| Library / Tipiṭaka / তিপিটক • Tipiṭaka / থেরীগাথা-অট্ঠকথা • Therīgāthā-aṭṭhakathā |
৫. পঞ্চকনিপাতো
5. Pañcakanipāto
১. অঞ্ঞতরাথেরীগাথাৰণ্ণনা
1. Aññatarātherīgāthāvaṇṇanā
পঞ্চকনিপাতে পণ্ণৰীসতি ৰস্সানীতিআদিকা অঞ্ঞতরায থেরিযা গাথা। অযম্পি পুরিমবুদ্ধেসু কতাধিকারা তত্থ তত্থ ভৰে ৰিৰট্টূপনিস্সযং কুসলং উপচিনন্তী ইমস্মিং বুদ্ধুপ্পাদে দেৰদহনগরে মহাপজাপতিগোতমিযা ধাতী হুত্ৰা ৰড্ঢেসি। নামগোত্ততো পন অপঞ্ঞাতা অহোসি। সা মহাপজাপতিগোতমিযা পব্বজিতকালে সযম্পি পব্বজিত্ৰা পঞ্চৰীসতি সংৰচ্ছরানি কামরাগেন উপদ্দুতা অচ্ছরাসঙ্ঘাতমত্তম্পি কালং চিত্তেকগ্গতং অলভন্তী বাহা পগ্গয্হ কন্দমানা ধম্মদিন্নাথেরিযা সন্তিকে ধম্মং সুত্ৰা কামেহি ৰিনিৰত্তিতমানসা কম্মট্ঠানং গহেত্ৰা ভাৰনমনুযঞ্জন্তী ন চিরস্সেৰ ছল়ভিঞ্ঞা হুত্ৰা অত্তনো পটিপত্তিং পচ্চৰেক্খিত্ৰা উদানৰসেন –
Pañcakanipāte paṇṇavīsati vassānītiādikā aññatarāya theriyā gāthā. Ayampi purimabuddhesu katādhikārā tattha tattha bhave vivaṭṭūpanissayaṃ kusalaṃ upacinantī imasmiṃ buddhuppāde devadahanagare mahāpajāpatigotamiyā dhātī hutvā vaḍḍhesi. Nāmagottato pana apaññātā ahosi. Sā mahāpajāpatigotamiyā pabbajitakāle sayampi pabbajitvā pañcavīsati saṃvaccharāni kāmarāgena upaddutā accharāsaṅghātamattampi kālaṃ cittekaggataṃ alabhantī bāhā paggayha kandamānā dhammadinnātheriyā santike dhammaṃ sutvā kāmehi vinivattitamānasā kammaṭṭhānaṃ gahetvā bhāvanamanuyañjantī na cirasseva chaḷabhiññā hutvā attano paṭipattiṃ paccavekkhitvā udānavasena –
৬৭.
67.
‘‘পণ্ণৰীসতি ৰস্সানি, যতো পব্বজিতা অহং।
‘‘Paṇṇavīsati vassāni, yato pabbajitā ahaṃ;
নাচ্ছরাসঙ্ঘাতমত্তম্পি, চিত্তস্সূপসমজ্ঝগং॥
Nāccharāsaṅghātamattampi, cittassūpasamajjhagaṃ.
৬৮.
68.
‘‘অলদ্ধা চেতসো সন্তিং, কামরাগেনৰস্সুতা।
‘‘Aladdhā cetaso santiṃ, kāmarāgenavassutā;
বাহা পগ্গয্হ কন্দন্তী, ৰিহারং পাৰিসিং অহং॥
Bāhā paggayha kandantī, vihāraṃ pāvisiṃ ahaṃ.
৬৯.
69.
‘‘সা ভিক্খুনিং উপাগচ্ছিং, যা মে সদ্ধাযিকা অহু।
‘‘Sā bhikkhuniṃ upāgacchiṃ, yā me saddhāyikā ahu;
সা মে ধম্মমদেসেসি, খন্ধাযতনধাতুযো॥
Sā me dhammamadesesi, khandhāyatanadhātuyo.
৭০.
70.
‘‘তস্সা ধম্মং সুণিত্ৰান, একমন্তে উপাৰিসিং।
‘‘Tassā dhammaṃ suṇitvāna, ekamante upāvisiṃ;
পুব্বেনিৰাসং জানামি, দিব্বচক্খু ৰিসোধিতং॥
Pubbenivāsaṃ jānāmi, dibbacakkhu visodhitaṃ.
৭১.
71.
‘‘চেতোপরিচ্চঞাণঞ্চ , সোতধাতু ৰিসোধিতা।
‘‘Cetopariccañāṇañca , sotadhātu visodhitā;
ইদ্ধীপি মে সচ্ছিকতা, পত্তো মে আসৰক্খযো।
Iddhīpi me sacchikatā, patto me āsavakkhayo;
ছল়ভিঞ্ঞা সচ্ছিকতা, কতং বুদ্ধস্স সাসন’’ন্তি॥ –
Chaḷabhiññā sacchikatā, kataṃ buddhassa sāsana’’nti. –
ইমা গাথা অভাসি।
Imā gāthā abhāsi.
তত্থ নাচ্ছরাসঙ্ঘাতমত্তম্পীতি অচ্ছরাঘটিতমত্তম্পি খণং অঙ্গুলিফোটনমত্তম্পি কালন্তি অত্থো। চিত্তস্সূপসমজ্ঝগন্তি চিত্তস্স উপসমং চিত্তেকগ্গং ন অজ্ঝগন্তি যোজনা, ন পটিলভিন্তি অত্থো।
Tattha nāccharāsaṅghātamattampīti accharāghaṭitamattampi khaṇaṃ aṅguliphoṭanamattampi kālanti attho. Cittassūpasamajjhaganti cittassa upasamaṃ cittekaggaṃ na ajjhaganti yojanā, na paṭilabhinti attho.
কামরাগেনৰস্সুতাতি কামগুণসঙ্খাতেসু ৰত্থুকামেসু দল়্হতরাভিনিৰেসিতায বহলেন ছন্দরাগেন তিন্তচিত্তা।
Kāmarāgenavassutāti kāmaguṇasaṅkhātesu vatthukāmesu daḷhatarābhinivesitāya bahalena chandarāgena tintacittā.
ভিক্খুনিন্তি ধম্মদিন্নত্থেরিং সন্ধায ৰদতি।
Bhikkhuninti dhammadinnattheriṃ sandhāya vadati.
চেতোপরিচ্চঞাণঞ্চাতি চেতোপরিযঞাণঞ্চ ৰিসোধিতন্তি সম্বন্ধো, অধিগতন্তি অত্থো। সেসং ৰুত্তনযমেৰ।
Cetopariccañāṇañcāti cetopariyañāṇañca visodhitanti sambandho, adhigatanti attho. Sesaṃ vuttanayameva.
অঞ্ঞতরাথেরীগাথাৰণ্ণনা নিট্ঠিতা।
Aññatarātherīgāthāvaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / থেরীগাথাপাল়ি • Therīgāthāpāḷi / ১. অঞ্ঞতরাথেরীগাথা • 1. Aññatarātherīgāthā
