti eke. Yāva dassanasavanūpacārāti eke. Yāva aññe na passantīti eke. Yāva paccāsā chijjatīti eke. Yāva sākhāpalāsapariyesanabhañjanasajjanakālaparicchedāti eke. Idaṃ sabbaṃ yathāsambhavaṃ yujjati. Kathaṃ paññāyatīti ce? ‘‘Sace pana etesaṃ vuttappakārānaṃ gihivatthādīnaṃ bhisichavipariyantānaṃ kiñci na labbhati, tena tiṇena vā paṇṇena vā paṭicchādetvā āgantabba’’nti aṭṭhakathāvacanato.
ந தாவ தே²ரானங் தா³தப்³பா³னீதி ந தாவ அத்தனோ ருசியா தா³தப்³பா³னி, யதா³ தே²ரா ‘‘தே³தா²வுஸோ’’தி வத³ந்தி, ததா³ தா³தப்³பா³னி. ‘‘ஏவங் ஸதி த³ஹராபி அச்சி²ன்னசீவரட்டா²னே திட்ட²ந்தி, ஸாகா²பலாஸங் ப⁴ஞ்ஜிதுங் வட்டதி, ந அஞ்ஞதா². ‘யேஹி கேஹிசி வா அச்சி²ன்னங் ஹோதீ’தி ஹி வுத்த’’ந்தி வுத்தங். ஆசரியோ பன ஏவங் வத³தி ‘‘அத்தனோ ருசியாபி தா³துங் லப⁴ந்தீ’’தி. ததா² ஹி அட்ட²கதா²யங் ‘‘பரிபோ⁴க³ஜிண்ணங் வா’தி எத்த² ச ‘அச்சி²ன்னசீவரானங் ஆசரியுபஜ்ஜா²யாதீ³னங் அத்தனா திணபண்ணேஹி படிச்சா²தெ³த்வா தி³ன்னசீவரம்பி ஸங்க³ஹங் க³ச்ச²தீ’தி வத்துங் யுஜ்ஜதீ’’தி வுத்தங். அதா²பி ஸியா ஆசரியாதீ³ஹி ‘‘ஆஹராவுஸோ’’தி வுத்தேயேவ, நாவுத்தேதி, ந, ‘‘கேஹிசி வா அச்சி²ன்ன’’ந்தி எத்த² வுத்தலேஸதோ து³தியலேஸஸ்ஸ அவிஸேஸபா⁴வப்பஸங்க³தோதி. அத² கிமத்த²ங் ‘‘ந தாவ தே²ரானங் தா³தப்³பா³னீ’’தி வுத்தந்தி சே? யாவ தே²ரானங் அத்தா²ய ஸாகா²பலாஸானி ப⁴ஞ்ஜதி, தாவ ந தா³தப்³பா³னி, ததோ தானி தே²ருத்³தி³ஸ்ஸகானி ஸாகா²பலாஸானி ஸயங் பரித³ஹித்வா வினாபி தே²ராணத்தியா அத்தனோ ருசியா தா³தப்³பா³னி, பூ⁴தகா³மபாதப்³யதாய பாசித்தியங் ந ஹோதி ஸத்து²னாபி அனுஞ்ஞாதத்தா. ‘‘திணேன வா பண்ணேன வா’’தி ஹி வுத்தங், தங் கப்பியமேவ ஸந்தா⁴ய வுத்தந்தி சே? ந, ‘‘தத³லாபே⁴ ந த்வேவ…பே॰… து³க்கடஸ்ஸா’’தி வசனவிரோத⁴தோ. எத்தா²ஹ – து³க்கடப⁴யா பாசித்தியவத்து² சே அதிக்கமிதப்³ப³ங், தத³லாபே⁴ து²ல்லச்சயவத்து² ஸங்கி⁴கங், தத³லாபே⁴ பாராஜிகவத்து²பி அதிக்கமிதப்³ப³ங் ஸியாதி? ந, பாராஜிகஸ்ஸ லோகவஜ்ஜத்தா. அபிச ந ஸப்³ப³ங் பூ⁴தகா³மங் பாசித்தியவத்து²மேவ, ததோ து³க்கடாதி³வத்து²பி அத்தி², அனாபத்திவத்து²பி காலோதி³ஸகங், தஸ்மா இத³ங் ததா³ அனாபத்திவத்து²கந்தி வேதி³தப்³ப³ங். கித்தாவதா பி⁴க்கு² அச்சி²ன்னசீவரோ நட்ட²சீவரோ ஹோதீதி? எத்தாவதா நக்³கோ³ ஹோதீதி ஏகே. விகப்பனுபக³பச்சி²மபா⁴வேன, விகப்பனுபக³பச்சி²மமாதி³ங் கத்வா விஞ்ஞாபெந்தஸ்ஸ ஆபத்தீதி ஏகே. நிவாஸனபாருபனுபகா³பா⁴வேனாதி ஏகே. திசீவராபா⁴வேனாதி ஏகே. ஸந்தருத்தரபரமாபா⁴வேனாதி ஏகே. அயங் ஏகேவாதோ³ யுத்தோ ‘‘ஸந்தருத்தரபரமங் ததோ சீவரங் ஸாதி³தப்³ப³’’ந்தி ஹி வசனதோ, தஸ்மா ஸந்தருத்தரே ஸதி விகப்பனுபக³பச்சி²மங் விஞ்ஞாபெந்தஸ்ஸ படிலாபே⁴ன நிஸ்ஸக்³கி³யங். யதி³ ஏவங் ‘‘விஞ்ஞாபெத்வா படிலபெ⁴ய்ய நிஸ்ஸக்³கி³ய’’ந்தி ஸிக்கா²பதே³ன ப⁴விதப்³ப³ந்தி சே? தன்ன, தத³த்த²ஸித்³தி⁴தோ நானத்த²த்தா தா⁴தூனங். கிங் வுத்தங் ஹோதி? யதா² ஹி ‘‘திக்க²த்துங் மேது²னங் த⁴ம்மங் அபி⁴விஞ்ஞாபேஸீ’’தி (பாரா॰ 36) வுத்தே பவத்தேஸீதி அத்தோ², ததா² இதா⁴பி ‘‘சீவரங் விஞ்ஞாபெய்யா’’தி விஞ்ஞத்தியா பவத்தெய்ய உப்பாதெ³ய்யாதி அத்தோ².
Na tāva therānaṃ dātabbānīti na tāva attano ruciyā dātabbāni, yadā therā ‘‘dethāvuso’’ti vadanti, tadā dātabbāni. ‘‘Evaṃ sati daharāpi acchinnacīvaraṭṭhāne tiṭṭhanti, sākhāpalāsaṃ bhañjituṃ vaṭṭati, na aññathā. ‘Yehi kehici vā acchinnaṃ hotī’ti hi vutta’’nti vuttaṃ. Ācariyo pana evaṃ vadati ‘‘attano ruciyāpi dātuṃ labhantī’’ti. Tathā hi aṭṭhakathāyaṃ ‘‘paribhogajiṇṇaṃ vā’ti ettha ca ‘acchinnacīvarānaṃ ācariyupajjhāyādīnaṃ attanā tiṇapaṇṇehi paṭicchādetvā dinnacīvarampi saṅgahaṃ gacchatī’ti vattuṃ yujjatī’’ti vuttaṃ. Athāpi siyā ācariyādīhi ‘‘āharāvuso’’ti vutteyeva, nāvutteti, na, ‘‘kehici vā acchinna’’nti ettha vuttalesato dutiyalesassa avisesabhāvappasaṅgatoti. Atha kimatthaṃ ‘‘na tāva therānaṃ dātabbānī’’ti vuttanti ce? Yāva therānaṃ atthāya sākhāpalāsāni bhañjati, tāva na dātabbāni, tato tāni theruddissakāni sākhāpalāsāni sayaṃ paridahitvā vināpi therāṇattiyā attano ruciyā dātabbāni, bhūtagāmapātabyatāya pācittiyaṃ na hoti satthunāpi anuññātattā. ‘‘Tiṇena vā paṇṇena vā’’ti hi vuttaṃ, taṃ kappiyameva sandhāya vuttanti ce? Na, ‘‘tadalābhe na tveva…pe… dukkaṭassā’’ti vacanavirodhato. Etthāha – dukkaṭabhayā pācittiyavatthu ce atikkamitabbaṃ, tadalābhe thullaccayavatthu saṅghikaṃ, tadalābhe pārājikavatthupi atikkamitabbaṃ siyāti? Na, pārājikassa lokavajjattā. Apica na sabbaṃ bhūtagāmaṃ pācittiyavatthumeva, tato dukkaṭādivatthupi atthi, anāpattivatthupi kālodisakaṃ, tasmā idaṃ tadā anāpattivatthukanti veditabbaṃ. Kittāvatā bhikkhu acchinnacīvaro naṭṭhacīvaro hotīti? Ettāvatā naggo hotīti eke. Vikappanupagapacchimabhāvena, vikappanupagapacchimamādiṃ katvā viññāpentassa āpattīti eke. Nivāsanapārupanupagābhāvenāti eke. Ticīvarābhāvenāti eke. Santaruttaraparamābhāvenāti eke. Ayaṃ ekevādo yutto ‘‘santaruttaraparamaṃ tato cīvaraṃ sāditabba’’nti hi vacanato, tasmā santaruttare sati vikappanupagapacchimaṃ viññāpentassa paṭilābhena nissaggiyaṃ. Yadi evaṃ ‘‘viññāpetvā paṭilabheyya nissaggiya’’nti sikkhāpadena bhavitabbanti ce? Tanna, tadatthasiddhito nānatthattā dhātūnaṃ. Kiṃ vuttaṃ hoti? Yathā hi ‘‘tikkhattuṃ methunaṃ dhammaṃ abhiviññāpesī’’ti (pārā. 36) vutte pavattesīti attho, tathā idhāpi ‘‘cīvaraṃ viññāpeyyā’’ti viññattiyā pavatteyya uppādeyyāti attho.
தேன நிவத்தோ²தி தங்னிவத்தோ². அஞ்ஞஸ்ஸ அலாபே⁴ன தமேவ பரிபு⁴ஞ்ஜதோ ஜிரதி, ந லேஸேன. அத்தனாதி ஸயமேவ வத்துங் யுஜ்ஜதி, தஸ்மா அயுத்தபரிபோ⁴கே³ன அபரிபு⁴ஞ்ஜித்வா யுத்தபரிபோ⁴க³வஸேன பரிபு⁴ஞ்ஜதோ ஜிண்ணங் பரிபோ⁴க³ஜிண்ணங் நாம. தஸ்ஸ ஸபா⁴கா³னங் அச்சி²ன்னகாலே தா³னம்பி யுத்தபரிபோ⁴கே³ ஏவ ஸங்க³ஹங் க³ச்ச²தீதி அதி⁴ப்பாயோ. ‘‘இமே கிர த்³வே லேஸா அட்ட²கதா²யோ, வாசெந்தானங் ஆசரியானங் மதந்தி த⁴ம்மஸிரித்தே²ரோ ஆஹா’’தி வுத்தங்.
Tena nivatthoti taṃnivattho. Aññassa alābhena tameva paribhuñjato jirati, na lesena. Attanāti sayameva vattuṃ yujjati, tasmā ayuttaparibhogena aparibhuñjitvā yuttaparibhogavasena paribhuñjato jiṇṇaṃ paribhogajiṇṇaṃ nāma. Tassa sabhāgānaṃ acchinnakāle dānampi yuttaparibhoge eva saṅgahaṃ gacchatīti adhippāyo. ‘‘Ime kira dve lesā aṭṭhakathāyo, vācentānaṃ ācariyānaṃ matanti dhammasiritthero āhā’’ti vuttaṃ.
521. நிஸீதி³துங் வா நிபஜ்ஜிதுங் வா ந லப⁴தீதி யதா²ஸுக²ங் ந லப⁴தீதி அதி⁴ப்பாயோ. ‘‘அஞ்ஞஸ்ஸத்தா²யா’’தி எத்தா²பி ‘‘ஞாதகானங் பவாரிதான’’ந்தி அனுவத்ததி ஏவ. அத்தா²ய கஸ்ஸ? தஸ்ஸேவ அஞ்ஞஸ்ஸ. யதா² அஞ்ஞாதகே திகபாசித்தியங், ததா² அப்பவாரிதேபீதி த³ஸ்ஸனத்த²ங் ‘‘ஞாதகானங் பவாரிதான’’ந்தி வுத்தங். அஞ்ஞதா² ‘‘ஞாதகே ஞாதகஸஞ்ஞீ’’தி இமினா ஸித்³த⁴த்தா ந நிச்சங் ஸேஸங் ஆபஜ்ஜதி. அபிசெத்த² அஞ்ஞாதகக்³க³ஹணேன அப்பவாரிதக்³க³ஹணங் ஹோதி , அப்பவாரிதக்³க³ஹணேன அஞ்ஞாதகக்³க³ஹணங், அஞ்ஞாதகா ஹி அப்பவாரிதா ஹொந்தி. ததா² ஞாதகக்³க³ஹணேன பவாரிதக்³க³ஹணங் ஹோதி, கத்த²சி ந ஹோதி. ந பவாரிதக்³க³ஹணேன ஞாதகக்³க³ஹணங் ஹோதீதி இமஸ்ஸ அத்த²விஸேஸஸ்ஸ த³ஸ்ஸனத்த²ங் ‘‘ஞாதகானங் பவாரிதான’’ந்தி வுத்தங். ததா² ஹி அஞ்ஞாதிகாய பி⁴க்கு²னியா அப்பவாரிதாய ச சீவரங் அஞ்ஞத்ர பாரிவத்தகா படிக்³க³ண்ஹந்தஸ்ஸ ஆபத்தி. ஞாதிகாய பன பவாரிதாய ச விஸ்ஸாஸங் க³ண்ஹாதி, அனாபத்தி. ததா² புராணசீவரங் ஞாதிகாய அனாபத்தி, பவாரிதாய பன திகபாசித்தியமேவ. ஞாதகானஞ்ச ஏகச்சானங் புராணசீவரங் நாம தா³துங் வட்டதி, ந பவாரிதானங். திகச்சே²தோ³ ச மாதிகாபதே³னேவ ஹோதி, ந அஞ்ஞேன. தத்தா²பி ஏகேனேவ, ந து³தியாதீ³ஹீதி அயங் வினயே த⁴ம்மதா வேதி³தப்³பா³.
521.Nisīdituṃ vā nipajjituṃ vā na labhatīti yathāsukhaṃ na labhatīti adhippāyo. ‘‘Aññassatthāyā’’ti etthāpi ‘‘ñātakānaṃ pavāritāna’’nti anuvattati eva. Atthāya kassa? Tasseva aññassa. Yathā aññātake tikapācittiyaṃ, tathā appavāritepīti dassanatthaṃ ‘‘ñātakānaṃ pavāritāna’’nti vuttaṃ. Aññathā ‘‘ñātake ñātakasaññī’’ti iminā siddhattā na niccaṃ sesaṃ āpajjati. Apicettha aññātakaggahaṇena appavāritaggahaṇaṃ hoti , appavāritaggahaṇena aññātakaggahaṇaṃ, aññātakā hi appavāritā honti. Tathā ñātakaggahaṇena pavāritaggahaṇaṃ hoti, katthaci na hoti. Na pavāritaggahaṇena ñātakaggahaṇaṃ hotīti imassa atthavisesassa dassanatthaṃ ‘‘ñātakānaṃ pavāritāna’’nti vuttaṃ. Tathā hi aññātikāya bhikkhuniyā appavāritāya ca cīvaraṃ aññatra pārivattakā paṭiggaṇhantassa āpatti. Ñātikāya pana pavāritāya ca vissāsaṃ gaṇhāti, anāpatti. Tathā purāṇacīvaraṃ ñātikāya anāpatti, pavāritāya pana tikapācittiyameva. Ñātakānañca ekaccānaṃ purāṇacīvaraṃ nāma dātuṃ vaṭṭati, na pavāritānaṃ. Tikacchedo ca mātikāpadeneva hoti, na aññena. Tatthāpi ekeneva, na dutiyādīhīti ayaṃ vinaye dhammatā veditabbā.
அஞ்ஞாதகவிஞ்ஞத்திஸிக்கா²பத³வண்ணனா நிட்டி²தா.
Aññātakaviññattisikkhāpadavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 6. அஞ்ஞாதகவிஞ்ஞத்திஸிக்கா²பத³ங் • 6. Aññātakaviññattisikkhāpadaṃ
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவிப⁴ங்க³-அட்ட²கதா² • Mahāvibhaṅga-aṭṭhakathā / 6. அஞ்ஞாதகவிஞ்ஞத்திஸிக்கா²பத³வண்ணனா • 6. Aññātakaviññattisikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / 6. அஞ்ஞாதகவிஞ்ஞத்திஸிக்கா²பத³வண்ணனா • 6. Aññātakaviññattisikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / 6. அஞ்ஞாதகவிஞ்ஞத்திஸிக்கா²பத³வண்ணனா • 6. Aññātakaviññattisikkhāpadavaṇṇanā
