| Library / Tipiṭaka / திபிடக • Tipiṭaka / விமதிவினோத³னீ-டீகா • Vimativinodanī-ṭīkā |
6. அஞ்ஞாதகவிஞ்ஞத்திஸிக்கா²பத³வண்ணனா
6. Aññātakaviññattisikkhāpadavaṇṇanā
515. ச²ட்டே² படு ஏவ பட்டோ. பாளியங் த⁴ம்மனிமந்தனாதி ஸமணேஸு வத்தப்³பா³சாரத⁴ம்மமத்தவஸேன நிமந்தனா, தா³துகாமதாய கதனிமந்தனா ந ஹோதீதி அத்தோ². தேனேவ ‘‘விஞ்ஞாபெஸ்ஸதீ’’தி வுத்தங். அஞ்ஞாதகஅப்பவாரிததோ ஹி விஞ்ஞத்தி நாம ஹோதி.
515. Chaṭṭhe paṭu eva paṭṭo. Pāḷiyaṃ dhammanimantanāti samaṇesu vattabbācāradhammamattavasena nimantanā, dātukāmatāya katanimantanā na hotīti attho. Teneva ‘‘viññāpessatī’’ti vuttaṃ. Aññātakaappavāritato hi viññatti nāma hoti.
517. ‘‘திணேன வா பண்ணேன வா படிச்சா²தெ³த்வா ஆக³ந்தப்³ப³’’ந்தி இமினா பூ⁴தகா³மவிகோபனங் அனுஞ்ஞாதந்தி ஆஹ ‘‘நேவ பூ⁴தகா³மபாதப்³யதாயா’’திஆதி³. பட²மங் ஸுத்³த⁴சித்தேன லிங்க³ங் க³ஹெத்வா பச்சா² லத்³தி⁴ங் க³ண்ஹந்தோபி தித்தி²யபக்கந்தகோ ஏவாதி ஆஹ ‘‘நிவாஸெத்வாபி லத்³தி⁴ ந க³ஹேதப்³பா³’’தி.
517. ‘‘Tiṇena vā paṇṇena vā paṭicchādetvā āgantabba’’nti iminā bhūtagāmavikopanaṃ anuññātanti āha ‘‘neva bhūtagāmapātabyatāyā’’tiādi. Paṭhamaṃ suddhacittena liṅgaṃ gahetvā pacchā laddhiṃ gaṇhantopi titthiyapakkantako evāti āha ‘‘nivāsetvāpi laddhi na gahetabbā’’ti.
யங் ஆவாஸங் பட²மங் உபக³ச்ச²தீதி எத்தா²பி விஹாரசீவராதி³அத்தா²ய பவிஸந்தேனபி திணாதீ³ஹி படிச்சா²தெ³த்வாவ க³ந்தப்³ப³ங், ந த்வேவ நக்³கே³ன ஆக³ந்தப்³ப³ந்தி ஸாமஞ்ஞதோ து³க்கடஸ்ஸ வுத்தத்தா. சிமிலிகாஹீதி படபிலோதிகாஹி. பரிபோ⁴கே³னேவாதி அஞ்ஞங் சீவரங் அலபி⁴த்வா பரிபு⁴ஞ்ஜனேன. பரிபோ⁴க³ஜிண்ணந்தி யதா² தங் சீவரங் பரிபு⁴ஞ்ஜியமானங் ஓப⁴க்³க³விப⁴க்³க³தாய அஸாருப்பங் ஹோதி, ஏவங் ஜிண்ணங்.
Yaṃ āvāsaṃ paṭhamaṃ upagacchatīti etthāpi vihāracīvarādiatthāya pavisantenapi tiṇādīhi paṭicchādetvāva gantabbaṃ, na tveva naggena āgantabbanti sāmaññato dukkaṭassa vuttattā. Cimilikāhīti paṭapilotikāhi. Paribhogenevāti aññaṃ cīvaraṃ alabhitvā paribhuñjanena. Paribhogajiṇṇanti yathā taṃ cīvaraṃ paribhuñjiyamānaṃ obhaggavibhaggatāya asāruppaṃ hoti, evaṃ jiṇṇaṃ.
521. அஞ்ஞஸ்ஸத்தா²யாதி எத்தா²பி ‘‘ஞாதகானங் பவாரிதான’’ந்தி இத³ங் அனுவத்ததி ஏவாதி ஆஹ ‘‘அத்தனோ ஞாதகபவாரிதே’’திஆதி³. இத⁴ பன அஞ்ஞஸ்ஸ அச்சி²ன்னநட்ட²சீவரஸ்ஸ அத்தா²ய அஞ்ஞாதகஅப்பவாரிதே விஞ்ஞாபெந்தஸ்ஸ நிஸ்ஸக்³கி³யேன அனாபத்தீதி அத்தோ² க³ஹேதப்³போ³, இதரதா² ‘‘ஞாதகானங் பவாரிதான’’ந்தி இமினா விஸேஸோ ந ப⁴வெய்ய. தேனேவ அனந்தரஸிக்கா²பதே³ வக்க²தி ‘‘அட்ட²கதா²ஸு பன ஞாதகபரிவாதட்டா²னே…பே॰… பமாணமேவ வட்டதீதி வுத்தங், தங் பாளியா ந ஸமேதீ’’தி (பாரா॰ அட்ட²॰ 2.526) ச ‘‘யஸ்மா பனித³ங் ஸிக்கா²பத³ங் அஞ்ஞஸ்ஸத்தா²ய விஞ்ஞாபனவத்து²ஸ்மிங்யேவ பஞ்ஞத்தங், தஸ்மா இத⁴ ‘அஞ்ஞஸ்ஸத்தா²யா’தி ந வுத்த’’ந்தி (பாரா॰ அட்ட²॰ 2.526) ச. விகப்பனுபக³சீவரதா, ஸமயாபா⁴வோ, அஞ்ஞாதகவிஞ்ஞத்தி, தாய படிலாபோ⁴தி இமானெத்த² சத்தாரி அங்கா³னி.
521.Aññassatthāyāti etthāpi ‘‘ñātakānaṃ pavāritāna’’nti idaṃ anuvattati evāti āha ‘‘attano ñātakapavārite’’tiādi. Idha pana aññassa acchinnanaṭṭhacīvarassa atthāya aññātakaappavārite viññāpentassa nissaggiyena anāpattīti attho gahetabbo, itarathā ‘‘ñātakānaṃ pavāritāna’’nti iminā viseso na bhaveyya. Teneva anantarasikkhāpade vakkhati ‘‘aṭṭhakathāsu pana ñātakaparivātaṭṭhāne…pe… pamāṇameva vaṭṭatīti vuttaṃ, taṃ pāḷiyā na sametī’’ti (pārā. aṭṭha. 2.526) ca ‘‘yasmā panidaṃ sikkhāpadaṃ aññassatthāya viññāpanavatthusmiṃyeva paññattaṃ, tasmā idha ‘aññassatthāyā’ti na vutta’’nti (pārā. aṭṭha. 2.526) ca. Vikappanupagacīvaratā, samayābhāvo, aññātakaviññatti, tāya paṭilābhoti imānettha cattāri aṅgāni.
அஞ்ஞாதகவிஞ்ஞத்திஸிக்கா²பத³வண்ணனா நிட்டி²தா.
Aññātakaviññattisikkhāpadavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 6. அஞ்ஞாதகவிஞ்ஞத்திஸிக்கா²பத³ங் • 6. Aññātakaviññattisikkhāpadaṃ
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவிப⁴ங்க³-அட்ட²கதா² • Mahāvibhaṅga-aṭṭhakathā / 6. அஞ்ஞாதகவிஞ்ஞத்திஸிக்கா²பத³வண்ணனா • 6. Aññātakaviññattisikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / 6. அஞ்ஞாதகவிஞ்ஞத்திஸிக்கா²பத³வண்ணனா • 6. Aññātakaviññattisikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 6. அஞ்ஞாதகவிஞ்ஞத்திஸிக்கா²பத³வண்ணனா • 6. Aññātakaviññattisikkhāpadavaṇṇanā
