| Library / Tipiṭaka / তিপিটক • Tipiṭaka / সংযুত্তনিকায (টীকা) • Saṃyuttanikāya (ṭīkā) |
৫. অঞ্ঞতরব্রহ্মসুত্তৰণ্ণনা
5. Aññatarabrahmasuttavaṇṇanā
১৭৬. তেজোকসিণপরিকম্মং কত্ৰাতি ‘‘তেজোকসিণপরিকম্মজ্ঝানং সমাপজ্জিস্সামী’’তি চিত্তুপ্পাদো এৰেত্থ তেজোকসিণপরিকম্মং। ন হি বুদ্ধানং অঞ্ঞেসং ৰিয তত্থ ঝানসমাপজ্জনেন পরিকম্মপপঞ্চো অত্থি সব্বত্থেৰ চিণ্ণৰসীভাৰস্স পরমুক্কংসভাৰপ্পত্তত্তা। তস্স কির ব্রহ্মুনো ‘‘যথাহং এৰং মহানুভাৰো অঞ্ঞো নত্থী’’তি লদ্ধি, যং সন্ধায ৰুত্তং – ‘‘নত্থি সো সমণো ৰা ব্রাহ্মণো ৰা, যো ইধ আগচ্ছেয্যা’’তি। ভগৰা তস্স তং লদ্ধিং ৰিস্সজ্জেতুং তেজোধাতুং সমাপজ্জিত্ৰা তস্স উপরি আকাসে নিসীদি। তেন ৰুত্তং ‘‘তেজোধাতুং…পে॰… তথাগতং দিস্ৰা’’তি। অট্ঠিৰেধং ৰিযং ৰিজ্ঝিতব্বো অট্ঠিৰেধী, যথা অট্ঠিং ৰিজ্ঝিত্ৰা অট্ঠিমিঞ্জং আহচ্চ তিট্ঠতি, এৰং ৰিজ্ঝিতব্বোতি অত্থো। অযং পন অট্ঠিৰেধী ৰিয অট্ঠিৰেধী, যথা সো লদ্ধিং ৰিস্সজ্জেতি, এৰং পটিপজ্জিতব্বোতি অত্থো। সেসানন্তি মহাকস্সপমহাকপ্পিনঅনুরুদ্ধত্থেরানং।
176.Tejokasiṇaparikammaṃkatvāti ‘‘tejokasiṇaparikammajjhānaṃ samāpajjissāmī’’ti cittuppādo evettha tejokasiṇaparikammaṃ. Na hi buddhānaṃ aññesaṃ viya tattha jhānasamāpajjanena parikammapapañco atthi sabbattheva ciṇṇavasībhāvassa paramukkaṃsabhāvappattattā. Tassa kira brahmuno ‘‘yathāhaṃ evaṃ mahānubhāvo añño natthī’’ti laddhi, yaṃ sandhāya vuttaṃ – ‘‘natthi so samaṇo vā brāhmaṇo vā, yo idha āgaccheyyā’’ti. Bhagavā tassa taṃ laddhiṃ vissajjetuṃ tejodhātuṃ samāpajjitvā tassa upari ākāse nisīdi. Tena vuttaṃ ‘‘tejodhātuṃ…pe… tathāgataṃ disvā’’ti. Aṭṭhivedhaṃ viyaṃ vijjhitabbo aṭṭhivedhī, yathā aṭṭhiṃ vijjhitvā aṭṭhimiñjaṃ āhacca tiṭṭhati, evaṃ vijjhitabboti attho. Ayaṃ pana aṭṭhivedhī viya aṭṭhivedhī, yathā so laddhiṃ vissajjeti, evaṃ paṭipajjitabboti attho. Sesānanti mahākassapamahākappinaanuruddhattherānaṃ.
অঞ্ঞব্রহ্মসরীরৰিমানালঙ্কারাদীনং পভাতি ব্রহ্মানং সরীরপ্পভা ৰিমানপ্পভা অলঙ্কারৰত্থাদীনং পভাতি ইমস্মিং ব্রহ্মলোকে ইমা সব্বা পভা অত্তনো পভস্সরভাৰেন অভিভৰন্তং। নত্থি মে সাতি ইদানি মে সা দিট্ঠি নত্থি, ‘‘নত্থি সো সমণো ৰা ব্রাহ্মণো ৰা, যো ইধ আগচ্ছেয্যা’’তি অযং লদ্ধি নত্থি। তেনাহ ‘‘তত্রাস্স…পে॰… পহীনা’’তি। এত্থাতি এতস্মিং সমাগমে। যথা তস্স ব্রহ্মুনো সব্বসো দিট্ঠিগতং ৰিমুচ্চতি ধম্মচক্খু উপ্পজ্জতি, এৰং মহন্তং ধম্মদেসনং দেসেসি।
Aññabrahmasarīravimānālaṅkārādīnaṃ pabhāti brahmānaṃ sarīrappabhā vimānappabhā alaṅkāravatthādīnaṃ pabhāti imasmiṃ brahmaloke imā sabbā pabhā attano pabhassarabhāvena abhibhavantaṃ. Natthi me sāti idāni me sā diṭṭhi natthi, ‘‘natthi so samaṇo vā brāhmaṇo vā, yo idha āgaccheyyā’’ti ayaṃ laddhi natthi. Tenāha ‘‘tatrāssa…pe… pahīnā’’ti. Etthāti etasmiṃ samāgame. Yathā tassa brahmuno sabbaso diṭṭhigataṃ vimuccati dhammacakkhu uppajjati, evaṃ mahantaṃ dhammadesanaṃ desesi.
‘‘অজ্জাপি তে, আৰুসো’’তিআদিনা ৰুত্তেন তত্তকেনেৰ। সরূপেন ৰুত্তাতি পঠমেন পাদেন চতস্সো, দুতিযেন একন্তি এৰং পঞ্চ অভিঞ্ঞা সরূপেন ৰুত্তা। কস্মা এত্থ দিব্বসোতং নাগতন্তি? আহ ‘‘তাসং ৰসেন আগতমেৰা’’তি। যেন ইমা লোকুত্তরা অভিঞ্ঞা অধিগতা, ন তস্স দিব্বসোতসম্পাদনং ভারিযং পটিপক্খৰিগমেন সুখেনেৰ ইজ্ঝনতো।
‘‘Ajjāpi te, āvuso’’tiādinā vuttena tattakeneva. Sarūpena vuttāti paṭhamena pādena catasso, dutiyena ekanti evaṃ pañca abhiññā sarūpena vuttā. Kasmā ettha dibbasotaṃ nāgatanti? Āha ‘‘tāsaṃ vasena āgatamevā’’ti. Yena imā lokuttarā abhiññā adhigatā, na tassa dibbasotasampādanaṃ bhāriyaṃ paṭipakkhavigamena sukheneva ijjhanato.
অঞ্ঞতরব্রহ্মসুত্তৰণ্ণনা নিট্ঠিতা।
Aññatarabrahmasuttavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / সংযুত্তনিকায • Saṃyuttanikāya / ৫. অঞ্ঞতরব্রহ্মসুত্তং • 5. Aññatarabrahmasuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ৫. অঞ্ঞতরব্রহ্মসুত্তৰণ্ণনা • 5. Aññatarabrahmasuttavaṇṇanā
