| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
3. அஞ்ஞதரபி⁴க்கு²ஸுத்தங்
3. Aññatarabhikkhusuttaṃ
35. ஸாவத்தி²னிதா³னங். அத² கோ² அஞ்ஞதரோ பி⁴க்கு² யேன ப⁴க³வா தேனுபஸங்கமி; உபஸங்கமித்வா ப⁴க³வந்தங் அபி⁴வாதெ³த்வா ஏகமந்தங் நிஸீதி³. ஏகமந்தங் நிஸின்னோ கோ² ஸோ பி⁴க்கு² ப⁴க³வந்தங் ஏதத³வோச – ‘‘ஸாது⁴ மே, ப⁴ந்தே, ப⁴க³வா ஸங்கி²த்தேன த⁴ம்மங் தே³ஸேது; யமஹங் ப⁴க³வதோ த⁴ம்மங் ஸுத்வா ஏகோ வூபகட்டோ², அப்பமத்தோ ஆதாபீ பஹிதத்தோ விஹரெய்ய’’ந்தி. ‘‘யங் கோ², பி⁴க்கு², அனுஸேதி, தேன ஸங்க²ங் க³ச்ச²தி; யங் நானுஸேதி, ந தேன ஸங்க²ங் க³ச்ச²தீ’’தி. ‘‘அஞ்ஞாதங், ப⁴க³வா; அஞ்ஞாதங், ஸுக³தா’’தி.
35. Sāvatthinidānaṃ. Atha kho aññataro bhikkhu yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho so bhikkhu bhagavantaṃ etadavoca – ‘‘sādhu me, bhante, bhagavā saṃkhittena dhammaṃ desetu; yamahaṃ bhagavato dhammaṃ sutvā eko vūpakaṭṭho, appamatto ātāpī pahitatto vihareyya’’nti. ‘‘Yaṃ kho, bhikkhu, anuseti, tena saṅkhaṃ gacchati; yaṃ nānuseti, na tena saṅkhaṃ gacchatī’’ti. ‘‘Aññātaṃ, bhagavā; aññātaṃ, sugatā’’ti.
‘‘யதா² கத²ங் பன த்வங், பி⁴க்கு², மயா ஸங்கி²த்தேன பா⁴ஸிதஸ்ஸ வித்தா²ரேன அத்த²ங் ஆஜானாஸீ’’தி? ‘‘ரூபங் சே, ப⁴ந்தே, அனுஸேதி தேன ஸங்க²ங் க³ச்ச²தி. வேத³னங் சே அனுஸேதி தேன ஸங்க²ங் க³ச்ச²தி. ஸஞ்ஞங் சே அனுஸேதி தேன ஸங்க²ங் க³ச்ச²தி. ஸங்கா²ரே சே அனுஸேதி தேன ஸங்க²ங் க³ச்ச²தி. விஞ்ஞாணங் சே அனுஸேதி தேன ஸங்க²ங் க³ச்ச²தி. ரூபங் சே, ப⁴ந்தே, நானுஸேதி ந தேன ஸங்க²ங் க³ச்ச²தி. வேத³னங் சே… ஸஞ்ஞங் சே… ஸங்கா²ரே சே… விஞ்ஞாணங் சே நானுஸேதி ந தேன ஸங்க²ங் க³ச்ச²தி. இமஸ்ஸ க்²வாஹங், ப⁴ந்தே, ப⁴க³வதா ஸங்கி²த்தேன பா⁴ஸிதஸ்ஸ ஏவங் வித்தா²ரேன அத்த²ங் ஆஜானாமீ’’தி.
‘‘Yathā kathaṃ pana tvaṃ, bhikkhu, mayā saṃkhittena bhāsitassa vitthārena atthaṃ ājānāsī’’ti? ‘‘Rūpaṃ ce, bhante, anuseti tena saṅkhaṃ gacchati. Vedanaṃ ce anuseti tena saṅkhaṃ gacchati. Saññaṃ ce anuseti tena saṅkhaṃ gacchati. Saṅkhāre ce anuseti tena saṅkhaṃ gacchati. Viññāṇaṃ ce anuseti tena saṅkhaṃ gacchati. Rūpaṃ ce, bhante, nānuseti na tena saṅkhaṃ gacchati. Vedanaṃ ce… saññaṃ ce… saṅkhāre ce… viññāṇaṃ ce nānuseti na tena saṅkhaṃ gacchati. Imassa khvāhaṃ, bhante, bhagavatā saṃkhittena bhāsitassa evaṃ vitthārena atthaṃ ājānāmī’’ti.
‘‘ஸாது⁴ ஸாது⁴, பி⁴க்கு²! ஸாது⁴ கோ² த்வங், பி⁴க்கு², மயா ஸங்கி²த்தேன பா⁴ஸிதஸ்ஸ வித்தா²ரேன அத்த²ங் ஆஜானாஸி. ரூபங் சே, பி⁴க்கு², அனுஸேதி தேன ஸங்க²ங் க³ச்ச²தி. வேத³னங் சே… ஸஞ்ஞங் சே… ஸங்கா²ரே சே… விஞ்ஞாணங் சே அனுஸேதி தேன ஸங்க²ங் க³ச்ச²தி. ரூபங் சே, பி⁴க்கு², நானுஸேதி ந தேன ஸங்க²ங் க³ச்ச²தி. வேத³னங் சே… ஸஞ்ஞங் சே… ஸங்கா²ரே சே… விஞ்ஞாணங் சே நானுஸேதி ந தேன ஸங்க²ங் க³ச்ச²தி. இமஸ்ஸ கோ², பி⁴க்கு², மயா ஸங்கி²த்தேன, பா⁴ஸிதஸ்ஸ ஏவங் வித்தா²ரேன அத்தோ² த³ட்ட²ப்³போ³’’தி.
‘‘Sādhu sādhu, bhikkhu! Sādhu kho tvaṃ, bhikkhu, mayā saṃkhittena bhāsitassa vitthārena atthaṃ ājānāsi. Rūpaṃ ce, bhikkhu, anuseti tena saṅkhaṃ gacchati. Vedanaṃ ce… saññaṃ ce… saṅkhāre ce… viññāṇaṃ ce anuseti tena saṅkhaṃ gacchati. Rūpaṃ ce, bhikkhu, nānuseti na tena saṅkhaṃ gacchati. Vedanaṃ ce… saññaṃ ce… saṅkhāre ce… viññāṇaṃ ce nānuseti na tena saṅkhaṃ gacchati. Imassa kho, bhikkhu, mayā saṃkhittena, bhāsitassa evaṃ vitthārena attho daṭṭhabbo’’ti.
அத² கோ² ஸோ பி⁴க்கு² ப⁴க³வதோ பா⁴ஸிதங் அபி⁴னந்தி³த்வா அனுமோதி³த்வா உட்டா²யாஸனா ப⁴க³வந்தங் அபி⁴வாதெ³த்வா பத³க்கி²ணங் கத்வா பக்காமி.
Atha kho so bhikkhu bhagavato bhāsitaṃ abhinanditvā anumoditvā uṭṭhāyāsanā bhagavantaṃ abhivādetvā padakkhiṇaṃ katvā pakkāmi.
அத² கோ² ஸோ பி⁴க்கு² ஏகோ வூபகட்டோ² அப்பமத்தோ ஆதாபீ பஹிதத்தோ விஹரந்தோ நசிரஸ்ஸேவ – யஸ்ஸத்தா²ய குலபுத்தா ஸம்மதே³வ அகா³ரஸ்மா அனகா³ரியங் பப்³ப³ஜந்தி தத³னுத்தரங் – ப்³ரஹ்மசரியபரியோஸானங் தி³ட்டே²வ த⁴ம்மே ஸயங் அபி⁴ஞ்ஞா ஸச்சி²கத்வா உபஸம்பஜ்ஜ விஹாஸி. ‘‘கீ²ணா ஜாதி, வுஸிதங் ப்³ரஹ்மசரியங், கதங் கரணீயங், நாபரங் இத்த²த்தாயா’’தி அப்³ப⁴ஞ்ஞாஸி. அஞ்ஞதரோ ச பன ஸோ பி⁴க்கு² அரஹதங் அஹோஸீதி. ததியங்.
Atha kho so bhikkhu eko vūpakaṭṭho appamatto ātāpī pahitatto viharanto nacirasseva – yassatthāya kulaputtā sammadeva agārasmā anagāriyaṃ pabbajanti tadanuttaraṃ – brahmacariyapariyosānaṃ diṭṭheva dhamme sayaṃ abhiññā sacchikatvā upasampajja vihāsi. ‘‘Khīṇā jāti, vusitaṃ brahmacariyaṃ, kataṃ karaṇīyaṃ, nāparaṃ itthattāyā’’ti abbhaññāsi. Aññataro ca pana so bhikkhu arahataṃ ahosīti. Tatiyaṃ.
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 3. அஞ்ஞதரபி⁴க்கு²ஸுத்தவண்ணனா • 3. Aññatarabhikkhusuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 3. அஞ்ஞதரபி⁴க்கு²ஸுத்தவண்ணனா • 3. Aññatarabhikkhusuttavaṇṇanā
