| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
5. அஞ்ஞதரப்³ரஹ்மஸுத்தவண்ணனா
5. Aññatarabrahmasuttavaṇṇanā
176. பஞ்சமே தேஜோதா⁴துங் ஸமாபஜ்ஜித்வாதி தேஜோகஸிணபரிகம்மங் கத்வா பாத³கஜ்ஜா²னதோ வுட்டா²ய, ‘‘ஸரீரதோ ஜாலா நிக்க²மந்தூ’’தி அதி⁴ட்ட²ஹந்தோ அதி⁴ட்டா²னசித்தானுபா⁴வேன ஸகலஸரீரதோ ஜாலா நிக்க²மந்தி, ஏவங் தேஜோதா⁴துங் ஸமாபன்னோ நாம ஹோதி, ததா² ஸமாபஜ்ஜித்வா. தஸ்மிங் ப்³ரஹ்மலோகேதி கஸ்மா தே²ரோ தத்த² அக³மாஸி? தே²ரஸ்ஸ கிர தேஜோதா⁴துங் ஸமாபஜ்ஜித்வா தஸ்ஸ ப்³ரஹ்முனோ உபரி நிஸின்னங் ததா²க³தங் தி³ஸ்வா ‘‘அட்டி²வேதீ⁴ அயங் புக்³க³லோ, மயாபெத்த² க³ந்தப்³ப³’’ந்தி அஹோஸி, தஸ்மா அக³மாஸி. ஸேஸானங் க³மனேபி ஏஸேவ நயோ. ஸோ ஹி ப்³ரஹ்மா ததா²க³தஸ்ஸ சேவ ததா²க³தஸாவகானஞ்ச ஆனுபா⁴வங் அதி³ஸ்வா அப⁴ப்³போ³ வினயங் உபக³ந்துங், தேன ஸோ ஸன்னிபாதோ அஹோஸி. தத்த² ததா²க³தஸ்ஸ ஸரீரதோ உக்³க³தஜாலா ஸகலப்³ரஹ்மலோகங் அதிக்கமித்வா அஜடாகாஸே பக்க²ந்தா³, தா ச பன ச²ப்³ப³ண்ணா அஹேஸுங், ததா²க³தஸ்ஸ ஸாவகானங் ஆபா⁴ பகதிவண்ணாவ.
176. Pañcame tejodhātuṃ samāpajjitvāti tejokasiṇaparikammaṃ katvā pādakajjhānato vuṭṭhāya, ‘‘sarīrato jālā nikkhamantū’’ti adhiṭṭhahanto adhiṭṭhānacittānubhāvena sakalasarīrato jālā nikkhamanti, evaṃ tejodhātuṃ samāpanno nāma hoti, tathā samāpajjitvā. Tasmiṃ brahmaloketi kasmā thero tattha agamāsi? Therassa kira tejodhātuṃ samāpajjitvā tassa brahmuno upari nisinnaṃ tathāgataṃ disvā ‘‘aṭṭhivedhī ayaṃ puggalo, mayāpettha gantabba’’nti ahosi, tasmā agamāsi. Sesānaṃ gamanepi eseva nayo. So hi brahmā tathāgatassa ceva tathāgatasāvakānañca ānubhāvaṃ adisvā abhabbo vinayaṃ upagantuṃ, tena so sannipāto ahosi. Tattha tathāgatassa sarīrato uggatajālā sakalabrahmalokaṃ atikkamitvā ajaṭākāse pakkhandā, tā ca pana chabbaṇṇā ahesuṃ, tathāgatassa sāvakānaṃ ābhā pakativaṇṇāva.
பஸ்ஸஸி வீதிவத்தந்தந்தி இமஸ்மிங் ப்³ரஹ்மலோகே அஞ்ஞப்³ரஹ்மஸரீரவிமானாலங்காராதீ³னங் பபா⁴ அதிக்கமமானங் பு³த்³த⁴ஸ்ஸ ப⁴க³வதோ பப⁴ஸ்ஸரங் பப⁴ங் பஸ்ஸஸீதி புச்ச²தி. ந மே, மாரிஸ, ஸா தி³ட்டீ²தி யா மேஸா, ‘‘இதா⁴க³ந்துங் ஸமத்தோ² அஞ்ஞோ ஸமணோ வா ப்³ராஹ்மணோ வா நத்தீ²’’தி புரே தி³ட்டி², நத்தி² மே ஸா. கத²ங் வஜ்ஜந்தி கேன காரணேன வதெ³ய்யங். நிச்சொம்ஹி ஸஸ்ஸதோதி இமஸ்ஸ கிர ப்³ரஹ்முனோ லத்³தி⁴தி³ட்டி² ஸஸ்ஸததி³ட்டி² சாதி த்³வே தி³ட்டி²யோ. தத்ராஸ்ஸ ததா²க³தஞ்சேவ ததா²க³தஸாவகே ச பஸ்ஸதோ லத்³தி⁴தி³ட்டி² பஹீனா. ப⁴க³வா பனெத்த² மஹந்தங் த⁴ம்மதே³ஸனங் தே³ஸேஸி. ப்³ரஹ்மா தே³ஸனாபரியோஸானே ஸோதாபத்திப²லே பதிட்ட²ஹி. இதிஸ்ஸ மக்³கே³ன ஸஸ்ஸததி³ட்டி² பஹீனா, தஸ்மா ஏவமாஹ.
Passasi vītivattantanti imasmiṃ brahmaloke aññabrahmasarīravimānālaṅkārādīnaṃ pabhā atikkamamānaṃ buddhassa bhagavato pabhassaraṃ pabhaṃ passasīti pucchati. Na me, mārisa, sā diṭṭhīti yā mesā, ‘‘idhāgantuṃ samattho añño samaṇo vā brāhmaṇo vā natthī’’ti pure diṭṭhi, natthi me sā. Kathaṃ vajjanti kena kāraṇena vadeyyaṃ. Niccomhi sassatoti imassa kira brahmuno laddhidiṭṭhi sassatadiṭṭhi cāti dve diṭṭhiyo. Tatrāssa tathāgatañceva tathāgatasāvake ca passato laddhidiṭṭhi pahīnā. Bhagavā panettha mahantaṃ dhammadesanaṃ desesi. Brahmā desanāpariyosāne sotāpattiphale patiṭṭhahi. Itissa maggena sassatadiṭṭhi pahīnā, tasmā evamāha.
ப்³ரஹ்மபாரிஸஜ்ஜந்தி ப்³ரஹ்மபாரிசாரிகங். தே²ரானஞ்ஹி ப⁴ண்ட³கா³ஹகத³ஹரா விய ப்³ரஹ்மானம்பி பாரிஸஜ்ஜா ப்³ரஹ்மானோ நாம ஹொந்தி. தேனுபஸங்கமாதி கஸ்மா தே²ரஸ்ஸேவ ஸந்திகங் பேஸேஸி? தே²ரே கிரஸ்ஸ தத்தகேனேவ கதா²ஸல்லாபேன விஸ்ஸாஸோ உத³பாதி³, தஸ்மா தஸ்ஸேவ ஸந்திகங் பேஸேஸி அஞ்ஞேபீதி யதா² தும்ஹே சத்தாரோ ஜனா, கின்னு கோ² ஏவரூபா அஞ்ஞேபி அத்தி², உதா³ஹு தும்ஹே சத்தாரோ ஏவ மஹித்³தி⁴காதி? தேவிஜ்ஜாதி புப்³பே³னிவாஸதி³ப்³ப³சக்கு²ஆஸவக்க²யஸங்கா²தாஹி தீஹி விஜ்ஜாஹி ஸமன்னாக³தா. இத்³தி⁴பத்தாதி இத்³தி⁴வித⁴ஞாணங் பத்தா. சேதோபரியாயகோவிதா³தி பரேஸங் சித்தாசாரே குஸலா. ஏவமெத்த² பஞ்ச அபி⁴ஞ்ஞாபி ஸரூபேன வுத்தா. தி³ப்³ப³ஸோதங் பன தாஸங் வஸேன ஆக³தமேவ ஹோதி. ப³ஹூதி ஏவரூபா ச²ளபி⁴ஞ்ஞா பு³த்³த⁴ஸாவகா ப³ஹூ க³ணனபத²ங் அதிக்கந்தா, ஸகலங் ஜம்பு³தீ³பங் காஸாவபஜ்ஜோதங் கத்வா விசரந்தீதி. பஞ்சமங்.
Brahmapārisajjanti brahmapāricārikaṃ. Therānañhi bhaṇḍagāhakadaharā viya brahmānampi pārisajjā brahmāno nāma honti. Tenupasaṅkamāti kasmā therasseva santikaṃ pesesi? There kirassa tattakeneva kathāsallāpena vissāso udapādi, tasmā tasseva santikaṃ pesesi aññepīti yathā tumhe cattāro janā, kinnu kho evarūpā aññepi atthi, udāhu tumhe cattāro eva mahiddhikāti? Tevijjāti pubbenivāsadibbacakkhuāsavakkhayasaṅkhātāhi tīhi vijjāhi samannāgatā. Iddhipattāti iddhividhañāṇaṃ pattā. Cetopariyāyakovidāti paresaṃ cittācāre kusalā. Evamettha pañca abhiññāpi sarūpena vuttā. Dibbasotaṃ pana tāsaṃ vasena āgatameva hoti. Bahūti evarūpā chaḷabhiññā buddhasāvakā bahū gaṇanapathaṃ atikkantā, sakalaṃ jambudīpaṃ kāsāvapajjotaṃ katvā vicarantīti. Pañcamaṃ.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 5. அஞ்ஞதரப்³ரஹ்மஸுத்தங் • 5. Aññatarabrahmasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 5. அஞ்ஞதரப்³ரஹ்மஸுத்தவண்ணனா • 5. Aññatarabrahmasuttavaṇṇanā
