| Library / Tipiṭaka / ತಿಪಿಟಕ • Tipiṭaka / ಸಂಯುತ್ತನಿಕಾಯ (ಅಟ್ಠಕಥಾ) • Saṃyuttanikāya (aṭṭhakathā) |
೫. ಅಞ್ಞತರಬ್ರಹ್ಮಸುತ್ತವಣ್ಣನಾ
5. Aññatarabrahmasuttavaṇṇanā
೧೭೬. ಪಞ್ಚಮೇ ತೇಜೋಧಾತುಂ ಸಮಾಪಜ್ಜಿತ್ವಾತಿ ತೇಜೋಕಸಿಣಪರಿಕಮ್ಮಂ ಕತ್ವಾ ಪಾದಕಜ್ಝಾನತೋ ವುಟ್ಠಾಯ, ‘‘ಸರೀರತೋ ಜಾಲಾ ನಿಕ್ಖಮನ್ತೂ’’ತಿ ಅಧಿಟ್ಠಹನ್ತೋ ಅಧಿಟ್ಠಾನಚಿತ್ತಾನುಭಾವೇನ ಸಕಲಸರೀರತೋ ಜಾಲಾ ನಿಕ್ಖಮನ್ತಿ, ಏವಂ ತೇಜೋಧಾತುಂ ಸಮಾಪನ್ನೋ ನಾಮ ಹೋತಿ, ತಥಾ ಸಮಾಪಜ್ಜಿತ್ವಾ। ತಸ್ಮಿಂ ಬ್ರಹ್ಮಲೋಕೇತಿ ಕಸ್ಮಾ ಥೇರೋ ತತ್ಥ ಅಗಮಾಸಿ? ಥೇರಸ್ಸ ಕಿರ ತೇಜೋಧಾತುಂ ಸಮಾಪಜ್ಜಿತ್ವಾ ತಸ್ಸ ಬ್ರಹ್ಮುನೋ ಉಪರಿ ನಿಸಿನ್ನಂ ತಥಾಗತಂ ದಿಸ್ವಾ ‘‘ಅಟ್ಠಿವೇಧೀ ಅಯಂ ಪುಗ್ಗಲೋ, ಮಯಾಪೇತ್ಥ ಗನ್ತಬ್ಬ’’ನ್ತಿ ಅಹೋಸಿ, ತಸ್ಮಾ ಅಗಮಾಸಿ। ಸೇಸಾನಂ ಗಮನೇಪಿ ಏಸೇವ ನಯೋ। ಸೋ ಹಿ ಬ್ರಹ್ಮಾ ತಥಾಗತಸ್ಸ ಚೇವ ತಥಾಗತಸಾವಕಾನಞ್ಚ ಆನುಭಾವಂ ಅದಿಸ್ವಾ ಅಭಬ್ಬೋ ವಿನಯಂ ಉಪಗನ್ತುಂ, ತೇನ ಸೋ ಸನ್ನಿಪಾತೋ ಅಹೋಸಿ। ತತ್ಥ ತಥಾಗತಸ್ಸ ಸರೀರತೋ ಉಗ್ಗತಜಾಲಾ ಸಕಲಬ್ರಹ್ಮಲೋಕಂ ಅತಿಕ್ಕಮಿತ್ವಾ ಅಜಟಾಕಾಸೇ ಪಕ್ಖನ್ದಾ, ತಾ ಚ ಪನ ಛಬ್ಬಣ್ಣಾ ಅಹೇಸುಂ, ತಥಾಗತಸ್ಸ ಸಾವಕಾನಂ ಆಭಾ ಪಕತಿವಣ್ಣಾವ।
176. Pañcame tejodhātuṃ samāpajjitvāti tejokasiṇaparikammaṃ katvā pādakajjhānato vuṭṭhāya, ‘‘sarīrato jālā nikkhamantū’’ti adhiṭṭhahanto adhiṭṭhānacittānubhāvena sakalasarīrato jālā nikkhamanti, evaṃ tejodhātuṃ samāpanno nāma hoti, tathā samāpajjitvā. Tasmiṃ brahmaloketi kasmā thero tattha agamāsi? Therassa kira tejodhātuṃ samāpajjitvā tassa brahmuno upari nisinnaṃ tathāgataṃ disvā ‘‘aṭṭhivedhī ayaṃ puggalo, mayāpettha gantabba’’nti ahosi, tasmā agamāsi. Sesānaṃ gamanepi eseva nayo. So hi brahmā tathāgatassa ceva tathāgatasāvakānañca ānubhāvaṃ adisvā abhabbo vinayaṃ upagantuṃ, tena so sannipāto ahosi. Tattha tathāgatassa sarīrato uggatajālā sakalabrahmalokaṃ atikkamitvā ajaṭākāse pakkhandā, tā ca pana chabbaṇṇā ahesuṃ, tathāgatassa sāvakānaṃ ābhā pakativaṇṇāva.
ಪಸ್ಸಸಿ ವೀತಿವತ್ತನ್ತನ್ತಿ ಇಮಸ್ಮಿಂ ಬ್ರಹ್ಮಲೋಕೇ ಅಞ್ಞಬ್ರಹ್ಮಸರೀರವಿಮಾನಾಲಙ್ಕಾರಾದೀನಂ ಪಭಾ ಅತಿಕ್ಕಮಮಾನಂ ಬುದ್ಧಸ್ಸ ಭಗವತೋ ಪಭಸ್ಸರಂ ಪಭಂ ಪಸ್ಸಸೀತಿ ಪುಚ್ಛತಿ। ನ ಮೇ, ಮಾರಿಸ, ಸಾ ದಿಟ್ಠೀತಿ ಯಾ ಮೇಸಾ, ‘‘ಇಧಾಗನ್ತುಂ ಸಮತ್ಥೋ ಅಞ್ಞೋ ಸಮಣೋ ವಾ ಬ್ರಾಹ್ಮಣೋ ವಾ ನತ್ಥೀ’’ತಿ ಪುರೇ ದಿಟ್ಠಿ, ನತ್ಥಿ ಮೇ ಸಾ। ಕಥಂ ವಜ್ಜನ್ತಿ ಕೇನ ಕಾರಣೇನ ವದೇಯ್ಯಂ। ನಿಚ್ಚೋಮ್ಹಿ ಸಸ್ಸತೋತಿ ಇಮಸ್ಸ ಕಿರ ಬ್ರಹ್ಮುನೋ ಲದ್ಧಿದಿಟ್ಠಿ ಸಸ್ಸತದಿಟ್ಠಿ ಚಾತಿ ದ್ವೇ ದಿಟ್ಠಿಯೋ। ತತ್ರಾಸ್ಸ ತಥಾಗತಞ್ಚೇವ ತಥಾಗತಸಾವಕೇ ಚ ಪಸ್ಸತೋ ಲದ್ಧಿದಿಟ್ಠಿ ಪಹೀನಾ। ಭಗವಾ ಪನೇತ್ಥ ಮಹನ್ತಂ ಧಮ್ಮದೇಸನಂ ದೇಸೇಸಿ। ಬ್ರಹ್ಮಾ ದೇಸನಾಪರಿಯೋಸಾನೇ ಸೋತಾಪತ್ತಿಫಲೇ ಪತಿಟ್ಠಹಿ। ಇತಿಸ್ಸ ಮಗ್ಗೇನ ಸಸ್ಸತದಿಟ್ಠಿ ಪಹೀನಾ, ತಸ್ಮಾ ಏವಮಾಹ।
Passasi vītivattantanti imasmiṃ brahmaloke aññabrahmasarīravimānālaṅkārādīnaṃ pabhā atikkamamānaṃ buddhassa bhagavato pabhassaraṃ pabhaṃ passasīti pucchati. Na me, mārisa, sā diṭṭhīti yā mesā, ‘‘idhāgantuṃ samattho añño samaṇo vā brāhmaṇo vā natthī’’ti pure diṭṭhi, natthi me sā. Kathaṃ vajjanti kena kāraṇena vadeyyaṃ. Niccomhi sassatoti imassa kira brahmuno laddhidiṭṭhi sassatadiṭṭhi cāti dve diṭṭhiyo. Tatrāssa tathāgatañceva tathāgatasāvake ca passato laddhidiṭṭhi pahīnā. Bhagavā panettha mahantaṃ dhammadesanaṃ desesi. Brahmā desanāpariyosāne sotāpattiphale patiṭṭhahi. Itissa maggena sassatadiṭṭhi pahīnā, tasmā evamāha.
ಬ್ರಹ್ಮಪಾರಿಸಜ್ಜನ್ತಿ ಬ್ರಹ್ಮಪಾರಿಚಾರಿಕಂ। ಥೇರಾನಞ್ಹಿ ಭಣ್ಡಗಾಹಕದಹರಾ ವಿಯ ಬ್ರಹ್ಮಾನಮ್ಪಿ ಪಾರಿಸಜ್ಜಾ ಬ್ರಹ್ಮಾನೋ ನಾಮ ಹೋನ್ತಿ। ತೇನುಪಸಙ್ಕಮಾತಿ ಕಸ್ಮಾ ಥೇರಸ್ಸೇವ ಸನ್ತಿಕಂ ಪೇಸೇಸಿ? ಥೇರೇ ಕಿರಸ್ಸ ತತ್ತಕೇನೇವ ಕಥಾಸಲ್ಲಾಪೇನ ವಿಸ್ಸಾಸೋ ಉದಪಾದಿ, ತಸ್ಮಾ ತಸ್ಸೇವ ಸನ್ತಿಕಂ ಪೇಸೇಸಿ ಅಞ್ಞೇಪೀತಿ ಯಥಾ ತುಮ್ಹೇ ಚತ್ತಾರೋ ಜನಾ, ಕಿನ್ನು ಖೋ ಏವರೂಪಾ ಅಞ್ಞೇಪಿ ಅತ್ಥಿ, ಉದಾಹು ತುಮ್ಹೇ ಚತ್ತಾರೋ ಏವ ಮಹಿದ್ಧಿಕಾತಿ? ತೇವಿಜ್ಜಾತಿ ಪುಬ್ಬೇನಿವಾಸದಿಬ್ಬಚಕ್ಖುಆಸವಕ್ಖಯಸಙ್ಖಾತಾಹಿ ತೀಹಿ ವಿಜ್ಜಾಹಿ ಸಮನ್ನಾಗತಾ। ಇದ್ಧಿಪತ್ತಾತಿ ಇದ್ಧಿವಿಧಞಾಣಂ ಪತ್ತಾ। ಚೇತೋಪರಿಯಾಯಕೋವಿದಾತಿ ಪರೇಸಂ ಚಿತ್ತಾಚಾರೇ ಕುಸಲಾ। ಏವಮೇತ್ಥ ಪಞ್ಚ ಅಭಿಞ್ಞಾಪಿ ಸರೂಪೇನ ವುತ್ತಾ। ದಿಬ್ಬಸೋತಂ ಪನ ತಾಸಂ ವಸೇನ ಆಗತಮೇವ ಹೋತಿ। ಬಹೂತಿ ಏವರೂಪಾ ಛಳಭಿಞ್ಞಾ ಬುದ್ಧಸಾವಕಾ ಬಹೂ ಗಣನಪಥಂ ಅತಿಕ್ಕನ್ತಾ, ಸಕಲಂ ಜಮ್ಬುದೀಪಂ ಕಾಸಾವಪಜ್ಜೋತಂ ಕತ್ವಾ ವಿಚರನ್ತೀತಿ। ಪಞ್ಚಮಂ।
Brahmapārisajjanti brahmapāricārikaṃ. Therānañhi bhaṇḍagāhakadaharā viya brahmānampi pārisajjā brahmāno nāma honti. Tenupasaṅkamāti kasmā therasseva santikaṃ pesesi? There kirassa tattakeneva kathāsallāpena vissāso udapādi, tasmā tasseva santikaṃ pesesi aññepīti yathā tumhe cattāro janā, kinnu kho evarūpā aññepi atthi, udāhu tumhe cattāro eva mahiddhikāti? Tevijjāti pubbenivāsadibbacakkhuāsavakkhayasaṅkhātāhi tīhi vijjāhi samannāgatā. Iddhipattāti iddhividhañāṇaṃ pattā. Cetopariyāyakovidāti paresaṃ cittācāre kusalā. Evamettha pañca abhiññāpi sarūpena vuttā. Dibbasotaṃ pana tāsaṃ vasena āgatameva hoti. Bahūti evarūpā chaḷabhiññā buddhasāvakā bahū gaṇanapathaṃ atikkantā, sakalaṃ jambudīpaṃ kāsāvapajjotaṃ katvā vicarantīti. Pañcamaṃ.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಸಂಯುತ್ತನಿಕಾಯ • Saṃyuttanikāya / ೫. ಅಞ್ಞತರಬ್ರಹ್ಮಸುತ್ತಂ • 5. Aññatarabrahmasuttaṃ
ಟೀಕಾ • Tīkā / ಸುತ್ತಪಿಟಕ (ಟೀಕಾ) • Suttapiṭaka (ṭīkā) / ಸಂಯುತ್ತನಿಕಾಯ (ಟೀಕಾ) • Saṃyuttanikāya (ṭīkā) / ೫. ಅಞ್ಞತರಬ್ರಹ್ಮಸುತ್ತವಣ್ಣನಾ • 5. Aññatarabrahmasuttavaṇṇanā
